Noꞌaa “Mageniinbaa Shiqa Eloxxen!”

1-2. (a) Mitti manjinni shiqike jaalo kadatee maa assa hasissa? (b) Tenne qoꞌneꞌni mariꞌantaannexxi yaanuwwa maachcho?

EETAATTEKA Jaalo affeette? Isinni jaalo kaddetteki hittate? Dedha isinni yanna saꞌissitattoxxi, mitte mitte isixxe hedhoꞌni gelteexxa yaanuwwa haasoottinaaxxinna isi eeyyaaxxanna gibaaxxa yaane egendattoxxi hexxaan. Kunni manji ati eetaatteka elolla adabuwwa afeexxa hubattetten. Okkoꞌni konnee jaalo eetaꞌni metetten.

² Mitti manjinni jaalo kada yannanna woꞌlaancho laqqaaxxe yaanen. Mageno Yihowwanninna shiqike jaalo kadatee assa hasissaaxxi tennen weli fakkaattaanxe yaanen. Tenne qoꞌneꞌni Mageni noꞌokibaa shiqa dandeennannoki hittate kaddeexxanna iitta assati alfinannoxxa laꞌuwwa mariꞌantannon. Edinsennexxi eloke jaalo noꞌoke Yihowwaabaa shiqa eloxxen hinaanneki mayeete kaddeexxa uundo.

3. Yihowwabaa shiqati alfinannoxxe laꞌuwwaꞌni alalcha hasisseeki mayeete? Fakkeenniki ifisi.

³ Yihowwabaa shiqa eloxxe kaddeexxa atinna addattattoxxi egeꞌnendeexxen. Kaddomaleꞌe, isibaa shiqa hittee qico laꞌo affeexxa alalcha isibaa shiqa ittin ediꞌaa sunfannoshsha assitaan. (Far. 63:6-8) Fakkeennakeꞌe, bisi noꞌokixxe fayyunteꞌaa kaddaaxxa sagaluwwa ita, isipoorte huja, adda diiphanna wodeꞌe adda haꞌwa noꞌaa eloxxe kaddeexxa egenneennen. Kaddomaleꞌe, heddi manni tennee yaanuwwa lummise uuda gophaammaxxeꞌe fayyunte ifixxeꞌni balalli hiyyaan. Kaddoolenna, fayyunte ifixxa heqqedha noꞌaa maa laꞌo affeexxa hendennexxe qixxeꞌni, iimiiꞌni kulendeexxa tennee yaanuwwa jabaante hordonfannon. Weli fakkaattaanxa, Yihowwabaa shiqa noꞌaa laꞌo affeexxa egennannoxxi hexxaan. Isibaa shiqati alfinannoxxe laꞌoꞌni alalchinaannexxe kaddoole kinni jaali noꞌokibaa shiqa ittin ediꞌaa sunfannon.—Far. 119:27-30.

4. Faaro 73:28 ki borreessanji maa hiyyeemmaꞌa?

⁴ Faaro 73:28 yaansis. Faaro 73 soxxi Asaafi yookiin isixxe gosa giddiiꞌni mitti manji borreesseexxe heddo faaruwwa giddiiꞌni mitteten. Faarsanji kunni Yihowwake mini giddo faarsaashsha mellemeemmake Lewaawichchon. Isinna heddo wogga Yihowwaa addateme ergatemaꞌni tureeke manjo kada gopheebaan. Taꞌanna kunni faarsanji Mageniinbaa shinqeeshshanni hedha isiꞌaanna ittan welekee eloxxe kaddeexxa hedaamman. Mageniinbaa shiqati mitte mitte alfinannoxxi laꞌuwwa maachcho?

“MAGENIINBAA SHIQA” GAMMANDANNOSHSHA ASSITAAN

5. (a) Yihowwabaa shiqa gammandannoshsha assitaan hinaanneki mayeete? (b) Fakkeenna 2:6-16 qicoꞌni kulendeeshsha Yihowwaki beekkumi atee gargaareekinna heqqeeki hittate?

⁵ Yihowwabaa shinqaꞌni menennexxe qixxeꞌni gammandeenneke kandannon. (Far. 65:4) Tinni dhugaate kaddeexxa leellishshaaxxi heddo yaanuwwa hexxeen. Qaale isixxi giddo afemaaka eloka beekkuma hujeteꞌni hosinsanno wodda laꞌo alfinannon. Kunni beekum kinni fuggoxxe yaaneꞌni eꞌyinabeꞌnoshshanna jabaka dedha hunjabeꞌnoshsha heqqaan. (Fakkeenna 2:6-16 yaansis.) Maxaafi Qullichinna “beekkuma alfaaki, jabaxxa qalbeffachcho ifixxe assedhaaaki manji gammadeeken” hiyyaꞌneeki tenneꞌaaten.—Fak. 3:13.

6. Faarsanji gammashsho gopheeki mayeete?

⁶ Dhugaaten, Yihowwange jaalo kadeeki manji yaadaaxxi hexxaan. Faaro 73 ki borreessanji qajeellichcha kadebaaka yaada hedeexxa yanna gammashsho ifixxa gopheen. Isi Magenokee ajajemaꞌnebaaka yookiin Mageniinka seera ulfeessaꞌnebaaka fuggoka manna hedeexxa yanna aaremman ittani insaꞌneenna gaabbeemman. Fuggichchanna hollaameeyye kadeeki manni dureeyye kadeexxa, fayyati hedhaꞌneexxanna rakkonde hinaaxxi yaane insaꞌneꞌni geltaꞌnebaashsha asse dedhiki hedeemman. (Far. 73:3-7, 12) Faarsanji kunni Yihowwaa ergatematee assaꞌneexxi woꞌlaancho laꞌo affebaachcho isoꞌni fakkaatteemmaxxeꞌe yoꞌoshsha yaadeemman. Isinna: “Dhugaandinni qalbe anxa caꞌa assedhenneki, qullichcha kadeennexxa leellishate anga anxa anshedhenneki tolangen” hiyye yaado isixxa ifiseen.—Far. 73:13.

7. Yaandanno wodda gammashsho higgeeni alfatee maa assa dandeennanno? ( fakke uudi.)

⁷ Faarsanji yaaddo isoo cuqurtoossitoꞌaa waaleemmabaan. Tennee irra gammashsho higgeeni alfatee mitte mitte yaane asseen. Isinna Yihowwa hedino isixxa toggi assaaxxe bakkabaa, “Mageniinke lumoke minibaa eꞌyeen.” (Far. 73:17-19) Yaandannoxxa yanna, noꞌoki eloki jaali Yihowwa, noꞌoo yaadisseexxa yaane egeꞌneꞌeen. Isi noꞌoo akeekoꞌaa kadhantaannole, ittan Maxaafi Qullichchii darreeꞌninna gubaꞌeti darreeꞌni isi noꞌaa uwwaꞌneeka gargaarsa adhdhinaannole, yaaddoteꞌni jabaante ossinannoka giddika nageꞌa alfinannon. Yaaddotenaaꞌni kexxeexxa baala gonpheennechcho noꞌoꞌni fakkaattaa wodda Yihowwa noꞌoo jajjabeessaan ittan dayyeessaan.—Far. 94:19.a

“MAGENIINBAA SHIQA” TAꞌA GAMMASHSHOTI HEꞌNANNOSHSHA, EDIꞌAA TASFA ALFINANNOSHSHA ASSITAAN

8. Mageniinbaa shiqa noꞌaa eloxxe kaddaaki weli haranga hasisaaki oruwwi hoonte?

⁸ Maginiinba shiqa noꞌaa laꞌo affeen hinaanneki weli haranga hasisaaki lami oruwwi hedheen. Taakka, Yihowwanni welti jabaxxa jaalunte anfoonnole taꞌanni gammashshoti hedha dandeennannon. Langa, ediꞌaa kinni addachchiisaaka tasfa alfinannon. (Er. 29:11) Tennee laꞌo meen baꞌlinse qoꞌninso.

9. Yihowwabaa shiqa gammashshoti heꞌnannoshsha assitaaki hittate?

⁹ Yihowwanni welti jabaxxa jaalunte anfoonnole taꞌanni gammashshoti hedha dandeennannon. Techchixxe yannaꞌni Mageni hedheexxa addataꞌnebaaki heddi manni dademeenneki tolange kaddeexxa, ediꞌaa kinni manjiinxi sanne duuchchi baxxaani hiyyee hedaꞌneen. Kaddomaleꞌe, Maxaafi Qullichchiinxe barachchonaaꞌni, Mageni “hedheexxanna isoo qalbe mitten halsaaka badhaasaake kadeexxa” konkeennen. (Ibr. 11:6) Dademmeenneki iimatike anna noꞌoke Yihowwaa ergatemmonnaate kaddemmaxxeꞌe, taꞌixxe yannaꞌninni gammashshoti hedha dandeennannon.—Zed. 10:12, 13.

10. Faaro 37:29 xxe hundaayyeshsha, Yihowwaꞌni addataaki manni ediꞌaa maa alfa?

¹⁰ Heddo manjoꞌni hedho taꞌa hedhaꞌneexxe calla fakkaattaammaxxeꞌe, hujeteꞌni, aadhe iꞌlateꞌninna soodiꞌaa kaddaaxxa yaane caꞌmateꞌni calla miꞌlachcho assaan. Insaꞌne Mageni manjiinke beltiꞌaa uwweeka tasfa egennebaan. Wele darrenaaꞌni kinni, Mageniinki ardi adde assedhaꞌneeki Yihowwaaten. (Far. 25:3-5; 1 Xi. 6:17) Noꞌo addantaanneki noꞌobaa shiqaꞌneekenna dhugaatika tasfa noꞌaa uwweeke Magenoꞌniten. Ediꞌaa Gennete giddo isoo bara baro mageneeffatatika tasfanna anfeennen.—Faaro 37:29 yaansis.

11. Mageniinbaa shiqa noꞌaa laꞌo affeeki hittate? Tinni yaane isoꞌni maachchi laqemaashsha assita?

¹¹ Mageniinbaa shiqa heddo orinni noꞌaa laꞌo affeen. Fakkeennakeꞌe, Yihowwa aadde aageꞌe isibaa shiqaake manjixxa cubbo gattowwaal hiyyaaxxa haasoꞌeen. (Isa. 1:18) Tenneꞌaa edo hunjennexxe cubboxxe buutonni hangulli hineꞌe yaandaꞌni heꞌnannoxxi buuto hexxebaan. (Far. 32:1-5) Ittan Yihowwaa gammachchiinsanno wodda noꞌonna gammandannon. (Fak. 23:15) Mageniinke jaalo kadati alfinannoxxa wele eebbanna atinna heddattoxxi egeꞌnendeexxen. Mageniinbaa shiqqetteshanni hedha dandeettattokita hittate?

“MAGENIINBAA SHIQQETTESHANNI” HEXXATTO QICO

12. Mageniinbaa shiqatee maa assitteette?

¹² Cuuphendeetteke Kirsitaana kaddoottole, Yihowwabaa shiqatee heddo jabaxxa yaane assiteetten. Fakkeennakeꞌe, Mageno Yihowwaanna Yesuusi Kirsitoosii uuddaaxxa heddo dhugaa baratteetten, edo hujjettaxxe cubboꞌaa aadde aaggeetten. Yihowwaꞌni jabaxxa adde affeettexxa leellishsheeten, ittan fedhii isixxenni weli aaga garinni hedhatee jabaxxa woꞌlaancho aassiteetten. Kaddoolenna Maginiinbaa shiqatee tenne yaanuwwa assa ittin sufa hasissaan.—Qol. 2:6.

13. Yihowwabaa shiqa ittin ediꞌaa sunfannoshsha noꞌoo gargaartaaxxi sase yaanuwwa heente?

¹³ Yihowwabaa shiqa ittin ediꞌaa sunfannoshsha noꞌoo gargaartaaxxi yaanuwwa maachcho? (1) Maxaafa Qullichcha yaansisanna qoꞌnisa ittin sufa hasissaan. Iitta assinanno wodda herregi noꞌoki Mageno uuddaaxxa hundaayye kaddeexxa barachcho calla egeꞌnatenaaꞌni, caaldeexxa yaane egeꞌnatee woꞌlaanate kada hasissaan. Mageni noꞌaa afeeka yaada egeꞌnateꞌni, ittan Qaale isixxeꞌni hedheeka hundaayyetika seeruwwa hordofatee woꞌlaannannon. (Eff. 5:15-17) (2) Isi noꞌaa jaalala afeexxa leellishshaaxxa heddo yaanuwwa hedati adde noꞌoxxa jabeessedha hasissaan. (3) Yihowwa eeyyabaaxxa yaanuwwa giba ittin sufanna elobaaxxa yaane hujaake manninni jaalooma gophatee xexxeꞌata hasissaan.—Far. 1:1; 101:3.

14. Taakkaka Qorontoosi 10:31 xxe hundaayyeshsha, barra barrandeꞌni Yihowwaa gammachchiisatee assinannoxxi mitte mitte yaanuwwa heente? (Fakketanna uudi.)

¹⁴ Taakkaka Qorontoosi 10:31 yaansis. Yihowwaa gammachchiissaaxxa yaanuwwa assa haranga hasissaaxxe yaanen. Isoo gammachchiisatee ergatensha fulanna gubaꞌe mara calla kaddebaaki, caaldeexxa yaane assa hasissaan. Tinni Yihowwaa gammachchiissaaxxi yaanuwwa barra barrandeꞌni hedho noꞌoxxeꞌni assinannoxxe yaanuwwan. Fakkeennakeꞌe, duuchchiinxe yaanenni addatemmeenneke kandanno woddanna anfeennexxe yaanenaaꞌni welekee uunanno wodda Yihowwaa gammachchiinsannon. (2 Qo. 8:21; 9:7) Hedho uwwa isixxe kaddemmaxxeꞌe, tenne uwwa lumminse uundonnanna hasaꞌneen. Miketike kadeeke orinni itatinna haꞌwati ittan seeriinke kadeeke wele oruwwinni fayyunte ifixxa karkarsedhati hedho uwweeke annibaa shinqannon. Noꞌoꞌni heenoonxe fakkaataaxxi Yihowwaa gammachchiisatee assinaannexxi yaanuwwa isi edo eeyyemmannoshsha assitaan.—Luq. 16:10.

15. Yihowwa wele manjo abindonnaa hasaꞌneeki hittate?

¹⁵ Yihowwa qulliyyeteenna kaddo cubbaaleeyyetee arja Magenon. (Mat. 5:45) Isishshanni noꞌonna arja kandonnaa hasaꞌneen. Fakkeennakeꞌe, ‘ayyika summanna balleessinabeꞌnoke, lola hansabeꞌnoke, . . . manji duuchchiꞌaa woꞌma kadee garinni baꞌlunte leellinshaanneke’ kandannon. (Tit. 3:2) Tenneꞌaa mitti manji Yihowwaxxe Naqaashe kada gopheenxe calla ifi dunke isoo tuffantaaꞌnon. (2 Xi. 2:23-25) Manji duuchchiꞌaa duuchchinii wodda arjakenna baꞌlake kadati Yihowwabaa shinqannon.

GUGGUFANTANNO WODDANNA “MAGENIINBAA SHIQA” DANDEENNANNON

16. Faaro 73 ki borreessanji heenoxxe yanna uduma maa hiyye heda safeemmaꞌa?

¹⁶ Heenoxxe yannan kayyiꞌaa Yihowwaxxi jaalala aniꞌaa hasissaake manjobaan hite heda saffoottolenaꞌa? Iimiiꞌni uundennashshanni Faaro 73 ke borreessanjoꞌni iitta hexxeexxi yaane gelteemman. Isinna yaaddoti: “Lekka anxi orakenaaꞌni fula shiqqeemman, xale ibanna shiqeennan” hiyyeen. (Far. 73:2) Faarsanji ifixxe hedinonaaꞌni kexxeexxa, Yihowwa edo ‘qaraarfate’ ‘baꞌlise heda dandeꞌa gopheen’ ittan “heda dandeꞌabaake biniinchishsha” kadeen. (Far. 73:21, 22) Hujeexxe cubbonaaꞌni kexxeexxa, Yihowwa isoo eeyyaꞌnebaashsha yookiin cubbo isixxa gattowwaali hiyyabaachcho isoꞌni fakkaattee?

17. (a) Faarsanji kunni adde woxoolenna maa asseemmaꞌa? (b) Fakkeenna isikenaaꞌni maa barantanno? (Fakketanna uudi.)

¹⁷ Faarsanjo konneꞌni Yihowwa isoo eeyyaꞌnebaachcho fakkaattoolenna, tinni hedino yannatinxe calla kada gophpheebaan. Faarsanji adde woxeexxe kaddoolenna faaro isixxeꞌni borreesseeshshanni, Yihowwabaa shiqa hasissaaxxa hubateꞌeen. Iitta hiyyeen: “[Yihowwaa] taꞌa kinni duuchchinii wodda atinni welti hedhennen, atinna middixxa anga anxa abiddeetten. Gorsi atikenni anee akeekkatton, udumiiꞌninna ulfinna aneꞌni oddeessitatton.” (Far. 73:23, 24) Noꞌonna gonphanno wodda yookiin adde wonxanno wodda Yihowwa noꞌoo jabeessoꞌaa isibaa uuda hasissaan. (Far. 73:26; 94:18) Yannatee lekka noꞌoxxi orakenaaꞌni fuldoolenna, Yihowwa “gattowwaali hiyyatee qophphoꞌeeke” kadeexxa egenneennaxxeꞌe isibaa higa dandeennannon. (Far. 86:5) Giddiiꞌninni adde wonxe yaandanno wodda Mageniinbaa shiqa hasissaan.—Far. 103:13, 14.

BARO BAROKEE “MAGENIINBAA SHIQA”

18. Yihowwabaa shiqa gabala affeexxe yaanebaan hinaanneki mayeete?

¹⁸ Yihowwabaa hitte qico shinqannoxxanna hitte qico isoo egeꞌna hasissaaxxa uggendeexxi gabala hexxebaan. Maxaafi Qullichchi Yihowwaki ori, beekkuminna egeꞌna isixxi “dhaqqanbabaaxxe” kaddeexxa haasoꞌaan.—Rom. 11:33.

19. Faaro 73 ediꞌaa maa alfinannoxxa haasootta?

¹⁹ Faaro 73 ki borreessanji Yihowwabaa shiqa itti sufa hasissaaxxa woꞌma qalbenni addataamman. Asaafi yookiin gosa isixxenaaꞌni mitti manji borreesseexxi Faaro 79:13 “Noꞌo ardi atiki kaloteꞌni bobbaasseeteki baro barokee atiꞌaa galata shiqinsaannen, ilatenaaꞌni ilati qicoꞌninna atee janjaannen” hitaan. Atinna Mageniinbaa shiqa ittin suffottole isi atee baro barokee badhaasaaxxa addat. Faarsanjiinshanni “Mageni kinni baro barokee qalbe anxixxe rassanna qoobbo anken” hiyya dandeettatton—Far. 73:26.