Shawlu Hpe Yesu Lata

Shawlu gaw Roma mung masha rai nna, Tarshu mare hta shangai wa ai. Shi gaw Yuda Tara ni hta grai ningtawn ai Hparishe langai rai nna, Hkristan ni hpe grai nju ndawng ai. Shi gaw Hkristan num la ni hpe shanhte a nta kaw na garawt la nna, htawng jahkrat ai wa re. Masin pawt nga ai masha hpawng gaw sape Stehpan hpe nlung hte kabai sat ai shaloi hta pyi, Shawlu gaw makau hta tsap nna yu taw nga ai.

Shawlu gaw Yerusalem hta nga ai Hkristan ni hpe rim ai hte sha myit n dik ai. Dai majaw, shi gaw Damasku mare kaw nga ai Hkristan ni hpe rim na matu hkinjawng agyi kaw ahkang hpyi ai. Dai mare makau de Shawlu du yang, akajawng sha shi makau hta nhtoi kaba htoi kabrim wa nna, ga de galau mat ai. Shaloi, ‘Shawlu e, nang ngai hpe hpa majaw zingri nga ai kun?’ ngu ai nsen hpe shi na dat ai. ‘Nang kadai rai kun?’ nga nna Shawlu san dat ai. Shaloi: ‘Ngai gaw Yesu re. Damasku de sa su. Nang hpa galaw ra na hpe dai kaw chye lu na re.’ Dai aten hta sha, Shawlu myi n mu mat ai. Dai majaw, kaga masha ni gaw shi a lata hpe dun la nna mare de woi sa mat ai.

Damasku hta, Anani ngu ai sadi dung ai Hkristan langai nga ai. Shi hpe shingran hku nna Yesu ndai hku tsun ai: ‘Lam Ding ngu ai lam kaw nga ai Yuda a nta de sa nna, Shawlu ngu ai wa hpe sa tam su.’ Anani ndai hku tsun ai: ‘Dai wa a lam ngai yawng chye ai. Shi gaw madu a sape ni hpe htawng jahkrat ai wa re.’ Raitim, Yesu ndai hku tsun ai: ‘Shi hpang de sa su. Mungdan law law de kabu gara shiga hkaw tsun na matu, shi hpe ngai lata da sai.’

Anani gaw Shawlu hpe mu ai shaloi ndai hku tsun ai: ‘Hpunau Shawlu e, na a myi hpaw ya na matu, Yesu ngai hpe shangun dat ai.’ Dai shaloi, Shawlu myi bai mu wa ai. Shawlu gaw, Yesu a lam sharin la nna, sape langai byin wa ai. Ya, hkalup hkam ngut sai Hkristan langai hku nna, Shawlu gaw tara jawng ni hta kaga Hkristan ni hte arau hkaw tsun hpang nga sai. Yesu a lam Shawlu hkaw tsun nga ai hpe, Yuda masha ni mu ai shaloi, kade daram mau mat na hpe shingran yu u. Shanhte ndai hku tsun ma ai: ‘Yesu a sape ni hpe hkan zingri ai wa gaw, ndai wa sha n re i?’

Shawlu gaw Damasku kaw nga ai masha ni hpe, masum ning tup hkaw tsun wa ai. Yuda masha ni gaw Shawlu hpe nju wa nna, sat na matu bawng ban ma ai. Raitim, hpunau ni gaw dai lam hpe chye mat nna, Shawlu lawt lu hkra karum ya ma ai. Shanhte gaw, Shawlu hpe katawng langai kaw bang nna, mare bunghku hkuwawt kaw nna shayu ya dat ai.

Yerusalem de Shawlu du ai shaloi, dai kaw nga ai hpunau ni hte sa hkrum ai. Raitim, hpunau ni gaw shi hpe hkrit nga ma ai. Barnaba ngu ai matsan dum chye ai sape langai gaw, Shawlu hpe kasa ni hpang de shaga sa nna, shi kaja wa galai shai mat sai hpe tsun dan ya ai. Shawlu gaw, Yerusalem hta nga ai nawku hpung hte arau, kabu gara shiga hpe myit rawt let hkaw tsun hpang wa ai. Hpang hta shi hpe Pawlu ngu ai amying hte chye wa ma ai.