Hka Ntsa Yesu Lam Hkawm

Yesu gaw machyi ai ni hpe shamai ya nna si mat ai ni hpe bai jahkrung ya lu ai sha n-ga, nbung hte marang hpe mung hkang lu ai. Bum ntsa kaw akyu hpyi ngut ai hpang, Galile Nawng hpe yu dat ai shaloi nbung laru ru nga ai hpe mu dat ai. Kasa ni gaw li ntsa kaw nga taw nna, nbung laru a majaw li shap na matu yak taw nga ai. Yesu gaw yu wa nna, shanhte a li nga ai shara de hka ntsa, lam hkawm let sa wa ai. Masha langai hka ntsa, lam hkawm nga ai hpe kasa ni mu ai shaloi, hkrit kajawng mat ai. Raitim, shanhte hpe Yesu ndai hku tsun ai: ‘Ngai she re. Hkum hkrit mu.’

Petru ndai hku tsun ai: ‘Madu, nang rai yang gaw, Madu hpang de sa lu na matu ngai hpe shaga la rit.’ Yesu gaw Petru hpe: ‘Sa wa rit’ ngu tsun ai. Dai majaw, Petru gaw nbung laru ru nga ai lapran, li kaw na pru nhtawm hka ntsa, lam hkawm let Yesu hpang de sa wa ai. Raitim, Petru gaw Yesu hpang de du wa mahka, nbung laru ru nga ai hpe yu hkrup dat nna, hkrit kajawng mat ai. Hka de lup bang wa ai hpe shi chye dat ai shaloi, ndai hku marawn ai: ‘Madu e, ngai hpe hkye la rit!’ Yesu gaw shi a lata hpe magra jum dat nna ndai hku tsun ai: ‘Nang hpa majaw ntsen ai myit nga wa a ta? Na a makam masham gaw gara kaw ta?’

Yesu yan Petru li ntsa de du ai hte kalang ta nbung laru zim mat ai. Kasa ni gara hku hkamsha mat na hpe nang shingran yu u. Shanhte ndai hku tsun ai: “Nang gaw Karai Kasang a Kasha gaja wa teng teng rai nga ndai.”

Lamu marang hpe Yesu hkang wa ai gaw ndai kalang sha n re. Kalang mi hta mung, Yesu hte kasa ni gaw nawng wora hkran de li hte sa ai shaloi, Yesu gaw li mai maga hta yup pyaw nga ai. Shi yup pyaw nga ai laman, nbung laru ru wa ai. Hka leng ni mung, li hpe sa kayat ai majaw hka hpring wa ai. Kasa ni gaw Yesu hpe jasu nna ndai hku marawn tsun ai: ‘Sara e, anhte si sana. Anhte hpe karum la rit!’ Yesu rawt nna nawng hpe ndai hku tsun dat ai: ‘Zim u!’ Shaloi, nbung hte nawng gaw kalang ta zim mat ai. Yesu gaw sape ni hpe ndai hku san ai: ‘Nanhte a makam masham gara kaw ta?’ Shanhte shada da ndai hku tsun ma ai: “Nbung hte nawng pyi shi a ga madat nga ma hka?” Yesu hpe shanhte kam yang, hpa mung hkrit tsang n ra ai hpe kasa ni sharin la lu wa ai.