Uphkang Hpung Kaw Na Laika

Tsawra Ai Hpunau Nauna Ni E:

Karai Kasang hte masha hpe tsawra ai myit gaw, “pru sa nna, masha amyu baw shagu hpe sape shatai let, . . . shanhte hpe baptisma jaw” na matu shadut ya ai. (Mat 28:19, 20; Mrk 12:28-31) Tinang akyu n tam ai tsawra myit gaw atsam kaba ai. “N htum n wai asak lu la na” matu, dingman ai myit hte shakut ai ni a myit masin hpe hkra ya ai.—Kas 13:48.

Moi de gaw, tsun shaga ladat ni hpe matsing hkra galaw nna, laili laika ni garan ai hpe myit maju jung wa ai. Ya gaw, tsun shaga ai atsam rawt jat hkra galaw ra ai. Shanhte myit lawm na lam ni hpe tsun dan nna tsawra myit madun mayu ai. Dai gaw, langai hpra a myit lawm ai lam ni hpe atsawm myit nna, galai shai nna hkaw tsun ai lachyum re. Dai zawn galaw lu na matu, ndai brochure gaw gara hku karum ya na kun?

Ndai brochure hta tsawra myit madun nna, sape shatai ai lam hta nga ra na atsam ningja ni hpe sharin ya ai daw 12 lawm ai. Daw langai hpra gaw, hkaw tsun bungli hta Yesu (sh) tsa ban langai na Hkristan ni madun wa ai, Chyum Laika labau hte seng ai atsam ningja langai hpe madung tawn da ai. Yaw shada lam gaw, hkaw tsun ladat ni hpe matsing hkra galaw na matu n re ai sha, masha ni hpe tsawra myit madun lu na matu re. Anhte a hkaw tsun bungli daw yawng hta dai atsam ningja langai hpra ra ai. Raitim, tsun shaga hpang ai shaloi, bai kawan ai shaloi (sh) chyum ga sharin ai shaloi, laksan hku nna dai atsam ningja ni gara hku ra ai hpe bawngban mat na re.

Daw langai hpra hpe hkaja ai aten hta, nang nga ai shara na masha ni hte tsun shaga ai shaloi, dai atsam ningja hpe gara hku madun lu ai lam atsawm myit yu u. Yehowa hte masha hpe grau tsawra wa hkra shakut u. Kaga hkaw tsun ladat ni hta na, dai tsawra myit gaw, sape shatai na ngu ai na a bandung de du hkra karum ya na re.

Nanhte hte rau kahkyin gumdin let galaw lu ai ahkaw ahkang kaba hpe anhte grai manu shadan ai. (Zep 3:9) Masha ni hpe matut tsawra nna sape shatai ai shaloi, nanhte hpe Yehowa shaman chyeju jaw u ga!