Sumsing Lamu Na Gumlau Ai Lam

Yehowa hpan da ai wenyi hkum hkrang yawng gaw kaja ai. Raitim, hpang hta lamu kasa langai gaw nhkru wa ai. Shi gaw Satan Nat wa re. Satan gaw mungkan ga hta nga ai masha ni hpe Yehowa hpe nawku na malai, shi hpe nawku shangun mayu ai. Mabyin gaw ndai hku re:

Edin Sun hta namchyim mu ai namsi hpun ni grai law hkra nga ai. Dai namsi ni hpe myit ra ai hku mai sha tim, hpun langai na asi hpe gaw n mai sha ai. Sha yang si na ngu nna Adam yan Ewa hpe Yehowa matsun wa ai.—Ningpawt 2:​9, 16, 17.

Lani mi hta, Ewa langai hkrai sha nga taw ai aten hta, lapu langai gaw ga sa shaga ai. Teng sha nga yang gaw lapu ga shaga ai n re. Lapu hku nna Satan ga shaga nga ai re. N sha na matu tsun da ai namsi hpe sha na nga yang, Karai Kasang zawn hpaji rawng wa na re ngu nna Satan gaw Ewa hpe tsun ai. Si na n re ngu nna mung tsun ai. Dai gaw masu ai ga ni re. Raitim, Ewa gaw Satan hpe kam nna namsi hpe sha kau ai sha n-ga, Adam hpe mung jaw ai. Adam mung sha kau ai.—Ningpawt 3:​1-6.

Satan gaw gumlau ai wa, masu ai wa re ai hpe ndai mabyin kaw na chye lu ai. Karai Kasang a ga n madat yang si na n re ngu Ewa hpe tsun ai. Dai gaw masu ga re. Ewa si mat ai zawn, Adam mung si mat ai. Mara galaw ai majaw Satan gaw garai n si shi tim, hpang jahtum gaw si ra na re. Ya aten du hkra Satan asak naw hkrung nna, masha ni hpe matut naw hkalem nga ai.—Yawhan 8:44.

Gumlau Ai Kaga Lamu Kasa Ni

Hpang hta, kaga lamu kasa ni mung nhkru wa ma ai. Mungkan ga na anum ni tsawm ai hpe mu ai shaloi, shanhte hte hkumshan kanawn mayu wa ma ai. Dai majaw, ala hkum hkrang dagraw la nna mungkan ga de du wa ai. Num ni la ma ai. Dai gaw Karai a yaw shada lam hpe ninghkap ai re.—Ningpawt 6:​1, 2; Yuda 6.

Dai hku galaw ai gaw shinggyim masha ni hpe hkra machyi shangun ai. Dai lamu kasa ni a num ni gaw, yu maya n re ai ma ni shangai wa ma ai. Dai ma ni kaba wa ai shaloi mazut nna zingri zingrat chye ai masha numraw kaba ni byin wa ai. Dai hku nna mungkan ga hta, nhkru ai lam ni hpring wa ai majaw, nhkru ai ni hpe hka sha-u ing ai hku nna jahten kau na matu Yehowa dawdan wa ai. Myit dinghpring ai Noa hte shi a nta masha ni sha, hka sha-u ing ai lam kaw na lawt lu wa ai.—Ningpawt 6:​4, 11; 7:23.

Nhkru ai lamu kasa ni chyawm gaw, n si ai sha sumsing lamu de bai lung mat wa ai. Raitim, shanhte ari jaw hkrum ai. Dinghpring ai lamu kasa ni hte sha hpawng de da ai Karai Kasang a kun dinghku kata de shang na ahkang n nga mat ai. Dai sha n-ga, masha hkum hkrang dagraw la lu ai ahkang hpe mung Yehowa zing la kau ya ai. Shanhte gaw tara jeyang na nhtoi hta si ra na re.—2 Petru 2:4; Yuda 6.

Sumsing Lamu Kaw Na Satan Jahkrat Hkrum

Tsa ban 20 shawng nnan maga hta, sumsing lamu kaw majan byin ai. Dai mabyin hpe Shingran Laika hta ndai hku tsun da ai: “Bai, sumsing lamu kata e majan gasat nga ai: Mihkaela [hkrung rawt wa sai Yesu] hte shi a ali ama ni gaw dai baren numraw [Satan] hte gasat nga ma ai; dai baren numraw hte shi a ali ama ni mung, gasat nga ma ai rai timung, shanhte n dang lu ma ai rai nna, sumsing lamu kata e shanhte a matu nga shara naw n nga masalu ai. Shaloi, mungka ga ting hpe hkalem kau ai, Nat hte Saran ngu ai, moi na lapu rai nga ai baren numraw kaba gaw, jahkrat kau ai hkrum wu ai: shi gaw, le ga de jahkrat kau hkrum ai rai nna, shi a ali ama ni mung shi hte rau jahkrat kau ai hkrum ma ai.”

Akyu gaw hpa kun? Chyum Laika hta ndai hku matut tsun da ai: “Dai re ai majaw, sumsing lamu ni hte dai hte hta rawng nga ai ni e, kabu gara nga mu.” Satan hte nhkru ai lamu kasa ni sumsing lamu hta n nga sai re ai majaw, dinghpring ai lamu kasa ni gaw kabu gara lu sai. Rai yang, ginding aga hta nga ai shinggyim masha ni gaw gara hku kun? Chyum Laika hta ndai hku matut tsun da ai: “Ginding aga hte nammukdara chyawm gaw dingnye lu ma ai: kaning re nme law, Nat gaw, shi a nhtoi loi mi sha ngam sai chye wu ai majaw, n-yun bu let nanhte hpang de yu wa sai.”—Shingran 12:7-9, 12.

Satan hte shi a nhkru ai manaw manang yawng gaw, mungkan ga na shinggyim masha ni hpe hkalem nna yakhkak ai mabyin ni hkrum sha shangun ai. Dai nhkru ai lamu kasa ni hpe nat ni ngu shaga ai. Shanhte gaw Karai Kasang a hpyen ni rai ma ai. Shanhte yawng gaw nhkru n kaja ma ai.