DAW 02

Chyum Laika Gaw Myit Mada Lam Jaw

Dip Shapraw Ai Hkrang

Mungkan ting na masha ni gaw, manghkang ni a majaw yawn hkyen ai, myit tsang ai, hkra machyi ai lam ni hkrum taw nga ai. Nang mung dai zawn hkrum ga ai kun? Machyi makaw hkrum nga ai (sh) tsawra ai marai langai si mat ai majaw, yawn hkyen nga ai rai na re. ‘Prat gaw kaja wa na kun?’ ngu nna nang myit nga na re. Dai ga san a mahtai hpe Chyum Laika hta mu lu ai.

1. Chyum Laika hta gara myit mada lam jaw da ai kun?

Mungkan hta manghkang ni hpa majaw hpring nga ai hpe Chyum Laika gaw sanglang dan ai. Dai manghkang ni gaw chyahkring mi sha rai nna, kade n na yang mat mat na ngu ai kabu gara shiga hpe mung tsun dan ai. Chyum Laika ga sadi ni gaw, anhte hpe htawm hpang myit mada lam jaw ai. (Yeremia 29:11, 12 hpe hti u.) Dai ga sadi ni gaw, ya aten hta hkrum nga ai manghkang ni hpe hparan lu na matu, kaja ai ningmu nga na matu, htani htana kabu gara lam hpe mu tam na matu karum ya ai.

2. Chyum Laika hta htawm hpang hte seng nna gara hku tsun da ai kun?

“Htawm hpang e si hkrung si htan n nga lu na sai; sharung shayawt ai, hkrap ngu hkrap ngoi ai, hki si ba si ai mung, n nga lu na sai” ngu nna ga sadi jaw da ai. (Shingran 21:4 hpe hti u.) Dai ni aten hta, masha ni gaw matsan ai, n tara ai, machyi ai, si ai lam ni a majaw, myit mada lam n nga ai ngu hkamsha nga ai. Raitim, kade n na yang, dai lam ni nga sana n re. Shinggyim masha ni gaw, ginding aga Hparadisu hta ngwi pyaw let htani htana asak hkrung lu na ngu Chyum Laika hta ga sadi jaw da ai.

3. Chyum Laika hta lawm ai myit mada lam hpe kam ai myit grau nga wa hkra gara hku galaw lu na kun?

Masha law law gaw kaja ai lam ni byin wa na hpe myit mada ai. Raitim, gaja wa byin wa na re ngu nna gaw shanhte hkrak n lu tsun ai. Chyum Laika ga sadi ni gaw dai hku n re. “Chyum Laika” hpe atsawm dinglik yu nna makam masham ngang kang hkra galaw mai ai. (Kasa 17:11) Chyum Laika hkaja ai shaloi, htawm hpang hte seng nna Chyum Laika hta lawm ai myit mada lam hpe kam mai na kun? ngu ai hpe tinang nan dawdan lu wa na re.

Kahtap Hkaja

Htawm hpang hte seng nna Chyum Laika hta tsun da ai ga sadi nkau hpe sawn dinglik yu ga. Dai ni aten na masha ni hpe Chyum Laika myit mada lam gaw gara hku karum ya nga ai hpe yu yu ga.

Sumla: Dai ni aten hta masha ni hkrum nga ai masa ni hte htawm hpang hta byin wa na Chyum Laika ga sadi ni hpe shingdaw da ai. Dai zawn sumla ni hpe lawu kaw mung madun da.

4. Chyum Laika gaw hkum tsup ai prat hte htani htana asak hkrung lu na myit mada lam jaw da

Lawu hta madun da ai Chyum Laika ga sadi ni hpe yu yu ga. Gara ga sadi hpe nang ra dik htum rai kun? Hpa majaw kun?

Dai ga sadi ni hpe lakap da ai Chyum daw ni hpe hti nna, ndai ga san ni hpe sumru yu ga:

Dai Chyum daw ni gaw nang hpe myit mada lam jaw ai ngu nna hkamsha ai kun? Na nta masha ni hte manang ni hpe mung myit mada lam jaw ai ngu nang shadu ai kun?

Ndai zawn mungkan hta nga lu na ngu shingran yu u

Kadai Mung . . .	Masha Yawng Gaw . . .
yawn hkyen ai lam, asak kaba wa ai majaw n-gun yawm wa ai lam, si ai lam ni nga sana n re.—Esaia 25:8.	si mat ai shanhte a tsawra ai ni ginding aga hta asak bai hkrung wa ai hpe mu lu na.—Yawhan 5:28, 29.
machyi makaw ai (sh) n kung n kang ai lam nga sana n re.—Esaia 33:24; 35:5, 6.	ngwi pyaw hkam kaja ai hte brang ram prat a n-gun atsam bai lu la na.—Yoba 33:25.
n tara ai lam ni hkrum sana n re.—Esaia 32:16, 17.	lu sha law htam na, nga pyaw ai nta hte myit dik ai bungli hpe lu la na.—Shakawn 72:16; Esaia 65:21, 22.
majan a majaw hkra machyi ai lam ni nga sana n re.—Shakawn 46:9.	ngwi pyaw simsa ai lam hpring nga na.—Shakawn 37:11.
hkra machyi wa ai lam ni hpe dum sana n re.—Esaia 65:17.	grai kaja ai prat hte htani htana asak hkrung lu na.—Shakawn 37:29.

Hkam n kaja wa ai ma gaw hkamja let kanu hpe ahpum nga.

Asak kaba ai la langai gaw bai hkalung wa nna namsi namsaw ni bang da ai leng hpe htu nga.

5. Chyum Laika myit mada lam gaw galai shai ya lu

Masha law law gaw, tinang a grup-yin hta byin nga ai manghkang ni a majaw, myit daw myit hten ai (sh) masin pawt ai du hkra pyi byin ai. Nkau mi gaw, masa lam ni galai shai wa na matu, grau kaja wa na matu shakut ma ai. Chyum Laika ga sadi gaw masa lam ni grau kaja wa hkra ya aten hta masha ni hpe gara hku karum ya ai hpe yu yu ga. VIDEO hpe hpaw, dai hpang ndai ga san hpe bawngban u.

VIDEO: N Tara Ai Lam Hpe Gasat Mayu Wa (4:07)

Sumla: ‘N Tara Ai Lam Hpe Gasat Mayu Wa’ ngu ai video kaw na sumla. 1. Rahpika gaw asak kaji ai aten hta shi a amyu masha ni hte rau pasi shaw nga. 2. Rahpika gaw Yehowa Sakse ni a zuphpawng kaba hpe shawng nnan sa lung ai shaloi, amyu n bung ai masha ni rau kanawn mazum nga ai hpe mu ai majaw grai kabu nga.

Video hta, Rahpika gaw gara n tara ai lam hte hkrum wa ai kun?
N tara ai lam n nga hkra shi n lu galaw wa tim, Chyum Laika gaw shi hpe gara hku karum ya wa ai kun?

Htawm hpang hte seng ai Chyum Laika myit mada lam ni gaw myit daw myit hten lam ni hpe hkamjan lu na matu, manghkang ni hpe atsawm hparan lu na matu karum ya lu ai. Ga Shagawp 17:22 hte Roma 12:12 hpe hti nna, ndai ga san hpe bawngban u:

Chyum Laika myit mada lam gaw, ya aten hta mung na a prat hpe galai shai ya lu ai ngu nna nang shadu ai kun? Hpa majaw kun?

Nkau Mi Tsun Ai: “Htawm hpang hte seng ai Chyum Laika ga sadi ni gaw nau kaja taw ai majaw byin gaw byin wa na kun?”

Tinang hkrai tam sawk sagawn na matu hpa majaw ahkyak ai kun?

Kadun Dawk

Ngwi pyaw ai htawm hpang prat hte seng ai Chyum Laika ga sadi ni gaw anhte hpe myit mada lam jaw ai. Manghkang ni hpe tawt lai lu hkra mung karum ya ai.

Bai Maram

Masha ni hpa majaw myit mada lam ra ai kun?
Htawm hpang hte seng nna Chyum Laika hta hpa tsun da ai kun?
Htawm hpang myit mada lam gaw ya aten hta nang hpe gara hku karum ya lu ai kun?

Hkaja ngut ai nhtoi:

Bandung

Ndai daw hta lawm ai Chyum daw ni hpe hti nna, Chyum Laika ga sadi ni hpe grau chye hkra galaw na.

Kaga:

Kaga bandung

Sawk Sagawn

Myit mada lam a atsam hte seng nna grau hkaja yu u.

“Myit Mada Lam—Gara Kaw Tam Mu Na Kun?” (Dum Hprang!, April 22, 2004)

Htawm hpang myit mada lam gaw machyi jung nga ai ni hpe gara hku karum ya lu ai lam hti yu u.

“Machyi Galu Hkrum Ai Shaloi Chyum Laika Gaw Nang Hpe Karum Ya Lu Ai Kun?” (Web sumhpa)

Ndai yungwi video hpe yu ai shaloi, nang hte na nta masha ni gaw, Chyum Laika ga sadi re ai htawm hpang Hparadisu hta, ngwi pyaw let asak hkrung nga ai hpe shingran yu u.

Shingran Yu Ga (3:37)

Lai wa sai aten hta, htawm hpang hte seng ai Chyum Laika myit mada lam hpe hkaja wa ai gaw, mung masa galaw wa ai la langai a prat hpe gara hku galai shai ya ai hpe hti yu u.

“Mungkan Hpe Ngai Galai Shai Ra Ai Ngu N Hkamsha Sai” (Sin Langchyi, July 1, 2013)