Daw Kăba 1
Kărai Kăsang Hpyi Ai Lam Ni Hpe Nang Găra Hku Mu Lu Na Lam
Chyum laika ē, hpa ahkyak ai shiga rawng a ni? (1)
Chyum laika shung ya ai Mungga Mădu gaw, kădai rai ta? (2)
Chyum laika hpe hpa măjaw sawk săgawn yu ra a ni? (3)
1. Chyum laika gaw Kărai Kăsang kaw na, hpu ging la ai kumhpa rē. Tsaw ra ai kăwa kaw na, tinang a shăyi shădang sha ni hpe jaw ya ai laika lăngai hte bung ai. Dai gaw Kărai Kăsang kădai rē ai, shi asat mădang ni gaw găra hku rē ai lam ni zawn rē ai, Kărai Kăsang hte seng nna teng man ai tăra hpe mădun tawn ai. Manghkang ni hpe găra hku hpăran ya na hte teng man ai ngwi pyaw lam hpe găra hku mu lu na lam ni hpe tsun shăleng dan ai. Kărai Kăsang a myit hte hkrum na mătu, anhtē hpa gălaw ra ai lam hpe, Chyum laika hta sha tsun da ai.—Shăkawn Kungdawn 1:1-3; Esaia 48:17, 18.
2. Chyum laika hpe B.C.E. 1513 ning kaw nna, shăning 1,600 jan lăman hta, kăga hkrai hkrai rē ai măsha mărai 40 dăram ka tawn da ma ai. Dai hpe laika buk kăji 66 htē hpe gumhpawn da ai rē. Chyum laika ka ai măsha ni hpe, Kărai Kăsang shung ya ai rē. Shanhtē a myit jăsat ai hku n rē ai sha, Mădu a myit jăsat ai hku shanhtē ka da ma ai. Dai rē măjaw, ginding aga ntsa na shinggyim măsha kădai mung n rē ai sha, sumsing lămu ē nga ai Kărai Kăsang chyu sha, Chyum laika a Mungga Mădu rai nga ai.—2 Timohti 3:16, 17; 2 Petru 1:20, 21.
3. Chyum laika hpe tup hkrak kănan ka nna, hkang măzing sin măkawp măga tawn na mătu, Kărai Kăsang teng tup sha gălaw lăjang da ai. Kăga găra laika buk hta n-ga, Chyum laika hpe grau nna htang dip tawn nga sai. Nang Chyum laika shărin hka ja nga ai hpe, măsha hkum shăgu kăbu na n rai ti mung, de măjaw hkum jăhkring kau u. Na a htani htana htawm hpang prat gaw, Kărai Kăsang hpe chyē chyang ai lam hte, kăning rē nhtan shai ai lam kăta ē raitim, Mădu ra shărawng ai hpe gunhpai nga na lam ntsa ē, dè nga ai. —Mahte 5:10-12; Yawhan 17:3.