Israela Mungdan A Hpang Jahtum Na Kaja Ai Hkawhkam

YOSHIA gaw dingda Israela lakung lahkawng mungdan a hkawhkam galaw ai shaloi asak matsat ning sha naw re ai. Ndai daram hta hkawhkam galaw ai gaw grai naw kaji ai. Dai majaw nnan daw hta e, asak kaba ai ni gaw up hkang ai lam hta shi hpe karum ma ai.

Yoshia hkawhkam galaw ai sanit ning du wa ai shaloi Yehowa hpe hkan tam hpang ai. Shi gaw Dawi, Yahosahpat, Hezekia ni zawn kaja ai hkawhkam ni a kasi ningli yu la ai. Shi gaw shi ning jan daram sha naw kaba ai shaloi, Yoshia gaw magrau grang ai bungli langai mi hpe galaw ai.

Israela masha law malawng nshawp nkap rai nna nga ai aten na sai. Shut ai karai ni hpe nawku ma ai. Gawngngu sumla ni hpe nawku ma ai. Dai majaw Yoshia gaw, shi a masha ni hte pru sa wa nna mungdan hta na shut ai karai ni hpe nawku ai kaw na yeng seng kau ai. Shut ai karai hpe nawku ai masha law law nga ma ai majaw, ndai amu gaw loi ai amu nre. Yoshia hte shi a masha ni gawngngu sumla hpe adup grawp nga ma ai lam ndai sumla kaw e mu a ni?

Dai hpang Yoshia gaw masha masum hpe san tawn nna Yehowa a nawku htingnu hpe gram lajang shangun ai. Masha ni kaw na gumhpraw lahkawn la nna ndai masha masum hpe galaw jahpu jaw ai. Nawku htingnu kaw e, amu galaw nga ma ai shaloi, hkingjawng agyi Hilkia gaw ahkyak dik ai arai langai mi hpe mu la ai. Moi shawng de Mawshe hpe ka shangun ai laika buk re. Ndai laika buk mat mat ai shaning law law na sai.

Dai laika hpe Yoshia hpang de la sa wa ma ai. Yoshia gaw dai laika hpe hti shangun dat ai. Yoshia madat yu ai shaloi masha ni gaw Yehowa a tara hpe n hkan nang nga ma ai lam shi chye kau ai. Shi grai yawn ai majaw shi a palawng hpe gang je dat ai. Ndai sumla hta mu ai hte maren re. ‘Yehowa gaw anhte hpe masin pawt nga sai. Hpa majaw nga yang anhte a ji wa ni ndai laika hta rawng ai tara hpe n hkan shatup ma ai majaw re,’ nga nna tsun ai.

Dai majaw Yoshia gaw Yehowa shanhte hpe hpa galaw na lam chye lu hkra hkinjawng agyi Hilkia hpe san shangun ai. Hilkia gaw myihtoi num Hulda kaw sa san ai. Hulda gaw Yehowa kaw na shiga hpe kasa dat nna Yoshia hkawhkam hpang de tsun shangun ai. ‘Masha ni gaw shut ai karai ni hpe nawku nna mungdan hpe nhkru ai amu hte hpring hkra galaw ma ai majaw dai masha yawng hte hte, Yerusalem mare hpe a ri jaw na. Raitimung nang Yoshia gaw kaja ai amu hpe galaw ai majaw, nang si mat wa ai hpang e, dai ari du na ra ai.’