Kin Yu Shi Lahkawng

Israela ni gaw Sina Bum kaw nna pru wa ma ai. Paran zaibru jang hpe lai nna Kadesha ngu ai shara de bu hkawm wa ma ai. Dai shara hta Yehowa gaw Mawshe hpe: ‘Amyu lakung 12 kaw nna marai langai hpra hpe lata nna, Israela ni hpe jaw na ngu ngai ga sadi jaw da ai Hkanan mung de kin yu yu na matu shangun dat u’ ngu tsun ai. Dai majaw Mawshe gaw ala marai 12 lata nna shanhte hpe: ‘Hkanan mung de sa yu nna dai shara na ga gaw hkai sha na matu kaja n kaja hpe yu wa mu. Mung masha ni n-gun ja n ja hte, shanhte sum ni kaw sha nga ai kun, mare kaba kaw nga ai kun ngu ai hpe mung yu wa marit’ nga nna htet dat ai. Yawshu hte Hkaleb lawm ai kin yu 12 gaw Hkanan mung de sa wa ma ai.

Nhtoi 40 ya na ai hpang, kin yu ni bai wa nna, maihpang si, hkainu si hte tsabyi si ni la wa ma ai. Kin yu ni gaw: ‘Dai mung gaw grai kaja ai mung re, raitim dai hta nga ai masha ni gaw n-gun atsam kaba nna mare bunghku ni gaw grai tsaw ai’ nga nna wa tsun dan ai. Hkalep chyawm gaw: ‘Shanhte hpe anhte awng dang lu na re. Ya nan sa gasat saga!’ nga nna tsun ai. Hkalep hpa majaw dai hku tsun ai hpe chye ai kun? Shi hte Yawshu gaw Yehowa hpe kamhpa ai majaw re. Raitim kaga kin yu marai shi chyawm gaw: ‘N re! Dai mung masha ni gaw grai kaba ai masha numraw ni zawn re! Anhte shanhte makau kaw rai mat yang, hkagrit hkadawn ni zawn sha re’ nga nna tsun ma ai.

Israela ni mung myit daw mat ma ai. Shanhte aput angun tsun wa ma ai. ‘Marai langai ngai hpe anhte agyi shatai la nna Egutu mung de nhtang wa saga. Si hkam na matu hpa majaw dai shara de sa taw na ma?’ nga nna shada da tsun ma ai. Yawshu hte Hkalep chyawm gaw: ‘Yehowa hpe madat mara mu, hkum hkrit myit. Yehowa anhte hpe makawp maga ya na re’ nga nna tsun ai. Raitim, Israela ni gaw ga n madat ma ai. Yawshu hte Hkalep hpe pyi sat kau mayu wa ma ai.

Yehowa gara hku galaw wa ai kun? Shi gaw Mawshe hpe: ‘Israela ni a matu ngai yawng galaw ya wa tim, shanhte gaw nye a ga, ya du hkra n madat ma ai. Dai majaw, shanhte nam mali hta shaning 40 ning tup nga ra nna, dai shara hta sha si ra na re. Shanhte a kashu kasha ni hte Yawshu yan Hkalep sha, ngai jaw na ngu ga sadi jaw da ai mung hta nga lu na re’ nga nna tsun ai.