Rahab Kin-Yu Ni Hpe Makoi Ai

NDAI masha ni kyin dut hkrum nga ma ai. Dai shara kaw na shanhte nhprawng pru yang si na ma ai. Shanhte gaw Israela kin-yu ni rai ma ai. Shanhte hpe karum dat ai anum gaw, Rahab rai nga ai. Rahab gaw Yerihko mare bunghku ntsa e, gap da ai nta hta nga ai. Ndai ni hpa majaw kyin dut hkrum nga ma ai hpe yu yu ga.

Israela masha ni gaw Yawdan hka rap nna, Hkanan mung de shang na jin jin rai sai. Shanhte rai n shang sa wa yang, Yawshu gaw kin-yu lahkawng hpe dat dat ai. ‘Mungdan hte Yerihko mare hpe kin-yu sa yu mu’ nga nna shangun dat ai.

Kin-yu ni gaw Yerihko mare de du ma yang, Rahab a nta hta shang ma ai. Raitimung masha langai mi Yerihko hkawhkam wa hpe shi ga jaw dat ai: ‘Israela masha lahkawng mungdan hpe kin-yu yu na matu, dai na de shang wa masai,’ nga nna tsun ai. Dai shi ga hpe hkawhkam wa na ai shaloi, Rahab hpang de masha shangun dat ai. Dai masha ni mung: ‘Na a nta kaw na masha ni hpe shingan de shapraw ya rit!’ nga nna Rahab hpe hkang dat ma ai. Raitimung Rahab gaw kin-yu yan hpe nta numgaw ntsa e makoi da ai: ‘Nye a nta kaw e ala nkau mi sa wa ma ai gaw teng ai; Raitimung shanhte gara kaw na sa wa ma ai mung ngai nchye dat ai; nsin sin wa nna, chyinghka rai nla yang shanhte pru mat wa masai. Alawan hkan shachyut mu; dep lu na re!’ nga nna tsun wu ai. Shing nga jang dai masha ni gaw kin-yu ni a hpang de hkan shachyut ma ai.

Shanhte pru mat wa ai hpang, Rahab gaw numgaw ntsa de alawan lung wa ai. ‘Yehowa gaw nanhte hpe ndai mungdan jaw na nga ai hpe ngai chye nngai; Egutu mung kaw na nanhte pru wa ai shaloi nawng hkyeng hpe kaning rai jahkyet kau ai mung, Sihon hte Oga hkawhkam hpe nanhte sat kau ai lam anhte na saga ai; nanhte hpe shalawt dat ai chyeju a matu, ngai hpe mung chyeju htang na ngu ai ga sadi hpe jaw mu; nye a kanu kawa kahpu kanau ni a asak hpe shalawt ya mi,’ nga nna kin-yu ni hpe tsun ai.

Kin-yu yan mung asak shalawt la na ga ai, nga nna ga sadi jaw ma ai. Raitimung Rahab galaw ra na lam nga ai. ‘Ndai sumri hkyeng hpe la nna hku wawt hku hta gyit da mu; na a anu awa, nhpu nnau ni hpe na a nta hta e jahpawng da u; anhte Yerihko mare de bai sa ai shaloi, ndai sumri hpe na a hku wawt hku hta mu nna, na a nta na masha kadai hpe mung nsat na ga ai,’ nga nna kin-yu yan tsun ma ai. Kin-yu yan mung Yawshu hpang de bai du wa ma ai shaloi, byin ai lam shagu hpe wa tsun dan ma ai.