1 Ga Sadi

Lachyum

Shada da ga sadi tawn da ai yan la ni gaw, dinghku hpe htani htana grin ai makyit sumri ngu mu mada ma ai. Dai gaw dinghku hta shim lum lam hkamsha shangun ai. Mayak mahkak ni hkrum wa yang pyi, makyit sumri di mat na n re ngu kam ma ai.

Nkau yan la ni chyawm gaw, shinggan kaw na shadut ai lam, nta masha ni a shadut ai lam ni a majaw, rau nga ai baw byin chye ai. Raitim, shada da tsawra myit, hkungga lara ai lam ni hpe madung tawn yang she grau kaja ai.

Chyum Laika Npawt Tara: “Madu wa mung, madu jan hpe n kau u ga.”​—1 Korinhtu 7:11.

“Ga sadi tawn da yang, dinghku hpe aloi sha hkra machyi hkam na n re. Kalang hta hpyi nem chye na re. Kalang ta mara raw ya na re. Manghkang ni hpe hka bra shangun ai lam ngu n mu ai sha, dingbai dingna byin shangun ai lam hku nna mu mada na re.”​—Maihka.

Hpa Majaw Ahkyak Ai Kun?

Mayak manghkang ni hkrum wa ai shaloi, ga sadi n tawn da hkat ai yan la ni gaw, “An gaw n htuk ai” ngu tsun nna, hka na lam tam ma ai.

“Masha law law gaw n htuk hkat yang, hka na ngu ai myit hte dinghku de ai. Hka mai ai ngu ai myit hte dinghku de ai shaloi, shan a hkungran ga sadi ni gaw nnan kaw na grin na masa nau n nga sai.”​—Jin.

Galaw Mai Ai Lam

Tinang Hkum San Jep Yu U

Ga Law Ai Shaloi . . .

• Shi hpe hkungran wa ai majaw myit malai lu ai kun?

• Kaga langai hte nga yang grau htuk na re ngu myit ga ai kun?

• “Hka nga saga” (sh) “ngai hpe manu shadan ai wa hpe sha tam sana” ngu tsun ai kun?

Ga san langai (sh) langai hta n-ga hpe, re ai ngu htai ai nga yang, hkungran ga sadi hpe ngang kang hkra galaw na matu ra sai.

Ningrum Ningtau Wa Hte Bawngban U

• Hkungran ga sadi n grin mat sai kun? Hpa majaw kun?

• Hkungran ga sadi ngang kang na matu, hpa ni galaw ging ai kun?

Tatut Galaw Mai Ai Lam

• Ningrum ningtau hpe tsawra ai lam laika kadun ni sa u

• Bungli galaw ai saboi hta, ningrum ningtau a sumla hpe tawn da u

• Bungli (sh) shinggan de du nga yang, ningrum ningtau hpe phone shaga u

Chyum Laika Npawt Tara: “Karai Kasang matut da nu ai hpe, masha gaw n jahka kau u ga.”​—Mahte 19:6.