DAW 05
Chyum Laika Gaw Karai Kasang Kaw Na Sa Ai Shiga
Yehowa gaw anhte hpe kumhpa hku nna Chyum Laika jaw da ai. Dai hta, laika buk kaji 66 lawm ai. ‘Chyum Laika hpe gara hku lu la wa ai kun? Chyum Laika Madu gaw kadai rai kun?’ ngu nna nang myit na re. Dai ga san ni a mahtai hpe chye lu na matu, Chyum Laika hta lawm ai Karai a shiga hpe gara hku lu la wa ai lam hkaja yu ga.
1. Chyum Laika hpe shinggyim masha ni ka wa ai rai yang, Karai Kasang gaw gara hku nna Chyum Laika a Madu rai kun?
Chyum Laika hpe shaning 1,600 laman hta, la 40 daram ka wa ai. B.C. 1513 kaw nna A.D. 98 daram du hkra re. Chyum Laika ka wa ai ni gaw shing du labau amyu myu kaw na ni re. Raitim, Chyum Laika gaw, shawng hpang rap ra ai. Dai gaw mai byin na kun? Mai byin ai. Hpa majaw nga yang, Chyum Laika a Madu gaw Karai Kasang re ai majaw re. (1 Htesaloni 2:13 hpe hti u.) Ka wa ai ni gaw, shanhte a myit mang ai lam hpe ka wa ai n re. “Chyoi pra ai Wenyia e myit shadut ya hkrum ai masha ni gaw, Karai Kasang kaw na ga htawn tsun ma ai.” (2 Petru 1:21) Karai Kasang gaw shi a myit mang ai lam ni hpe ka na matu chyoi pra ai wenyi hpe akyu jashawn nna, masha ni hpe shatsam ya ai, shadut ya ai.—2 Timohti 3:17.
2. Masha yawng gaw Chyum Laika kaw na akyu lu la mai na kun?
“Amyu baw shagu, baw lakung shagu, ga amyu shagu hte masha mungdan shagu” kaw na ni gaw, Chyum Laika shiga kaw na akyu lu la mai ai. (Shingran 14:6 hpe hti u.) Dai ni aten hta, Chyum Laika hpe kaga laika buk ni hta grau nna amyu ga law law hte lu la nga sai. Masha yawng ngu na daram Chyum Laika hpe lu hti sai. Gara kaw mi nga nga, gara amyu ga mi shaga tim lu hti sai.
3. Yehowa gaw Chyum Laika hpe gara hku makawp maga wa ai kun?
Chyum Laika hpe shanhpyi, tinggaw lap zawn re ai na na n hkam ai arai ni hta ka wa ai. Raitim, Chyum Laika hpe tsawra ai ni gaw, Chyum Laika hpe tup hkrak jaw hkra bai ka wa ai. Ahkang aya kaba ai masha ni gaw, Chyum Laika hpe mat mat hkra kade daram shakut tim, masha nkau mi gaw asak jaw nna makawp maga wa ai. Yehowa gaw shi hte anhte a lapran na, matut mahkai lam hpe hkring mat hkra galaw ai kadai hpe raitim, hpa hpe raitim, ahkang jaw na n re. Chyum Laika hta ndai hku tsun da ai: “Anhte a Karai Kasang a mungga chyawm gaw, htani htana grin nga na ra ai.”—Esaia 40:8.
Kahtap Hkaja
Karai Kasang gaw Chyum Laika ka na matu masha nkau mi hpe gara hku shatsam ya ai, Chyum Laika hpe gara hku makawp maga wa ai, Chyum Laika hpe masha ni lu la hkra gara hku galaw wa ai lam ni hpe hkaja yu ga.
4. Chyum Laika Madu kadai re ai hpe Chyum Laika nan tsun dan
VIDEO hpe hpaw. Dai hpang, 2 Timohti 3:17 hpe hti nna, ndai ga san ni hpe bawngban u.
Chyum Laika hpe masha ni ka ai rai yang, hpa majaw Karai a Mungga ngu nna tsun ai kun?
Karai Kasang gaw shi a myit mang ai lam ni hpe Chyum Laika ka ai ni hpang de sa ya ai. Dai hte seng nna nang gara hku shadu ai?
Amu madu gaw laika ka ya ai. Raitim, dai hta lawm ai lam ni gaw matsun ai wa kaw na sa ai she re. Dai hte maren, Chyum Laika hpe masha ni ka ai raitim, dai hta lawm ai lam ni gaw Karai Kasang kaw na sa ai re
5. Chyum Laika gaw matut grin nga
Chyum Laika gaw Karai Kasang kaw na rai yang, shi makawp maga ya na re ngu myit mada mai ai. Labau hta, ahkang aya nga ai ni gaw, Chyum Laika hpe mat mat hkra shakut ai. Nawku htung ningbaw ni gaw, Chyum Laika hpe makoi magap da na matu shakut ai. Ninghkap ai lam ni, si dam jaw na ngu jahkrit ai lam ni nga tim, masha law law gaw asak jaw nna makawp maga wa ai. Dai ni kaw na marai langai a lam hpe yu yu ga. VIDEO hpe hpaw, dai hpang, ndai ga san ni hpe bawngban u.
VIDEO: Chyum Laika Hpe Shanhte Manu Shadan—Kadun (Wiliyan Tinde) (6:17)
Chyum Laika hpe makawp maga na matu sak jaw wa ai lam ni hpe chye lu ai gaw, Chyum Laika hpe hti mayu ai myit grau nga wa shangun ai kun? Hpa majaw kun?
Shakawn 119:97 hpe hti nna, ndai ga san hpe bawngban u:
Masha law law gaw, tinang a asak hpe pyi jaw ai du hkra, Chyum Laika hpe ga gale na matu, dip shabra na matu hpa gaw shanhte hpe shadut ya wa ai kun?
6. Masha yawng a matu laika buk
Chyum Laika gaw labau hta ga gale lu dik htum hte shapraw lu dik htum laika buk re. Kasa 10:34, 35 hpe hti nna, ndai ga san ni hpe bawngban u:
Karai Kasang gaw Chyum Laika hpe hpa majaw ga gale shangun mayu nna, dip shabra shangun mayu ai kun?
Chyum Laika hte seng nna gara hpe nang ra sharawng ai kun?
Mungkan masha a
100%
hkawt gaw
shanhte chye na ai amyu ga hte Chyum Laika hpe lu la nga sai
Buk ting (sh) daw hte daw hku nna amyu ga
3,000
jan hte
lu mai sai
5,000,000,000
Dip shapraw ngut sai sawn maram yu ai hti hkum,
kaga laika buk ni hta grau law
Nkau Mi Tsun Ai: “Chyum Laika gaw shinggyim masha ni ka wa ai laika buk dingsa langai daram sha re.”
Nang gaw gara hku shadu ai kun?
Chyum Laika gaw Karai a Mungga re ai ngu lu tsun ai gara lam ni nga ai kun?
Kadun Dawk
Chyum Laika gaw, Karai a Mungga rai nna, masha amyu yawng lu la hkra Karai Kasang galaw ya ai.
Bai Maram
Chyum Laika ka na matu Karai Kasang gaw masha ni hpe shatsam ya ai ngu ai lachyum gaw hpa rai kun?
Chyum Laika grin wa ai, ga gale wa ai, dip shabra wa ai lam ni hte seng nna gara hpe nang ra sharawng ai kun?
Karai Kasang gaw nang hte matut mahkai na matu shakut wa ai lam hpe chye ai shaloi nang gara hku hkamsha ai kun?
Sawk Sagawn
Chyum Laika hpe moi prat lata hte ka ai aten kaw nna, dai ni ga gale ai aten du hkra byin wa ai Chyum Laika labau hpe hti yu u.
“Anhte A Aten Du Hkra Chyum Laika Grin Wa Ai Lam” (Dum Hprang!, November 2007)
Laja lana gasat hkrum wa ai lam 3 a lapran hta, Chyum Laika gara hku grin wa ai hpe hkaja yu u.
Chyum Laika ga gale na matu masha ni gara hku sak jaw wa ai lam hpe yu yu u.
Chyum Laika Hpe Shanhte Manu Shadan (14:26)
Chyum Laika hpe mi ka wa ai hku sha law law lang bai ka la ai, ga gale wa ai. Raitim, Karai a shiga gaw n galai shai ai ngu hpa majaw lu tsun ai kun?
“Chyum Laika Hpe Galai Shai Kau Ai Lam Nga Ai Kun?” (Web sumhpa)