DAW 28
Anhte A Website Hta Hpa Ni Mu Lu Na Kun?
France
Poland
Russia
“Masha ni gaw nanhte a kaja ai bungli mu lu nna, sumsing lamu e nga ai nanhte a Kawa hpe shagrau sha a lu mu ga, shanhte a man e nanhte a nhtoi hpe tu shangun da mu” nga nna Yesu Hkristu gaw shi a sape ni hpe tsun ai. (Mahte 5:16) Dai hku galaw ai hta, prat dep hpaji ni hpe anhte jailang ai, dai hta internet mung lawm ai. Anhte a tara shang website re ai jw.org gaw, Yehowa Sakse Ni a makam masham hte, galaw ai lam ni hpe madun ai. Dai hta hpa ni hpe mu lu na ta?
Masha ni san chye ai ga san ni a Chyum Laika mahtai ni. Masha ni san ai ga san ni hta na, ahkyak htum ga san nkau mi a mahtai ni hpe nang mu lu na re. Ga shadawn, Yakhkak Jamjau Ai Lam Ni Htum Mat Na Kun? hte Si Mat Ai Masha Ni Bai Hkrung Rawt Wa Na Kun? ngu ai garan laika ni hpe internet hta ga amyu baw 600 jan hte lu mai ai. Mungkan Nnan Ga Gale Chyum Laika hpe ga amyu 130 jan hte mu lu nna, Chyum Laika Anhte Hpe Hpa Sharin Ya Ai Kun? ngu ai laika buk hte, Sin Langchyi, Dum Hprang! hte ndai laika buk zawn, Chyum Laika hkaja na matu karum ya ai laili laika ni hpe mung mara da ai. Ndai laili laika law law hpe online hta hti mai, madat mai ai zawn, nsen, MP3, PDF, EPUB ni hte mung lu mai ai. Myit lawm ai masha hpe nang jaw mayu yang, shi a ga amyu hte print shaw ya mai ai. Lata masat kumla ga ni hte hkrang shala da ai video ni mung nga ai. Nang ban sa ai aten hta madat mayu yang, madat na matu Chyum Laika maumwi, Chyum Laika hpe madung tawn ai kamung naura hte, yungwi nsen ni hpe mung dawnload mai galaw ai.
Yehowa Sakse Ni hte seng ai shiga ni. Internet hta mara da ai kaga lam ni gaw, anhte a mungkan grup magam bungli ni, Yehowa Sakse Ni hte seng ai mahkrum madup ni, masha ni hpe hkye mawai galaw ai lam ni, shiga nnan ni hte video kadun ni re. Galaw na zuphpawng kaba ni a lam hte, anhte a ginjaw garan rung hpe matut mahkai na hkring dat ni hpe mung mu lu ai.
Dai lam ni hte, teng man ai nhtoi hpe mungkan ting htoi tu hkra anhte galaw nga ai. Antarctica shara zawn grai katsi ai shara hta na masha ni hte, kaga masha ni yawng mung akyu hkam sha nga ma ai. “Madu a mungga” mungkan ting chyam bra nna Karai Kasang a hpung shingkang danhkung u ga, anhte akyu hpyi dat nngai.—2 Htesaloni 3:1.
Chyum Laika a teng man ai tara hpe masha ni chye wa hkra jw.org website gaw gara hku karum ya nga ai kun?
Anhte a website hpe nang yu mayu ai kun?