Baro Barokee Yihowwaxxe Keessumma Kaddineeshshani Hedhdhe!

1. Faaro hafuura adhdha 15:1-5 qicoꞌn qoꞌnisa noꞌaꞌa maa laꞌo affee?

SAXXEEXXE qoꞌneꞌni ifi Yihowwaꞌa mudhdhitexxi ergantoole, isinni welt affeexxa firunte jabeessedhati isixxe fakkeeniinxe dunkaaneꞌni keessumma kada dandeettaaxxa baranteennan. Tenne firunteꞌaa kaddaaxxa dandeette afa dandeennannoki hittate? Konnee yaada uuddaaxxa Faaro 15 soxxi maa hitaaxxa uundo. (Faaro 15:1-5 yaansis.) Tinni faaro Mageniinbaa shiqatee maa assa hasissaaxxa egenannoshsha gargaartaan.

2. Faarsanji Daawiti Yihowwaxxa dunkaane uuddaaxxa haasoꞌaashsha isooꞌo tirtirsiteexxi yaane maachcho kada dandeetta?

² Faaro 15 ssoxxi: “Yihowwaa dunkaane atixxeꞌni keessunsemaaki ayyete? Qullitte kooba atixxeꞌni hedhaaki ayyete?” hiyyat saffaan. (Faaro 15:1) Faarsanji Daawiti Yihowwaxxa dunkaane uuddaaxxa haasoꞌeeki, ettene yannaꞌni Gebaꞌooni hexxemmaxxa galdumiinxa “dunkaane” hedeete kada gopheebaan. Ittan Daawiti Mageniinxa “qullitte kooba” uuddaaxxa haasoꞌeeki Eyerusaalemi giddo hexxemmaxxa Tsiyoonixxa koba ifisateete kada gopheebaan. Daawiti Bitaꞌixxe Gebaꞌonenaaꞌni heddo kiilo meetirenni bayyattaaxxe bakkaꞌni, deettichchi taabootiinki mini ijaaremaa qicoꞌni, yannatee kakotike taabotiꞌaa dunkaane oteemman.—2 Samu. 6:17.

3. Faaro 15 soxxee miꞌlachcho uwwa hasisseeki mayeete? (Fakke uudi.)

³ Baci Isiraꞌeelootiꞌa galdumiinxe dunkaneꞌni ergatemaashsha ijjenda eeti uwwendeemabaan, wele darrenaaꞌn kinni kakotiki taabooti hedheexxe bakkabaa eꞌyaammaki heenooke manjo callamman. Kaddomaleꞌe, duuchchiinxi addatendeexxi Yihowwaxxi ergantoole, isike jaalo kadatinnaa jaalunteti ittin ediꞌaa sufat faakkeenniinxe dunkaane isixxeꞌn keesumma kada dandeettaan. Tinni noꞌo duuchchiingi hansaannexxe yaanen. Faaro 15 soxxeꞌn, hedheeki yaadi, Yihowwake jaalo kandenneshshani hedhatee nossedhanna leellisha hasissaaka mitte mitte adabuwwa ifisaan.

BALLEESSA BELO MAMMAREMME ITTAN TOGGITTE KADDEEXXA YAANEENNA ASSE

4. Yihowwa noꞌo assinonnaa hassaꞌneexxi yaane cuuphensha calla kadebaaxxa egenannoki hittate? (Isayaasi 48:1)

⁴ Faaro 15:2 keꞌn, Mageniinke jaalo hiyyemaaki manji “balleessa belo mammaremaak, toggitte kaddeexxa yaane assaake” kadeexxa kulendeen. “Mammarema”nnaa “assa” hitaaxxi hiyyuwwa uurichchi belonnaa koobbi koobbiki assinaaxxa yaane ifissaaxxen. Kaddomaleꞌe, balleessa belo mammarema dandeennanno? Eeti. Dhugaaten, qullichcha kadeeki manji hedhebaan, kaddomaleꞌe Yihowwaꞌa ajajematee dandeennennexxa yaane duuchcha assinaannole, isi noꞌoꞌo ballessa belo mammaremaanneke mannishsha assee uudaan. Ifi Magenokee mudhdhine cuuphemmanno wodda Mageniki welt meꞌa sanfannon. Mitti manji Isiraꞌeelixxe gosa calla kadeexxeeꞌe, mittendeꞌni Yihowwaxxe keessumma kada dandeꞌaamabaaxxa qalli hiyye, mitti mitti manni summi isikini yeꞌemaꞌneexxenna kaddoole “dhugaatinna qullummati” hedhemmabaan. (Isayaasi 48:1 yaansis.) Qajeelto qalbe afeeki Isiraꞌeelooti Yihowwaka seera baratanna hordofa hasissaamman. Weli fakkaattaanxa, techchonna Mageni edo eeyyemateꞌe, cuuphenshatenaaꞌninna gubaꞌe maratenaaꞌn caldeexxa assinannoxxi yaane hexxeen. “Toggitte kaddeexxa yaane” assa ittin ediꞌaa sufa noꞌonaaꞌni heqqendaanni. Tennee assa dandeennannoki hittate?

5. Duuchiinxe yaanenni Yihowwaꞌa ajajemate hiyyo maa hiyyote?

⁵ Yihowwaxxe ille edo “balleessa belo mammarema” ittan “toggite kaddeexxa yaane assate” hiyyo mageneeffachchotixxe bakkaꞌni duuchchinii wodda mitte mitte yaane assatenaaꞌni caaldeexxa yaane assate hiyyoten. (1 Samu. 15:22) Hedho noꞌoxxeꞌn assinaannexxe yaane duuchchin, iittan qofitti heꞌnanno woddanna Magenokee ajajematee jabaxxa woꞌlaancho assiyyo hasissaan. (Fakke. 3:6; Mekib. 12:13, 14) Shiixxaramma fakkaattaaxxe yaaneꞌni Yihowwaꞌa ajajemateꞌe woꞌlaana laꞌo affeen. Iitta assa isooꞌo qalbe mitten eenaannexxanna noꞌonna isi edo eeyyemmaannexxa leellishshaan.—Yoha. 14:23; 1 Yoha. 5:3.

6. Ibraawiyaane 6:10-12 qicoꞌn ifisendeeshshan, saxxemmaxxe yannaꞌni assineennaxxe heene eloxxe yaanenaaꞌn haranga caaldeexxi heene yaane?

⁶ Yihowwa edixxe yannaꞌn isiꞌaa assinennexxa yaane lummise uudaan. Kaddomaleꞌe, saxxemmaxxe yannaꞌni assinennexxe addetixxi huje calli, Yihowwaxxe dunkaaneꞌni keessummate kandeꞌe heꞌnannoshsha noꞌoꞌo gargaartabaan. Tinni yaane dhugaate kaddeexxa Ibraawiyaane 6:10-12 (Yaansis.) qicoꞌn hedheeki yaadi kokeessaan. Yihowwa konneechchi edi darre assinennexxa eloxxa yaane dedhabaan. Isi woꞌma lubbon “muuxamii qicoꞌni” mageneeffachcho isiꞌa shiqisa ittin ediꞌaa sunfonnaa hasaꞌneen. “Adde woxa gonphonnole” baro barokee jaalo noꞌoke kadaan.—Gela. 6:9.

QALBETI DHUGAA HAASOꞌE

7. Qalbet dhugaa haasoꞌate hiyyo maa hiyyote?

⁷ Mageniinxe dunkaane giddo keessummate kade hedhatee hasaaki manji “qalbet dhugaa haasoꞌaaken.” (Faaro 15:2) Iitta hiyyo kinni dhara haasoꞌa gopha calla hiyyotebaan. Yihowwa haasonnaannexxenna assinaannexxe yaane duuchchinni dhugichcha manna kandonaaꞌa hasaꞌneen. (Ibra. 13:18) Yihowwa “hantalcha manjo xireeffataan”, ittan isike jaalo kadoꞌa hasaꞌneeki eloxxa yaane assaake manjon.—Fakke. 3:32.

8. Hitta hedheeke adabanaaꞌni bayyatiyyo hasissa?

⁸ ꞌQalbet dhugaa haasoꞌaakiꞌ manji qofitti hedhaaxxa yanna seera Mageniinka saꞌaꞌni, manjiki welt hedhaa wodda Magenokee ajajemaꞌneeke manjo ifi fakkeessabaan. (Isa. 29:13) Elobaaxxe hujenaaꞌni bayyatiyyo hasissaan. Hantallichchi manji mitte mitte Yihowwaxxa beekkumiinxa akeette mama safaaxxinna hexxaan. (Yaꞌiqo. 1:5-8) Mitte yaane okkone qico laꞌo afebaaxxe isoꞌni fakkaattoole Yihowwaꞌa ajajemabaaxxinna hexxaan. Okkooꞌni ajajensha gonphe isixxi rakko isoꞌni geesisa gopheexxe kaddoole, Mageniinka seera saꞌa ittin sufaammaxxeꞌe, mageneeffachcho isixxinna sinsinnetixxe kaddaan. (Mekib. 8:11) Noꞌo duuchchiinxe yaanenni dhugichcha manna kandonnaa hansaaꞌnen.

9. Yesuusi taakkaaꞌa Naatinaꞌeelini afemee wodda haasoꞌeexxe yaanenaaꞌni maa barantano? (Fakke uudi.)

⁹ Qajeelto qalbe afa laꞌo affeexxe yaane kaddeexxa, Yessusi taakkaaꞌa Naatinaꞌeelini afemee wodda haasoꞌeeke yaadanaaꞌn barachcho alfinannon. Filiphoosi jaalo isika Naatinaꞌeelii Yesuusini afensiseexxa yanna haranga gargarit hexxeexxi yaane kaddeemman. Yesuusi Naatinaꞌeeliꞌi bire egeꞌneeke manjo kada gophoolenna: “Hantalle afebaaki dhugaatiki Isiraꞌeelichchi kunnuuxxi” hiyyeen. (Yoha. 1:47) Yesuusi wele hordofooleeyye isixxa dhugeeyyetishsha asse uudaaxxi egeꞌnendeexxen, kaddoolenna Naatinaꞌeeli haranga qajeela manjo kadeexxa uudeemman. Naatinaꞌeeli noꞌoshshani qullichcha manjo kadanna gophoole, sinsinneti manjommabaan, ittan duuchchiinxe yaaneni dhugichcha manjomman. Yesuusi tenne yaane saadati isooꞌo galateeffateen. Noꞌoonna Yesuusi itta hiyyeele hittatta hedheeke ulfinna!

10. Uwwa kaddeexxa haasoꞌiinxa dandeette seeribelo laꞌoonfatatenaaꞌn xexxeꞌata hasisseeki mayeete? (Yaꞌiqoobi 1:26)

¹⁰ Faaro 15 soxxeꞌni baꞌla qicoꞌni borreessemeeki yaadi wele manjo hitta abida hasissaaxxa ifisaaken. Faaro 15:3 keꞌni, Yihowwaxxe dunkaaneꞌn keesunsemaaka manjo uuddaaxxa haasoꞌaa wodda, “arrabi isikinni summa balleesabaan, jaalo isikeꞌni fuggoxxa yaane assabaan, jaaluwwi isikika summa xureesabaan” hiyyaan. Arrabo noꞌoka seeri belo laꞌoonfata wele manjoꞌninna jabaka miidhdhama geesissaan, Yihowwaxxe dunkaane giddonna keessummate kande heꞌnabeꞌnoshsha assitaan.—Yaꞌiqoobi 1:26 yaansis.

11. Summa balleessate hiyyo maa hiyyote? Summa balleesaꞌni aadde aagabaake manjoꞌni hitta hexxeexxi tarkaaffe adhdhenda?

¹¹ Faarsanji toggichcha kadeeke orinni summa balleessaaka manjo ifiseꞌeen. Summa balleessate hiyyo maa hiyyote? Mitte manjika eloka summa yolshaake dhariinke haasoꞌan hiyyoten. Aadde aagabaaki summa balleessaaki manji Kirsitaaniinxe gubaꞌenaaꞌni fugussemaan.—Ermi. 17:10.

12-13. Keekkantebeꞌnongi jaaluwwi noꞌokika summa xureessat, balleessanjuwwa kada dandeennannoki mitti mitti jeejuwwi hoonte? (Fakke uudi.)

¹² Faaro 15:3 keꞌn hedheeki yaadi, Yihowwaxxi keessumma jaaluwwa ifikeꞌni elobaaxxa yaane assitabaaxxanna summa insaꞌneka xureessitabaaxxa qalli hinannoshsha assitaan. Dedha jaaluwwi noꞌokika summa xureessa dandeennannoki hittate?

¹³ Keekkantebeꞌnongi qajeellichcha kadebaaka tarja facaasat mitte manjika summa xureesinannoxxi hexxaan. Fakkeennakeꞌe: (1) mitte dayyo woꞌma yannaxxa ergachcho uurrissoole (2) mitti miniinki anninna miniinxi ama Beetelexxa ergachcho uurinsoole yookiin (3) mitti dayyi gubaꞌetike geercho yookiin gubaꞌetike ergatanjo kade ergata uurisaaxxa yanna. Tinni dayyuwwa ergatensha tenneꞌe uurisseeki mayeete kaddeexxa ifiꞌa hendennexxa yaane wele manjoꞌni haasoꞌa seerakee? Tinni dayyuwwa ergachcho tenne uuriseexxi buuto noꞌo egennebeꞌnoxxi wele yaane hedha dandeettaan. Yihowwaxxe dunkaane giddo keessummate kade hedhaaki manji ‘jaalo isikeꞌni elobaaxxa yaane assabaan, jaaluwwi isikika summa tureessabaan.’

YIHOWWAꞌA SODAATAAKA MANNA ULFEESSE

14. Yihowwaxxi keessumma ‘salphichcha manjonaaꞌni’ bayyattaaki hittate kaddeexxa ifisi.

¹⁴ Faaro 15:4 mitti Yihowwake jaalo kadeeki manji, ‘salphichcha kadeeka manjo duuchcha tuffataaxxa’ haasoottaan. Iitta assa dandeennannoki hittate? Noꞌo qulliyye kada gonpheennaxxeeꞌe mitte manjo salphichchake hiyye murteessatixxa baalle anfeebeꞌnon. Mayee? Noꞌo eenaanneka adaba afeeke manjibaa shinqaꞌni, noꞌo eenaabeꞌnoka adaba afebaake manjoꞌni hifantannoxxi hexxaan. Tenneꞌa noꞌo bayyatiyyo hasissaaki Yihowwa “salphichchake” hiyyeeke manjonaaꞌni callan. (1 Qoro. 5:11) Kunniirinna, aadde aagabelo fuggoxxa yaane assaake, adde noꞌoxxanna addantaannexxa yaane ulfeessabaake yookiin noꞌoxxa manfasiinxa hedho gophisatee woꞌlaanaake mannan.—Fakke. 13:20.

15. Yihowwaꞌa sodaataaka manjo ulfeesinannoki mitti ori hoonte?

¹⁵ Wele darrenaaꞌn kinni Faaro 15:4 keꞌn hedheeki yaadi, “Yihowwaꞌa sodaataaka manna” ulfeessa hasissaaxxa ifisaan. Tenneꞌa, Yihowwake jaaluwwiꞌa baꞌluntenna ulfinne leellinshannoka oruwwa halsedha hasissaan. (Roome 12:10) Hitta? Faaro 15:4 keꞌn ifisemeeki mitti ori, Yihowwaxxe dunkaaneꞌni keessummate kade hedhaꞌneeki manji “rakkoteꞌni ibissaꞌneexxe kaddoolenna haasoꞌa isika jijjiirabaan.” Assinanno hine haasonennexxa yaane assa gopha wele manjo miitaaxxi egeꞌnendeexxen. (Mat. 5:37) Fakkeennakeꞌe, Yihowwa isixxi keessumma buliitike jaaliꞌa aaggeexxa kako heqqexxoꞌa hasaꞌneen. Ittan hadi oose ifixxee aageexxa kako muuxatee qalbetixxa woꞌlaancho assa wodda Yihowwa gammadaan. Mageno noꞌokeenna jaaluwwakee anfeennexxi jaalala, kako aangeennexxa heqqedhatee dandeennennexxa duuchcha assinannoshsha noꞌoꞌo gaddachchitaan.

16. Yihowwaxxa jaaluwwa ulfeesinannoki weli ori hoonte?

¹⁶ Mageniinxa jaaluwwa ulfeessinannoki weli ori insaꞌnee keesunsatinna arjunte leellishatiten. (Roome 12:13) Dayyeeffachchoteꞌni dayyuwwati saꞌisinannoxxi yanna, insaꞌnenninna Yihowwanni welt anfeenneki jaaluntetiki sansalati jabaataashsha assitaan. Duuchchiinxi iimi darre keessumma adhdhinanno wodda Yihowwaꞌa fakkaantannon.

MAALLAQIINXE JAALALANAAꞌNI BAYYATTE

17. Faaro 15 ssoxxi maallaqiinxa yaane haasottaꞌneeki mayeete?

¹⁷ Tenne Faaroꞌn mitti Yihowwaxxe keessumma kadeeki manji ‘maallaqi ileeꞌnaa adhdhatee liqeessabaaxxa, balleessa beloka manjo balleesanjo assatee matta adhdhabaaxxa’ uundannon. (Faaro 15:5) Tenne harumaaxxe faaroꞌni maallaqiinxi yaane kexxeeki mayeete? Buutotinna miketixxe kaddebaaxxi maallaqakee anfeennexxi uushsho welenna miidha dandeettaan, ittan Mageniki welt anfeennexxa jaaluntenna balleesitaan. (1 Ximo. 6:10) Birexxe yannaꞌni mitti mitti manni hiyyeeyye kaddeexxe dayyuwwiꞌa maallaqa liqeessati, maallaqi ikki ileeꞌnaa adhdhat dayyuwwa ifinga miicaamman. Ittan mitti mitti murteessalluwwi matta adhdhat balleessa hujebaake manjoꞌni seeri beloxxa murte murteessaamman. Tinni Yihowwa ijjenda xireefataammaxxe yaanuwwamman.—Hiziq. 22:12.

18. Maallaqakee anfeennexxa uushsho hekki hineꞌe hendannoshsha gargaaraaki qortumuwwi hoonte? (Ibraawiyaane 13:5)

¹⁸ Maallaqakee anfeennexxi uushshso hitta hexxeexxe kaddeexxa hekki hiyye heda eloxxen. Ifi iitta hitine qorre: ‘Heddo yanna heedaaneki maallaqakenna hidhdhannoxxe yaanuwwa? Maallaqa liqeeffatonnole liqeessemmaki manji hasabaani hiyyat sammi hiyyee qaraphphaane? Maallaqa afa anxi welekenaaꞌni caaleenneke manjishsha ifi asse uudannoshshanna donnoomannoshsha assitee? Maallaqa affeexxa dayyuwwa maallaqa lubbotishsha assite xeꞌmifattaꞌneexxishsha assee hedaane? Dureessa kadeeke manji callinni jaaloomonnaa hasaꞌni, hiyyeesiki jaalomatenaaꞌni ifi abixxaane?’ Noꞌo Yihowwaxxe keessumma kadatixxa lumoxxa bado anfeennen. Maallaqiinxe jaalalanaaꞌni bayyatati, tennee anfeennexxa bado heqqedha dandeenannon. Iitta assinaannexxe kaddoole, Yihowwa noꞌoꞌo ijjenda hunabaan!—Ibraawiyaane 13:5 yaansis.

YIHOWWA JAALUWWA ISIXXA EEYYAAN

19. Yihowwa fulcheeke seeruwwi udumi darreeꞌn hedheeki lumoki yaadi maachcho?

¹⁹ Faaro 15 soxxi “tenneꞌe yaanuwwa assaaki manji duuchchi ijjenda raankabaan” hiyyaake tasfinni muuxendeen. (Faaro 15:5) Tenne bakkaꞌni faarsanji Mageni fulcheeke seeri udumi darreeꞌni hedheeki lumoki yaadi maachcho kadeexxa ifiseen. Yihowwa gammashshoti heꞌnonnaa hasaꞌneen. Tenneꞌaa isixxa eebbannaa heqqo alfinannoxxa akeete noꞌaa uwween.—Isa. 48:17.

20. Yihowwaxxi keessumma ediꞌaa halchati heqqexxaꞌneexxi yaane maachcho?

²⁰ Yihowwaxxi eeyyendeexxi keessumma ediꞌaa gammachchiisaaka tasfa heqqexxaꞌneen. Addatendeexxi manfasiki hariirendeexxi keessumma, Yesuusi iimateꞌni qophpheesseexxe bakkaꞌni hexxaan. (Yoha. 14:2) Buttateꞌni hedhatika tasfa affeexxi keessumma kinni, Leellisha Yohaannisixxa 21:3 keꞌn hedheeka tasfa halchat heqqexxaꞌneen. Yihowwa isike jaaluwwa kande, dunkaane isixxi giddo baro barokee keessummate kande heꞌnannoshsha yeꞌeeka yeꞌinjo adhdha noꞌaꞌa lumoke ulfinnan!