Jabaante Ossinannoshsha Yihowwa noꞌoo Gargaaraaki Hittate?

1. Jabaate ossa hasisseeki mayeete? Jabaante ossinannoshsha gargaaraki ayyete? (1 Pheexiroosi 5:10)

TENNE muuxamiinxe barruwwaꞌni, Yihowwaki ardi jabaate ossa hasissaan. Mitti mitti fayyitabaaxxe dhibonni rakkataꞌneeki hedheen. Weli kinni eeyyaꞌneeka manjo reyeeꞌna gophe yaadaꞌneen. Horqoneꞌni kinni, mini hadonaaꞌni yookiini mootummatixxe baalloole darreeꞌni shorrichchi geyateꞌni hedheen. (Mat. 10:18, 36, 37) Fedheexxi rakkonna ateꞌni geltoole, jabaatteꞌe ossittattoshsha Yihowwa gargaaraaxxa addat.—1 Pheexiroosi 5:10 yaansis.

2. Jabaate ossateꞌe hunna alfinannoki habaaꞌnite?

² Jabaate ossate hiyyo, guggufachchiissaaxxi yaane, shorrichchi, abari yookiin hega uushsho hexxeeꞌnaanni jabaatatenna tasfiki ittin ediꞌaa sufatixxe dandeette hiyyoten. Jabaate ossatixxi dandeette ifike jabennanaaꞌni daggaaxxe yaanebaan, tenne irra dandeette tennee alfinannoki “manjiinxe hunna iimi darre hexeexxa hunna” uwwaake Mageno Yihowwanaaꞌniten. (2 Qo. 4:7) Tenne qoꞌneꞌni, jabaante ossinannoshsha Yihowwa noꞌoo gargaarateꞌe qophpheesseexxa shoole yaanuwwa uundannon. Tenne shooliinxe qophphenaaꞌni laꞌo alfa dandeennannoki hittate kadeexxanna mariꞌantannon.

KADHA

3. Kadha masoten hinaanneki mayeete?

³ Yihowwa jabaante ossinanooshsha gargaartaaxxa manbeꞌa assitaaxxa yaane qophpheesseen. Tenne asseki cubbaaleeyyetenna kandonnole, isinni welti haasonnannoshsha assatiten. (Ibr. 4:16) Hedde meen: Yihowwabaa heene yannaꞌninna ittan heene yaaneꞌaanna kadhata dandeennannon. Isi habanna heꞌne hoone laagadinninna kadhantonnole laqaan, matanga qofiti yookiin usurri mineꞌni heꞌne kadhantanno woddanna kadha noꞌoxxa laqaan. (Yon. 2:1, 2; Huj. 16:25, 26) Yaaddotenaaꞌni kexxexxa maa hine kadhantannoxxa mekki hinannoxxa yanna, maa hinonna hansaannexxa Yihowwa egeꞌnaan. (Rom. 8:26, 27) Dhugaandini kadha masoten!

4. Jabaate ossateꞌe kadhantannoxxi kadha Yihowwaxxe fedhiini weli qabaan hinaanneki mayeete?

⁴ Yihowwa Qaale isixxeꞌni, “kadhantaannexxi yaane heenetenna kaddoole fedhii isixxinni weli qabaake garinni kadhantonnole” laqaaxxa kokeesseen. (1 Yo. 5:14) Jabaante ossinannoshsha Yihowwa noꞌoo gargaaroꞌaa kadhata dandeennanno? Eet! Iitta hexxeexxi kadha fedhii isixxinni weli qabbaaxxen. Iitta hinaanneki mayeete? Noꞌo rakko geltaaꞌnaa jabaante ossinanno wodda Yihowwa isoo tuffataꞌneeke Seexana Dabiloosiꞌaa hiissichcho hiissa dandeꞌaan. (Fak. 27:11) Ittin lebendaaxxa, Yihowwa “qalbe mitten isibaa wirri hiyyeeke manniꞌaa jabeenna isika leellishateꞌe” hasaꞌneexxa Maxaafi Qullichchi haasoꞌaan. (2 Ze. 16:9) Tenneꞌaa Yihowwa jabaante ossinannoshsha noꞌoo gargaarateꞌe hunnanna halcha afeexxa addata dandeennannon.—Isa. 30:18; 41:10; Luq. 11:13.

5. Sammotika nageꞌa anfannoshsha kadha gargaartaaki hittate? (Isayaasi 26:3)

⁵ Yadissaꞌneexxe yaaneꞌaa qalbe giddixxinni kadhantanno wodda ‘hedino noꞌoxxi iimi darre hedheeki Mageniinki nageꞌi. . .qalbe noꞌoxxanna sammo noꞌoxxa heqqaaxxa’ Maxaafi Qullichchi haasoꞌaan. (Flp. 4:7) Iitta hiyyo maa hiyyote kaddeexxa hedi. Yihowwaa ergatemaꞌnebaaki manni rakko geltaa wodda sammotika nageꞌa alfateꞌe gargari hexxeexxa yaanuwwa assaan. Fakkeennakeꞌe, mitti mitti manni yaaddo balleeffatateꞌe hedaanxi yaane sammotibaa daggabaashsha assati sammo duwwixxe assateꞌe woꞌlaanaan. Sammo duwwixxe assa kinni manfasiinxe hedhoꞌaa eloxxebaan. (Matwoosi 12:43-45 welti hokkokis.) Kadhati Yihowwanaaꞌni alfinannoki nageꞌi kinni, mitti manji sammo duwwixxe assati alfa dandeꞌaake nageꞌi irraan caala hedheeken. Yihowwabaa kadhantanno wodda mitte qalbenni isoꞌni irkanteennexxa leellinshannon, ittan isinna “baꞌabaaka nageꞌa” noꞌaa uwwaan. (Isayaasi 26:3 yaansis.) Yihowwa noꞌaa nageꞌa uwwaꞌneeki mitti ori Qaale isixxenaaꞌni barantennexxa dayyeessitaaxxa xiqsuwwa qalli hinannoshsha assatiten. Yihowwa noꞌaa hedaꞌneexxanna noꞌaa qabboꞌaa hasaꞌneexxa egenneennaxeꞌe, tinni xiqsuwwa sammonna qalbe noꞌoxxi hafuura adhdhitaashsha assitaan.—Far. 62:1, 2.

6. Kadhatixxa qophphe woꞌma kadee garinni laꞌoonfata dandeettattoki hittate? (Fakketanna uudi.)

⁶ Maa assa dandeettatto? Addetixxi hega uushsho geltaa wodda jabaate ossateꞌe “baꞌo atixxa Yihowwaꞌni huꞌni” ittan nageꞌa uwwaashsha kadhat. (Far. 55:22) Rakko geltaꞌneexxa ossite saxxattoshsha Yihowwa beekkuma uwwoꞌaanna kadhat. (Fak. 2:10, 11) Jabaate ossateꞌe kadhattatto wodda, Yihowwaa galateeffatanna deetoxxeꞌe. (Flp. 4:6) Rakkotixxa yanna atee gargaaraꞌneexxa leellishaaka beesisuwwa hubati, ittan atee kiphaꞌneexxeenna galateeffat. Ateꞌni gelteexxi rakko Yihowwa konneechchi edi darre atiꞌaa uwweeka badhaadha dedhissoꞌaa waaldoxxeꞌe.—Far. 16:5, 6.

QAALE MAGENIINXA

7. Maxaafa Qullichcha qoꞌnisa jabaante ossinannoshsha noꞌoo gargaartaaki hittate?

⁷ Yihowwa jabaante ossinannoshsha noꞌoo gargaartaaxxa Qaale isixxa noꞌaa uwweꞌeen. Maxaafi Qullichchi giddo, Yihowwa noꞌoo kiphaaxxa leellishshaaxxi heddo xiqsuwwa hexxeen. Meen mitte fakkenna uundo. Matwoosi 6:8 “Anni haꞌnooki kadhattinebaangi, ediseenni maachchi haꞌnoꞌaa hasisaaxxa egeꞌneꞌeen” hiyyaan. Tenne hiyya haasoꞌeeki Yesuusiten, isi kinni ayyi iimi darrenna Yihowwaa egeꞌneꞌeen. Tenneꞌaa, rakko noꞌoꞌni geltaa wodda Yihowwa hasissaaxxa yaane wonshaaxxa mammannoxxi buuto hexxebaan. Maxaafi Qullichchi giddo jabaante ossateꞌe murteesseꞌneennexxa murte kiphphaaxxi konnenni weli fakkaataaka yaada affeexxi wele xiqsuwwa hexxeen.—Far. 94:19.

8. (a) Jabaante ossinannoshsha gargaaraki mitti Maxaafi Qullichchiinki hundaayyetiki seeri hoonte? (b) Maxaafi Qullichchiinki hundaayyetiki seeri noꞌaa hasisaaxxa yanna qalli hinannoshsha noꞌoo gargaartaaxxi yaane maachcho?

⁸ Maxaafi Qullichchiinki hundaayyetiki seeruwwi jabaante ossinannoshsha gargaaraan. Kunni hundaayyetiki seeruwwi, eloxxa murte murteesseꞌnannoshsha gargaaraaka beekkuma afeen. (Fak. 2:6, 7) Fakkeennakeꞌe, Maxaafi Qullichchi soodo kaddaaxxe yaaneꞌaa yaadati irra duchchiinxa barra Yihowwaꞌni addantannoshsha jajjabeessaan. (Mat. 6:34) Maxaafa Qullichcha yansisatixxanna alalchatixxa aada anfoonnole hansannoxxe yannaaꞌa kaddaxxa xiqse qalliyya shollexxaan.

9. Maxaafi Qullichchi giddo hedheeki raagi, Yihowwake gargaarsaꞌni anfeennexxa adde jabeessaaki hittate?

⁹ Maxaafi Qullichchi giddo Yihowwaꞌni addataammakenna gargaarsa isika alfeeke noꞌoshshani hedheeke manniki raaginna afemaan. (Ibr. 11:32-34; Yaq. 5:17) Konnee raaguwwa hendaannole “noꞌoxxe irkonna jabeenna, rakkotixxa yanna rake noꞌoo dhaqqabaake gargaarsanjo [noꞌoke]” kadeeke Yihowwaꞌni anfeennexxi adde jabaattaan. (Far. 46:1) Qarixxi Yihowwaxxi ergantoole, isoꞌni adde affeexxa lellishsheeki hittate kaddeexxa hendennexxe qixxeꞌni addetinna jabaate ossati insaꞌnee fakkantaꞌni menannon.—Yaq. 5:10, 11.

10. Mageniinxa Qaale woꞌma kadee garinni laꞌoonfattattoki hittate?

¹⁰ Maa assa dandeettatto? Maxaafa Qullichcha barra barrandeꞌni yaansisi, ittan anee gargaartaan hitattoxxa xiqsuwwa borreessite abixxi. Heddi manni, gorsa barratixxa xiqse yaansise fula, barra duuchcha hedaꞌni hosaaka Maxaafi Qullichchiinka yaada alfaashsha gargaarteen. Meeritea hiyyendaꞌneexxi dayyo anninna ama isexxi kanseretika dhukkuba ciꞌlooꞌminaammaxxa yanna tinni yaane dhugaate kaddeexxa uuddeꞌeen. Muuxamii qicoꞌni insaꞌnee ossunteti karkarsitaashsha gargaarteexxi yaane maachcho? Iitta hiteen: “Gorsunte duuchchinii wodda Qullitte Borruwwa Barra barrandeꞌni Qoꞌnisa hitaꞌneexxe borreessilenaaꞌni xiqse yaansisaannan ittan alalchaannan. Tinni yaanenna anenaaꞌninna aneꞌni gelteexxe rakkonaaꞌni caakaake, ossa dandeꞌannoshsha gargaaraake Maxaafi Qullichchiinke yaadinni sammo anxi woꞌmitaashsha assiteen.”—Far. 61:2.

ADDETIKA JAALUWWA

11. Rakko noꞌoꞌni gelteeꞌnaa ossinanno wodda qofitti heꞌnebeꞌnoxxa egeꞌna noꞌoo jajjabeessitaaki hittate?

¹¹ Yihowwa jabaante ossinannoshsha gargaartaaxxa dayyuwwa noꞌaa uwweꞌeen. ‘Dayyuwwatike maabari giddo hedheeke dayyuwwa noꞌokeꞌni weli fakkaattaanxi rakko geltaꞌneexxa’ egeꞌna rakko geltaꞌneeki noꞌoꞌni calla kaddeebaaxxa hubantannoshsha assitaan. (1 Ph. 5:9) Dayyuwwa noꞌoxxi, noꞌoꞌni geltaꞌneexxixxi rakko insaꞌneꞌni gelteeꞌnaa jabaatte ossitaꞌneexxa egeꞌna hiini rakkonna noꞌoꞌni geltoole jabaante ossa dandeennannoxxa addantannoshsha assitaan. Tenneꞌaa noꞌonna insaꞌneshshanni jabaante ossinannon!—Huj. 14:22.

12. Noꞌoki addetiki jaaluwwi noꞌoo gargaaraaki hittate? Noꞌo insaꞌnaa maa assa dandeennanno? (2 Qorontoosi 1:3, 4)

¹² Jabaante ossinannoshsha noꞌoki addetiki jaaluwwi haasoꞌaaxxenna assaaxxe yaanenni jajjabeessa dandeꞌaan. Hawaarya Phawuloosi tinni yaane dhugaate kaddeexxa hedho isixxeꞌni uudeꞌeen. Mine ifikeꞌni usuremeemma wodda isoo gargaarteexxa dayyuwwa duuchchinii wodda summa insaꞌneka ganaꞌni galateeffataamman. Insaꞌnenna Phawuloosii dayyeessineꞌeen, jajjabeessineꞌeen, ittan hasisaa garinni gargaarreꞌeen. (Flp. 2:25, 29, 30; Qol. 4:10, 11) Techchonna dayyuwwa iitta hexxeexxa yaane noꞌaa assitaaxxi hexxaan. Gargaarsi noꞌaa hasisaaxxa yanna dayyuwwa rakkeꞌe noꞌoo dhaqqabbaan. Noꞌonna insaꞌnaa gargaarsi hasisaaxxa yanna ranke insaꞌnee dhaqqanbannon.—2 Qorontoosi 1:3, 4 yaansis.

13. Maya hiyyendaꞌneexxi dayyo jabaatte ossitaashsha gargaarteexxi yaane maachcho?

¹³ Ruusiya hexxaꞌneexxe Maya hiyyendaꞌneexxe dayyoꞌaa, dayyuwwa jabeeniinxe muumme kaddeen. Ise addattaꞌneexxa yaane wele manjoꞌni barsiisseexxeꞌe pooliise 2020 waggaꞌni mine iseka fattashsheechchi uduma isee usurteen. Maya iitta hiteen: “Eettene yanna gopheennan, yaaddoti hangulli hiyyeennan. Kaddoolenna dayyuwwa anibaa bilbildaꞌninna daddaabbe borreessitaꞌni aneꞌe eetaꞌneexxa kokeessiteen. Anee eetaꞌneexxa mitte lumoxxa maate afeennexxa haanonna dedhe egeꞌneeꞌnon. Giddiiꞌninni 2020 wogganaaꞌni safeꞌe tennee yaane edi irra hubateennen.”

14. Dayyuwwatike gargaarsanaaꞌni laꞌo alfateꞌe maa assa dandeennanno? (Fakketanna uudi.)

¹⁴ Maa assa dandeettatto? Rakko geltaa wodda dayyuwwatenaaꞌni bayyattoxxeꞌe. Geedhe atee gargaartaashsha qoratee sodaattoxxeꞌe. Insaꞌne atiꞌaa ‘diidallotenaaꞌninna sorakenaaꞌni gollattattoxxe’ bakkashsha kandaan. (Isa. 32:2) Addetiki jaaluwwi atikinna atishshanni rakko geltaaꞌnaanni jabaate ossaꞌneexxa qalli hiyyi. Gargaarsi hasisaake manjiꞌaa eloxxa yaane assa, ateꞌni gltaꞌneexxe rakkoꞌaa miketixxanna qajeelto uushsho affattoshsha gargaartaan.—Huj. 20:35.

TASFA

15. Tasfi Yesuusii gargaareeki hittate? Noꞌoonna gargaaraaki hittate? (Ibraawiyaane 12:2)

¹⁵ Yihowwa jabaante ossinannoshsha gargaaraaka addachchiisaaka tasfa noꞌaa uwween. (Rom. 15:13) Yesuusi buttateꞌni hedhemma wodda haranga haꞌurtitte yannaꞌni tasfi isoo gargaaree qico qalli hiyye. (Ibraawiyaane 12:2 yaansis.) Yesuusi addatemeeke kadatee assaꞌneexxi yaane Yihowwaka summa qulloonsitaaxxa egeꞌneemman. Yesuusi Anni isikibaa higaaxxanna iimatixxe Mootummaꞌni dayyuwwi isikinni welti galchaaxxa yanna halchati heqqedhaamman. Weli fakkaattaanxa, haarooxxe buttaꞌni baro barokeꞌe heꞌnannoshsha Mageni noꞌaa uwweeki tasfi, tenne Seexaniinxe buttaꞌni fedheexxi rakko geltoolenna jabaante ossinannoshsha gargaaraan.

16. Tasfi mitte dayyo jabaatte ossitaashsha gargaareeki hittate? Ise haasootteeke yaadanaaꞌni maa baratteette?

¹⁶ Ruusiya hexxaꞌneexxa Aana hiyyendaꞌneexxa dayyo Mageniinxe Mootumaki tasfi gargaaree qico hubatte. Miniinka anna iseka abindeexxi qofitti usurreen. Tinni yaane kaddeexxa yanna Aana iitta hiteen: “Duuchchinii wodda Yihowwa noꞌaa uwweeka tasfa uuddaaxxa kadhataannan, ittan hedaannan. Tinninna adde woxabeꞌnoshsha gargaarteen. Rakko tinni saxxeeꞌnaa eloxxi yanna daggaaxxa egeꞌneennen. Injifachcho Yihowwaxxe kaddaan, noꞌoonna badhaasaan.”

17. Yihowwa noꞌaa uwweeke tasfaa saadino anfeennexxa leellinshannoki hittate? (Fakketanna uudi.)

¹⁷ Maa assa dandeettatto? Yihowwa ediꞌaa noꞌaa uwwatee kako aageeka tasfa yanna uutine hedde. Haarooxxe buttaꞌni hexxetteshsha assite hedi, ittan alfitattoxxi eebba sammo atixxeꞌni caꞌa hite leellitaashsha assi. Iitta assitaattola, taꞌa geltaꞌneexxi hiini rakkonna “yannatixxenna shollaxxe” fakkaattaan. (2 Qo. 4:17) Ittani addattaattexxa yaane welekee kulataꞌe dandeettattoxxa yaane duuchcha assi. Mageni manjokee afeeka yaada egeꞌnebaake manniꞌaa Seexaniinxe buttaꞌni rakko geltaaꞌnaa dandeꞌe hedha hittee qico haꞌurtaaxxe yaane kaddeexxa hedi. Mageniinxe mootummaka tasfa uuddaaxxa harumaaxxa yaane insaꞌnenni haasoꞌandi tasfa konnee egeꞌnatixxa halcha insaꞌnexxa dammassitaaxxi hexxaan.

18. Yihowwa kako aageexxa yaane addantaanneki mayeete?

¹⁸ Iyyoobi heddo rakkoꞌni jabaate osseechchi uduma Yihowwaaꞌa iitta hiyyeen: “Ati duuchchiinxa yaane assa dandeettattoxxa, ittan heddettexxa yaane duuchcha assa ateꞌni haꞌurtabaaxxa taꞌa egeꞌneennen.” (Iyo. 42:2) Iyyoobi hiyyeeshshanni, Yihowwa kako aageexxa yaane muuxabaashsha hiini yaanenna kuta dandeettabaan. Tinni yaane noꞌonna jabaante ossinannoshsha gargaartaan. Fakkeennakeꞌe, heddo ciꞌleeyyeba marteexxi fayya gophpheexxi, adde woxxeexxa mitte manjichcho hedde. Mitti eloka ciꞌlotika beekkuma afeekinna addatemeeki ciꞌleessichchi, isee dhibbaꞌneexxi yaane maachcho kaddeexxa afeexxi hitta ciꞌloomaaxxanna kuleen. Matanga tinni manjichcho hirbangeꞌni fayyanna gophphoole fayyitaaxxa egendeemmaxxeꞌe hafuura adhdhitaan. Taꞌa ise fayyitaaxxa egendeemmaxxeꞌe jabaatte ossa dandeettaan. Weli fakkaattaanxa, butta Gennete kaddaaxxa anfeenneki addachchiissaaki tasfi jabaante ossinannoshsha gargaaraan.

19. Jabaate ossateꞌe noꞌo maa assa hasissa?

¹⁹ Rakko geltaa wodda jabaante ossinannoshsha Yihowa noꞌoo gargaaraꞌneeki; kadhati, Qaaleti, addetike jaaluwwi darreeꞌninna tasfikite kaddeexxa uundeennen. Isi qophpheesseexxa tennee yaanuwwa woꞌma kadee garinni laꞌoonfantaannole, Seexaniinxe fuggitte buttaxxi rakko baxxaaxxe barra qicoꞌni noꞌoꞌni geltaaxxe heene haꞌurtaaxxe yaaneꞌni Yihowwa noꞌoo gargaaraan.—Flp. 4:13.