Yansisalluwwiinka Qortumuwwa

Solomoon ijaaremmake mageneeffachchotike minixxi, barandiinxi hojja hitteexxemmaꞌa?

Mageneeffachchotike qullichchi minixxe kutabaa eꞌyinaammaki barandiinbaaꞌniten. Harooxxe Buuttaxxi Maxaafi Qullichchiinxi Tika 2023 wogga edi darre maxxanseedeexxi, “barandiinki baꞌlinni 20 ciqile kada wodda hojja kinni 120 tinninaa miniinke baꞌlininni qixxetemman” hitaan. (2 Zeena 3:4) Wele Maxaafi Qullichchixxi tikanna barandiinxi hojja “120 ciqile” kadeexxa kuldaan yookiin 53 meetireka qeerrinne afeeke minishshaten!

Kaddomaleꞌe, 2023 keꞌni maxxansedeexxi Haarooxxe Buutaxxi tika Solomoon ijaareka mageneeffachchotika mine “hojja 20 ciqile” yookiin 9 meetireka qeerriine afexxa haasoottaan.a Iitta hexxeexxi jijjiirra assedeeki mayeete kaddeexxa leellishshaaxxa heenooxxa buutuwwa uundo.

1 Negisite 6:3 keꞌni barandiinxi hojja hitteexxe kaddeexxa ifisendeebaan. Tenne xiqiseꞌn Erimiyaasi borreesseeki barandiinxe hojja, kaddebaangi godobanna qeerriinne callan. Okkooꞌn, itti aanaake hafuura adhdhaꞌn mageneeffachchotike minixxa haranga hasissaaxxa kutuwwa, tinninna; sibliki giissendeexxa abbaayya, tome gaaruwwanna barandi gadhi darre medaabeti giissineexxe lame mososson. (1 Neg. 7:15-37 ) Barandi 50 meetirenaaꞌni caldaaxxa hojja afoolenna mageneeffachchotike minenaaꞌni saꞌaꞌnoole Erimiyaasi hojja isixxa kula gopheeki mayeete? Dhibba wogguwwa udumanna Ayhuudootiinke raagixxi borreessanoole, barandiinxi hojja miniinxa saxxabaaxxa borreessiteen.

Beekkooleeyye mageneeffachchotike minixxi gimo, 120 ciqile geltaaxxa hojja afeeka baranda kipha dandeꞌaaxxa mandaan. Qarixxe yannaꞌni kinjikinna xuubeti hunjaammaxxi eꞌyinaaxxi huluwwa, fakkeennake, Gibsteke mageneeffachchotike minibaaꞌa eꞌyinaamaki baranduwwi, buttiiꞌn baꞌlateꞌe qaccetibaa kinni qaꞌlakemman. Kaddomaleꞌe, Solomoon ijaareemmaki mageneeffachchotiki mini, konnenaaꞌni gargariti hedheekemman. Beekkooleeyye barandiinxe gimoki furdinni jaane ciqile yookiin 2.7 meetirenaaꞌn saꞌabaaxxa addattaan. Arkitekicheeretiki raagiinki borreessaji, Teꞌodoori Bayusinki iitta hiyyee muuxeen: “[Mageniinke minibaa eꞌyinaammaxxe] barandiinxe hulake gimotike furdinenaaꞌni kexxeexxa, barandiinxi hojja 120 ciqile geltabaan” hiyyeen.

2 Zeena 3:4 wele miyibaaꞌa ikkillee wodda dedhiki borreessa gonpheebaan. Wele addatendeexxi qarixxe yannaꞌni angati borreessendeexxi borro tennee xiqse “120” ken hitaan. Ondeesso dhibbeesso barroꞌn Koodekisi Alekisiandirenesinna jiꞌeessoke dhibbeesso barroꞌni qophpheessendeexxi Koodekisi Ambrooshiꞌasi hiyyendaaxxi tika tennee xiqseꞌni “20 ciqile” hittee ifissaan. Mitti borreessanji “120” dedhiki borreessaaki mayeete? Ibrayisixetike laagadani “dhibba” nna “ciqile” hitaaxxi hiyya weli fakkaattaaxxeen. Tenneꞌaa mitti borreessanji “ciqile” hiyyee borreessammaxxa bakka “dhibba” hiyyeꞌe borreessaaxxi hexxaan.

Solomoon ijaaremmaka mageneeffachchotika mine duuchchiinxa yaane uddaaxxa egeꞌnateenna kunni mini ijaaremee qico toggichcha kadeeke orinni ifisateeꞌe woꞌlaancho assa hasissaaxxe kaddoolenna, irran calla miꞌlachcho assa hasissaaki, kunni mini gaaddiiddo kadeemake lumoke manfasiinke mageneeffachchotike mineꞌniten. Yihowwa ergatoole isixxi duuchchiinxi konne mineꞌni isoo mageneeffattaashsha yeꞌa hittatta galateeffachchiissaaxxe yaane!—Ibra. 9:11-14; Leellisha. 3:12; 7:9-17.