Yoshia Kaw Manang Kaja Ni Nga Ai

Teng man ai hpe galaw na matu yak ai ngu shadu ai i?— Masha law law gaw dai hku shadu ma ai. Yoshia ngu ai la sha gaw, teng man ai lam galaw na matu yakhkak tim, shakut nna galaw wa ai ngu, Chyum Laika hta tsun da ai. Dai hku galaw lu ai gaw shi hpe karum ya ai shi manang ni a majaw re. Yoshia hte shi manang ni a lam hti yu ga.

Yoshia a kawa gaw Yuda hkawhkam Amon re. Amon gaw grai nhkru nna sumla ni hpe nawku ai. Kawa si mat ai hpang Yoshia gaw Yuda hkawhkam byin wa ai. Raitim shi asak, 8 ning sha naw re ai. Yoshia gaw shi kawa hte bung na ngu shadu ai i?— Nbung ai.

Yehowa a ga hpe naw kaji ai aten kaw na Yoshia madat mayu ai. Dai majaw Yehowa hpe tsawra ai ni hte sha kanawn ai. Teng man ai hpe Yoshia galaw lu hkra, dai manang ni karum ya ai. Yoshia a manang nkau mi gaw kadai ni ta?

Manang langai gaw Zehpani re. Shi gaw myihtoi langai re. Nanhte sumla ni hpe matut nna nawku yang, jamjau sana re nga nna, Yuda masha ni hpe sadi jaw ai. Zehpani a ga Yoshia madat nna sumla ni hpe n nawku ai sha Yehowa hpe nawku ai.

Yoshia a kaga manang langai gaw Yeremia re. Shi gaw Yoshia hte asak bung nna nta htingbu ni hku nna kaba wa ma ai. Shan yan grai tsawra ma ai. Yoshia si ai shaloi Yeremia gaw mahkawn mangoi langai hte, shi hpe kade daram dum ai lam ka wa ai. Yeremia hte Yoshia gaw Yehowa a ga madat nna teng man ai hpe galaw na matu shada da karum ya ai.

Yoshia kaw na hpa sharin la mai na ta?— Yoshia gaw naw kaji ai aten kaw na teng man ai hpe galaw mayu ai. Yehowa hpe tsawra ai ni hte sha manang galaw ra na hpe shi chye ai. Ma ni mung, Yehowa hpe tsawra nna teng man ai hpe galaw na matu karum ya ai ni hte sha, kanawn ra ai.