Yihowwa “Hedho Afeeke” Mageno Kadeexxa Qalli Hiyye

1. Yihowwaki ardi rakko geltaaꞌnaanni isooꞌo mageneeffata ittin ediꞌa sufaashsha gargaataaxxi yaane maachcho?

HEꞌNAANNEKI Maxaafi Qullichchi “dandeꞌe hedhatee haꞌuraake haranga gargariti hedheeke” hiyyaake baroꞌniten. (2 Ximo. 3:1) Yihowwake ardaꞌni tenne aadaꞌni duuchchiinge manjoꞌni geltaꞌneexxe rakko gadhi darre, moronshanna shorrichchi geyaꞌneen. Rakko tinni hexxeeꞌnaanni Yihowwaꞌa mageneeffata ittin ediꞌaa sunfannoshsha noꞌoꞌo gargaartaaxxi yaane maachcho? Noꞌo gargaartaaxxi lumoxxi yaane Yihowwa “hedho afeeke mageno” kadeexxa egeꞌnaten—Ermi. 10:10; 2 Ximo. 1:12.

2. Yihowwa hedho afeeke Mageno kadeexxa leellishaꞌneeki hoone orinnite?

² Yihowwa rakko noꞌoꞌni geltaa wodda noꞌoꞌo gargaaraꞌneekenna duuchchinii wodda gargaaratee hasaꞌneeke dhugaandinni hedho afeeke Magenon. (2 Zeena 16:9; Faaro 23:4) Isi hedho afeeke Mageno kadeexxa qalli hiyya noꞌoꞌni geltaꞌneexxa heene rakkonna injifantannoshsha gargaartaan. Tinni yaane Mootichcha Daawiti gargaarteeki hittate kaddeexxa uundo.

3. Daawiti ‘Yihowwa hedho afeekeni’ hiyyeeki maa hiyyatee haseete?

³ Daawiti Yihowwaaꞌa egeꞌneemmaxxeꞌe isoꞌni addataamman. Mootichchi Saꞌoolinna weli naaphi isooꞌo shorraammaxxa yanna Yihowwa isooꞌo gargaaroꞌa kadhataamman. (Faaro 18:6) Mageni kadha isixxa laqati naaphiinxe anganaaꞌni isooꞌo gargaareechchi uduma, Daawit: “Yihowwa hedho afeeken!” hiyye haasoꞌeen. (Faaro 18:46) Kunni haasoꞌi Daawit Mageni hedheexxa addataꞌneexxa calla leellishaakebaan. Mitte dhugeessatixxi borro “Yihowwa arda isikeꞌe hiyyaa wodda duuchchinii wodda tarkaaffe adhaꞌneeke hedho afeeke Mageno kadeexxa” Daawit qalbe woꞌmani haasoꞌeeke yaada ifessaan. Daawit hedho isixxeꞌni gelteexxe yaanenaaꞌni Mageni isiki hedho afeeke kadeexxa uudeexxi yaane, Yihowwaaꞌa ergatemateenna jajatee afeexxa adde isixxa jabeesiteen.—Faaro 18:28, 29, 49.

4. Yihowwa hedho afeeke Mageno kadeexxa qalli hiyya noꞌaa laꞌo affeeki hittate?

⁴ Yihowwa hedho afeeke Mageno kadeexxa addata isiꞌaa hinaaffeti ergammannoshsha gargaartaan. Hega uushshoteꞌni jaabate ossatixxa hunnanna isiꞌaa jabaante ergatematixxa yorte alfinannoshsha assitaan. Ittan lebendaaxxa, Yihowwanni welt jaalo kadatee murteesseꞌneenneke manna kandannoshsha gargaartaan.

HEDHO AFEEKI MAGENI HAꞌNOO JABEESSAAN

5. Rakko noꞌoꞌni geltaa wodda sodaantabeꞌnoshsha noꞌoꞌo gargaartaaxxi yaane maachcho? (Filphisiyuusi 4:13)

⁵ Yihowwa hedho afeekenna noꞌoꞌo gargaaraꞌneeke kadeexxa qalli hinaannexxe kaddoole, noꞌoꞌni geltaꞌneexxi rakko lummexxenna shiixxexxoole jabaante ossa dandeennannon. Noꞌoꞌni geltaꞌneexxi hiini rakkonna Mageni noꞌokinni qixxoottaanxi hexxebaan. Isi duuchchiinxa dandeꞌaake Mageno kademmaxxeꞌe rakko geltaa wodda jabaante ossinannoxxa hunna uwwaan. (Filphisiyuusi 4:13 yaansis.) Tinni, rako noꞌoꞌni geltaa wodda sodaꞌa belo osinannoshsha assitaaxxe yaanen. Shollaxxi hegaꞌuushsho gelteeꞌna Yihowwaxxa gargaarsiinxa anga uundennexxe kaddoole, haꞌurtaaxxi hegaꞌuushsho geltaa woddanna isoꞌni addantannoshsha gargaartaan.

6. Daawit dargaggumma hedhemmaxxa yanna Yeihowwaꞌni afeexxi adde jabaaattaashsha assiteexxi heene yaane?

⁶ Daawiti Yihowwaꞌni afeexxi adde jabaattaashsha assiteexxa lame isoꞌni futti hiteexxa yaane hubatte. Daawiti dargaggummateꞌni hedhe gedhebo allalaammaxxa yanna dibe hinaaki biniinchinna neenqi anni isikika gedhebo adhdhaamman. Eettene yanna Daawiti sodaꞌa belo biniincha shorrati afoꞌo isikenaaꞌni gedhebo ibisaamman. Kaddomaleꞌe, tenne yaane assaammaki ifixxe hunnannite kaddeeshsha asse hedaammabaan. Isinni welt Yihowwa hedheexxa egeꞌneemman. (1 Samu. 17:34-37) Daawiti tennee yaane ijjenda dedhebaan. Tenne yaaneꞌni alalcha isixxi, ediꞌaa kaddaaxxe yaane duuchchaꞌni hedho afeeki Mageni isiꞌaa jabeenna uwwaaxxa addataashsha gargaarteꞌeen.

7. Daawit qajeelto uushsho afa Goliyaadiiꞌi lolaashsha gargaarteeki hittate?

⁷ Daawiti lolakee fuleeka Isiraꞌeelika sannachcha uudoꞌa mareemmaxxa yanna dargaggeessa kada gopheebaan. Okkoonna geyeexxa yanna, dhaggati lomoki Filsixeemetiki Goliyaadite hiyyemaaki sannachchi ‘lolakee fuleeke Isiraꞌeeletike sannachchaꞌni qacifataamaxxee’ Isiraꞌeeloot alayyiki raankaaꞌnaa uudeen. (1 Samu. 17:10, 11) Isiraꞌeeliki sannachchuwwi sodaateeki konne manjichchixxe dhaggaꞌninna isi haasoꞌaꞌneexxe yaaneꞌni miꞌlachcho asseexxeeten. (1 Samu. 17:24, 25) Kaddomaleꞌe, Daawit afeexxi uushsho insaꞌnexxenaaꞌni gargarti hexxeexxemman. Isinna konne Goliyaadika yowwichcho uudaammaki Isiraꞌeelika sannachcha yowweeshshan calla kaddebaangi, ‘hedho afeeke Magenika sannachcha’ yowweeshshatemman. (1 Samu. 17:26) Daawit heene yaane iimi darre qalli hiyyaammaki Yihowwaaten. Yihowwa isooꞌo hore allalaammaxxa yanna gargaareemmashshanni taꞌanna gargaaraaxxa addataamman. Mageniinke gargaarsinni Daawit, Goliyaadii loleexxi injifateen!—1 Samu. 17:45-51.

8. Rakko noꞌoꞌni geltaa wodda Yihowwa noꞌoꞌo gargaaraaxxa addata dandeennannoki hittate? (Fakke uudi.)

⁸ Hedho afeeki Mageni noꞌoꞌo gargaaratee hasaꞌneexxa qalli hinaannole, rakko noꞌoꞌni geltaa wodda jabaante ossa dandeenannon. (Faaro 118:6) Noꞌonna Daawitishshanni saxxeexxe yannaꞌni Yihowwa noꞌaa asseexxa yaane qalli hinaannexxe kaddoole adde noꞌoxxa jabeessedha dandeenannon. Yihowwa mageneeffatoole isixxa gargaaree qico qalli hitattoshsha assaaka Maxaafi Qullichchiinka raaga yaansis. (Isa. 37:17, 33-37) Ittan, jw.org hiyyendaaxxe webisayitenaaꞌni taꞌixxe yannaꞌni Yihowwa dayyuwwa gargaaraꞌnee qico leellishshaaxxa ripoorte uudi. Ittan lebandaaxxa, Yihowwa atiꞌa hiyyaa wodda tarkaaffe adhdheexxa yannuwwa qalli hiyyi. Neenqa yookiin dibe fakkaattaaxxe yaanenaaꞌni Yihowwa ateꞌe gargaareexxi yaane hexxebaachcho ateꞌni fakkaattaꞌnoole adde woxxoxxe. Mayee? Dhugaatishsha hexxoole, Yihowwa atiꞌa asseexxi heddo yaane hexxeen! Yihowwa isike jaalo kaddattoshsha ifibaaꞌa ateꞌe harkirsedheen. (Yohaannisi 6:44) Welenna gattoole taꞌi qicoꞌni dhugaatike mineꞌni hedhan calli isooꞌo galateeffatattoshsha assitaaxxe yaanen. Kadhatteeꞌnaa kadha atixxa hiisseexxa yanna, gargaarsa hassaattaaxxe yannaꞌni atee gargaareexxa, yokiin haranga haꞌuraake jeei giddo hexxeeꞌnaaꞌa ateꞌe kipheexxa yanna qalli hitattoshsha gargaaroꞌa kadhatteetelenaꞌa? Itta fakkaattaaxxe yaanuwwaꞌni alalcha Yihowwa atiꞌaa hiyyaa wodda tarkaaffe adhdhaꞌneexxa affeettexxi adde ittin jabaattaꞌni meꞌitaan.

9. Rakko noꞌoꞌni geltaa wodda qalli hiyya hasissaaxxi yaane maachcho? (Fakkeenna 27:11)

⁹ Yihowwa hedho afeeke Mageno kadeexxa qalli hiyya rakko noꞌoꞌni geltaꞌneexxeꞌe toggitte uushsho anfannoshsha assitaan. Hitta? Rakko noꞌoꞌni gelteexxi Yihowwaxxenna Seexaniinxe oddoꞌni lumoxxa bakka affeexxe moronsiissaaxxe yaane assine heda sanfannon. Seexani jabaxxi rakko geltaa wodda Yihowwa waallannoxxa haasoꞌeen. (Iyyo. 1:10, 11; Fakkeenna 27:11 yaansis.) Kaddomaleꞌe rakko noꞌoꞌni geltaa wodda jabaante ossinaanole, Yihowwaꞌa jaalala anfeennexxa ittan Dabiloosinna dharichcha kadeexxa kokeesinannon. Motummati darenaaꞌni shorrichchi, maalaqiinxi rakko, dhugaa lassitatto wodda manji haasoꞌaꞌneexxi elobaaxxi yaane yookiin mitte mitte rakkissaaxxi yaanuwwa ateꞌni geltaꞌnee? Iittate kaddoole, kunni jeeji Yihowwaxxa qalbe gammachchiissattoxxa futtii alfitattoshsha assaaxxa qalli hiyyi. Ittan lebendaaxxa, Yihowwa hunna atixxi iimi darre hexxeexxi rakko ateꞌni geltoꞌa ijjenda waalabaaxxa qalli hiyyi. (1 Qoro. 10:13) Jabaate ossa dandeetattoshsha hunna atiꞌaa uwwaan.

HEDHO AFEEKI MAGENI HAꞌNOO BADHAASAAN

10. Hedho afeeki Mageni isooꞌo mageneefataake manniꞌaa maa assa?

¹⁰ Yihowwa isooꞌo mageneeffataaka manna badhaasaake Magenon. (Ibra. 11:6) Taꞌixxe yannaꞌni nageꞌikinna gammashshot heꞌnannoshsha assaan ittan ediꞌa bari bariinxa hedho noꞌaa uwwaan. Yihowwa noꞌoꞌo badhaasatee halchanna hunna afeemmaxxeꞌe isoꞌni addata dandeenannon. Ittan tinni adde, edixxe yannaꞌni hexxemmaxxi addatendeexxi Mageniinxi ergantoole assitemmashsha, noꞌonna hedho duuchchinni isooꞌo mageneeffatate dandeennennexxa yaane assinannoshsha tirtirsitaan. Taakkake dhibbeesso baroꞌni hedhemmaki Ximootwosi tinni dhugaate kaddeexxa kokeesseen.—Ibra. 6:10-12.

11. Ximootwosi gubaꞌe giddo jabaate hujaashsha tirtirsiteexxi yaane maachcho? (1 Ximootwosi 4:10)

¹¹ 1 Ximootwosi 4:10 yaansis. Ximootwosi hedho afeeke Magenoꞌni jabaxxa adde afeemman. Tinni yaane jabaxxa woꞌlaancho assaashshanna jabaate hujaashsha isooꞌo tirtirsiteen. Hoone oruwwin? Hawaarya Phawuloosi, Ximootwosi eloke barsiisaanjo kadaashshanna gubaꞌeteꞌni haasoꞌa shiqisatixxa dandeette afaashsha jajjabeesseemman. Ximootwosi addetike jaaluwwiꞌaa, dargaggeeyyeteenna kadde geedheteꞌe eloke fakkeennamman. Ittanni, Gorsi hasisaake manjiꞌa, hurudhdhi hiyyeeka gorsa jaalalati gorstixxi mitte mitte jabaxxi huje isiꞌaa uwweendeemman. (1 Ximo. 4:11-16; 2 Ximo. 4:1-5) Ximootwosi assaꞌneexxi yaane manjokeꞌni leella gophphoole yookiin weli isi assaꞌneexxa yaane saada gophoolenna Yihowwa isooꞌo badhaasaaxxa addata dandeꞌaamman.—Roome 2:6, 7.

12. Geedhe gubaꞌe giddo jaabaatte hujjaashsha tirtirsitaaxxi yaane maachcho? (Fakke uudi.)

¹² Techchonna geedhe eloxxa huje insaꞌnexxa Yihowwa uudaaxxanna isi edo lumoka hira affeexxa addata dandeettaan. Heddo geedhe allalatixxee, barisiisatixxenna lassatixxe huje gadhi darre, ijaarsiinxa projekite kiphphaan ittan bala gelteexxe bakkaꞌni hexxeexxe dayyuwwaaꞌa gargaarsa assitaan. Wele geedhe kinni, Ela Gopheeka Marte Qortaaxxe Gollo giddo yookiin Hosipitaala Afensiissaaxxe Komite giddo ergatendaꞌneen. Tennee, huje hujjaꞌneexxi geedhe gubaꞌe uuddaꞌneeki Yihowwaxxe qophpheshshate maleꞌe, manjiinxishatebaan. Tennenaaꞌni kexxeexxa huje insaꞌnaa uwwendeexxa woꞌma lubbon hunjaammaxxee Mageni insaꞌnee badhaasaaxxa woꞌma qalbeni addantaan.—Qola. 3:23, 24.

13. Noꞌo mitti mittingi ergachcho isixxeꞌni assinaannexxa yaane Yihowwa uudaꞌneeki hittate?

¹³ Duuchchi manji geedhe kada dandeꞌabaan. Kaddoolenna noꞌo duuchchiing Yihowwaa uunannoxxa yaane anfeennen. Mageni noꞌoki isiꞌa ergatematee dandeennennexxa duuchcha assinanno wodda yoꞌoshsha gammadaan. Butta duuchchaꞌni hujendaꞌneexxe hujeꞌaa assinaannexxi yaane shiixxexxe lummexxoolenna isi assinaannexxa yaane hubataan. Shooko balleesedhatee assinaannexxa woꞌlaancho, gubaꞌe giddo yaada uwwatee anga keꞌisinanno wodda ittan hifachchiissaaxxa yaane tuffante saꞌnanno woddanna gattowwaali hinanno wodda noꞌoꞌni gammadaan. Assitaattexxi yaane ateꞌni womi fuldabaaxxe fakkattoolenna Yihowwa ettenee yaane lummise uudaaxxa addat. Tenne assitaattexxe yaanenaaꞌni kexxeexxa isi ateꞌe eeyyaani ittan eebbisaan.—Luqa. 21:1-4.

HEDHO AFEEKE MAGENIBAA SHIQQINEESHSHANNI HEDHDHE

14. Yihowwabaa shiqe hedha addatemeenneke kande heꞌnannoshsha gargaartaaki hittate? (Fakke uudi.)

¹⁴ Yihowwanni welti jabaxxa jaalunte anfeennexxe kaddoole isiꞌaa addatemme hedha noꞌaꞌa shollexxaan. Tinni yaane dhugaate kaddeexxa Yoosefixxe hedhoꞌni leelliteen. Yoosefi Mageno adda egeꞌneemmaxxeenna Isooꞌo yaadisatee hasa gophaammaxxeeꞌe saaliinxe baalaguntenaaꞌni bayyateen. (Dada. 39:9) Mageni qalbe noꞌoxxeꞌn illeti uundaaneshsha leelloꞌaa hansaanole isibaa kadhatateenna Qaale isixxa qoꞌnisatee yanna dhaaba hasissaan. Iitta assinaannexxe kaddole isinni anfeennexxi jaaluntenna nophphitaꞌni meꞌitaan. Noꞌonna Yoosefishsha Yihowwanni welt jabaxxa jaalunte anfoonnole isooꞌo yaadissaaxxa heene yaanenna assinabeꞌnon.—Yaꞌiqo. 4:8

15. Gammoojje qiillakeꞌni hedhemmake Isiraꞌeelootaꞌni gelteexxe yaanenaaꞌn maa barachcho alfinanno? (Ibraawiyaane 3:12)

¹⁵ Mageni hedho afeeke kadeexxa dedhaaki manji sholla qicin isonaaꞌni bayyataꞌni meꞌaan. Gammoojje qiillakeꞌni hedhemmake Isiraꞌeelootaꞌni gelteexxa yaane qalli hiyye. Insaꞌnenna Yihowwa hedheexxa egeneexxenna kaddoole, insaꞌnee karkarsaꞌneexxa mama sanfeemman. “Yihowwa oddoo noꞌoxxeꞌni hedhee moo hedhebaꞌa?” hine qorreemman. (Zetsi. 17:2, 7) Okkoneechchi uduma, Magenokeꞌni jallata sanfeen. Ajajema gibatika adaba insaꞌneka hordofatee hansaabeꞌnoxxi egeꞌnendeexxe kaddoolenna, kunni fakkeenni noꞌoꞌo xexxeꞌaachchiisatee kadaaken.—Ibraawiyaane 3:12 yaansis.

16. Adde noꞌoxxa hega uuddaaxxi yaane maachcho?

¹⁶ Butta tinni Yihowwabaa shinqenneshshan heꞌnabeꞌnosha yaane noꞌoꞌni haꞌurtaashsha assitaꞌneen. Heddi manni Mageni hedheeni hiyyaaka yaada addataꞌnebaan. Mageni hiyyaaxxa yaane gibaaki manji eloxxa hedho hedhaachcho fakkaattaan. Tenne yaane uundanno wodda adde noꞌoxxi hega uudendoꞌaa dandeettaan. Mageni hedheexxa addantaannolenna isi noꞌaa hiyye tarkaaffe adhdhaaxxa mamannoxxi hedha dandeettaan. Faaro 73 xxiki borreessanjinna iitta hexxeexxa yaane hedeemmaxxi yanna hexxemman. Loola isikeꞌni hedhemmaki Mageniinke seeriꞌa ajajemammabaaki manni eloxxa hedho hedhaaꞌnaa uudeemman. Tennenaaꞌn kexxeexxa, Magenokee ergatema hasissaaxxanna hasissabaaxxa mama safeemman.—Faaro 73:11-13.

17. Yihowwabaa shinqenneshshani heꞌnonnaa noꞌoꞌo gargaartaaxxi yaane maachcho?

¹⁷ Yannati uduma faarsanji hedino ifixxa toggi assedhaashsha gargaarteexxi yaane maachcho? Yihowwaa dedheeke mannaꞌni maachchi geyaaxxa hedeen. (Faaro 73:18, 19, 27) Magenokeꞌe ergatema maa laꞌo affeexxa qalli hiyyeen. (Faaro 73:24) Noꞌonna Yihowwa noꞌaꞌa asseexxa yaane heda dandeennannon. Yihowwaaꞌa ergetematixxenna ergatema gophatixxe oddooꞌni hexxeexxa gargarunte hedde. Itta assitinaꞌneexxe kaddoole, dhugaatike oraꞌni jabaate uurrat, faarsanjiishsha “aniꞌaa kinni Mageniibaa shiqa woyyan” hiyya dandeenannon.—Faaro 73:28.

18. Ediꞌa hexxeexxa yanna sodaꞌa belo heqqeꞌnaanneki mayeete?

¹⁸ Tenne muuxamiinxe barruwwaꞌni hiini rakkonna noꞌoꞌni geltoole ‘hedho afeeka Mageniꞌa ergatemaannaxxeꞌe’ sodantabeꞌnon. (1 Tese. 1:9) Mageni noꞌoki isooꞌo mageneefataake manniꞌaa hiyyaa wodda tarkaafe adhdhaake hedho afeeke Magenon. Isinna qarixxe yannaꞌni ergantoole isixxinni hedhemmashshanni techchonna noꞌonni hedhaaxxa kokeesseꞌeen. Shiqixxe yannaꞌni buttateꞌni lumoki abari kadaan. Okkone wodda Yihwwa noꞌoꞌo qofitti waalabaan. (Isa. 41:10) Tenneꞌaa noꞌo duuchchiing “woꞌma qalbenni ‘Yihowwa gargaarsanjo anken sodaatabeꞌnon. . . . hinannon.’”—Ibra. 13:5, 6.