Dawi Hpa Majaw Hprawng Ra Ai

DAWI gaw Goliat hpe sat kau ai hpang Israela hpyen du kaba Abna gaw shi hpe Shawlu hpang de woi wa ai. Shawlu gaw Dawi hpe grai ra sharawng ai. Dawi hpe hpyen du kaba shatai nna, hkawhkam htingnu hta e nga shangun ai.

Dai hpang e Hpilisti masha ni hpe gasat ai kaw nna hpyen luk suk nhtang wa ai shaloi: ‘Shawlu sat ai gaw hking hking, Dawi sat ai gaw mum mum,’ nga nna mahkawn ma ai. Shawlu hta grau nna Dawi hpe shakawn magrau ma ai majaw, Shawlu manawn ai myit rawng wa ai. Raitimung Shawlu a kasha Yonahtan gaw manawn ai myit n rawng ai. Shi gaw Dawi hpe grai tsaw ra ai. Dai majaw shan lahkawng langai hte langai tut nawng e jinghku hku na lam ga sadi tawn ma ai.

Dawi gaw tingse grai chye dum ai rai nna, Shawlu mung Dawi tingse dum shapyaw ai hpe ra sharawng ai. Raitimung lani mi hta e, Shawlu manawn ai myit rawng wa nna hkrit hpa re ai amu langai mi galaw dat ai. Dawi tingse dum nga yang nri hpe la nna: ‘Dawi hpe shakum hte jinghkyen shakap kau de ga,’ nga nna nri hpe jinghkyen dat ai. Raitimung Dawi a kajawng sha yen kau nna, shi hpe nhkra ai. Dai hpang e Shawlu nri bai jinghkyen dat yang Dawi hpe nhkra ai. Dai majaw Dawi gaw sadi nna nga ra sai, hpe chye na kau ai.

Shawlu jaw ai ga sadi hpe naw myit dum a ni? Goliat hpe sat kau lu ai masha hpe shi a shayi sha ya sha na nga ai. Hpang jahtum e Shawlu gaw shi a shayi sha Mihkala hpe Dawi hte ya sha na re da. Raitimung Hpilisti hpyen 100 hpe sat kau jang she lu la na re, nga nna Dawi hpe tsun ai. Shye myit yu mu. Shawlu gaw Dawi hpe Hpilisti masha ni e sat kau u ga ngu ai myit rawng nga ai. Raitimung Hpilisti masha ni a lata hta e, Dawi nsi ai. Dai majaw Shawlu gaw shi a shayi sha hpe Dawi hte jaw sha kau ai.

Lani mi hta e Shawlu gaw shi a kasha Yonahtan hte shi a mayam ni hpe tsun ai. Dawi hpe shi sat kau mayu ai da. Raitimung Yonahtan gaw: ‘Dawi hpe hkum sat kau u wa hpe Dawi hpa mung nshut ai. Dawi galaw ai lam shagu gaw wa a akyu hkrai re. Goliat hpe sat ai shaloi shi a asak hpe daw dan kau nna sa ai. Dai hpe wa mu nna kabu nit dai nrai ni?’ nga nna tsun ai.

Shawlu mung shi a kasha a ga hpe madat nna Dawi hpe hpyen ntam sana re, nga nna ga sadi jaw ai. Dai rai nna Dawi hpe bai shaga la ai. Dawi mung Shawlu a hkawhkam htingnu kaw e, shawng na hte maren bai wa nga nga ai. Lani mi hta e, Dawi tingse dum nga ai shaloi, Shawlu gaw Dawi hpe nri hte bai jinghkyen dat ai. Dawi akajawng sha yen dat ai. Nri mung shakum hta wa jung mat ai. Ndai lang hte rai jang masum lang rai sai. Dawi gaw hprawng ra ai nga chye kau ai.

Dai shana e Dawi gaw shi a nta de wa mat ai. Raitimung Shawlu gaw shi a masha ni hpe shangun nna Dawi hpe sat shangun ai. Mihkala gaw shi a kawa a yawshada ai lam hpe chye ai majaw shi a madu wa hpe tsun ai: ‘Dai na nang nhprawng yen kau yang gaw hpawt de si na sai,’ nga nna tsun dan ai. Dai shana e hku wat hku kaw na Dawi hprawng lawt lu hkra Mihkala karum ya ai. Dawi gaw Shawlu nmu lu hkra shara mi kaw na shara mi sanit ning hprawng hkawm ai.