Tasfakeꞌn Gammadde Maleꞌe Yaaddinoqqe

1. Abirhaamiki tasfi muuxemaakeni hinaanneki mayeete?

YIHOWWA jaalo isikeꞌe Abirhaamiꞌa buttateꞌn hexxeexxi duuchchiniinxi gosa sanne isixxen eebbisendaaxxa kako aageemman. (Dada. 15:5; 22:18) Buutotinna Abirhaami Mageni kako aageexxi yaane muuxendaaxxa jabaxxa adde afeemman. Abirhaami 100, isixxi miniinxi ama 90 wogga kaddoolenna kunni addateemeeki manni belto illeemabaan. (Dada. 21:1-7) Maxaafi Qullichchi iitta hiyyaan: “Tasfiinxe hundaayyeꞌn [Abirhaami] heddo gosake anna kaddatton hiyyemeeke yaadaꞌn addataamman.” (Roome 4:18) Tasfi Abirhaamiꞌa uwwemeeki muuxemeexxa atinna egendeetten. Isinna qeerraaxxe yannaꞌa heqqedhaꞌn tureemmake Yisihaaqike anna kadeen. Abirhaami uwwemeeka tasfa addet heqqedhaashsha assiteexxi yaane maachcho?

2. Abrihaami Yihowwa kako aageexxi yaane muuxendaaxxa addataammaki mayeete?

² Abirhaami Yihowwan jabaxxa firunte afeemmaxxeꞌe “Mageni kako aageexxi yaane duuchchiniinxi” muuxendaaxxa addataamman. (Roome 4:21) Abirhaami Yihowwaꞌn addataammaxxeꞌe isi edo eeyyema ittan qullichchake hiyyeme yeꞌema dandeꞌeen. (Yaꞌiqo. 2:23) Roome 4:18 keꞌn Abirhaamixxi addenna tasfi weli abidemeexxa ifisendeꞌeen. Roome 5 keꞌn Phawuloosi tasfa uuddaaxxa maa hiyye borreesseexxa uundo.

3. Phawuloosi tasfa uuddaaxxa ifiseexxi yaane maachcho?

³ Phawuloosi “tasfi noꞌoki muuxemebaaki gateꞌe noꞌoꞌo yaaddoteꞌn geesisabaaxxa” addantaanneki mayeete kaddeexxa ifiseen. (Roome 5:5) Ittan noꞌoki Kirsitaaniinki tasfi hitta jabaataꞌn meꞌaaxxa egenannoshsha gargaaraan. Roome 5:1-5 qicoꞌn hedheeke yaadaꞌn mariꞌe assinanno wodda ediꞌa affeeteki tasfi jabaataꞌn meꞌaaki hittate kadeexxa hedateꞌe woꞌlaan. Tinni assinaannexxi mariꞌe, tasfa taꞌixxe yannaꞌn haranga jabeessedha dandeenannoki hittate kaddeexxa ifissaan. Phawuloosi muuxemebaangi gate yaadisabaan hiyyeeka tasfa uundo.

ULFAATEEKA NOꞌOKA TASFA

4. Roome 5:1, 2 keꞌn hedheeki yaadi maachcho ifisa?

⁴ Roome 5:1, 2 yaansis. Phawuloosi tenne hiyya borreesseeki Roomeke bogaꞌn afendaaxxe gubaꞌaatemman. Konne bogaꞌn hedhemmaki dayyuwinna dayyuwwa, Yihowwanna Yesuusi uuddaaxxa barante, adde anfeexxa leellishatenaaꞌn kexxeexxa Kirsitaana kandeemman. Tenneꞌa Mageni insaꞌneꞌe addetixxe sultonni qulliyye hiyye yeꞌeen ittan manfasi qullichchiki hariireen. Insaꞌnenna haranga hasisaakanna manbeꞌa assaaka tasfa alfineen.

5. Manfasiki hariiremeeke manniki tasfi maachcho?

⁵ Phawuloosi udumiiꞌn Effesooni hedhemmake manfasiki hariiremeemmake Kirsitaaniꞌa, insaꞌne yeꞌemmeeka tasfa uuddaaxxa borreesseemman. Kunni tasfinna “qulliyye dhaaldaaka tasfa” adhdha uuddaaxxen. (Efe. 1:18) Ittan Qolaasiyaasike bogaꞌn hedhemmake Kirsitaaniꞌa tasfi insaꞌneki dhugaandini muuxemaake kadeexxa ifiseꞌeen. Isinna konne tasfa “iimateꞌn haꞌnoꞌo heqqaꞌneeke tasfanaaꞌn kexxeexxeniten” hiyyeen. (Qola. 1:4, 5) Hariiremeeke Kirsitaaniki tasfi reyotenaaꞌn keꞌne iimateꞌn baro baro hedhanna Kirsitoosin welt galchaten.—1 Tese. 4:13-17; Leellisha. 20:6.

6. Mitti manfasiki hariiremeeki dayyi tasfa uuddaaxxa maa hiyye?

⁶ Hariiremeeki Kirsitaani konne tasfa lummisee uudaꞌneen. Hariremeeke Kirsitaani giddiiꞌn mitti dayyi Fireedirik Firaanzik qalbetenaaꞌn iitta hiyyeen: “Tasfi kunni noꞌoki dhugaandini muuxemaaken, isinna noꞌo hendaane irrancaala hedheeke orinni shiixxooxxe goodhenaaꞌn kadeeke 144,000 xxe unaaꞌa, duuchchiningeꞌe woꞌma kadeeke orini muuxemaan.” Qeerraaxxe yannaꞌa Magenokeꞌe addatemeꞌe ergatemaꞌn tureeki Dayyi Firaanzi 1991 woggaꞌn iitta hiyye kokeesseen: “Noꞌo anfeenneki tasfi hitteꞌe qico laꞌo afeeke kadeexxa haanonna deenaaꞌnon. . . . Qeerraaxxe yannaꞌa konne tasfa heqqedhanna hasissoole jajino isiꞌa anfeennexxi xeꞌyitabaan. Konne garini mitte Miiliyoone geltaaxxe yannaꞌa heqqeꞌnonolenna koꞌwinabeꞌnon. Edi irra tasfi noꞌoki hitte qico laꞌo afeeke kadeexxa hubateennen.”

7-8. Heddi manni maa tasfa afee? (Roome 8:20, 21)

⁷ Taꞌixxe yannaꞌn Yihowwaꞌa mageneefataꞌneeki manni gargarit hedheeke tasfa afeen. kunni tasfi Abirhaami Mageniinxe Mootummaxxe galcha hunda baro baro buttateꞌn hedhaashsha uwwemeemmakiken. (Ibra. 11:8-10, 13) Phawuloosi konne tasfa heqqedha maa laꞌo affeexxa tasfi uwwemeeke manniꞌa borreesseen. (Roome 8:20, 21 yaansis.) Taakkaxxe yannaꞌa Maxaafi Qullichchi ediꞌa hexxeexxa yanna uuddaaxxa haasoꞌaꞌneeka tasfa barattete wodda, ateꞌe haranga eeyyisseexxi yaane maachcho? Ediꞌa qullichcha kaddattoxxa egeꞌnatemma? Moo eetaatteki manji reyotenaaꞌn keꞌe gennete kaddaaxxe buttaꞌn haarooba hedhaaxxa egeꞌnate? Tinninna ediꞌa hexxeexxa yanna “tasfiniinxe hundaayyeshshan” heqqexxatoshsha assitaan.

⁸ Bari bariniinxa hedho alfinaanneki iimateꞌninna kaddo buttateꞌn gammandanoshsha assaaka ulfiniinka tasfa anfeennen. Kunni gammachchiisaaki tasfi ediꞌaan jabaataꞌn meꞌaan. Phawuloosi itti aana borreesseeki yaadi tasfi noꞌoki jabaataꞌn meꞌaaki hittate kadeexxa ifisaan. Meen, tasfa noꞌoka uuddaaxxa borreesseexxa yaane uundo. Iitta assinaannexxe kaddoole tasfakeꞌn anfeennexxi adde nophphitaꞌn meꞌitaa maleꞌe buttaꞌa higgabaan.

TASFI NOꞌOKI MUUXEMAAKE KADEEXXA ADDANTANNOKI HITTATE?

9-10. Phawuloosike fakkeennishshani Kirsitaanekeꞌn maachchi geyaaxxa heqqedhiyyo hasissaꞌne? (Roome 5:3.) (Fakke uudi.)

⁹ Roome 5:3, 4 yaansis. Abari noꞌoꞌn geyaaki, tasfi noꞌoki jabaataashsha assa dandeꞌaaxxa qalbeefat. Kunni yaadi dedha mekki assaake kada dandeꞌaan. Dhugaatishsha hexxoole, duuchchiniinxe Kirsitoosixxe hordofooleyyeꞌn rakko geltaaxxi egeꞌnendeexxen. Phawuloosika fakkeenna hedde. Isinna Teselonqe hedhemmake Kirsitaaniꞌa: “Haꞌnooni heꞌnennaxxa yanna rakko noꞌoꞌn geya gattabaaxxa edinseen kullaannan, egendinemmashshani tinni yaanenna gelteꞌeen.” (1 Tese. 3:4) Ittan Qorontoosike bogaꞌn hedhemmake manniꞌa iitta hiyye borreesseen: “Dayyuwwaa, noꞌoꞌn gelteexxa rakko egendinoꞌa hansaanen . . . Hunna noꞌoxxi iimi darre hexxeexxi jabaxxi rakko noꞌoꞌn gelteemmaxxeꞌe hedhot gata noꞌoxxi mansiisseemman.”—2 Qoro. 1:8; 11:23-27.

¹⁰ Telchixxe yannaꞌn Kirsitaana kandeenneke duuchchaꞌn gargarit hedheeki abari geyaaxxa egeneennen. (2 Ximo. 3:12) Ateꞌn maa fakkaataꞌne? Kirsitoosiꞌn addate isoꞌo hordoffetexxeꞌe rakko ateꞌn geltaꞌnee? Jaaluwwinna hadi ateꞌe dedha coora yookiin jibba dandeꞌaan. Duuchchiniinxe yaaneꞌn addatandeeteke kadateꞌe assexxeettexxi murte hujetixxe bakkaꞌn ateꞌn rakko geltaashsha assitaꞌnee? (Ibra. 13:18) Tasfa noꞌoꞌa uwwemeeka welekeꞌe kulatenaaꞌn kexxeexxa mootummatenaaꞌn moronsha ateꞌn geltaꞌne? Huuni abarinna noꞌoꞌni geyaꞌnoole gammadiyyo hasissaaxxa Phawuloosi haasoꞌeen. Mayee?

11. Heene rakkoꞌninna jabaatiyyo hasissaꞌneeki mayeete?

¹¹ Abari noꞌoꞌn geya wodda gammando. Mayee? Buutotinna eloxxa gumma afeemmaxxe. Roome 5:3 keꞌn hiyyaꞌneeshshani abari “ossunte alfinannoshsha assaaxxa egenneenen.” Duuchchiniinge Kirsitaanaꞌn abari geyaan, tenneꞌaa duuchchiniing Kirsitaani jabeenna yookiin ossunte afiyyo hasissaan. Hiini rakkonna geltoole jabeenniki rakko saꞌateꞌe murteessedha hasissaan. Tasfi noꞌoki muuxemeeꞌnaꞌa uuda dandeenannoki iitta assinonole callan. Yesuusi rassateꞌn ibbeexxe gummani fakkeesseemake mannishsha kandonaaꞌa hansabeꞌnon. Insaꞌnenna qaale gammashshoti adhdhineen, kaddomaleꞌe, “abari yookiin shorrichchi” geyeexxa yanna guggufanteen. (Matwo. 13:5, 6, 20, 21) Moronsha yookiin rakko shollaxxenna gammachchiissaaxxe yaane kaddebaaxxi egeꞌnendeexxen, kaddomaleꞌe, rakkoteꞌn ossinaannexxe kaddoole tennete hinabeꞌnoxxa eebba alfinannon. Hoone orini?

12. Rakkoteꞌn jabaantonnole laꞌo alfinannoki hittate?

¹² Yaꞌiqoobi rakkoteꞌn jabaantonole alfinannoxxa laꞌo ifiseen. Isinna “hiini yaanenna xeꞌitabaake woꞌma kaddinaashshanna xure afinebaake kaddinaashsha jabeenni huje woꞌma kadeeke orinni muuxowwaal” hiyye borreesseen. (Yaꞌiqo. 1:2-4) Tenne bakkaꞌn Yaꞌiqoobi jabeenni huje afeexxa ifiseen. Jabeenni hujaꞌneexxi huje maachcho? Isinna; ossunte, addenna Magenokeꞌn addatatika adabuwwa nosseꞌnannoshsha gargaara dandeꞌaan. Ittan rakkoteꞌn jabaatatenaaꞌn wele gargarit hexxeexxa laꞌo affeexxa yaane alfa dandenannon.

13-14. Jabaante ossinaannexxe kaddoole maa alfinanno? Tinni yaane tasfiki shiqqaaki hittate? (Roome 5:4)

¹³ Roome 5:4 yaansis. Phawuloosi jabeenni Mageni edo adhdhensha alfinannoshsha assaaxxa haasoꞌeen. Atiki jabeenni Mageni edo adhdhensha alfitattoshsha assaan. Iitta hiyyo kinni rakko yookiin abari ateꞌn geya Yihowwaꞌa gammachchiissaan hiyyotebaan. Mageni gammadaꞌneeki ateꞌniten. Jabeenni atiki Mageni ateꞌn gammadaashsha buutote kadaan. Tinni hittatta gammachchiissaaxxe eebba!—Faaro. 5:12.

¹⁴ Abirhaami hega uushshoteꞌn jabaate ossatenaaꞌn kexxeexxa Mageni isoꞌn gammadeexxa qalli hiyye. Yihowwa isoꞌo uudammaki jaaliinshanna qullichchiishshaten. (Dada. 15:6; Roome 4:13, 22) Noꞌonna iittani uudaꞌneexxa addata dandeenannon. Mageni edo eeyyemmaanneki ergachchoteꞌn assinaannexxe hujexxe birasaꞌnen yookiin anfeennexxe baallennitebaan. Isi noꞌoꞌo eeyyaꞌneeki isiꞌa addatemme ossinonnoleten. Wogga noꞌoxxi, heꞌnenneki jeeji ittan dandeette noꞌoxxi heenetenna kaddoole duuchchining jabaata yookiin ossa dandeenannon. Taꞌixxe yannaꞌn rakko ateꞌn gelteeꞌnaꞌa addatende ossateꞌn hexxette? Iittate kaddoole Yihowwaꞌa gammachchiisateꞌn hexxettexxa qalli hiyyi. Mageni edo eeyyensha alfa noꞌoꞌa eloxxa laꞌo affeen. Tinninna tasfi noꞌoki jabaataashsha assitaan.

JABAKA TASFA

15. Phawuloosi weli keꞌisseeki yaadi hoonte? Tinni yaane mitte mitte manna mekki assitaꞌneeki mayeete kada dandeetta?

¹⁵ Phawuloosi hiyyeeshshan, rakko noꞌoꞌn geltaa wodda jabeenniki ossati Yihowwa edo eeyyemmannon. Isi hitta hiyye haasoꞌa sufeexxa hubat: “Adhdhensha alfa kinni tasfa badhaassaan, tasfinna muuxemebaangi gateꞌe yaandannoshsha assabaan.” (Roome 5:4, 5) Tinninna mitte mitte manjoꞌn mekki assitaaxxe yaane fakkaataan. Mayee? Buutotinna Phawuloosi edise Roome 5:2 keꞌn Roome hedhemmaki Kirsitaani Tasfa afeexxa kunninna “Mageniinka ulfinna alfatika tasfa” anfeexxa borreesseemman. Tennenaaꞌn kexxeexxa, mitti mitti manni iitta hiyye qoraan, kunni Kirsitaani tasfa afeexxe kaddoole Phawuloosi isoon higgeen diideesseeki mayeete?

16. Mitte manjiki tasfi jabaata meꞌaaki hittate? (Fakke uud.)

¹⁶ Tasfi noꞌoki jabaataꞌn meꞌaaxxe yaane kadeexxa heda, Phawuloosi iitta hiyya dandeꞌeeki mayeete kadeexxa egeꞌna dandeenannon. Fakkeennakeꞌe, taakkaxxa yanna Qaale Mageniinxenaaꞌn laqqeetaka gammachchiisaaka tasfa qalli hitaatte? Butta gennete kaddeeꞌnaꞌa baro baro hedha dandeennaaxxa haasoꞌaaka yaada dedha tinni yaane dhugaanidini muuxendaaxxa mandattoxxina hexxaan. Kaddomaleꞌe, Yihowwaanna Maxaafi Qullichchi giddo hedheeka tasfa adda egendettexxe qixxeꞌn kunni tasfi dhugaandini muuxemaake kadeexxa kokkatton.

17. Magenokeꞌe ifi mudhdhite cuuphendetechchi udumanna tasfi jabaata ittini ediꞌa sufaaki hittate?

¹⁷ Ifi Magenokeꞌe mudhdhite cuuphendetechchi uduma, caaldeexxa barachcho alfite manfasiki galfattatto wodda tasfi atiki jabaataꞌn meꞌaan. (Ibra. 5:13–6:1) Roome 5:2-4 qicoꞌn borreessemeeki yaadi dhugaatike kadeexxa hedho atixxeꞌn uuddatton. Gargariti hedheeki abari ateꞌn geyaaꞌnaan jabeenniki ossitaattole, Mageni ateꞌn gammadaan. Isi ateꞌe eeyyaꞌneexxanna ateꞌn gammadaꞌneexxa egendeetaxxee isi kako aageexxa yaane addatattoshsha assitaaxxa geltaaxxa buuto affeetten. Tasfakeꞌn affeettexxi addenna edi irran caala jabaattaꞌn meꞌitaan. Tinninna dhugaate kaddeexxa ati ifiꞌaan egendaton. Isenna adde atixxa jabeessitaan. Tennenaaꞌn kexxeexxa, hedho atixxeꞌn assitaattexxe yaane duuchcha, mini hado atika abiddaatte qicinna murte assexxaatte qici ittan yanna laꞌonfataatte qici jijjiiremaan.

18. Yihowwa maa addachchiisaaka yaada haasoꞌe?

¹⁸ Hawwaaryaatichchi Mageni edo eeyyensha alfinennechchi uduma, alfinannoka tasfa uuddaaxxa wele eloxxa beddonna keꞌisseen. Isinna tasfi atiki muuxemaaxxa kokeesseen. Tenneꞌe addata dandeetattoki mayeete? Phawuloosi manfasi qullichchiki akeekemeꞌe addachchiisaaka yaada Kirsitaanakeꞌe haasoꞌeen: “Tasfi muuxemebaaki gateꞌe yaandannoshsha assabaan, buutotinna Mageniinxi jaalala noꞌa uwwemeeke manfasi qullichchi darreeꞌn qalbe noꞌoxxi giddo dunendeen.” (Roome 5:5) Kunni tasfi dhugaatike kadeexxa addatattoshsha assitaaxxi buutuwwa hexxeen.

19. Tasfa uuddaaxxa heene yaane kokiinke kada dandeetatto?

¹⁹ Yihowwa Abirhaamaꞌa kako ageexxa, isi edo eeyyeme qiconna isike jaalo hiyyemeexxa qaalli hiyye. Abrihaami addeti heqqedhaammaxxi toliinxe yaanebaan. Maxaafi Qullichchi iitta hiyyaan: “Abrihaami ossuntet heqqedheechchinni uduma konne tasfa alfeen.” (Ibra. 6:15; 11:9, 18; Roome 4:20-22) Isinna ijjenda yaadebaan. Addatendeteke kaddottole tasfi atikika badhaadha alfitaton. Tasfi atiki dhugaatike kademmaxxeꞌe gammadattoshsha assa maleꞌe yaadisabaan! (Roome 12:12) Phawuloosi borreesseeshshani: “Isoꞌn addatatenaaꞌn kexxeexxenni manfasi qullichchiniinxe hunnani, tasfi haꞌnoꞌa dinbiliqqi hiyyaashsha, tasfa uwwaaki Mageni gammashshonna nageꞌa haꞌnoꞌaa wonshowwaal.”—Roome 15:13.