Yaansisalluwwiinka Qortumuwwa

Fakkeenna 30:18, 19 ki borreessalli “manjinna dubarichcho beltonni meꞌaaki gari” ‘hedino anxi iimi darren’ hiyyeen. Iitta hiyyo maa hiyyote?

Tinni hiyya Maxaafi Qullichchiinxe beekkooleeyyeꞌni ittan heddo manaꞌni hiibbote kaddeexxen. Haarooxxe Buttaxxe Tikaꞌni tenne xiqseki woꞌmi yaadi iitta hiyyaan: “Hedino anxi iimi darre hexxeexxi [yookiin “manbeꞌa assitaaxxi” lqj] sase yaanuwwa hexxeen, hubanno anxi iimi darre hexxeexxi shoole yaanuwwa hexxeen: Simbiri iimateꞌni meꞌaꞌnee gari, bofi rassateꞌni meꞌaꞌnee gari, hobolo abbaayyateꞌni hana meꞌitaꞌnee gari, manjinna dubarichcho beltonni meꞌaaki gari.”—Fak. 30:18, 19.

Edo “manjinna dubarichcho beltonni meꞌaaki gari” hiyyaaki yaadi elobaaxxa yaane ifisaake hinee hendaannan. Mayeete iitta hinaannaki? Tenne xiqiseke qarqaraꞌni hedheeki yaadi, “gelteꞌeen” hitabaaxxa elobaaxxa yaanuwwa ifisaan. (Fak. 30:15, 16) Ittan laakkoossi 20 kinni mitte balleessanna hujjeebaashsha heddaꞌneexxa mitte “yababulto manjichcho” uuddaaxxa haasooꞌaan. Tennenaaꞌni kexxeexxa, mitti manji manjiinxe illenaaꞌni shoome hujaaxxa seeri beloxxa yaane, iimateꞌni keeliki meꞌaake simbirinni, rassateꞌni meꞌaake bofini, yookkiin baꞌlaxxe abbaayyaꞌni meꞌitaaxxe hobolonni fakkeessinaannan. Tenneꞌaa “manjinna dubbarichcho beltonni meꞌaaki gari” hiyyaꞌneeka yaada mitti dargaggeesi dubarichcho belto gowwiseꞌe, ise siꞌattebaangi assaaxxa elobaaxxa yaane ifisaan hinaannan.

Kaddomaleꞌe, tinni xiqse haasoottaꞌneeki yaadi, manji assaaxxe elobaaxxe yaane kaddeebaaki eloxxe yaanen hine hendannoshsha assitaaxxi buuto hexxeen. Tenne xiqseki borreessalli konnee yaada haasoꞌeeki iimiiꞌni kulendeexxe yaanuwwaꞌni manbeꞌa hiyyeeten.

Ibraysixetixxi qarixxi borruwwanna tinni xiqse haasoottaꞌneeki qajeela yaane uuddaaxxe kaddeexxa haasoottaan. Tiꞌolojikal Lekiskon ovi ze Oldi Testamenti hiyyaaki maxaafi hiyyaꞌneeshsha Fakkeenna 30:18 keꞌni “hedino anxi iimi darre hexxeexxi” hitaꞌneexxi hiyya “mitti manjixxe . . . hedino iimi darre hexxeexxa, dandeessissabaaxxa matanga manbeꞌa assitaaxxa gammachchiissaaxxe yaane” kaddeexxa haasoꞌaan.

Yunayitid Istetise Harvardixxe yunversiteki profeeseerichchi Kirawdford Howeli Toyiki, tenne xiqseꞌni Maxaafi Qullichchi haasoꞌaꞌneexxi yaane elobaaxxe kaddeebaaxxa kokeesseen. Isinna: “Tenne xiqseꞌni borreessalli kuloꞌaa haseexxi, manbeꞌa assitaaxxe yaanen” hiyyeen.

Tenneꞌaa Fakkeenna 30:18, 19 keꞌni kulendeexxi hiyyuwwa, haranga manbeꞌa assitaaxxa yookiin hedino noꞌoxxi iimi darre hexxeexxa yaanuwwa ifissaaxxe hineꞌe haasoꞌa dandeessissaan. Maxaafi Qullichchiinke borreessallishshanni, simbiri keeliki iimateꞌni meꞌaꞌnee qici, bofi leka belo rassateꞌni meꞌaꞌnee qici, jabaka haꞌurre affeexxi hobolo abbaayyateꞌni hana metaꞌnee qicinna mitti dargaggeessinna mitte belto weli eeneꞌe gammashshoti welti heꞌnaa qici noꞌoonna manbeꞌa assaan.