Kărai Kăsang A Hpyen Ni Gaw Kădai Ni Rai Ta?

Kărai Kăsang a hpyen mădung wa gaw Satan Nat rè. Shi gaw Yehowa hpe gumlau ai wenyi hkrung kănu lăngai rè ai. Satan gaw Kărai Kăsang hpe mătut gumlau nhtawm, shinggyim măsha ni hpe ruyak jam jau kăba hkam sha shăngun ai. Satan gaw n hkru ai wa rè ai. Shi gaw măsu măgaw ai hte măsha sat ai wa rè.​—Yawhan 8:​44.

Kăga wenyi hkrung kănu ni mung Kărai Kăsang hpe gumlau ai hta, Satan hte mătut măhkai ma ai. Chyum laika hta shanhtē hpe nat mătsē ni nga ma ai. Nat mătsē ni gaw, Satan hte măren shinggyim măsha ni a hpyen ni rai nga ma ai. Shanhtē gaw măsha ni hpe măchyi hkam sha shăngun măyu ma ai. (Mahte 9:​32, 33; 12:22) Yehowa gaw Satan hte shi a nat mătsē ni hpe, prat jănat jăhten kau na wu ai. Shanhtē shinggyim măsha ni hpe jam jau jaw na aten, loi sha ngam sai.​—Shingran 12:12.

Kărai Kăsang a jinghku byin măyu yang, nang hpe Satan gălaw shăngun măyu ai lam ni hpe hkum gălaw ēt. Satan hte nat mătsē ni gaw, Yehowa hpe n ju n dawng ma ai. Shanhtē gaw Kărai Kăsang a hpyen ni rai ma ai rai nna, nang hpe mung Kărai Kăsang a hpyen byin shăngun măyu ma ai. Yehowa shing n rai Satan, găra wa a ra shărawng ai hpe nang lăta la ra ndai. Htani htana asak lu măyu yang, nang Kărai Kăsang a ra shărawng ai hpe lăta la ra ai. Măsha ni hpe hkălem na mătu, Satan hta ē hpaji daw ai lam law law nga ai. Măsha law mălawng gaw shi a hkălem sha ai hpe hkam nga ma ai.​—Shingran 12:9.