Chyum Laika Gaw Prat Hpe Rawt Jat Shangun Lu Ai Lam

Chyum Laika gaw yu maya laika buk n re. Chyum Laika hta Hpan Madu kaw na hpaji jaw ga ni lawm ai. (2 Timohti 3:17) Dai shiga ni gaw anhte a prat hpe grai akyu shabyin ya lu ai. Chyum Laika hta ndai hku tsun da ai: “Karai Kasang a mung ga gaw, a hkrung nga ai hte alet nga ai.” (Hebre 4:12) Chyum Laika gaw anhte a prat hpe lam lahkawng hku nna rawt jat shangun ai. Langai, shani shagu na prat hkrun lam hpe lam matsun ya ai. Lahkawng, Karai Kasang hte shi a ga sadi ni hpe chye wa hkra karum ya ai.​—1 Timohti 4:8; Yaku 4:8.

Prat hpe rawt jat shangun ai. Chyum Laika gaw prat a lam shagu hpe matsun ya lu ai. Ndai lam ni a matu tatut re ai hpaji jaw ga ni Chyum Laika hta lawm ai:

• Kaga ni hte kanawn mazum ai lam.​—Ehpesu 4:31, 32; 5:22, 25, 28, 33.

• Hkum hkrang hte myit hkam kaja lam.​—Shakawn 37:8; Ga Shagawp 17:22.

• Akyang lailen tsang madang hte seng ai lam.​—1 Korinhtu 6:9, 10.

• Hpaga lam.​—Ga Shagawp 10:4; 28:19; Ehpesu 4:28.a

Asha dan kaw na yan la langai gaw, Chyum Laika hpaji jaw ga ni hpe grai manu shadan mat ai. Dinghku nnan de ai kaga yan la ni zawn sha, shan yan mung akyang lailen ni hpe galai shai na matu, makoi magap ai lam n nga ai sha tsun shaga chye na matu yak wa ma ai. Raitim, Chyum Laika kaw nna hti lu ai lam ni hpe tatut hkan sa wa ai. Lu la ai akyu hpe madu wa Bisin ndai hku tsun dan ai: “Chyum Laika hti nna chye wa ai lam ni gaw dinghku hta hkrum ai manghkang ni hpe, tsawra myit hte hparan chye na matu karum ya ai. Chyum Laika tsang madang hte maren asak hkrung ai gaw, lahkawng yan hpe ngwi pyaw shangun ai.” Madu jan Annalawt mung ndai hku tsun ai: “Chyum Laika hta lawm ai kasi ningli ni hpe hti ai gaw, an yan hpe grai karum lu shangun ai. Ya nga yang, an yan a dinghku gaw ngwi pyaw myit dik nna, prat a yaw shada lam ni hte hpring nga sai.”

Karai Kasang a lam grau chye shangun ai. Bisin gaw shi a dinghku lam sha n-ga “Chyum Laika hpe hti ai majaw, Karai Kasang hte grau hku hkau wa ai” ngu tsun ai. Shi a ga gaw ahkyak ai lam langai hpe dan leng shangun ai. Chyum Laika gaw Karai Kasang hte grau hku hkau hkra karum ya lu ai hpe mu lu ai. Chyum Laika hti ai shaloi, dai hta lawm ai hpaji jaw ga ni kaw nna, akyu lu la mai ai sha n-ga, Karai Kasang hpe jinghku langai zawn grau hku hkau wa ai. Dai sha n-ga, grau kaja ai htawm hpang hte seng nna, Karai Kasang ahkri ahkrai tsun da ai hpe mung chye wa na re. Htawm hpang hta, htani htana asak hkrung lu na “asak majing” hpe lu la na re. (1 Timohti 6:19) Dai zawn, htawm hpang prat hte seng nna tsun da ai hpe kaga gara laika buk hta mung n mu lu ai.

Chyum Laika hpe nang hti hpang taw sai nga yang, matut nna hti u. Na a prat rawt jat wa nna, Karai Kasang a lam hpe mung grau chye wa na re. Raitim, Chyum Laika hti nga let, ga san ni law law pru wa chye ai. Dai hku byin wa yang, lai wa sai shaning 2,000 daram hta asak hkrung wa ai Ehtiopi masha langai a kaja ai kasi hpe myit dum u. Shi kaw mung Chyum Laika hte seng ai ga san law law nga wa ai. Hti nga ai lam hpe chye na ai kun? ngu nna shi hpe san ai shaloi, “Htai ya ai mi n nga yang, ngai kaning rai chye na na rai ta?” ngu htai wa ai. Dai hpang, Yesu a sape rai nna, Chyum Laiak hpe atsawm sharin ya lu ai Hpilip a karum ai lam hpe kabu gara let shi hkap la wa ai. (Kasa 8:30, 31, 34) Shi zawn sha, nang mung Chyum Laika hpe grau chye mayu yang, www.pr2711.com hta Chyum Laika hkaja na matu hpyi shawn ai shara hta tang shawn laika hpe ka u. Shing nrai, ndai laika buk hta madun da ai, nang hte ni dik htum hkring dat langai ngai hpang de laika ka nna matut mahkai u. Na a makau grup-yin hta nga ai Yehowa Sakse ni hpe matut mahkai mai ai zawn, na a buga hta nga ai Nawku Htingnu de mung sa du mai ai. Dai ni nan Chyum Laika hpe hti dat sa nu. Grau kaja ai asak aprat lu na matu, Chyum Laika gaw lam matsun ya u ga.