Chyum Laika Hpe Myit Lawm Let Hti Mai Ai Lam

Chyum Laika hti ai gaw na matu, shalan shabran lam n byin ai sha, lagawn hpa byin nga ai kun? Mahtai gaw nang gara hku hti ai ngu ai hta madung ai. Chyum Laika hti ai hpe grau nna myit lawm hpa byin hkra, myit dik lam byin hkra galaw mai ai ladat ni hpe yu yu ga.

Kam mai nna chye na loi ai ga gale Chyum Laika hpe lata u. Nang hti taw nga ai Chyum Laika gaw chye na yak nna, prat n dep mat sai ga si ni hpe lang da ai nga yang, hti jin mat chye ai. Dai majaw, hti nga ai lam ni myit masin de du na matu, chye na loi ai ga hte ka da ai Chyum Laika hpe tam nna hti u. Raitim, tup hkrak tengman ai hku gale da ai, ga gale Chyum Laika rai ra ai.a

Prat dep ai ladat hpaji ni hpe akyu jashawn u. Ya aten hta Chyum Laika hpe laika buk hku nna sha n-ga, electronic hkrang hku nna mung lu mai ai. Chyum Laika nkau nga yang, internet kaw mai hti ai. Kumpyuta, tabalet, phone ni hta download galaw nna hti mai ai. Nkau electronic hkrang ni hta, lam langai hte seng ai kaga Chyum daw ni hpe hti lu hkra, kaga ga gale Chyum Laika ni hte mung shingdaw lu hkra galaw da ya ai. Laika hte hti ai hta na, madat ai hpe grau ra sharawng ai nga yang mung, Chyum Laika hpe nsen bang da ai hkrang hku nna lu la mai ai. Masha law law gaw, mawdaw jawn nga ai aten, kaga bungli ni galaw nga ai aten hta madat ai hpe ra sharawng ma ai. Na a matu htap htuk ai ladat hpe lang mai ai.

Hkaja ai shaloi madi shadaw ya lu ai hkingrai ni hpe lang u. Madi shadaw ya lu ai hkingrai ni hpe lang yang, Chyum Laika hti ai kaw nna akyu grau lu la na re. Chyum Laika hte seng ai lamu ga sumla ni nga ai. Dai lamu ga sumla ni gaw Chyum Laika hta lawm ai ginra ni a shara hpe chye shangun ai. Hti taw nga ai mabyin a shingdu labau hpe grau chye na hkra karum ya ai. Ndai magazin hta lawm ai sumhpa ni (sh) jw.org/kac hta na “CHYUM LAIKA SHARIN YA AI LAM NI” ngu ai daw gaw Chyum daw ni a lachyum hpe chye na hkra karum ya ai.

Ladat amyu myu galai u. Chyum Laika hpe nnan kaw nna jahtum du hkra hti na matu htingnut nga ai nga yang, nang ra sharawng ai daw kaw nna hti hpang u. Chyum Laika kaw na mying gumhkawng ai ni a lam hpe chye mayu ai nga yang, langai hpra hpe lata nna hti mai ai. Ga shadawn hpe “Chyum Laika Hta Lawm Ai Masha Ni A Lam Hpe Kahtap Nna Hkaja U” ngu ai lawk hta madun da ai. Shing nrai, ga baw langai hpra hku nna, mabyin ni hpe azin ayang hku nna hti mai ai. Ladat langai ngai hpe chyam yu u.