Yihowwa ‘Kaasemmennexxe Bakkaꞌni Daraarrannoshsha’ Gargaareꞌeen

Matisinna Anikatriini 1979 woggaꞌni Giliyaadiiꞌni eebbisemmeechchi uduma, heddo woggaaꞌa Iraani, Morisheesi, Mayinamaar, Taanzaniya, Yugaandanna Zayeri “kaassemmeen” yookiin dhaabemmeꞌe ergatemmeen. Insaꞌne Giliyaade barantaammaxxa yanna barsiisanji Jaaki Redfordiki insaꞌnee gorsaꞌni insaꞌne heddole “kaasemmaaxxa” “goshemmaaxxa” nna “higgeen kaasemmaaxxa” haasoꞌaaꞌnaa lanqeen. Insaꞌne hinaachcho lanqo meen.

Matisi, taakkaa dhugaa laqqetteki hittate kaddeexxa noꞌaa kuli meen.

Matisi: Anni anki langake buttatike bagedi wodda Poolaande hedhaamman. Isinna Katoliketixxi adde dhariinxa yaane barsiissaꞌneexxa hubateen. Isi kinni duuchchii wodda, “Dhugaa hexxeeki wele bakkaꞌniten!” hiyyaamman. Aninna udumiiꞌni isi hiyyaammaxxi yaane dhugaate kaddeexxa kokennen. Manji laꞌoonfate keꞌeechchi uduma gurguraꞌneeka heddo maxaafuwwa hirennen. Konne maxaafuwwi giddo cuqullitte bifaki Bari Bariinxe Hedhobaa Akeekkaaxxa Dhugaa hiyyaaki maxaafi hedhemman. Konne maxaafiki umi yaadi miꞌlachcho anxa butateemmaxxeꞌe, hirennenxa hashsha yaansise birennen. Gorsunte eettenee dhugaati afemeennexxa egeꞌnennen!

Wocabajje 1972 wogganaaꞌni safennexxi heddo Yhowwaxxe Naqaashexxa borreessiluwwa yaansiseennaxxeꞌe, Maxaafa Qullichchakeꞌni afeennake qortumuwwiꞌaa hiissichcho alfennen. Mitte fiixa hira afeeke kinjiꞌaa hiyyeꞌe afeexxa yaane duuchcha gurguremmake Yesuusi fakkeenniki haasoꞌemmake daddaltichchishsha assee ifi laakkoꞌaannen. Aninna alfennexxa fiixa dhugaa hidhdhatee hiyyennexxi yunversite baratennexxi ciꞌleessa kadateꞌe afeennaka herrega waalennen. (Mat. 13:45, 46) Arfaasa 10, 1972 waggaꞌni cuuphemennen.

Hadi ankinna shiixxooki dayyi anki dhugaa lanqeexxi wogga mitte giddo cuuphemmeen. Hageyya 1973 woggaꞌni aninna woꞌma yannaxxa ergatensha safennen. Gubaꞌe noꞌoxxi giddo hinaaffe affeemmaxxe qajeellisano giddiiꞌni danchanna Yihowwaa yoꞌoshsha eetaammaxxi Anikatriini hiyyendaaxxi dayyo hexxemman. Weli eenennexxi 1975 woggaꞌni buliiteꞌni eꞌyinennen, itti aandaaxxa shoole wogga heꞌnaannaki Isiwiidine, Isitromsundi hinaake danchanna heddi manni dhugaa laqatee hasaꞌneeke mandaraꞌnitemman.

Anikatriini: Anni anki dhugaa barateeki Isikotiholmi yunversitetixxa barachcho bireeshshanden. Ettene yanna ani sase agenjixxe annomman, kaddomaleꞌe isi aneꞌe gubaꞌenna ergatensha adhdhaꞌni meꞌaamman. Ama anxi tennee yaane eetaammabaan, ittan Yihowwaxxi Naqaashe barsiissaꞌneexxi yaane dharaken hitaꞌni addachchiisateꞌe woꞌlaandaamman. Kaddoolenna dandeettebaan, isenna udumiiꞌni cuuphendeen. Tommenna sase woggaꞌni cuuphemennen, 16 woggaꞌni qajeellisanjo kadeꞌe ergatema safennen. Baꞌlisanooletiki gargaarsi haranga hasisaaxxe bakkaꞌni Umewu ergatemennechchi uduma, gargariti hexxeexxe qajeellisanjo kadennen

Matisinna ani buliiteꞌni eꞌyinennechchi uduma, heddi manni dhugaa barataashsha gargaarreennen. Konne manni giddiiꞌni Mayivor hiyyendaaxxi qajeellisanjo kaddeexxi, isipoortetixxa oge waaldeexxi shiixxooxxe dayyo anxixxi jaalo hexxemman. Insaꞌnenna 1984 woggaꞌni Giliyaade yeꞌemmeexxi, Ikuwaador miisoonoota kandeꞌe ergatemmeen.

Miisonummatixxe ergatenshaꞌni “kaasendineexxe bakkaꞌni daraarre” hiyyaꞌneeka gorsa hujeteꞌni hosissineeki hittate?

Matisi: Edo heꞌnennaxxe bakkanaaꞌni wele haarooxxe bakkaꞌni heddole ‘higgeen kaasemmeenneen.’ Kaddomaleꞌe, ifi heeshshi assatike adabinni Yesuusii fakkatati isoꞌni “hidda olte” hedhatee dandeennennexxa yaane duuchcha assineennen. (Qol. 2:6, 7) Fakkennakeꞌe, looliinxi dayyuwwa mitte yaane noꞌo hunjaanne qicinni hujjoꞌaa heqqati irra, insaꞌne mitte yaane baratemee toorinni callinni hunjaꞌneeki mayeete kaddeexxa egeꞌnatee woꞌlaannennen. Hedino insaꞌnexxanna aada egeꞌnatee hansaannan. Yesuusika fakkeenna hordonfaꞌni menennexxe qixxeꞌni, dhaabemmennexxe bakkaꞌni daraarrannoshsha ‘wodiꞌi qarqara kaasemmenneshsha’ noꞌoꞌni fakkaattaamman.—Far. 1:2, 3.

Anikatriini: Mitti kaasemeeki haqichchi nophphateꞌe, arishshotiki ifininna hasisaan. Yihowwa duuchchinii wodda “arishsho” qophpheessaamman. (Far. 84:11) Yihowwa noꞌaa qiiddabaaxxa jaalala affeexxa dayyuwwwa qophpheessati noꞌoo eebbiseꞌeen. Fakkeennakeꞌe, Iraani, Tehraan hiyyendaaxxe bakkaꞌni shiixxooxxe gubaꞌeꞌni heꞌnenna wodda dayyuwwa Maxaafi Qullichchi giddo kulemeeke mannishsha keesumma adhdhatika manfasa leellishshaaꞌnaa uundeennen. Iraani turronnaa hansaannan. Kaddomaleꞌe, mootumma Hageyya 1980 woggaꞌni Yihowwaxxe Naqaashexxa huje kutteen, noꞌonna boga okkonenaaꞌni 48 saate giddo fullannoshsha kulleen. Okkooꞌni Afiriki giddo Zayeri (taꞌa Kongo) hiyyemaake bogaꞌni higgeen dhaabemmennen.

Afiriki giddo dhaabemeennexxa laqennexxa yanna oodheennan. Afiriki gido hedheen hinaꞌneeka bofanna dhukkuba laqeennaxxeꞌe yoꞌoshsha alayyeennan. Kaddomaleꞌe, Afiriki giddo heddo woggaa ergatendeexxi lame jaaluwwa noꞌoxxi iitta hiteen: “Sodaatinoqqe. Afirikiinka boga egendinebaan. Woꞌlaandine uudde, eetinaan! Boga okkoneꞌni hexxeexxi dayyuwwa eebbaxxa jaalala affeexxemman. Matanga jaane wogga uduma mootumma huje noꞌoxxa kutteeꞌnaa Zayeri boganaaꞌni fullaannaxxeꞌe, taꞌa sodaꞌa baxxeeꞌnaa “Yihowwaa Afiriki giddo turrannashsha assi” hiyyaꞌni kadhataannexxa qalli hiyyennexxi ifiꞌninni osoꞌlennen.

Yihwwaa ergatendineexxe tenne wogguwwaꞌni maa eebba alfitinee?

Matisi: Misoonummatixxe ergatenshanaaꞌni kexxeexxa gargariti hexxeexxe gosanaaꞌninna aadanaaꞌni daggeexxe miisoone kaddexxe dayyuwwanni jaaloommeennen. Ittanni dhaabemmennexxe bakkaꞌni heddo manna Maxaafa Qullichcha barsiinsaꞌni gargariti hexxeexxa gammashsho alfineennen. Mitte mitte wodda 20 geyaaka manna basiinsaannan! Afiriki giddo hexxeexxi dayyuwwa affeexxi jaalalanna arjunte haanonna qalbe anxenaaꞌni baꞌi hineeꞌnaanna baxxabaan. Tanzaniya hexxeexxa gubaꞌuwwa doyyatee marreꞌe, giddo gallaannaxxa kaamole mini isaꞌneeki bira urrinseennaxxa yaana dayyuwwa “hunna insaꞌnexxi iimi darre” keesunsati arjunte noꞌaa leellishsheen. (2 Qo. 8:3) Giddiiꞌninni noꞌaa gargariti hexxeemmaxxi yanna raagiinxe yanna hine yeꞌnaannaxxen. Tinni Anikatriininni welti ofolleꞌe barra saꞌissinenne qico haasoonnaannaxxenna Yihowwa noꞌonni welti hedheexxeꞌe isoo galateeffantaannaxxe yannamman.

Anikatriini: Aniꞌaa lumoxxi gammashsho, butta duuchchaꞌni hedheeke dayyuwwixxe oddoꞌni hedhaten. Farsi, Firenchi, Lugandanna Isiwahili hinaaka haarooka laagaduwwa baranteennen. Ittani gammachchiissaaxxa gargariti hexxeexxa aadanna baranteennen. Haarooxxa hordofoole leenjinseennen, dhugaatika jaaluwwa alfineennen, ittan insaꞌnenni “weli abinde” Yihowwaa ergatemmeennen.—Sof. 3:9.

Yihwowa dadeexxe dancha dadaꞌni hexxeexxa manbeꞌa assitaaxxa gargarunte uundeennen. Ergatenshateꞌe mitte bakkanaaꞌni haaroxxe bakkaꞌni dhaabemmanno wodda Yihowwa noꞌoo akeekaꞌneeshsha noꞌoꞌni labbaamman. Isi hunna ifixxenni ijjenda barata dandeennabeꞌnoxxa yaane noꞌaa barsiisseen.

Haꞌnooꞌni hiini hega uushsho geltee? Jabaattine ossitinaashsha gargaarteexxi yaane maachcho?

Matisi: Biiꞌnetike dhukkubinni heddo yanna dhibemmeennen. Ittani Anikatriini heenooxxa wiinansitaaxxa opirasiyoone assendeen. Cimeeke hadi noꞌokixxi yaanenna noꞌoo yaadissaamman. Duuchchinii wodda insaꞌnee karkarsitaꞌneexxa dayyuwwa noꞌoxxa lumminsee galateeffantaannen. Insaꞌnenna hado noꞌoka karkarsinaammaki ossuntetinna gammashshoti, ittan jaalalatiten. (1 Xi. 5:4) Taꞌi qicoꞌni, hado noꞌokee bayya heꞌne assinaannexxe yaane irra heddo yaane assa dandeennannani hinaꞌni qajellichcha kadebaake yaadinni mitte mitte yanna rakkantaannen.

Anikatriini: Zayeri 1983 woggaꞌni ergatemmaanna wodda heddole koleeriinke dhukkubinni abidemeennen. Cileessichchi Matisii “Konne boganaaꞌni techchonni isee adhdhite meꞌi!” hiyyeemman. Langa baro Isiwidinaa meꞌaꞌneeke miya calla feꞌaꞌneeke rophphiyyaꞌni menennen.

Matisi: Eettene yanna konneechchi uduma misoonoota kandeꞌe ergatemmabeꞌnoꞌni hine hendeennaxxeꞌe, hiiqqinse ooꞌnennen. Cileessichchi Anikatriini fayyitabaan hiyyoolenna ise kinni fayyiteen. Okkooꞌni mitte wogga uduma Zayeriꞌaanni hingennen. Ergatemmaannakinna Lubumbaashi hiyyendaaxxe bakkaꞌni, Isiwahilike laagadinni akeekendaꞌneexxe shiixxoxxe guabaꞌeꞌniten.

Anikatriini: Lubumbaashi heꞌnennaxxa yanna gufatennen. Oose ilatika herrega afanna gonphonnole, godoba afeennaxxi anno rerteexxeꞌe yoꞌoshsha yaandeennan. Eettenee yaaddotixxa yaana heqqinebeꞌnoxxa uwwa Yihowwanaaꞌni alfineennen. Edi irra heddi manni Maxaafa Qullichcha barata safeen. Mitte wogga geltabaaxxe yanna giddo baꞌlisanooletiki laakkoosi 35 kenaaꞌni 70 baa nophpheen. Gubaꞌe dagaammake manni laakkossinna 40 kenaaꞌni 220 baa lebeen. Ergatenshatixxe hujenni yoꞌoshsha abidemmeennan, Yihowwa woꞌlaancho noꞌoxxa eebbiseemmaxxeꞌe qalbe anxi gammaddeen. Taꞌanna baxxeexxa anno noꞌoxxa hendaannen, ittan haasoonnaannen. Yihowwa qalbe noꞌoxxa woꞌma kadee garinni fayyisaaxxa yanna halchati heqqeꞌnaannen.

Matisi: Anikatriini adde woxxeemmaxxinna gophpheemmaxxi yaana hexxemman. Eettene yannaꞌninni ani jabake kanseretike dhukkubinni abidemennen, ittan jabaxxa opirasiyoone assedha hasisseemman. Taꞌa ani jabaken, Anikatrininna dandeetteexxa yaane duuchcha assitaꞌneen

Rakko geltaꞌneeki noꞌo callaꞌnite kaddeebaaxxa egenneennen. Ruwaandi giddo sanne balleessatiki bagedi 1994 woggaꞌni keꞌeechchi uduma, kaanpe giddo hexxeexxa heddo jaaluwwa noꞌoxxa marreꞌe uundeennen. Insaꞌnexxi adde, jabeeninna jijjiirendabaaxxi arjunte insaꞌnexxi, Yihowwa feedheexxe rakko giddo arda isika gargaaraaxxa hunna afeeke Mageno kadeexxa egennannoshsha assiteen.—Far. 55:22.

Anikatriini: Wele rakko noꞌoꞌni gelteeki 2007 woggaꞌni Yugaandixxa dame beero eebbisateꞌe menaannaxxe yannan. Prograami mudeechchi uduma 25 gennannoki misoonootinna Beetelooti Keeniya, Nayiroobi menaannan. Keniyiinxa gabala gennebeꞌno edi darre, mitte limoxxi kaamole ora noꞌokeꞌni eꞌyiteexxi noꞌo heꞌnennaxxa kaamole gandeen. Oofallinna onde jaaluwwa noꞌoxxi hirbangeꞌni renneen, mitte dayyo kinni rerteeki hosipitaala gelteechchi uduman. Jaaluwwa noꞌoxxa higgeeni uudateꞌe halchati heqqeꞌnaannen!—Iyo. 14:13-15.

Aninna miidhemonnolenna udumiiꞌni fayyeennen. Aninna Matisi ittan welinna gelteexxe balanaaꞌni kexxeexxa sammotika nageneꞌa gonpheennen. Ani kinni itti yaane sammotibaa hasha daggaammaxxeꞌe, onnatixxe dhibo fakkaattaaꞌnaa diiphokenaaꞌni keꞌaannan. Anee iitta assitaammaxxi sodaꞌatemman. Kadhanna mitte mitte eenaannexxa xiqsuwwa yaansinsaꞌni heda noꞌoo gargaarteꞌeen. Eloxxa oge affeexxe ciꞌleeyyenaaꞌni laꞌo alfineennen. Taꞌa edishsha sodaantaabeꞌnon. Noꞌoꞌni gelteexxixxi rakko gelteexxa dayyuwwa jajjabeesinannoshsha Yihowwa noꞌoo gargaaroꞌaa kadhantennen.

Rakko haꞌnooꞌni gelteeꞌnaa ossitinaamma wodda Yihowwa noꞌoo “quuphphiinsha karkarseen” hitineen. Iitta hiyyo maa hiyyote?

Matisi: Isiwahilike laagadinni manji “Quuphphiinsha karkarsemmennen” hiyyaan. Mitti manji iinqaki quuphphi reyabaashsha xexxeꞌate abidammashsha Yihowwanna dhaabemmennexxe bakka duuchchaꞌni noꞌoo mararteti karkarseen. Noꞌo hasissaaxxa yaane gonphe egenneeꞌnon, matanga hasissaaxxi iimi darre hexxeexxa yaane anfeennan. Yihowwaxxa jaalalanna isika gargaarsa uundenneki mitti ori, Iimiki Bisi noꞌaa hedaꞌneexxa leellisheeke oranaaꞌniten.

Anikatriini: Yihowwa noꞌoo mararteti kiphpheexxa leellishaaka mitte fakkeenna haasoꞌonnaa hasaannen. Mitte barra Isiwiidine hedheeki anni anki jaba qicinni dhibemeꞌe hosipitaala hedheexxa bilbille aneꞌni kulleen. Ettene yanna Matisi biiꞌnetixxe dhibonaaꞌni fowwi hiyyeeki reefinde kaddemmaxxeꞌe, rophphiyiinxa tiikkeette wonxannoka maallaqa anfeennabaan. Kaamole anfeennaxxa gurgurateꞌe mudhdhineennan. Ookkone hirbaꞌninni lame bakkanaaꞌni bilbila bilbilleen, mitte bilbila bilbilleemmaki heꞌnenneka jeeja lanqeꞌe mitte tiikkeetteka maallaqa noꞌaa kaffalatee hasaammake arenna aroꞌon. Wele bilbila bilbildeemmaxxi kinni “Rakko Geltaake Manjiꞌaa” hitaꞌni maallaqa saaxine giddo candaammaxxe mitte cindeexxe dayyomman. Heenooke daqiiquwwi giddo Yihowwa hasissaaxxa yaane alfinannoshsha gargaareen!—Ibr. 13:6.

Woꞌma yannaxxe ergatenshaꞌni saꞌissitineexxe 50 wogganaaꞌni caaldaaxxa yanna heddinaa wodda maachcho barattinee?

Anikatriini: Jabeenni noꞌoki ‘raankinebeꞌnongi addate hedhat, worbooleeyye kandeennexxa leellishate’ kaddeexxa barateennen. Yihowwaꞌni addantanno wodda isi noꞌaa hiyye lolaan. (Isa. 30:15; 2 Ze. 20:15, 17) Noꞌaa uwwendeexxe huje duuchchaꞌni anfenneexxe dandeette duuchchinni Yihowwaa ergatemati, wele orinni alfinannoxxe eebbanaaꞌni caaldeexxa eebba alfineennen.

Matisi: Hedho anxeꞌni barateennexxi taakkaxxi yaane duuchchiinge jeeji giddo Yihowwaꞌni addatatenna isi aniꞌaa hiyyeꞌe tarkaaffe adhdhaaki hittate kaddeexxa uudaten. (Far. 37:5) Isi haanonna kako aageexxa yaane muuxebaaki gate egeꞌnebaan. Taꞌanna Mayinamaare, Beetele ergatemmaꞌni tinni yaane dhugaate kaddeexxa uudateꞌni heꞌnennen.

Ergatenshatixxa huje baꞌlisatee hassaꞌneexxi dargaggeeyye, Yihowwa noꞌaa leellisheexxixxa addatendeexxa jaalala uundaaxxa addantaannen. Insaꞌne kaasemmeexxe bakkaꞌni woꞌma kadee garinni daraarraashsha, Yihowwa gargaaroꞌaa fedhiitike kandoole tenne yaane uundaaxxa mammaabeꞌnon