Yihowwa Dhugaatixxa Gammashsho Alfinannoshsha Gargaaraan

1-2. (a) Techchixxe yannaꞌni heddo mannaꞌni hitta hedhee jeeja futti hiyyaꞌne? (b) Tenne qoꞌneꞌni mariꞌantaannexxi yaane maachcho?

TECHCHIXXE yannaꞌni heddi manni gammashsho alfateꞌe assaꞌnebaaxxi yaane hexxebaan. Fedheexxa woꞌlaancho assinoolenna hendeeshsha gammado alfa dandeenneebaan. Heddi manni yaadaꞌneeni, ittan ifiꞌni adde woxaꞌneen. Yihowwake ardaꞌninna iitta hexxeexxi yaane geltaaxxi egeꞌnendeexxen. Buutotinna heꞌnaanneki ‘muuxamiinxe barruwwaꞌnite’ kaddemmaxxeꞌe rakkonna yaadissaaxxi yaanuwwa geltaaxxa egenneennen.—2 Xi. 3:1.

² Tenne qoꞌneꞌni gammashsho noꞌoxxa moortaaxxi yaanuwwa heente kaddeexxanna gammashsho gonphonnole higgeenni alfinannoki hittate kaddeexxa uundannon. Edinsennexxi dhugaatixxe gammashshoxxi Muumme ayyete kadeexxa uundo.

DHUGAATIXXE GAMMASHSHOXXA MUUMME

3. Dadendeexxe yaanenaaꞌni Yihowwaa uuddaaxxa barantannoxxi yaane maachcho? (Fakkuwwatanna uuddi.)

³ Yihowwa duuchchinii wodda gammadaꞌneeke Magenon. Ittan noꞌonna isishshanni gammandonnaa hasaꞌneen. Isi noꞌaa buttateꞌni gammachchissaaxxa yaanuwwa dadeeki tenneꞌaaten. Fakkennakeꞌe, buttateꞌni hexxeexxa laakkonne birrabaaxxa bifanna biniinchuwwi geebaaꞌnaa uundanno wodda ittan xeꞌmitaaxxa sagale indanno wodda gammandannon. Yihowwa noꞌoo qalbe mittenni eeyyaꞌneen, ittan gammandaꞌni heꞌnoꞌnaa hasaꞌneen!

Baby elephant: Image © Romi Gamit/Shutterstock; Pingiween hiyyendaaxxe ciꞌaxxa caacute: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Yihowwa buttateꞌni rakko hexxeeꞌnaa uudaꞌninni gammashshoti hedha dandeꞌeeki mayeete? (b) Yihowwa noꞌoo gargaaraꞌneeki hittate? (Faaro 16:11)

⁴ Yihowwa “gammashshoti Mageno” kadoolenna buttateꞌni hexxeexxa rakkonna haranga yaadissaaxxa yaanuwwa egeꞌneꞌeen. (1 Xi. 1:11) Kaddomaleꞌe, isi tinni yaanuwwa gammashsho isixxa balleessitoꞌaa waalabaan. Isi buttateꞌni rakko hexxaꞌneeki yannandeete kaddeexxa egeꞌneꞌeen. Matanga rakko balleessaaxxa yannanna mureꞌeen. Isinna yaaddonna abara buttatenaaꞌni balleessaaxxe barra qicoꞌni ossunteti heqqaꞌneen. Okkone qicoꞌni hitta hexxeexxe rakko giddo heꞌnaannexxa egeꞌneꞌeen, noꞌoonna gargaaroꞌaa hasaꞌneen. Yihowwa noꞌoo gargaaraꞌneeki hittate? Gammashsho noꞌaa uwwatiten. (Faaro 16:11 yaansis.) Isi Belto isike Yesuusiꞌaa tennee uwwa uwweeki hittate kaddeexxa hubatte.

5-6. Yesuusi gammashoti hedha dandeꞌeeki mayeete?

⁵ Yihowwa dadeexxe dada duuchchinaaꞌni Yesuusi gammashshotiken. Mayee? Lame buuto uundo. (1) “Isi leellabaake Magenixxe fakken,” ittan duuchchinii wodda woꞌma kadeeke orinni Anni isikixxa ayyunte leellishaamman. (Qol. 1:15) (2) Yesuusi qeerraaxxa yanna saꞌisseeki gammashshotixxe muumme kadeeke Anni isikinniten.

⁶ Yesuusi duuchchinii wodda Anni isiki hiyyeexxa yaane duuchcha muuxaammaxxeꞌe gammadaamman. (Fak. 8:30, 31; Yoh. 8:29) Anni isiki Yihowwanna isoꞌni gammadaammaki tenneꞌaaten.—Mat. 3:17

7. Dhugaatixxa gammashsho alfa dandeennannoki hittate?

⁷ Noꞌonna dhugaatixxa gammashsho alfa dandeennannoki dhugaatixxe gammashshoxxe muumme kadeeke Mageno Yihowwabaa shiqatiten. Yihowwaa adda egennaꞌni menanno woddanna isoo fakkaantanno wodda gammandeenneke kandannon. Ittan Mageniinxa fedhii muuxatinna isoo gammachchiissaaxxa yaane egeꞌnati gammashsho alfa dandeennannon.a (Far. 33:12) Kaddomaleꞌe, mitte mitte wodda yookiin duuchchiin wodda gammashsho gonphaannolenaꞌa? Tinni Mageni noꞌoꞌni gamadaꞌnebaaxxa leellishshaaxxe yaane? Waawwot! Noꞌo qulliyyetebaan, ittan mitte mitte wodda noꞌoꞌni geltaaxxe rakkonaaꞌninna yaadonaaꞌni kexxeexxa yaandannoxxinna miira yoꞌnannoxxi hexxaan. Yihowwa tinni yaanuwwa noꞌoꞌni geltaꞌneexxa egeꞌneꞌeen. (Far. 103:14) Gammashsho noꞌoxxa moortaaxxa yaanuwwanna gammashsho higgeeni alfinannoki hittate kaddeexxa mariꞌanto.

HIINI YAANENNA GAMMASHSHO HAꞌNOOXXA MOORTABAASHSHA XEXXEꞌATTE

8. Hedho noꞌoxxeꞌni geltaaxxi rakkuwwa noꞌoo miitaaki hittate?

⁸ Gammashsho moortaaxxa yaane #1: Hedho noꞌoxxeꞌni geltaaxxa raakko. Ati shorrichchiki, dadumiinxe balanni, hiyyummati, dhiboti yookiin cimoti rakkatateꞌni hexxette? Tenne rakkuwwaꞌni miꞌlachcho assinaannole sholla qicinni gammashsho noꞌoxxa gonphannon. Giddiiꞌninni gelteexxi rakko hunna noꞌoxxi iimi darre hexxeexxe kaddaa wodda gammashsho noꞌoxxa balleessitaan. Maxaafi Qullichchi qalbe giddixxi yaaddo, yaadiki enqemmannoshsha assitaaxxa haasoꞌaan. (Fak. 15:13) Shoole wogga giddo dayyo isika, annanna ama reyoti gopheeki Bebisi hiyyemaaki gubaꞌetiki geerchi iitta hiyyeen: “Qofitti gateenneshshanna anee gargaaraaki mitti manji hedhebaashsha aneꞌni fakkaatteen. Hujaannaxxe heddo hujenaaꞌni kexxaaxa, anki dayyinna hadi anki reyebaa edi darre insaꞌnenni eloxxa yanna saꞌissa dandeꞌa gophennexxeꞌe mitte mitte wodda yoꞌoshsha yaadaannan.” Hedho noꞌoxxeꞌni geltaaxxi rakkuwwa bisikinna yaadiki dhibemmannoshsha assa dandeettaan.

9. Gammashsho higgeeni alfinannoshsha gargaartaaxxi yaane maachcho? (Erimiyaasi 29:4-7, 10)

⁹ Gammashsho higgeeni alfinannoshsha gargaartaaxxi yaane maachcho? Rakko gelteexxa addate adhdhatinna anfeennexxe yaaneꞌaa galateeffantaanneke kadati, gammashsho higgeeni alfa dandeennannon. Buttateꞌni heddi manni gammashshoti heꞌnannoki hedho noꞌoxxeꞌni rakko geya gophphaꞌnooleten hiyyaan. Kaddomaleꞌe, tinni dhugaatebaan. Fakkennakeꞌe, Yihowwa boojiꞌeme Baabilooniꞌaa meꞌeemmaki Ayhuudooti, gadhike bogaꞌni boojiꞌemme heꞌneexxa addante adhdhinaashshanna haꞌuraange jeeji giddo gammashshoti hedhateꞌe dandeenneexxa yaane duuchcha assinaashsha ajajeemman. (Erimiyaasi 29:4-7, 10 yaansis.) Maa barantanno? Hexxetteka jeeja addatte adhdhateenna affeettexxe eloxxe yaanuwwaa galateeffatateꞌe woꞌlaan. Yihowwa atee haanonna qofitti waalabaaxxa qalliyyi. (Far. 63:7; 146:5) Bala gelteeꞌnaa meꞌa dandeꞌaꞌnebaaki Effii hiyyemaaki dayyi iitta hiyeen: “Yihowwanaaꞌni, maate anxenaaꞌninna gubaꞌetenaaꞌni konnete hinabaaka gargaarsanna kipha alfeennen. Tenneꞌa, adde woxaannole assendeexxe yaaneꞌaa galateeffataabeꞌnochcho aneꞌni labbeen. Yihowwanna jaaluwwa anxi assiteeke jabake gargaarsiꞌaa saadino afeennexxa leellishonnaa hasaannen.”

10. Rakko hexxeeꞌnaanni gammada dandeennannon hinaanneki mayeete?

¹⁰ Noꞌoꞌninna kadde mini hado noꞌokeꞌni rakko geltaaꞌnaanni gammandaanneke kada dandeennannon.b (Far. 126:5) Mayee? Buutotinna gammashsho noꞌoxxi hundeessendeeki heꞌnenneke jeejaꞌnitebaan. Qajeellisanjo kadde ergatendaꞌneexxi Maariya iitta hiteen: “Rakko geltaaꞌnaanni gammashshoti hedhate hiyyo, yaada yookiini oodha gophate hiyyotebaan. Tenne irra Yihowwa aageexxa kako dedha gophate hiyyoten. Anni noꞌoki Yihowwa gammashsho noꞌonaaꞌni baxxabaashsha heqqeꞌnonnaa gargaaraan.” Taꞌixxe yannaꞌni fedheexxi rakko geltaꞌnooꞌlenna duuchchiinxi rakko yannatixxe kaddeexxa qalliyye—Isenna hirbangeꞌni diidallo balleessitammake bukoteꞌni gatammake faana noꞌoxxike beessisishshaten. Yihowwa shiqoxxe yannaꞌni noꞌoo yaadissaꞌneexxa rakko mittenna gattebaangi balleessaan.

11. Hawaarya Phawuloosiki fakkeenni atee jajjabbeessaaki hittate?

¹¹ ‘Rakko aneꞌni geltaꞌneeki Yihowwa aneꞌni mufateexxeeten’ hine hendonnolenaꞌa? Jabaxxi rakkuwwa gelteexxa addatendeexxa Yihowwaxxa ergantoole qalliyya gargaartaan. Hawaarya Phawuloosika fakkeenna uundo. Isi ‘azaabeteenna mootooleeyyeteꞌe ittan Israꞌeelixxe ooseꞌaa’ dhugaa lassaashsha, Yesuusi ifiꞌaanni meelleeke manjomman. (Huj. 9:15) Yesuusi isiꞌaa uwweexxi huje haranga gargariti hexxeexxemman! Kaddoolenna Phawuloosiꞌni rakko geltaamman. (2 Qo. 11:23-27) Phawuloosiꞌni duuchchinii wodda rakko gelteexxee Yihowwa isoꞌni mufateemman hiyyotee? Waawwot! Matanga, isi rakko geltaaꞌnaanni jabaate ossandi, Yihowwa isoo eebbisaꞌneexxa leellishshaan. (Rom. 5:3-5) Taꞌa ateꞌni geltaꞌneexxa rakko hekki hite hedi meen. Tinni rakko duuchchi geltoolenna jabaatte ossateꞌni hexxetten. Tenneꞌaa atinna Yihowwa atinni hedheexxanna ateꞌni gammadaꞌneexxa addata dandeettatton.

12. Halchinaaꞌnaa kaddebaangi gatteexxi yaane gammashsho noꞌoxxa moortaaki hittate kada dandeetta?

¹² Gammashsho moortaaxxa yaane #2: Halchinaaꞌnaa kaddebaangi gatteexxi yaanuwwa. (Fak. 13:12) Yihowwaa anfeennexxi jaalalanna saadino isiꞌaa ergatemateꞌe herrega fulcheꞌnannoshsha assitaan. Kaddomaleꞌe, herrengenneexxe bakkaꞌni geyatee dandeennennexxa yaane assinonnolenna heꞌnenneki jeeji noꞌoo kutaa wodda adde wonxannoxxi hexxaan. (Fak. 17:22) Hooli hiyyemaaki qajeellisanji iitta hiyyeen: “Wengeelaawwootiinke Barachchotike Mineꞌni barateꞌe wele bogaꞌni ergatemmonnaa yookiin Ramapoxxe ijaarsiinxe projekiteꞌni hujonnaa hasaannan. Jeeji hedhennaki jijjiiremeen, herrega konneꞌninna geya dandeꞌebeꞌnon. Tennenaaꞌni kexxeexxa yaadennen. Mitte yaane assatee hassaꞌni heddaattexxa yaane muuxa dandeꞌa gopha haranga yaadissaaxxe yaanen.” Kunni yaadi heddo manjoꞌni laqemaaken.

13. Heꞌnenneki jeeji hendaannexxa yaane assinabeꞌnoshsha kutoole, wele dandeennannoxxa heenee yaanuwwa assa dandeennanno?

¹³ Gammashsho higgeeni alfinannoshsha gargaartaaxxi yaane maachcho? Yihowwa duuchchinii wodda noꞌonaaꞌni calla heqqaꞌneeke Mageno kedeebaaxxa qalliyye. Isi hunna noꞌoxxi iimi darre hexxeexxa yaane assinonnaa hasabaan, yookiin isi noꞌoꞌni gammadaꞌneeki ergatenshatixxe hujeꞌni assinennexxe yaanexxe bira saꞌnennitebaan. Yihowwa mike ifixxa egennonnaanna addatemmeenneke kandonnaa hasaꞌneen. (Mik. 6:8; 1 Qo. 4:2) Yihowwa assinannoxxe yaane irra uudatee hasaꞌneeki giddixxe ayyunte noꞌoxxen. Yihowwa noꞌonaaꞌni hasaꞌneexxi iimi darre hexxeexxa yaane ifinaaꞌni heqqa hasissaa?c Waawwot! Tenneꞌaa, hexxeetteki jeeji Yihowwaxxe ergatenshaꞌni assatee hassaattexxa yaane assitabexxoshsha kutaꞌnoole, dandeettattoxxe yaaneꞌni miꞌlachcho assi. Dargaggeeyye leenjisa yookiin cindeexxa dayyuwwa jajjabeessa dandeettaatto? Mitte gargaarsi hasisaꞌneeka manjo mare qorati, bilbiliki yookiin harumaaxxa erga borreessati jajjabeessatee herrega fulchedha dandeettatto? Mike atixxenni metaaxxanna laꞌo affeexxa iitta hexxeexxa huje hujjatto wodda Yihowwa gammashsho atiꞌaa uwwati eebbisaan! Ittan shiqoxxe yannaꞌni haaroxxe buttaꞌni hedde egendebexxoke oruwwinni laakkonne birrabaaxxa Yihowwaa ergatematixxa futtii alfitattoxxa hedi! Iimiiꞌni uundeennaki Hooli lebeexxi iitta hiyyeen: “Ofoꞌlennexxi bari bariinxe hedhoka tasfa afeennexxa hedennen. Yihowwake gargaarsinni haarooxxe buttaꞌni fulchedheenneke mitte mitte herregaꞌni geyannon.”

14. Gammashsho noꞌoxxa moortaaxxi wele yaane heente?

¹⁴ Gammashsho moortaaxxa yaane #3: Ifi-calla gammachchiisatee woꞌlaana. Mitti mitti manni dhugaatixxa gammashsho alfateenna qabbeexxa hedho hedhateꞌe, ifi gammachchiissa hasissaaxxa kulaaka yaada interneeteteꞌni egeꞌnishaan. Kunni manni gamashsho alfateꞌe, gammachchiissaaxxa yaanuwwa assa, miya hiranna wele bakkabaa mammaremateꞌni miꞌlachcho assa hasissaaxxa jajjabeessaan. Iitta hexxeexxa gammachchiissaaxxa yaanuwwa assa dedhakebaan. Yihowwa noꞌoo dadeeki dancha yaanuwwa uunde saandannoshsha asseetten. Kaddomaleꞌe, konne orinni ifi gammachchiisatee woꞌlaaneeki heddi manni, udumiiꞌni tinni yaanuwwa gammashsho insaꞌnexxa balleessiteexxa hubateꞌeen. Eeva hiyyendaaxxi qajeellisanjo iitta hiteen, “Duuchchinii wodda ifi hitta gammachchiissattoxxa calla heddaattole, dheebo fuldaaxxon.” Ifi gammachchiisatee calla hendaannole yaandannon, ittan adde wonxannon.

15. Mootichcha Solomoonixxe hedhonaaꞌni maa barantanno?

¹⁵ Ifi-gammachchiisa affeexxa rakko Solomoonike fakkeennanaaꞌni barantannon. Solomooni gargariti hexxeexxa elolla sagale itati, gammachchiisaaka muuziqa laqati, baro isikeꞌni maallaqiki hirraaxxa elolla yaane duuchcha hirati maaliinxa halcha wonshati gammashsho alfatee woꞌlaaneen. Kaddomaleꞌe tinni yaanuwwa woꞌma gammashsho isiꞌaa idaggebaan. Isinna: “Ille uudde godditabaan, manshanna laqqe woꞌmitabaan” hiyyeen. (Mek. 1:8; 2:1-11) Heddo manjoꞌni mitti manji maallaqa afoole haseexxa yaane assa dandeꞌaaxxanna gammashshoti hedhaachcho fakkaattaan. Kunni dharaken, maallaqi dhugaatixxa gammashsho alfinannoshsha ijjenda assa dandeꞌabaan.

16. Anfeennexxa yaane welekee uwwa, gammashsho higgeenni alfinannoshsha gargaartaaki hittate? (Fakkuwwatanna uudi.)

¹⁶ Gammashsho higgeenni alfinannoshsha gargaartaaxxi yaane maachcho? Yesuusi ‘adhdhattee irra uwwa caaldeexxa gammashsho affeexxa’ barsiiseen. (Huj. 20:35) Alikosi hiyyemaaki mitti gubaꞌetiki geerchi iitta hiyyeen: “Shiixxarama fakkaattaaxxe yaanenni wele gargaaratee woꞌlaanannon. Ifiꞌaa irra welekee hedaanneke kadannon, tinni gammadannoshsha assitaan.” Ati welekee maa assa dandeettatto? Mitti manji yaadaaꞌnaa uuddottole, jajjabeessatee woꞌlaan. Rakko isixxa tikanna dandeꞌa gophphottole, qalbe mittenni isoo caqasati, isiꞌaa mararte affeettexxa leellishatinna baꞌo isixxa Yihowwaꞌni huꞌnaashsha qalli assati jajjabeessa dandeettatton. (Far. 55:22; 68:19) Yihowwa isoo hunabaaxxa qalli hiyyaashsha assatinna gargaara dandeettatton. (Far. 37:28; Isa. 59:1) Sagale isiꞌaa qophpheessatinna welti mammaremati isoo gargaara dandeettatton. Welti ergatensha fulle, tinninna isi gammadaashsha assitaan. Yihowwa arda isika jajjabeessatee laꞌoonfataꞌneeke miya kadi. Ifiꞌaa irra welekee heddaattole dhugaatixxa gammashsho alfitatton!—Fak. 11:25.

17. Gammashsho noꞌoxxi Yihowwanni abidendeeki hittate? (Faaro 43:4)

¹⁷ Iimatike Anni noꞌokibaa shiqa ittin sunfaannole dhugaati gammandaanneke manna kandannon. Maxaafi Qullichchi Yihowwa noꞌaa ‘lumoxxe gammashsho’ uuwwaaxxa haasoꞌaan. (Faaro 43:4 yaansis.) Tenneꞌaa fedheexxi rakko noꞌoꞌni geltaꞌnoolenna raankinabeꞌnon. Baxxabaaxxe gammashsho noꞌoxxixxe muumme kadeeke Yihowwaꞌni miꞌlachcho assa ittin sunfo!—Far. 144:15.