Dawi Hte Shawlu

Dawi gaw Goliat hpe sat ngut ai hpang, Hkawhkam Shawlu gaw Dawi hpe shi a hpyen dap hta hpyen du shatai dat ai. Dawi gaw majan law law hpe awng dang wa nna, mying kaba wa ai. Dawi majan awng dang nna nta de bai wa shagu, anum ni gaw ka manawt let mahkawn hkawn nna, ndai hku hkap tau la ai: ‘Shawlu sat ai gaw hkying hkying, Dawi sat ai gaw mun mun!’ Shawlu gaw Dawi hpe manawn nna, sat kau mayu wa ai.

Dawi gaw tingse atsawm chye dum ai. Lani mi hta, Dawi gaw Hkawhkam Shawlu a matu tingse dum ya nga ai shaloi, hkawhkam wa gaw shi a nri hpe Dawi hpang kabai shapyen dat ai. Dawi gaw aten hkrak, yen kau lu ai majaw shi hpe n hkra ai sha, nri gaw shakum de shang mat ai. Dai hpang, Shawlu gaw Dawi hpe sat na matu chyahkring hkring shakut ai. Hpang jahtum, Dawi gaw hprawng nna nam mali hta makoi nga ra mat ai.

Shawlu gaw hpyen la marai 3,000 hte Dawi hpe hkan tam ai. Shi gaw Dawi hte shi a masha ni makoi nga ai lungpu de ndum shami shang hkrup mat ai. Dawi a masha gaw kahte nna ndai hku tsun ai: ‘Ndai gaw Shawlu hpe sat na matu ahkaw ahkang re.’ Dawi gaw Shawlu hpang angwi sha sa nna, shi a palawng matu hpe yat sha gadoi la dat ai. Shawlu chyawm gaw dai hpe n chye ai. Raitim, Dawi gaw Yehowa aya tang da ai hkawhkam hpe n hkungga ai hku galaw hkrup ai majaw, grai myit n pyaw mat ai. Shawlu hpe gasat na matu, shi a masha ni hpe mung ahkang n jaw ai. Lungpu shinggang de Shawlu pru mat ai hpang, Dawi gaw Shawlu hpe sat lu ai ahkaw ahkang nga wa ai lam jahtau nna tsun ai. Dawi hte seng nna Shawlu a myit jasat galai shai wa ai kun?

N galai shai ai. Shawlu gaw Dawi hpe rim na matu, matut hkan tam ai. Lana mi hta, Dawi hte shi a kahkri Abishai gaw Shawlu a dap de mayun nna shang mat wa ai. Shawlu a sin langa agyi Abna mung yup pyaw nga ai. Abishai ndai hku tsun ai: ‘Ndai gaw anhte a matu ahkaw ahkang re! Shi hpe sat na matu ngai hpe ahkang jaw rit.’ Dawi ndai hku tsun ai: ‘Yehowa sha Shawlu hpe jeyang u ga. Shi a nri hte hka bu hpe sha la mat ga.’

Dawi gaw Shawlu a dap hte ni nna dap hpe atsawm mu lu ai bum ntsa de lung mat ai. Dai hpang shi ndai hku marawn ai: ‘Abna, nang hpa majaw hkawhkam wa hpe n makawp maga ya ai kun? Shawlu a nri hte hka bu gara kaw ta?’ Dawi a nsen re ai hpe Shawlu matsing mat nna ndai hku jahtau tsun ai: ‘Ngai hpe nang sat lu tim n sat wa ai. Nang gaw Israela ni a hpang lung na hkawhkam re ai hpe ngai chye ai.’ Shawlu gaw shi a hkawhkam htingnu de bai wa mat ai. Raitim, Shawlu a nta masha yawng, Dawi hpe nju ndawng ai gaw n re.