Hkying Hku Law Ai Masha Ni Hpe Yesu Malu Masha Jaw Sha

A.D. 32, Shalai Wa Ai Poi n hpang shi ai aten hta, kasa ni gaw bu hkawm let hkaw tsun ai kaw nna, bai du wa ma ai. Grai pu ba nga ai majaw, hkring sa la lu na matu Yesu gaw shanhte hpe Betsaida de li hte shaga sa mat ai. Raitim, li gaw hka kau de du ai shaloi, hkying hku law ai masha ni gaw shanhte hpang de hkan nang sa wa ai hpe Yesu mu dat ai. Yesu gaw shi a sape ni hte sha arau nga mayu tim, sa wa ai masha ni hpe tsawra myit hte hkap hkalum la ai. Machyi ai masha ni hpe shamai ya nna, shanhte hpe hkaw tsun hpang wa ai. Shani tup Karai Kasang a mungdan hte seng ai lam hpe sharin ya ai. Shana maga du wa yang, kasa ni gaw Yesu hpe ndai hku sa tsun ai: ‘Shanhte kawsi sana re. Lama ma sha na matu shanhte hpe wa shangun dat u.’

Yesu ndai hku tsun ai: ‘Shanhte wa n ra ai. Ndai kaw sha lama ma sha na matu jaw dat u.’ Kasa ni ndai hku san ai: ‘Shanhte a matu shahpa anhte hpe sa mari shangun ai kun?’ Kasa Hpilip ndai hku tsun ai: ‘Anhte hta gumhpraw grai law hkra nga yang pyi, ndai daram law ai masha ni hpe jaw sha na matu lu mari na n re.’

Yesu ndai hku san ai: ‘Anhte hta sha hpa kade daram nga ai kun?’ Andre ndai hku tsun ai: ‘Anhte hta muk 5 hte nga kaji 2 sha nga ai. Gara hku mung n law ai.’ Yesu ndai hku tsun ai: ‘Dai muk hte nga hpe la sa wa marit.’ Yesu gaw masha ni hpe tsingdu kaw marai 50 hpra, 100 hpra garan nna dung na matu tsun ai. Yesu gaw muk hte nga hpe la nna, sumsing lamu de mada yu let akyu hpyi ai. Dai hpang, malu masha hpe kasa ni hpang jaw nna shanhte gaw masha ni hpe gam ya ai. Ala 5,000 sha n-ga, anum hte ma ni yawng mung hkru kat hkra lu sha ai. Shanhte sha ngut ai hpang, ngam ai hpe lahpawt lama n byin hkra lahkawn la ai shaloi, katawng 12 hpring tup lu ai. Grai mauhpa n re i?

Masha ni gaw Yesu hpe grai ra sharawng ai majaw, shanhte a hkawhkam byin shangun mayu ma ai. Raitim, hkawhkam galaw na matu Yehowa masat da ai aten garai n du shi hpe Yesu chye ai. Dai majaw, Yesu gaw masha hpawng hpe wa shangun dat nna, shi a kasa ni hpe mung Galile Nawng wora hkran de sa magang na matu tsun ai. Kasa ni li jawn nna sa mat yang, Yesu gaw shi hkrai bum ntsa de lung mat wa ai. Hpa majaw kun? Shi Kawa kaw akyu hpyi mayu ai majaw re. Yesu gaw kade daram n rau tim, akyu hpyi na matu galoi mung aten jaw ai.