Wenyi Ni, Si Mat Ai Ni A Wenyi Kun?

Wenyi hkum gaja wa nga ai. Myi hte n mu lu ai wenyi mungkan hta, kaja ai wenyi hkum hkrang ni nga ai zawn, n kaja ai wenyi hkum hkrang ni mung nga ai. Shanhte gaw mungkan ntsa asak hkrung nna si mat ai ni kun?

N re. Masha si mat ai hpang, masha law law shadu ai zawn wenyi mungkan de n du mat ai. Gara hku chye lu ai kun? Chyum Laika hta tsun dan da ai majaw re. Chyum Laika gaw Yehowa ngu amying nga ai langai sha re ai tengman ai Karai Kasang kaw na sa ai tengman ai laika buk re. Masha ni hpe Yehowa hpan da ai majaw, masha si mat yang hpa byin mat ai hte seng nna, shi atsawm chye ai.—Shakawn 83:17; 2 Timohti 3:17.

Shawng nnan na shinggyim masha Adam hpe “ga yun” hte hpan ai ngu nna Chyum Laika hta tsun da ai. (Ningpawt 2:7) Karai Kasang gaw shi hpe Hparadisu ngu ai Edin Sun hta nga shangun ai. Karai Kasang a ga madat na nga yang, Adam gaw si ra na n re. Dai ni aten du hkra asak hkrung nga na re. Karai a tara ni hpe dingsang tawt lai ai shaloi, Adam hpe Karai Kasang ndai hku tsun ai: “Ga de na nang hpe shapraw la de ai majaw, ga de nang nhtang wa . . . lu na ndai; kaning rai nme law, nang ga yun rai nga ndai rai nna, ga yun bai tai na rin dai, ngu wu ai.”—Ningpawt 3:19.

Hpa lachyum rai kun? Ga yun hte Adam hpe garai n hpan shi yang, Adam gara kaw nga nga ai kun? Gara kaw mung n nga ai. N shangai shi ai sumsing lamu na wenyi hkum mung n re. Shi asak n hkrung ai. “Ga de nang nhtang wa” lu na ngu Yehowa tsun ai shaloi, Adam si ra na re ngu tsun mayu ai re. Wenyi mungkan de du mat ai n re. Adam si mat ai shaloi, shi asak n hkrung sai, gara shara kaw mung n nga sai. Si ai ngu ai gaw asak n nga mat ai hpe tsun ai re.

Rai yang, si mat ai kaga masha ni gaw taw? Shanhte mung n nga mat sai kun? Chyum Laika hta ndai hku htai da ai:

• “Yawng [shinggyim masha hte dusat] hte gaw shara langai sha hta, du na ma ra ai; yawng hte gaw ga nhpu na rai nga ai hte ga nhpu de bai nhtang wa na ma ra ai.”—Hpaji 3:20.

• “Si mat ai ni chyawm gaw hpa n chye ma ai.”—Hpaji 9:5.

• “Shanhte a sumtsaw sumra, n dawng n yawt ai hte manawn masham gaw, moi kaw nna hkoi mat sai.”—Hpaji 9:6.

• “Nang yu wa na ra ai katsan ga hta e, amu bungli, maw mawn ai, chye chyang ai hte hpaji hparat hpa mung n nga ai.”—Hpaji 9:10.

• “Shi ga de bai nhtang mat wa ai rai nna, Dai shani jang, shi maw ai hku yawng hten mat wa ai.”—Shakawn 146:4.

Ndai Chyum daw ni gaw hkap la na matu yak ai kun? Hkap la yak ai nga yang, ndai hpe myit yu u. Dinghku law law hta la ni gaw dinghku hpe madi shadaw na matu gumhpraw tam ai. Madu wa si mat yang nta masha ni gaw mayak mahkak ni hkrum ai. Kalang lang, ngam nga ai shi madu jan hte ma ni hta, lusha mari na matu pyi gumhpraw n nga ai. Shing n rai, madu wa a hpyen ni gaw shanhte hpe n tara ai hku galaw wa chye ai. Ya ndai hku san yu u: “Madu wa gaw wenyi mungkan hta asak naw hkrung ai nga yang, shi a nta masha ni hpe hpa majaw matut n madi shadaw ya ai kun? Nhkru ai masha ni a lata kaw na shi a nta masha ni hpe hpa majaw n makawp maga ya ai kun?” Chyum Laika hta tsun da ai lam ni gaw jaw ai majaw re. Dai la gaw asak n hkrung sai rai nna hpa mung n lu galaw ya sai majaw re.—Shakawn 115:17.

Rai yang, si mat sai ni gaw galoi mung asak bai n hkrung wa sai lachyum kun? Dai hku mung n re. Bai hkrung rawt wa na lam hte seng nna hpang she tsun ga. Ya tsun mayu ai gaw, si mat sai masha ni gaw nang hpa galaw nga ai hpe n chye ai. Nang hpe n mu lu ai. Nang shaga nga ai hpe mung n na lu ai, nang hpe mung ga n lu shaga ai. Shanhte hpe hkrit tsang n ra ai. Nang hpe n lu karum ya ai zawn, shoihpa mung n lu jaw ai.—Hpaji 9:4; Esaia 26:14.