Yaansisalluwwiinka Qurtumuwwa

Yihowwa shiqixxe yannaꞌni mootooleeyyetixxe qalbeꞌni uggaꞌneeki “yaadi” maachcho?

Lumoke abarika safo uuddaaxxa Leellisha Yohaannisixxa 17:16, 17 iitta hiyyaan: “Uddetteki tommi gaafinna biniinchi, yabaabulto manjichcho ginbaan, ittan deessinaan, duwwi gatinsaan, maala isekanna indaan, hexxeeshshanni giirateꞌni gunbaan. Mageni isi haasoꞌeexxi yaane muuxendaa qicoꞌni, yaada isika bakka geesinsaashsha, eeti, mootumma insaꞌnexxa biniinchakee uwwati mitte kadeeka yaada insaꞌneka muunxaashsha tenne yaane qalbe insaꞌnexxeꞌni uggeen.” Konneechchi edo fuldeexxi borreessiluwwa noꞌoxxi, Yihowwa mootooleeyyetixxe qalbe giddo uggaꞌneeki mitti ‘yaadi’ dhariinxa adde balleessatike kadeexxa haasoottaan.

Kaddomaleꞌe, barachcho tennee toggi assa hasisseꞌeen. Yihowwa mootooleeyyetixxe qalbe giddo “yaada” uggaꞌneeki “mootumma insaꞌnexxa biniinchakee” uunaashshaten. Tinni yaane muuxendaa qico egeꞌnateꞌe buttiiꞌni hedheeka qortumuwwa uudde.

Tinbiite haasoꞌendeeki ayyiꞌaate? “Yabaabulto manjichcho” “Lumoxxe Babilooni” hiyyendenna yeꞌendeen; isenna butta duuchchixxa dhariinxe addexxa galcha tukkeessitaan. “Haranga diimooki biniinchi” Mittoondeexxa Mootummuwwa tukkeessaan. Tinni organna saffeeki 1919 keꞌni, butta duuchchaꞌni nageꞌa idagateetemman, okkone wodda tinni orga Liigi ov Neeshin (Kakotike Maabara) hiyyendaamman. (Lel. 17:3-5) “Tommi gaafuwwi” kinni biniincha konnee kiphphaaxxa duuchchiinxa mootumuwwa tokkeessaan.

Yabaabulto manjichchonna haranga diimooki biniinchi maa firunte anfee? Yabaabulto manjichcho biniinchakeꞌni “hana ofoldeen,” iitta assitaꞌneeki isoo kiphphaꞌninna ise hassaꞌneexxa yaane muuxaashsha assatiten.

Yabaabulto manjichcho maa kadda? Biniinchinna isoo kiphaꞌneeki tommi gaafuwwi “yabaabulto manjichcho ginbaan.” Isee jibbinaammaxxeꞌe, karra isexxa saammaan, ittan fuggoxxa huje isexxa baꞌlinna fulchinaan. Ittan isee hexxemmashsha balleessineexxi Yihowwa iseꞌni murteesseexxa murte muunxaan. (Lel. 17:1; 18:8) Iitti yanna dhariinxi adde duuchchi baxxaaxxe yanna kaddaan. Kaddomaleꞌe, tinni yaane kaddebaa edi darre, Yihowwa, mootooleeyye konneechchi edo kadde egendebaaxxa yaane assitaashsha assaan.

Yihowwa mootooleeyye maa assitaashsha assa? Yihowwa tomme gaafuwwixxe qalbeꞌni “yaada isika” uggaan, iittanna assaꞌneki insaꞌne haranga diimooke biniinchiꞌa yookiini Mittoondeexxa Mootummuwwaꞌa, mootumma insaꞌnexxa uunaashaten. (Lel. 17:13) Tinni maa hiyyote kaddeexxa hedde. Mootooleeyye hunnanna baalle isexxa biniinchakeꞌe uutaꞌneeki ifiꞌaani uwwa hasseetee? Waawwot! Insaꞌne iitta hexxeexxa murte murteesseꞌnaashsha assaꞌneeki Magenoke kadeexxa tinbiite haasoottaan. (Fak. 21:1; Isayaasi 44:28 welti hokkokisiis.) Insaꞌne mootumma insaꞌnexxa biniinchakeꞌe uunaꞌneeki laanikitee? Waawwot! Insaꞌne uunaꞌneeki keekkantebaangi dedhangeꞌniten. Haarooxxa hunna alfeeki biniinchi dhariinxe addexxa orga langaxxa higgabaa qicoꞌni balleessati, Yihowwaxxi murte muuxendaashsha assaan.

Ediꞌaa heqqinaannexxi yaane maachchota? Mootooleeyye, laanginni Mittoondeexxa Mootumuwwa kiphphaꞌni meꞌitaꞌneen hitaaxxa rippoorte heqqa hasissabaan. Heqqinannoxxi yaane: Yihowwa, mootooleeyye heddebaangi hunna insaꞌneexxa biniinchakeꞌe uutaashsha assaaxxe yannan. Tinni yaane kaddaa wodda lumoki abari safoꞌaate kaddeexxa egennannon. Tinni yaane kaddaꞌneeki shiqonni!, keekkantebeꞌnongite kaddemmaxxeꞌe, okkone qicoꞌni “dammanqe heꞌno, qalbeeffachchotika irra noꞌoka heqqeꞌno”—1 Te. 5:6.