Cindeexxi Dayyuwwa—Gubaꞌeteꞌe Lumoxxa Laꞌo Affeen
“Dargaggumma hedhenna wodda hujeennaxxa yaane udumiꞌa wirri hiyyeꞌe hedanno wodda, Aneꞌe manbeꞌa assitaan. Taꞌa kinni cimo aneꞌe buttaꞌa rabbeꞌen.”—Kani 83 woggaxxi geercho.
Dedha atinna cimotenaaꞌni kexxeexxa gophphaꞌni metattoxxi hexxaan. Heddo woggaaꞌa Yihowwaaꞌa addatenshati ergatendoottolenna, cimotixxe buutonni daggeexxe gonphenaꞌni kexxeexxa ifiꞌaa elobaaxxa hedino affattoxxi hexxaan. Fakkeennakeꞌe, dargaggummati wodda hujjaattaxxa yaane taꞌa hujjaattexxe yaaneni hokkokkissattoxxi hexxan. Atinna iitta hiteꞌe heddaattole, tennee hedino injifattattoshsha gargaartaaxxi yaane maachcho?
YIHOWWA ATENAAꞌNI HASAꞌNEEXXI YAANE MAACHCHO?
Ifi iitta hiteꞌe qori, ‘Yihowwa ani assonnaaꞌa hasaꞌneexxi yaane maachcho?’ Zedaagimi 6:5 keꞌni “Atinna Mageno atika Yihowwaꞌa, woꞌma qalben, woꞌma lubboninna woꞌma hunnani eeyyi” hiyyaꞌneeki yaadi ateꞌe jajjabeessaan.
Tinni xiqse hitaꞌneeshshanni, Yihowwa atenaaꞌni hasaꞌneexxi yaane; atixxe woꞌma qalbeni, lubbonninna hunnanni isiꞌa ergateendottaaten. Tennee egeꞌna, hedho atixxa welinxenni hokkokkisa yookiin—dargaggummati wodda hujjaattaxxa yaane taꞌa hujjaattexxe yaanenni hokkokkisa waaldattoshsha gargaartaan.
Tennee yaane heddi: Dargaggumma hexxetta wodda, Yihowwaꞌa maa assiteettaꞌa? Dargaggumma hexxeetta wodda hunna atixxi dandeetteexxa yaane duuchcha Yihowwaꞌa uwwa gophpheebexxon. Taꞌa Yihowwaꞌa uwwa dandeettattoxxi yaane machcho? Taꞌanna assitattoxxi yaane hexxetteke jeejaꞌni hundeessendeexxen. Atinna konne garinni heddaattole, Yihowwaꞌa taꞌa uwwateꞌni hexxettexxi yaane, dargaggummati wodda uutaattaxxe yaanenni qixxete kaddeexxa egeꞌna dandeettaton. Dargaggummati wodda hunna atixxi dandeetteexxa yaane Yihowwaꞌa uuteettashshanni, taꞌanna hunna atixxi dandeetteexxa yaane uwwateꞌni hexxeten.
Yihowwa dargaggumma haxxinemma woddanna kaddo taꞌanna cimotike baroꞌni assitinaꞌneexxa yaane uudaꞌneeki qixxenden
WELE GARGAARA DANDEETTATTON
Taꞌa kinni woggati lummedha affeexxa wele laꞌo uundo: Cimo atixxa gonphetishsha uudati irra, wele gargaartattoka oruwwa halsi. Ati cimeeke Kirsitaana kaddettaxxeꞌe, dargaggumma hexxetta wodda assitaattabaaxxa mitte mitte yaanuwwa taꞌa assa dandeettatton. Fakkeennakeꞌe, konneechchinni buttiꞌaa hexxeexxa yaanuwwa huja dandeettatton.
Hedho atixxeꞌni baratteettexxa yaane welekeꞌe kuli. Konnechchinni buttiꞌa hedheeka Maxaafi Qullichchi giddo borreessemeeka yaaduwwa hedi:
Mootichcha Daawit: “Mitte yanna ani dargaggeessakemman, taꞌa kinni cimeennen, kaddomaleꞌe, qulliyye hunendaaꞌnaꞌa, oose isexxinna sagale kadhattaaꞌnaꞌa uudebeꞌnon”—Far. 37:25.
Iyyaasu: “Taꞌa yoona, reyannoxxi yanna shiqqeꞌeen, Mageni haꞌnooki Yihowwa, haꞌnoꞌaa kako aageexxe eloxxe yaanenaaꞌni mittetinna muuxendebaangi gatteebaaxxa woꞌma qalbenninna woꞌma lubbonni egendineꞌeen. Duuchchiinxi yaane haꞌnoꞌaa muuxendeꞌeen. Haasoꞌeexxe yaanenaaꞌni muuxemebaangi gateeki mitti jechchinna hedhebaan.”—Iya. 23:14.
Dedha atinna weli fakkaattaanxa yaane haasootteettexxi hexxaan. Daawitinna Iyyaasu haasoonneexxi yaane hedho ifixxeꞌni uundeexxe yaanen. Buutotinna tinni addatendeexxi Yihowwaxxi erganna haasootteexxi yaane, qeerraake bariꞌa uundeexxenna lanqeexxe yaane kaddeemmaxxeꞌe jabaxxa laꞌo affeexxen.
Atinna qeerraake bariꞌaa, Yihowwaꞌa addateenshati ergatendaꞌni turtoottole, Yihowwa atiꞌaanna kadde welekeꞌe asseexxi haasoottattoxxi baca yaane hexxaan. Yihowwa arda isika eebiseeꞌnaꞌa uuddeettexxi, saaddaattexxi qalli hitattoxxi yanna hexxee? Iittate kaddoole, tennee hedho atixxeꞌni uuddettexxa yaane welekeenna kuli! Atinni, hedho atixxeꞌni uuddetteshshanni iitta assa wele jajjabeessatixxa hunna affeen. Tenneꞌa Yihowwaꞌa ergatendaꞌni hedho atixxeꞌni uuddettexxa yaane welekeꞌe haasoꞌati jajjabeenninxe muumme kada dandeettatton.—Rom. 1:11, 12.
Wele jajjabeessa dandeettattoki weli ori kinni, hunna atixxi dandeette qicoꞌni gubaꞌetixxe bukkiiꞌni afematiten. Iitta assitaattole atinna, ittan addetixxi jaaluwwa jabeenna alfitinaan. Iimiꞌni kulendeexxi Kani iitta hiteen: “Gubaꞌe mara adde woxabeꞌnoshsha gargaarteꞌeen. Gubaꞌetennaaꞌni iitta hexxeexxa jaalala alfaꞌni, hitta adde woxanno? Welekeꞌe henoonxe fakkaattaaxxa uwwa uwwati wele eyyaannexxa lellishateꞌe woꞌlaanannon. Ittan dayyuwwati welti manfasiinxe hedhoꞌa hasissaaxxa yaane assaannexxa koka ittin sufannon.”
YIHOWWA ASSITAATTEXXA YAANE LUMMISEE UUDAAN
Maxaafi Qullichchi giddo jeeji insaꞌneeki insaꞌneꞌe gabaloolenna Yihowwa eeyyaammake manniki fakkeenni hedheen. Yesuusi ilemeemmake baroꞌni hedhemmaka, woggati lummedheemmaka Israꞌeelaawichcho Simiꞌooni uundo. Simiꞌooni mageneeffachchotike minibaꞌa maraamma wodda labbaxxi dargaggeeyye haranga hasissaaxxa huje hujjaaꞌnaa uuda gopheebaan. Simiꞌooninata? Simiꞌooni woggati lummedheemmaxxeꞌe, Yihowwa edo okkone qiconna bakka afeebaashsha asseꞌe hedaaxxinna hexxaan. Kaddomaleꞌe, Yihowwa isoꞌo udaꞌneeki iittatebaan. Yihowwa isoꞌo uudaammaki ‘qullichchiinshanna isiꞌaa adatemeeke’ manjishshatemman, ittan reefi ilemeeka Yesuusiꞌi uudaashsha assati eebiseen. Matanga Yihowwa Simiꞌooni tinni anno ediꞌaa mesihcho kaddaaxxa haasoꞌaashsha assati eebbiseꞌeen! (Luq. 2:25-35) Dhugaaten, Yihowwa miꞌlachcho asseemmaki Simiꞌoonxe cimoꞌnite kaddebaaki afeexxe jabaxxe addeꞌnitemman, ‘Ittan manfasi qullichchiki woꞌmaashsha’ asseemman.
Yihowwa Simiꞌooni reefi ilemeeka Yesuusiꞌi uudaashsha assati eebiseen. Matanga tinni anno ediꞌaa mesihcho kaddaaxxa haasoꞌaashsha asseen
Atinna heenne gonphenna affoottole, Yihowwa isiꞌa addateenshati assitaattexxa yaane lummise udaꞌneexxa addata dandeettatton. Yihowwa uunaannexxa yaane adhdhaꞌneeki “mitti manji afeexxe qixxeꞌni uwwaa woddate maleꞌe afebaaxxe qixxeꞌni uwwaa woddatebaan.”—2 Qo. 8:12.
Atinna tennee yaane hedati assa dandeettattoxxe yaaneꞌni miꞌlachcho assi. Fakkeennakeꞌe, Taꞌa heenooxxe yannaanna kaddoole hoonee argateenshatike handaaraꞌni ergatema dandeettatto? Dedha dayyuwwatibaa bilbilati, yookiin daddaabbe borreessati jajjabeessa dandeettatto? Jaalalati assinannoxxi henoonxe labbaaxxi yaane, giddiiꞌninni qeerraaxxe wogguwwaꞌa Yihowwaꞌa addatenshati ergatendeexxa dayyuwwa lumo qicinni jajjabeesitoꞌa dandeettaan.
Mitti mitti bisiinxa gonphe afeꞌeen. Borotike Afirikaꞌni hexxaꞌneexxi mitte dayyo haasootteexxa hedhotixxa baranno “Tinni Hedho Isexxen” hitaꞌneexxe kollo uudi.
Atixxi addenna addateensha wele jajjabeessa dandeettaaxxa qalliyyi. Atixxi ossunte welekeꞌe eloke fakkeenna kaddaan, ittani Yihowwa iitta hiyye haasoꞌeexxa yaane addata dandeettatton, “Mageni qulliyyeteꞌe ergatemateenna kaddoꞌo, ediꞌaanna ergatema itti sufateꞌe assitinaꞌneexxa huje, ittan summa isikee leellishshineexxa jaalala dedhati dhugaa dassabaan.”—Ibr. 6:10.
WELE GARGAARATEꞌE DAMMAQQINEEKE KADDE
Heddi woggati lumedheeki manni wele gargaarati; caaldeexxa fayyunte, toggitte hedinonna qerraaxxe woggaꞌa hedha dandeꞌaaxxa qoꞌne egeꞌnishsheꞌeen.
Dhugaaten, welekeꞌe eloxxa yaane assa cimotixxa duuka daggaaxxa raakko duuchcha hoyyitabaan. Addaamixxe buutonni daggeexxe cimonaaꞌninna reyonaaꞌni noꞌoo gargaara dandeettaaxxi Mageniinxe Mootumma callan.—Rom. 5:12.
Kaddomaleꞌe, Yihowwaꞌa ergatemateenna wele gargaarateꞌe assitaattexxi woꞌlaancho, adde atixxi jabaattaashshanna fayyunte atinxi eloxxe kaddaashsha assitaan. Yoona woggati lummexxineexxe dayyuwwaa, maganneten Yihowwa isoo ergatemateꞌe assitinaꞌneexxa heene yaanenna lummise uudaꞌneexxa deetinoqqeꞌe, ittan gubaꞌenna haꞌnooka addetika fakkeenna lummissee uuddaꞌneen.