Yehowa Sakse Ni A Zuphpawng Lung Yang Gara Akyu Ni Lu La Na Kun?

Yehowa Sakse ni a zuphpawng lung ga ai kun? N lung ga shi yang, shawng nnan sa lung na matu loi gaw myit tsang nga na re. Nang ndai hku myit na re: ‘Dai zuphpawng ni hta hpa ni galaw ai kun? Zuphpawng ni gaw hpa majaw ahkyak ai kun? Ngai hpa majaw lung ging ai kun?’ Kaga ni hte rau zuphpawng lung ai gaw, Karai Kasang hte hku hkau shangun nna, nang hpe mung karum ya lu ai hpe ndai daw hta sharin la lu na re.

1. Zuphpawng rau lung na matu ahkyak htum lam gaw hpa rai kun?

Zuphpawng lung na matu grai ahkyak ai lam hpe Chyum Laika ka ai wa gaw, gara hku tsun da ai hpe yu yu ga: “Shawa hpawng ni hta e, ngai Yehowa hpe shagrau sha-a na nngai.” (Shakawn 26:12) Yehowa Sakse ni gaw, zuphpawng rau lung ai kaw na kabu gara lam lu la ma ai. Mungkan ting hta, shanhte gaw Karai Kasang hpe shakawn na matu, mahkawn shakawn na matu hte akyu hpyi na matu bat shagu zuphpawng galaw ma ai. Shaning shagu zuphpawng kaba a matu hkrum zup ai aten ni mung nga ai.

2. Zuphpawng ni kaw na hpa chye lu na kun?

Zuphpawng ni hta Chyum Laika hpe sanglang dan nna “lachyum shapraw dan ai” hpe anhte myit maju jung ai. (Nehemia 8:8 hpe hti u.) Zuphpawng lung yang, Yehowa a lam hte shi a kaja ai atsam ningja ni hpe chye wa na re. Nang hpe tsawra ai shi a tsawra myit a lam hpe grau chye wa nna, shi hte grau nihtep wa na re. Myit dik lam nga ai prat lu la hkra nang hpe shi gara hku karum ya lu ai lam hpe mung chye wa na re.​—Esaia 48:​17, 18.

3. Zuphpawng ni hta kaga ni hte rau kanawn mazum ai lam kaw na gara hku akyu lu la mai na kun?

‘Tsaw ra ai myit rawng wa na hte kaja ai amu bungli byin wa na matu, shada shingjawng hkat lu hkra, langai hte langai myit tau myit htang nga nna: . . . tinang a zup hpawng ai lam hpe n koi n kau’ na matu Yehowa anhte hpe n-gun jaw da ai. (Hebre 10:​24, 25) Zuphpawng ni hta jet ai tsawra myit madun ai ni, nang zawn Karai Kasang a lam hpe grau sharin la mayu ai ni hte hkrum lu na re. Chyum Laika kaw na n-gun jaw ya lu ai lam ni hpe mung na lu na re. (Roma 1:​11, 12 hpe hti u.) Prat a mayak manghkang ni hpe tawt lai nga ai ni hte mung nang hku hkau lu na re. Dai lam ni gaw, Yehowa anhte hpe zuphpawng ayan lung shangun mayu ai lam ni kaw na nkau mi sha naw re.

Kahtap Hkaja

4. Yehowa Sakse ni a zuphpawng ni

Tsa ban langai na Hkristan ni gaw, Yehowa hpe nawku na matu zuphpawng ayan lung ma ai. (Roma 16:​3-5) Kolose 3:16 hpe hti nna, ndai ga san hpe bawngban u:

• Tsa ban langai na Hkristan ni gaw Yehowa hpe gara hku nawku wa ai kun?

VIDEO: Nawku Htingnu Hta Hpa Ni Galaw A Ta? (2:12)

• Nawku Htingnu hta galaw ai lam ni hte Kolose 3:16 kaw lawm ai lam ni hta bung ai gara lam ni nga ai kun?

• Video (sh) sumla hta lawm ai lam ni kaw na gara lam hpe nang myit lawm ai kun?

2 Korinhtu 9:7 hpe hti nna, ndai ga san hpe bawngban u:

• Yehowa Sakse ni a zuphpawng hta hpa majaw alu gumhpraw n hta ai kun?

Nang hpe Chyum Laika sharin ya ai wa hte rau ndai bat hta galaw na zuphpawng ni kaw na daw langai daram hpe tau hkrau yu da u.

• Zuphpawng lamang ni a gara daw hpe nang myit lawm ai kun? (sh) na a matu akyu nga ai kun?

Nang chye ai kun?

Mungkan ting na zuphpawng ni hpe gara aten hte gara shara kaw galaw ai hpe chye na matu jw.org/kac kaw tam mai ai.

1. Anhte a zuphpawng lamang hta, mungga ni, hkrang shala ai ni hte video ni lawm ai. Zuphpawng ni hpang ai aten hte ngut ai hpang mahkawn hkawn nna akyu hpyi ai

2. Lamang nkau hta, mahtai jaw shang lawm na matu shawa masha hpe saw shaga ai

3. Asak kaji, kaba, dinghku nga ai, n nga ai ni yawng hpe saw shaga ai

4. Anhte a zuphpawng lung na matu manu jahpu n jaw ra ai. Yehowa Sakse ni gaw alu gumhpraw hkan hta ai baw n galaw ai

5. Zuphpawng lung na matu shakut ra

Yesu a nta masha ni a lam hpe yu yu ga. Shaning shagu zuphpawng lung na matu, Nazaret kaw nna deng 60 daram tsan ai Yerusalem de, bum ni hpe lai nna, lam hkawm sa ra ai. Luka 2:​39-42 hpe hti nna, ndai ga san ni hpe bawngban u:

• Yerusalem de sa na matu grai shakut ra ai ngu nang shadu ai kun?

• Zuphpawng ni hpe hpa majaw shakut nna lung ra ai kun?

• Shakut nna lung yang akyu lu la na ngu nang shadu ai kun? Hpa majaw kun?

• Zuphpawng hpe hpa majaw ayan lung ging ai kun?

Kadun Dawk

Zuphpawng lung ai gaw, Yehowa a lam grau chye hkra, shi hte grau hku hkau wa hkra, kaga ni hte rau nawku dawjau lu hkra karum ya ai.

Bai Maram

• Kaga ni hte rau zuphpawng lung na matu Yehowa hpa majaw n-gun jaw ai kun?

• Yehowa Sakse ni a zuphpawng kaw na nang hpa chye lu na kun?

• Zuphpawng ni kaw na akyu lu la mai ai lam ni naw nga ai ngu nang shadu ai kun?

Sawk Sagawn

Zuphpawng lung na matu tsang taw yang gara hku galaw na kun? Dai zawn hkamsha wa ai la langai gaw, zuphpawng lung na matu hpa majaw ra sharawng wa ai lam hpe yu yu u.

Anhte Hkrum Wa Ai Hpe Galoi N Malap Ai (4:16)

Ramma lasha langai gaw zuphpawng ni hpe hpa majaw ra sharawng wa ai, matut nna zuphpawng lu lung na matu hpa galaw wa ai lam ni hpe yu yu u.

Zuphpawng Ni Hpe Ngai Grai Ra Sharawng! (4:33)

Zuphpawng lung ai hte seng nna masha nkau gara hku hkamsha ai hpe hti yu u.

“Zuphpawng Ni Hpe Hpa Majaw Lung Ging Ai Kun?” (Web sumhpa)

Yehowa Sakse ni a zuphpawng lung ngut ai hpang prat galai shai wa ai nhkru ai masha langai a lam hpe hti yu u.

“Sinat N Lawm Ai Sha Gara De Mung Ngai N Sa Ai” (Sin Langchyi, July 1, 2014)