Qalli Hitaatte?

Tenne woggaxxe Heqqecatixxe Xellephoꞌni hedheeka yaada adda yaansisseette? Eloxxen, buttiiꞌni hedheeke qortumuwwiꞌaa hiissichcho hiissa dandeettattoxxa uudi:

Yihowwaꞌa ulfeessinannoshsha noꞌoo tirtirsitaaxxi yaane maachchoke?

Iitta assinaanneki isoo qalbe giddixxenni ulfeesinaannaxxeenna eenannaxxeeten. Ittan noꞌo isoo ulfeesinaanneki welinna isoo egeꞌnoꞌa hansaannaxxeeten.—w25.01, qoola 3.

Mitti manji noꞌoo mufachchiisaa wodda gattowwaali hinannoke manna kandannoki hittate?

Qalbe noꞌoxxeꞌni laqendaꞌneexxa yaane bashshi hiyya gonphonnolenna, aarenna halo abixxa waala kinni yaadiki miidhemmabeꞌnoshsha assitaan.—w25.02, deero 15-16.

Hordofeessi Marqoosi dargaggeeyye dayyuwwaꞌa eloke fakkeenna kadaani hinaanneki mayeete?

Marqoosi ergatenshatixxa maganne adhdhateꞌe fedhiitikemman. Marqoosi gelteexxe yaanenaaꞌni kexxeexxa miidhemoolenna ittan yaadoolenna, ergatenshatenaaꞌni udumiꞌaa higeemmabaan. Phawuloosininna wele galfateeke manninni afeemmaxxa mittunte jabeessedheemman.—w25.04, qoola 27.

Yesuusi “summa atika insaꞌnaꞌa egeꞌnisheennen” hiyye kadhateeki mayeete? (Yohaannisi 17:26)

Hordofoole isixxi Mageniinke summi ayyete kadeexxa edonni egendeemman. Kaddomaleꞌe, Yesuusi insaꞌneꞌni kulaammaxxi yaane summi udumiiꞌni hexxeexxe Mageniinxe ayyunten; insaꞌne egennoꞌa haseemmaxxi yaane, yaada, hujenna adabuwwa Mageniinken.—w25.05, deero 20-21.

Mike ifixxa egenneenneke kandonnole, heene yaane hubantanno?

Duuchcha yaane egennebeꞌnoxxa hubantannon. Fakkennakeꞌe, butta tenneki muuxami haanote kadeexxa yookiin Yihowwa ettenee yanna maa assaaxxa egennebeꞌnon. Ittani soodo kaddaaxxa yaane yookiin Yihowwa hittee qico noꞌo egeꞌneexxa egennebeꞌnon.—w25.06, deero 15-18.

Mitte qoꞌnetixxe barachchonaaꞌni yookiin ardiinke haasoꞌanaaꞌni barachcho alfinannoshsha noꞌoo gargaartaaxxi yaane maachcho?

Ifi iitta hine qora dandeennannon: ‘Caqasaꞌneeka manna addachchiisateꞌe shiqeeki tarji hoonte? Barsiisanno wodda laꞌoonfata dandeꞌannoki eloki fakkeenni hedhee? Konne yaada laqeele laꞌoonfataaki ayyete?’—w25.07, qoola 19.

Yihowwaxxa gattowaali uuddaaxxa isi Daawitii abideeke oranaaꞌni maa barantanno?

Daawiti jabaxxa cubbo hujoolenna, isi dhugaati aadde aageexxa yanna Yihowwa cubbo isixxa gattowaali hiyyeꞌeen. (1 Ne. 9:4, 5) Mageni mittele cubbo gattowwaali hiyyoole, cubbo hujeeke manjoꞌni tarkaaffe adhdhabaan yookiin wele woddiꞌaa massedhabaan—w25.08, qoola 17.

Maxaafa Qullichcha barsiissaatteke manjoꞌni mitti yaadi haꞌuroole maa assitatto?

Maxaafa Qullichcha barsiissaaꞌnaꞌa, mitti yaadi barsiissaatteke manjoꞌni haꞌuroole, waalde saxxeꞌe, wele wodda higgeꞌe uudatee barra abidde.—w25.09, qoola 24.

Maxaafi Qullichchi cubbo “dedhisatixxa hunna” affeexxa haasoꞌaan. (Ibr. 3:13) Dedhissaaki hittate?

Cubbo elobaaxxa yaane hunjannoshsha noꞌoo tirtirsitaan. Mageni noꞌo eeyyaꞌneexxa higge higgeen mammannoshsha assatinna dedhissaan.—w25.10, qoola 16.

Kadha noꞌoxxi qalbe giddixxe kaddaashsha gargaartaaxxi sase yaane heente?

(1) Kadhantanno wodda Yihowwake adabuwwaꞌni miꞌlachcho assinannon. (2) Gattowwaali noꞌoxxi hasissaake manjiꞌa maa assa hasissaaxxanna gattowwaali hineennexxa kullaanneki mayeete kaddeexxa hendannon. (3) Qeeraaxxe yaannaꞌa kadhata dandeennannon. Tinninna qalbe noꞌoxxi giddo hexxeexxa yaane Yihowwaꞌni farri assine haasoonnannoshsha gargaartaan.—w25.10, deero 19-20.

Woggati lummexxeexxa dayyuwwa gargaarrannoki hittate?

Insaꞌneba mine mara yookiin bilbila dandeennannon. Insaꞌnenni ciꞌlotixxa qaxaro maranna dandeennannon. Yookiin woggati lummexxeexxe dayyuwwan gargaarti hexxeexxa erigatenshatixxa huje huja dandeennannon.—w25.11, deero 6-7.

Kirsitaaninxi jila Yihowwa ulfaataaxxe kaddaashsha haranga hasissaaxxi yaane maachcho?

Motumma fulchiteeka hoone seeriꞌa ajajemme. Jilatixxinna sagale indaaxxi bakka Mageniinke manfasixxi gumma leellitaaxxe kaddaashsha asse. Oddoonotinna miketike kadde, ittan Maxaafi Qullichchi kiphabaaxxa yaanuwwa assitinebaxxana kokke. Jilatee qophpheeffatinaa wodda adda mariꞌatte.—w25.12, deero 21-24.