“Ayyiꞌaa Ergatendinaaxxa Techchonni Fiꞌle”

1. Dhugaatixxa gammashsho alfatee maa assa hasissa? Mayee? (Isayaasi 48:17, 18)

IIMATIKI Anni noꞌoki Yihowwa noꞌoo yoꞌoshsha eeyyaꞌneen. Taꞌanna ittan ediꞌaanna gammashshoti heꞌnonnaa hasaꞌneen. (Mek. 3:12, 13) Isi, noꞌo mitte mitte gargariti hexxeexxa dandeettuwwa anfannoshsha assee dadeen. Kaddoolenna, ifiꞌaanni ifi galchinannoshsha, yookiin eloxxenna elobaaxxe yaaneꞌaa ifika seera fulcheꞌnannoxxa dandeette noꞌaa uwweebaan. (Mek. 8:9; Er. 10:23) Yihowwa dhugaatixxa gammashsho alfinannoki, isiꞌaa ergatemmanno woddanna seera isikee ajajemmanno woddate kaddeexxa egeꞌneꞌeen.—Isayaasi 48:17, 18 yaansis.

2. Seexani manji maa keda dandeꞌaan hiyye hedeemmaꞌa? Isi haasoꞌeeki yaadi dhariinke kadeexxa kokeessatee Yihowwa maa asse?

² Seexani ‘manji Yihowwa belonni gammade hedha dandeꞌaan, ittan ifiꞌaanni ifi eloqicinni galcha dandeꞌaani’ hiyye hedaamman. (Dad. 3:4, 5) Yihowwa, Seexani haasoꞌeexxi yaane dhariinxe kaddeexxa kokeessateꞌe, jallichcha kadeeki manjiinki belti heenooxxe yannaaꞌa ifiꞌaani ifi galche uudaashsha waaleen. Manjiinxi fuggoxxi galcha idaggeexxa rakko ille noꞌoxxini uundaannenxen. Wele darrenaaꞌni kinni, Yihowwaa ergatemati dhugaatixxa gammashsho alfeeke labbakenna meyyake manniki heddi fakkeenni Maxaafi Qullichchi giddo hedheen. Isiꞌaa ergatemati gammashsho alfeeke manninaaꞌni taakkaki Yesuusi Kirsitoositen. Edinsennexxi, isi Yihowwaa ergatematee melledheeki mayeete kaddeexxa uundo. Okkoꞌni, iimatike Anna noꞌokee mageneeffachcho hasissaaki mayeete kaddeexxa qoꞌninsannon. Muuxamakeꞌni, Yihowwaa ergatematee melleꞌneenneki mayeete kaddeexxa mitte mitte buutuwwa uundannon.

YESUUSI YIHOWWAA ERGATEMATEE FIꞌLEEKI MAYEETE?

3. Seexani, Yesuusiꞌaa maa uwwanno hiyyeemmaꞌa? Yesuusi maa assatee fiꞌleta?

³ Yesuusi buttateꞌni hedhemma wodda ergatema hasissaaki ayyiꞌaate kaddeexxa fiꞌla hasisseemman. Seexani, Yesuusi cuuphemeexxe shiixxooxxe yanna uduma, mittele calla isoo mageneeffatoole, buttatixxa mootumma duuchcha Yesuusiꞌaa uwwaaxxa haasoꞌeemman. Yesuusi hiisseexxi: “Ati Seexana ani ediiꞌni bayyati! ‘Mageno Yihowwaa calla mageneeffati isiꞌaan calla qullitte mageneeffachcho shiqisi’ hiyyendee borreessendeen” hiyyeen. (Mat. 4:8-10) Yesuusi Yihowwaa mageneeffatatee fiꞌleeki mayeete? Mitte mitte buutuwwa uundo.

4-5. Yesuusi Yihowwaa ergatematee fiꞌlaashsha assiteexxi mitte mitte buutuwwa heente?

⁴ Yesuusi, Yihowwaa ergatemateꞌe melledhaashsha assiteexxi taakkaxxi buuto Anna isikee afeemmaxxe jabaxxenna qiiddabaaxxe jaalalan. (Yoh. 14:31) Ittin lebendaaxxa, Yesuusi, Yihowwaa ergatemeeki isiꞌaa ergatema hasissammaxxeeten. (Yoh. 8:28, 29; Lel. 4:11) Yesuusi, Yihowwa hedhotixxe muummenna addatemeeke kadeexxa ittan arja Mageno kadeexxa egeꞌneꞌeen. (Far. 33:4; 36:9; Yaq. 1:17) Yihowwa duuchchinii wodda Yesuusiꞌni dhugaan calla haasoꞌaamman, ittan afeexxa yaane duuchcha isiꞌaa uwweemman. (Yoh. 1:14) Seexani kinni, Yihowwashshate kadebaangi, manji cubbo hujaashshanna reyaashsha asseꞌeen. Isi duuchchiinxa yaane anaa calla hiyyaꞌneekenna umo ifika calla eeyyaꞌneeke dhariinke annan. (Yoh. 8:44) Yesuusi tennee Seexaniinxa huje egeꞌnaꞌni, Yihowwaꞌni jallate Seexana fakkaata ijjenda hedaaxxe yaanebaan.—Flp. 2:5-8.

⁵ Yesuusi, Yihowwaa ergatematee fiꞌlaashsha assiteexxi wele buuto kinni, addatenshati isiꞌaa ergatema affeexxa gumma hedaten. (Ibr. 12:2) Isi Magenokee addatemeeke kadoole, Anni isikika summa qulloonsaaxxanna Daabiloosixxa fuggoxxa huje duuchcha balleessaaxxa egeꞌneemman.

MAGENEEFFACHCHO YIHOWWAA HASISSAꞌNEEKI MAYEETE?

6-7. Techchixxe yannaꞌni heddi manni Yihowwaa mageneeffata gophaꞌneeki mayeete? Noꞌo isoo mageneeffantaanneki mayeete?

⁶ Techchixxe yannaꞌni heddi manni Yihowwaa mageneeffataꞌnebaan. Buutotinna isika gammachchiisaaka adabuwwa egeꞌna gonphemmaxxeenna isi insaꞌnaa asseexxa eloxxa yaane duuchcha hubata gonphaammaxxeeten. Insaꞌne Phawuloosi dhugaa lassemmake Ateensi hedhemmake mannishshaten.—Huj. 17:19, 20, 30, 34.

⁷ Phawuloosi, Ateensi hedhammake manniꞌaa, “hedho, hafuuranna duuchchiinxa yaane manji duuchchiꞌaa uwwaꞌneeki” dhugaatike Mageno kedeexxa haasoꞌeen. Ittin lebeexxi: “Hedho alfinenneki, leleꞌminaannekinna heꞌnaanneki isixxeeten” hiyyeen. Dadatiki Mageni ‘manjiinxa sanne duuchcha mitte manjonaaꞌni dadeeki’ isote kademmaxxeꞌe mageneeffachcho isiꞌaa hasissaan.—Huj. 17:25, 26, 28.

8. Yihowwa ijjenda assabaaxxi yaane heente? Ifisi.

⁸ Yihowwa dadatike annanna iimateꞌninna buttateꞌni lumoke galchanjo kademmaxxeꞌe, hunnati manji isoo mageneeffataashsha assa dandeꞌamman. Yihowwa iitta hexxeexxa yaane ijjenda assabaan. Tenne irra isi hedheexxanna noꞌoo mitte mittenga qalbe giddixxinni eeyyaꞌneexxa leellishaaka tarja qophpheesseen. Isi heddi manni baro barokee jaalo isike kadaashsha hasaꞌneen. (1 Xi. 2:3, 4) Yihowwa herrega isika manjokee barsiinsannoshshanna manjiinke beltiꞌaa assaꞌneexxa eloxxa yaane kullannoshsha leenjisaꞌneeki tenneꞌaaten. (Mat. 10:11-13; 28:19, 20) Isoo mageneeffantannoshsha gubaꞌe noꞌaa qophpheesseen. Ittan jaalalati noꞌoo karkarsaaka iimika toꞌatalluwwa uwween.—Huj. 20:28.

9. Yihowwa manji duuchchiꞌaa jaalala afeexxa leellisheeki hoone oruwwinnite?

⁹ Yihowwa manbeꞌa assitaaxxa jaalala isixxa leellisheeki isi hedheenxa addataꞌnebaaka manna abidaꞌneeke garinniten. Tenne yaane hedde: Qeerraake bariꞌaa biilooneti laakkoꞌemaaki manni eloxxenna elobaaxxe yaaneꞌaa ifiꞌaa fulchedheeke seeraꞌni meꞌatee fiꞌleen. Kaddoolenna kunni manni hedhoti hedhaashshanna gammadaashsha assitaaxxa yaanuwwa Yihowwa baꞌlunteti uwween. (Mat. 5:44, 45; Huj. 14:16, 17) Yihowwa kunni manni weliki jaaloomaashsha, illeexxa oose nosseꞌnaashshanna jabaante hunjeexxe yaanenaaꞌni gumma alfinaashsha asseen. (Far. 127:3; Mek. 2:24) Tinni yaanuwwa, iimatiki Anni duuchchiinga manjo eeyyaꞌneexxa leellishshaan. (Zts. 34:6) Yihowwaa ergatemmannoshsha assitaaxxa mitte mitte buutuwwanna isi noꞌaa maa assaaxxa meen uundo.

YIHOWWAA ERGATEMATEE FIꞌLINAANNEKI MAYEETE?

10. (a) Yihowwaa ergatemmaannexxi taakkaxxi buuto maachcho? (Matwoosi 22:37) (b) Ati Yihowwaxxe ossuntenaaꞌni maa laꞌo alfiteete? (Faaro 103:13, 14)

¹⁰ Yesuusishshanni noꞌonna Yihowwaa ergatemmaanneki isiꞌaa qalbe giddixxa jaalala anfeennaxxeeten. (Matwoosi 22:37 yaansis.) Adabuwwa Yihowwaka egennaꞌni menannoshshanni isibaa shinqaꞌni menannon. Fakkeennakeꞌe, Yihowwa noꞌoo hittee qico ossaꞌneexxa hedde. Israꞌeelooti isiꞌaa ajajema gibaammaxxa yanna “maganneten fuggoke oranaaꞌni higge” hiyyaꞌni insaꞌnee kadhataamman. (Er. 18:11) Yihowwa noꞌo qulliyye kandeebeꞌnoxxa, yookiin buttina kandeennexxa egeꞌneꞌeen. (Faaro 103:13, 14 yaansis.) Yihowwaxxe ossunteꞌninna gammachchiisaake isike wele adabuwwaꞌni alalcha isiꞌaa baro baro ergatendattoshsha atee tirtirsitabaa?

11. Iimatike Anna noꞌokee ergatemmannoshsha assitaaxxi wele mitte mitte buutuwwa heente?

¹¹ Yihowwaa ergatematee hansaanneki isiꞌaa ergatema hasissaake Mageno kademmaxxeeten. (Mat. 4:10) Tennee calla kaddebaaki, addatenshati isiꞌaa ergatema affeexxa eloxxa gumma egenneennen. Addatenshati Yihowwaa ergatemmaannole; summi isiki qulloomaashsha assinannon, Dabiloosi dharichcha kadeexxanna kokeessinannon. Ittani anni noꞌokixxi qalbenna gammaddaashsha assinannon. Ittani techcho Yihowwaa ergatematee fiꞌlinonnole ediꞌaa baro baro isiꞌaa ergatematika tesfanna anfannon!—Yoh. 17:3.

12-13. Jeenixxenna Paamixxe hedhotixxe barannonaaꞌni maa baratteete?

¹² Oosummadenaaꞌni sanfe cimoti qicoꞌni Yihowwaa qiiddabaaxxa jabaxxa jaalala afa dandeennannon. Jeeninna Paamia hiyyendaaxxe lame godobixxe dayyuwwaka fakkeenna uundo. Insaꞌne taakkaa Maxaafa Qullichcha barata sanfeexxa yanna, wogga insaꞌnexxi 11 nna 10 temman. Hadi insaꞌneki insaꞌne Maxaafa Qullichcha barantaashsha eeyya gophaammaxxeꞌe, Jeeminna Paami Yihowwaxxe Naqaashenni Maxaafa Qullichcha barata hansaꞌnoole insaꞌnenni welti cherche meꞌa hasissaaxxa haasoonneen. Jeeni “Yihowwaxxi Naqaashe Maxaafa Qullichchakenaaꞌni anee barsiisseexxi yaane, hiriyya anxi assitaꞌneeshsha hashiishe fakkaattaaxxa yaanuwwa xuuxabeꞌnoshsha, ittan adaba baꞌabeꞌnoshsha gargaarteen” hiteen.

¹³ Heenoxxe wogguwwa uduma laminiingi dubari baꞌlisanoole kadeen. Udumiiꞌni kinni cimeeka hado insaꞌne karkarsinaꞌni qajeellisanoole kande ergatema sanfeen. Jeeni hedho isexxa udumiꞌaa wirri hite heddaꞌni, “2 Ximootwosi 2:19 keꞌni ‘Yihowwa isike kadeeka egeꞌneꞌeen’ hiyyaꞌneeshshanni Yihowwa jaaluwwa isixxa karkarsaꞌneexxa ille anxennini uudeennen” hiteen. Yihowwa isoo eeyyateenna isiꞌaa ergatematee fiꞌleeka manna karkarsaaxxi mammannoxxe yaanebaan!

14. Haasoonaannexxinna assinaannexxi yaane Yihowwaki summi xuroꞌabaashsha assitaaki hittate? (Fakketanna uudi.)

¹⁴ Hiini yaanenna Yihowwaka summa xuroossitabaashsha assatee hansaannen. Fakkeennakeꞌe, mitte eloka, arjanna gattowwaaliitika jaalo affeeten hino. Mitte barra konnee jaalo atika mitti manji fuggokishshanna addatemabaake manjishsha asse haasoꞌaꞌni summa balleessaaꞌnaa laqqetten. Maa assitatto? Isiꞌaa baassitatton. Weli fakkaataanxa, Seexaninna isixxe galcha hunda hedheeki manni, dhariinxa yaane haasoꞌaꞌni Yihowwaka summa xureessatee woꞌlaanaa wodda noꞌonna Yihowwaa uuddaaxxa dhugaate kaddeexxa yaane haasoꞌati Yihowwaa baassinannon. (Far. 34:1; Isa. 43:10) Haasoonaannexxenna assinaannexxe yaanenni, woꞌma lubbonni Yihowwaa ergatematee hansaannexxa leellinshannon.

15. Phawuloosi hedho isixxike herregaꞌni jijjiirra assati laꞌo alfeeki hittate? (Filphisiyuusi 3:7, 8)

¹⁵ Yihowwaa gammachchiisateenna isiꞌaa woꞌma kadeeke orinni ergatematee hedho noꞌoxxeꞌni jijjiirra assa hansaannen. Fakkeennakeꞌe, hawaarya Phawuloosi, Kirsitoosii hordofateenna Yihowwaa ergatematee hiyyeexxi ardi giddo afeemmaxxa lumoxxa bakka waalatee fiꞌleen. (Gel. 1:14) Tennenaaꞌni kexxeexxa, eloxxa hedhonna Kirsitoosinni iimateꞌni galchatixxa mabite alfeen. Phawuloosi Yihowwaa ergatematee murteessedheexxe murteꞌni ijjenda unsha hiyye egeꞌnebaan. Noꞌonna unsha hinaaꞌnon.—Filphisiyuusi 3:7, 8 yaansis.

16. Juliyaxxe hedhotixxe barannonaaꞌni maa barachcho alfitinee? (Fakketanna uudi.)

¹⁶ Hedho noꞌoxxeꞌni Yihowwaxxe ergachchoꞌaa lumoxxa bakka uunaannole, taꞌanna ittan ediꞌaa gammachchiissaaxxa hedho hedha dandennannon. Juliya hiyyendaꞌneexxe dayyoxxa hedhotixxa baranno uundo. Juliya dhugaa barattebaa edi darre, shiixxooxxe hexxe cherche giddo koꞌwaareti faarsitaamman. Mitti oppeeriinke muuziqiki ogeessi ise dandeette affeexxa uude isee leenjiseen. Shiixxoxxe yanna giddo Juliyaki summi adda egeꞌnemaꞌni meꞌeen, ittan lumolla muuziqiinke galmuwwaꞌni muuziqa geebbaamman. Mitte baꞌla qicoꞌni egeꞌnemeeke muziqiinke barachchoti mineꞌni baratateꞌni hexxeeꞌnaa, mitti isenni barataꞌneeki belti Mageniinki summi Yihowwate kadeexxa iseꞌni kuleen. Shiixxoxxe yanna uduma Juliya torbateꞌni lamele Maxaafa Qullichcha barata saffeen. Yannati uduma, muuziqiinxe barachchoxxa oge baratati irra, hedho isexxeꞌni Yihowwaxxe ergachchoꞌaa taakkaxxa bakka uwwatee murteessexxeen. Tennee murte murteessedha iseꞌaa shollaxxemmabaan. Juliya; “heddi manni dadumiki alfennexxa dandeette faangeessenneshsha haasoꞌaꞌnemman. Kaddomaleꞌe, ani kinni woꞌma hedhonni Yihowwaa ergatemonnaa hasaannan” hiteen. Iitta hexxeexxa murte murteessexxeexxe 30 wogga caaldaaxxe yanna uduma Juliya maa hite? Taꞌa sammotika naꞌgeꞌa afeennen, ediꞌaa Yihowwa qalbe anxixxa halcha duuchcha wonshaaxxa addataannen” hiteen.—Far. 145:16.

YIHOWWAA ERGATEMA ITTIN SUFFE!

17. Heꞌnennexxi yanna muuxami shiqeexxe kada, Magenokee ergatematee fiꞌleekanna fiꞌlebaaka manna tuqqaaki hittate?

¹⁷ Heꞌnaanneki muuxami shiqeexxe yannaꞌniten. Hawaarya Phawuloosi: “Shiixxoxxe yannate maleꞌe dagaꞌneeki isi dagaan, ittan turabaan” hiyye borreesseen. (Ibr. 10:37) Iitta hiyyo maa hiyyoteta? Manji Yihowwaa ergatematee, yookiin ergatema gophatee fiꞌlatee gatteexxi yanna harumaaxxen. (1 Qo. 7:29) Tenneꞌaa dandeessissee qicoꞌni duuchchiingi tarkaaffe adhdha hasissaan. Ittan Magenokee ergatematee fiꞌlinoonnole rakko gelteeꞌnaa jabaate ossanna hasissaꞌneexxe kaddoole ossinaanneki “shiixxoxxe yannaa” calla kaddeexxa egenneennen.

18. Yihowwanna Yesuusi noꞌo maa assinonnaa hansaꞌne?

¹⁸ Yesuusi hordoofoole isixxi isoo hordofa saffaashsha calla kaddebaangi, hordofa ittin suffaashsha hasaꞌneen. (Mat. 16:24) Tenneꞌaa heddo woggaa Yihowwaa ergatemmeenneke kandonnolenna ergatema uurrisa gophatee murteessedha hasissaan. Isiꞌaa ergatematee murteesseꞌnennexxe murteshsha hedhatee jabaatanna hasissaan. Itta assa shollaxxe kada gophphaaxxi hexxaan. Kaddoolenna, taꞌanni hitta hexxeexxa eebbanna gammashsho alfa dandeennannoxxa hedde!—Far. 35:27.

19. Jiinixxe hedhotixxe barannonaaꞌni maa barantanno?

¹⁹ Mitte mitte manjoꞌni Yihowwaa ergatema jabaxxa yaane tolcha assatishsha fakkaattaꞌneen. Ati dargaggeessa kaddootole, Yihowwaa ergatendettexxee mitti mitti manni assaꞌneexxe yaanenaaꞌni gattattochcho fakkaattaꞌnee? Mitti Jiini hiyyemaaki dargaggeessi dayyi iitta hiyyeen: “Yihowwaxxe Naqaashe kada usureme hedhatishsha aneꞌni fakkaattaamman. Ani gubaꞌeteꞌninna ergatenshateꞌni yanna saꞌissanno wodda, welti nophphineennaxxi heddo oose kinni bukki hite ittaꞌni, haꞌwitaꞌninna burraaqqaꞌni, ittan dubarteti yanna saꞌissitaꞌni yookiin elobaaxxa viidiyotixxa geeme geebbaꞌni gammaddaꞌni hexxaꞌneechcho aneꞌni fakkaatteemman.” Tinni hedino Jiini maa kadaashsha assite? Iitta hiyyeen: “Lame hedho hedha safennen, yannatee gammadonnolenna gammashsho itti udumiiꞌni baxxeen. Waaleennaxxa Maxaafi Qullichchiinxa dhugaa udumiiꞌni heda safennen. Ittan Yihowwaa qalbe woꞌmaꞌni ergatematee murteessedhennen. Eettene yannanaaꞌni safe Yihowwa kadha anxe duuchchiinxe hiissichcho uwweechcho fakkaattaꞌneen.”

20. Maa assatee mudhdha hasissa?

²⁰ Mitti faarsanji Yihowwaa iitta hiyyee faarseen: “Dallaꞌiinxe baxxe atixxeꞌni hedhaashsha fildeettekinna shiqisseetteki manji gammadeeken.” (Far. 65:4) Iyyaasu: “Aninna maate anxi kinni Yihowwaa ergatammannon” hiyye murteessedhemmashshanni noꞌonna Yihowwaa ergatematee murteesseꞌno!—Iya. 24:15.