Welekeenna Kadhata Deetinoqqe

1. Yihowwa kadha noꞌoxxa lummise uudaꞌneexxa hitta egennanno?

KADHA manbeꞌa assitaaxxe qophphen. Tennee yaane hedde: Yihowwa mitte mitte huje iimatixxe ergantoole isixxee uwween. (Far. 91:11) Belto isikeenna haranga gargariti hexxeexxa maganne uwween. (Mat. 28:18) Kadha noꞌoxxa laqatixxa huje uwweekita ayyiꞌaate? Tinni Yihowwa ayyiꞌaanna uwwebaangi, ifiꞌaa gatilseexxe hujen. ‘Kadha laqaake kadeeki Yihowwa’ noꞌo mitti mittingi kadhantannoxxa kadha laqaan.—Far. 65:2.

2. Hawaarya Phawuloosi welekeꞌe kadhatati hoone fekkeenna leellishee?

² Noꞌoo yaadisseexxa yaane sodaꞌa belo Yihowwabaa shinqe kuꞌlinannashshanni, welekeenna kadhata hasissaan. Hawaarya Phawuloosinna iittanni asseemman. Fakkennakeꞌe, Effesoonixxe Gubaꞌeꞌaa: “Haanonna haꞌnoꞌaa kadhata uurrisaaꞌnon” hiyye borreesseen. (Eff. 1:16) Phawuloosi gubaꞌe giddo hedheeke mitti mittin manjiꞌaa kadhataamman. Fakkennakeꞌe, Ximootwoosiiꞌi: “Ergatemaanneka Mageno galateeffataannen, . . . hashsha barra duuchchinii wodda kadha anxeꞌni atee qalli hiyyaannen” hiyyeen. (2 Xi. 1:3) Phawuloosi kadha hasissaaxxa ifinxa rakko afeemman. (2 Qo. 11:23; 12:7, 8) Kaddoolenna, yanna uwwe welekee kadhataamman.

3. Welekee kadhata deenaanneki mayeete kada dandeetta?

³ Mitte mitte yanna welekee kadhata deenannoxxi hexxaan. Mayeete deenaanneki? Sabiriinaa hiyyendaaxxi dayyo mitte buuto ifisseen. Iitta hiteen: “Tenne aadaꞌni hedho noꞌoxxa elqe kayya buttaaxxi heddo yaane hexxeen. Rakko noꞌoꞌni geltaa wodda yaadi noꞌoki xexxeeremammaxxeꞌe, ifiꞌaa hansannoxxe yaaneꞌaa calla kadhantannon.” Ati iitta hexxeexxa yaane ifiꞌni hubatteette? Iittate kaddoole, tinni barachcho atiꞌaa kaddaaxxen. Tinni qoꞌne (1) welekee kadhata hasisseeki mayeete kaddeexxa ifissaan, ittan (2) wekekee kadhantannoki hittate kaddeexxa gargaaraaka yaada diideessitaan.

WELEKEE KADHANTAANNEKI MAYEETE?

4-5. Welekee kadhantaannoxxi kadha “lumoxxa hunna [afa]” dandeettaaki hittate? (Yaꞌiqoobi 5:16)

⁴ Welekee kadhantannoxxi kadha “lumoxxa hunna affeen” (Yaꞌiqoobi 5:16 yaansis.) Welekee kadhantannoxxi kadha geyeeki jeeji jijjiremaashsha assitaa? Eeti, assitaan. Yesuusi hawaarya Pheexiroosi shiqixxe yannaꞌni isoo waakkataaxxa egeꞌneemmaxxeꞌe: “Ani kinni adde atixxi baxxabaashsha atiꞌaa kadhatennen” hiyyeemman. (Luq. 22:32) Phawuloosinna kadha jijjiirra idagaaxxa egeꞌneemman. Isi balleessa belo Roome osurrakeꞌni hedhemmaxxa yanna, Filmoonaaꞌa iitta hiyye borreesseemman: “kadha haꞌnooxxi laqendeeꞌnaa haꞌnoobaa higannoxxa [addataannen.]” (Film. 22) Tennenaaꞌni kexxeexxa, Phawuloosi turebaangi usurrakenaaꞌni tikemeꞌe lassatixxa huje huja dandeꞌeen.

⁵ Iitta hiyyo kinni Yihowwa duuchchiinxa yaane assaashsha kadhati gaddachcha dandeennannon hiyyotebaan. Isi ergantoole isixxa yaadissaꞌneexxa yaane uudeexxi, mitte mitte yanna insaꞌne hansaꞌneexxa yaane muuxatee fiꞌlaan. Tenne egeꞌna noꞌoo yaadissaꞌneexxe yaaneꞌaa qalbe mittenni Yihowwabaa kadhantannoshshanna duuchchiinxa yaane isoꞌni waallannoshsha gargaartaan.—Far. 37:5; 2 Qorontoosi 1:11 nwtsty-E uudi.

6. Welekee kaadhata wele manjiꞌaa hitta hexxeexxa uushsho anfannoshsha assita? (1 Pheexiroosi 3:8)

⁶ Welekee kadhata “qalbe giddixxa mararte” anfannoshsha assitaan. (1 Pheexiroosi 3:8 yaansis.) Marartete hiyyo wele manjoꞌni geltaꞌneexxa rakko hubatatenna okkonee manjo gargaaratixxe halchan. (Mar. 1:40, 41) Mikaꞌeeli hiyyemaaki mitti gubaꞌetiki geerchi iitta hiyyeen: “Wele manjiꞌaa hasissaaxxe yaaneꞌaa kadhatanno wodda hitta hexxeexxe rakko giddo heꞌneexxa edi irra hubatannoshshanna insaꞌnaa afeennexxi jaalala lebbaashsha assiteen. Insaꞌne hubatanna gonphoole, taꞌa edi irra insaꞌnenni shiqeenneshsha aneꞌni labbaꞌneen.” Richardi hiyyemaaki gubaꞌetiki geerchinna wele laꞌo ifiseen. Iitta hiyyeen: “Mitte manjiꞌaa kadhantanno wodda okkonee manjo gargaarateꞌe edi irra hansannon.” Ittan lebeexxi: “Kadhantaaneke manjiꞌaa hasisaaka gargaarsa assinanno wodda, okkone manjiꞌaa kadhantaannexxi kadha higgaashsha gargaarateꞌni heꞌnenneshsha laakkoꞌendaan” hiyyeen.

7. Welekee kadhata ifixxe rakkoꞌaa miketixxa uushsho anfannoshsha gargaartaaki hittate? (Filphisiyuusi 2:3, 4) (Fakketanna uudi.)

⁷ Welekee kadhata ifixxe rakkoꞌaa miketixxa uushsho anfannoshsha gargaartaan. (Filphisiyuusi 2:3, 4 yaansis.) Heꞌnaanneki Dabiloosi galchaꞌneexxe buttaꞌnite kaddemmaxxeꞌe, noꞌo duuchchiingeꞌni rakko geltaꞌneen. (1 Yo. 5:19; Lel. 12:12) Duuchchinii wodda welekee kadhantaannole, “butta duuchchike dayyuwwummatike maabiri giddo hexxeexxe dayyuwwaꞌni weli fakkaattaaxxi rakko geltaꞌneexxa” qalli hinannon. (1 Ph. 5:9) Katiriini hiyyendaaxxi qajeellisanjo iitta hiteen: “Welelkee kadhata anishshanni wele manjoꞌninna rakko geltaꞌneexxa qalli hiyyannoshsha assiteen. Tinninna miketi imi darre ifixxe rakko callaꞌni miꞌlachcho assabeꞌnoshsha gargaarteen.”

KADHA NOꞌOXXI INSAꞌNAA HASISSAAN

8. Ayyiiriꞌaa kadhata dandeennannoxxa fakkeenna kuli.

⁸ Ayyiiriꞌaa kadhata dandeennanno? Fakkennakeꞌe, dhibendaꞌneexxe dayyuwwaa, barachchotike mineꞌneꞌni fuggoxxa yaane assitaashsha hariya tirtirsitaꞌneexxeenna coorraꞌneexxe dargaggeeyyeꞌaa yookiin cimoti rakkattaꞌneexxe dayyuwwa kadhata dandeennannon. Heddi addetiki jaaluwwi noꞌoki, mini hadi darreeꞌni yookiini mootummati darreeꞌni shorrichchi geyaaꞌnaa ossaꞌneeki hedheen. (Mat. 10:18, 36; Huj. 12:5) Poletikiinxe rakkonaaꞌni kexxeexxa minenna karra ifixxa waaldeꞌe baqatteexxi dayyuwwa hexxeen. Wele dayyuwwaꞌni kinni dadumiinxi bala geltaꞌneen. Tinni dayyuwwa illeti uunde egennebeꞌnoxxe kada dandeettaan. Kaddoolenna, insaꞌnaa kadhantannoxxa yanna Yesuusi “weliꞌaan weli eeyye” hiyyeeka ajaja ulfeessinaannexxa leellinshannon.—Yoh. 13:34.

9. Yihowwaxxe orga giddo akeette uutaꞌneexxe dayyuwwaanna insaꞌnexxe miniinxe amuwwaa kadhata hasisseeki mayeete?

⁹ Yihowwaxxe orga giddo akeette uutaꞌneexxe dayyuwwaanna kadhantannon. Kadhantanno wodda Iimike Bisiꞌaa, kiphalluwwa insaꞌnekee, Dame Beeroxxe Komituwwaa, dame beeroke iimike toꞌatalluwwiꞌaa, rogiinke iimike toꞌatalluwwiꞌaa, gubaꞌetixxe geedheꞌaanna gubaꞌetike ergatanjuwwiꞌaa kadhata dandeennannon. Tenne dayyuwwa giddiiꞌni heddo noꞌoo gargaartaꞌneeki insaꞌnee wixixxi assitaꞌneexxa ifixxa rakko affeenden. (2 Qo. 12:15) Fakkeennakeꞌe, Marki hiyyemaꞌneeki rogiinki iimiki toꞌatalli iitta hiyyeen: “Anee haranga yaadissaꞌneexxe yaanuwwa giddiiꞌni mitte, cimeeke hado ankenaaꞌni bayyate hedhaten. Insaꞌne laminiingi dhibemmaꞌneen. Anxi dayyonna iseki miniinki anni insaꞌnaa hasissaaxxa yaanne wonshati karkarsinaꞌnoolenna insaꞌne bira hedheꞌe insaꞌnee gargaara gopha anxi, giddo anxa ittaꞌneen.” Tennee jabaxxa huje hujjaꞌneexxe dayyuwwaxxa yaaddo egennenna, egeꞌnanna gonphonnole, duuchchinii wodda insaꞌnaa kadhata eloxxen. (1 Te. 5:12, 13) Konnee dayyuwwixxe miniinxe amuwwaanna kadhantannon, buutotinna insaꞌne miniinki anuwwi insaꞌneki, uwwendeexxa maganne muuxaashsha addatenshati gargaarraꞌneen.

10-11. Duuchchiinge dayyuwwa noꞌokee kadhantannoxxi kadha Yihowwaa gammachchiissaa? Ifisi.

¹⁰ Dayyuwwatee rakko rakkotishsha kadhantannoxxa woldo uundeennan. Fakkeennakeꞌe, egennebeꞌnoxxa usurriinke mineꞌneꞌni hexxeexxanna eetaꞌneeka manjo reyeeꞌnaa gophpheexxa dayyuwwa, Yihowwa jajjabeessaashsha kadhantanna dandeennannon. Donaaldi hiyyemaaki gubaꞌetiki geerchi; “Kadhati gargaarrannoxxi gargariti hexxeexxe rakko giddo hexxeexxi heddo dayyuwwa hexxeen” hiyyeen.

¹¹ Iitta hexxeexxi kadha Yihowwaa gammachchiissaa? Eet! Dayyuwwa noꞌoxxe mitte mittendee hasissaaxxa yaane duuchcha egennebeꞌnon. Tenneꞌaa duuchchiinxe dayyuwwaa mitteba bukki asse kadhata eloxxen. (Yoh. 17:20; Eff. 6:18) Itta hexxeexxi kadha “dayyuwummatike mabari duuchchiꞌaa” jaalala anfeennexxa leellishshaan.—1 Ph. 2:17.

MITTI MITTIN MANJIꞌAA KADHANTANNO WODDA

12. Weliinxa rakko hubata kadhantaannexxa yaane foone kadhantannoshsha gargaartaaki hittate?

¹² Welekeꞌni geltaꞌneexxa rakko hubatte. Duuchchiinxe dayyuwwaa mitteba bukki assine kadhantonnolenna, mitte mitten dayyuwwaa summa yeꞌnaꞌni kadhata hasissaan. Gubaꞌe haꞌnooxxeꞌni fayyitabaaxxa dhibonni rakkattaꞌneexxi dayyuwwa hexxee? Gubaꞌe giddo barachchotike minenaaꞌni geltaꞌneexxe hega uushshonni adde woxeeki egendineeki dargaggeessi hedhee? Oose anni belo yookiin ama belo “Yihowwake xixichchininna gorsinni” nossatee rakkataꞌneeki egendineeki Kirstaani hedhee? (Eff. 6:4) Welekeꞌni geltaꞌneexxa rakko hubata, dayyuwwatee jaalalanna mararte anfannoshsha assitaan. Tinninna kinni welekee kadhatatixxi halcha lebbaꞌni metaashsha gargaartaan.b—Rom. 12:15.

13. Uunde egennebeꞌnoke dayyuwwaa kadhata dandeennannoki hittate?

¹³ Welekee summiki kadhatte. Haanonna afemme egennebeꞌnoke dayyuwwaa summiki kadhantannon. Fakkeennakeꞌe, Kirmiya, Irtira, Ruusiyanna Singapuuri usurendeexxa dayyuwwa hedde. Tenne usurrakeꞌni hexxeexxe dayyuwwaki summi, Jw.org hiyyendaaxxe websayiteꞌni afemaan.c Biryaani hiyyemaaki rogiinki iimiki toꞌatalli: “Usurriinke mineꞌni hedheeke addetike jaaluwwi ankika summa, woraqatakeꞌni borreesse abixxa, kadha anxeꞌni qalli hiyyaꞌni insaꞌnaanna kadhatannoshsha gargaarteen” hiyyeen.

14-15. Kadhantaannexxa yaane gargaari hiissine kadhantannoki hittate?

¹⁴ Gargari hiissitine kadhatte. Iimiꞌni uundeennaki Mikaꞌeeli iitta hiyyeen: “Usurrakeꞌni hexxeexxe dayyuwwaka tarja jw.org tenaaꞌni yaansisanno wodda ani insaꞌnexxe bakkaꞌni hedheennele hitta kadannaꞌa hiyyaꞌni hedannon. Ani usuremeennele miniinxi ama anxi ‘maa kadda?, hasissaaxxa yaane habaaꞌni alfita?’ hiyyaꞌni yaadannoxxa egeꞌneennen. Tinninna bulii affeexxe usurendeexxe dayyuwwaa kadhatanno wodda garagaari hiisse kadhatannoxxa yaane alfannoshsha assitaan.”—Ibr. 13:3, lqj.

¹⁵ Usurriinke mineꞌni hexxeexxi dayyuwwa noꞌoxxi barra barrandeꞌni hitta hedheeke jeeji giddo saꞌissitaꞌneexxa hendano wodda, kadha noꞌoxxeꞌni gargari hissine insaꞌnaa kadhantannoxxa wele yaanenne alfinannon. Fakkeennakeꞌe, Usurriinka mine heqqaꞌneeki manni, insaꞌnaa shaqqunte leellishaashshanna dayyuwwa noꞌoxxi rakko belo mageneeffattaashsha baallooleeyye eeti uutaashsha kadhantannon. (1 Xi. 2:1, 2) Loolakeꞌni hexxeexxi gubaꞌe usurrakeꞌni hexxeexxi dayyuwwa leellishshaꞌneeke addetike fakkeenninni jajjabaattaashsha yookiin Yihowwaa egeꞌnebaaki manni insaꞌneka eloka meꞌinjo uudeexxi dhugaa kullaꞌneexxa laqaashsha kadhata dandeennannon. (1 Ph. 2:12) Wele rakko gelteeꞌnaa jabaatte ossateꞌni hexxeexxe dayyuwwa noꞌoxxeꞌe, kadhantanno woddanna tennenni weli fakkaattaaxxa yaane assinannon. Weliinxa rakko hubatati, welekee summiki kadhatatinna hansaannexxa yaane gargari foꞌe kadhatati, weliꞌaan weli anfeennexxi jaalala bira saxxeexxe kaddeexxa leellinshannon.—1 Te. 3:12.

KADHATEE MIKETIXXA UUSHSHO AFA

16. Kadhateꞌe miketixxa uushsho anfannoki hittate? (Matwoosi 6:8)

¹⁶ Iimiꞌni uundennashshanni kadha noꞌoxxi yaane mitte jijjiirendaashsha assa dandeettaan. Kaddomaleꞌe, kadha noꞌoxxee miketixxa uushsho afa hasissaan. Yihowwabaa kadhantaanneki isi edo egeꞌnebaaxxa yaane egeꞌnaashsha assateetebaan yookiin mitte yaane elo-qicinni abidaashsha isiꞌaa gorsa uwwateetebaan. Yihowwa ergantoole isixxeꞌe maachchi hasisaaxxa insaꞌne yookiin noꞌo egennebeꞌno edi darrenni egeꞌneen. (Matwoosi 6:8 yaansis.) Iitta kaddoole welekeꞌe kadhantaannekita mayeete? Tinni welekee hedaaki manji assaaxxe yaane kaddemmaxxeeten. Jalaala weliꞌaan weli kadhantannoshsha tirtirsitaan. Yihowwa ergantoole isixxi, isishshanni jaalala leellishshaaꞌnaa uuddaa wodda yoꞌoshsha gammadaan.

17-18. Addetike jaaluwwiꞌaa kadhantaannexxi kadha hitta ifisenda?

¹⁷ Kadha noꞌoxxi futti hiyyeeki jeeji jijjiiremaashsha assitaachcho noꞌoꞌni fakkaatanna gophphoole, kadha noꞌoxxi dayyuwwatee jaalala anfeennexxa leellishshaan. Ittan Yihowwanna assinaannexxa yaane hubataann. Fakkeennakeꞌe, lame oose afeeka mitte mini hado hendo. Labbaki belti ela-gophee diipheen. Dayyo isixxi kinni anna iseka: “Dayyo ankeeꞌe kaddeexxa yaane assitaa balloꞌo. Isoo giisseebaaqqa!” hiteen. Anni kinni maa assaaxxa ediseenni egeꞌneen; buutotinna belto isika eeyyaꞌneen, ittan karkarsoꞌaanna hasaꞌneen. Kaddomaleꞌe, tinni isixxi shiixxoxxi belto dayyo isekeꞌe yaaddeꞌe isoo gargaroꞌaa kadhattaa wodda anni hittee qico iseꞌni gammadaaxxa heda dandeennannon.

¹⁸ Yihowwa noꞌo assinonnaa jajjabeessaꞌneexxi yaane, weliꞌaan weli hendonnaanna kadhantonnaaten. Iitta assinanno wodda dayyuwwakeꞌe qalbe giddixxenni hendaannexxa leellinshannon, tiniinna Yihowwa lummisee uudaaxxe yaanen. (2 Te. 1:3.; Ibr. 6:10.) Taꞌi qicoꞌni uundenneshshanni mitte mitte wodda kadha yaane jijjiirendaashsha assatixxa hunna affeen. Tenneꞌaa duuchchiniinge orinni weliꞌaan weli kadhatatee dandeennennexxa duuchcha assino.