DAW 37
Bungli, Gumhpraw Hte Seng Nna Chyum Laika Hta Tsun Da Ai Lam
Bungli, gumhpraw hte seng nna myit tsang ga ai kun? Tinang a ra kadawn ai lam ni hpe madi shadaw let, Yehowa lu ging ai nawku dawjau lam hpe jaw na matu yak chye ai. Tatut re ai Chyum Laika hpaji jaw ga ni gaw, anhte hpe karum ya lu ai.
1. Bungli hte seng nna Chyum Laika hta hpa tsun da ai kun?
Karai Kasang gaw anhte hpe bungli hta pyaw shangun mayu ai. Chyum Laika hta ndai hku tsun da ai: “Masha gaw shi a amu bungli galaw let, . . . myit pyaw nga lu ai hta, grau kaja ai gaw nga lu ai n rai.” (Hpaji 2:24) Yehowa gaw bungli shakut ai. Anhte gaw shi hpe kasi la nna bungli shakut ai nga yang, shi hpe myit shapyaw ya lu nna, myit dik lam hkamsha lu na re.
Bungli galaw na matu ahkyak ai. Raitim, Yehowa hpe nawku dawjau ai lam hta na, bungli hpe grau ahkyak shatai ai baw galoi mung n galaw ging ai. (Yawhan 6:27) Shi hpe shawng tawn na nga yang, anhte a ra kadawn ai lam ni hpe madi shadaw ya na ngu ga sadi jaw da ai.
2. Gumhpraw hpe rap ra ai hku mu mada ai ngu ai gaw hpa rai kun?
“Gumhpraw gaw makawp maga chye” ai ngu Chyum Laika hta tsun da ai. Raitim, gumhpraw a majaw sha ngwi pyaw lam lu la ai n re, ngu nna mung sadi jaw da ai. (Hpaji 7:12) Dai majaw, “lu ai made hte myit dik” nna gumhpraw hpe ra marin ai myit n nga na matu n-gun jaw da ai. (Hebre 13:5 hpe hti u.) Anhte hta nga ai hte sha myit dik na nga yang, grau lu mayu ai myit a majaw myit bra nga sana n re. N ra ai sha, hka kap ai baw byin sana n re. (Ga Shagawp 22:7) Hpaida da ai, tara n shang ai hku gumhpraw lu hkra shakut ai lam kaw na mung koi lu na re.
3. Tingkyeng akyu n tam ai sha gumhpraw hpe gara hku jailang mai na kun?
Yehowa gaw, gam jaw gam ya kam ai Karai Kasang re. Anhte mung, “karan kachyan jaw ai” hku nna shi hpe kasi la ai. (1 Timohti 6:18) Nawku hpung hpe madi shadaw ya ai, kaga ni hte laksan hku nna hpunau nauna ni hpe karum ya ai gaw, gumhpraw hpe tingkyeng akyu n tam ai sha jailang nga ai re. Anhte kade daram jaw ai ngu ai hpe n re ai sha, hpa a majaw jaw ai ngu ai hpe Yehowa grau myit lawm ai. Myit masin mahkra hte jaw ai nga yang, anhte mung ngwi pyaw lam lu la nna, Yehowa hpe mung myit shapyaw ya lu na re.—Kasa 20:35 hpe hti u.
Kahtap Hkaja
Bungli hte seng nna jaw ai myit jasat nga ai, myit dik lam nga ai gaw gara hku akyu shabyin ya lu ai hpe yu yu ga.
4. Bungli hpe kangka hkra galaw ai hku nna Yehowa hpe shagrau u
Yehowa hte anhte a hku hkau ai lam gaw, bungli hte seng nna anhte a myit jasat hpe shingkang ka-up ya ging ai. VIDEO hpe hpaw, dai hpang ndai ga san ni hpe bawngban u.
Ndai video hta, bungli galaw ai shaloi hpunau Jesan madun wa ai gara myit jasat hte akyang lailen hpe nang ra sharawng ai kun?
Bungli hte seng nna rap ra ai ningmu matut nga hkra shi hpa galaw wa ai kun?
Kolose 3:23, 24 hpe hti nna, ndai ga san hpe bawngban u:
Bungli hte seng nna anhte a myit jasat gaw hpa majaw ahkyak ai kun?
Bungli galaw na matu ahkyak ai. Raitim, Yehowa hpe nawku dawjau ai lam hta na bungli hpe grau ahkyak shatai ai baw galoi mung n galaw ging ai.
5. Myit dik lam gaw anhte hpe akyu jaw
Masha law law gaw, gumhpraw law law lu na matu shakut nga ai. Raitim, Chyum Laika n-gun jaw ai gaw dai hku n re. 1 Timohti 6:6-8 hpe hti nna, ndai ga san hpe bawngban u:
Gara myit jasat nga na matu, Chyum Laika hta anhte hpe n-gun jaw da ai kun?
Anhte hta nga ai gaw n law n la sha raitim, ngwi pyaw lu ai. VIDEO hpe hpaw, dai hpang, ndai ga san hpe bawngban u.
Gumhpraw loi mi sha nga tim, ndai kun dinghku ni hpe hpa gaw ngwi pyaw shangun ai kun?
Anhte hta grai law hkra nga tim, dai hta grau lu mayu ai nga yang gaw gara hku kun? Shoihpa nga ai lam hpe Yesu gaw ga shadawn hte tsun dan wa ai. Luka 12:15-21 hpe hti nna, ndai ga san hpe bawngban u:
Yesu a ga shadawn kaw na hpa sharin la lu ai kun?—Daw kaji 15 hpe yu u.
Ga Shagawp 10:22 hte 1 Timohti 6:10 hpe hti nna shingdaw yu u. Dai hpang, ndai ga san ni hpe bawngban u:
Gara lam gaw grau ahkyak ai ngu nang shadu ai kun? Yehowa hte hku hkau lam kun? Gumhpraw law law lu ai kun? Hpa majaw kun?
Gumhpraw hpang hkan ai gaw, gara manghkang ni byin shangun ai kun?
6. Anhte a ra kadawn ai lam ni hpe Yehowa madi shadaw ya na
Bungli manghkang, gumhpraw manghkang gaw, Yehowa a ntsa tawn ai anhte a makam masham hpe chyam dinglik chye ai. Dai zawn chyam dinglik ai lam ni hpe gara hku hparan lu na hte seng nna chye na matu, VIDEO hpe hpaw. Dai hpang ndai ga san ni hpe bawngban u.
Video hta hpunau gaw, hpa manghkang ni hkrum wa ai kun?
Dai manghkang ni hpe hparan lu hkra shi hpa galaw wa ai kun?
Mahte 6:25-34 hpe hti nna, ndai ga san hpe bawngban u:
Yehowa gaw shi hpe shawng tawn ai ni hpe, hpa ga sadi jaw da ai kun?
Nkau Mi Tsun Ai: “Nye dinghku hpe madi shadaw na matu, ngai bungli shakut ra ai. Bat shagu gaw zuphpawng n lu sa ai.”
Yehowa hpe nawku dawjau ai lam hpe shawng tawn ai gaw, kaja htum dawdan lam re ai ngu gara Chyum daw gaw nang hpe kam shangun ai kun?
Kadun Dawk
Kan bau bungli hte gumhpraw gaw ra ahkyak ai raitim, de a majaw Yehowa hpe nawku dawjau ai lam kaw na myit bra mat ai baw n byin ging ai.
Bai Maram
Bungli hte seng nna rap ra ai ningmu matut nga lu na matu, hpa gaw karum ya lu ai kun?
Myit dik ai lam gaw nang hpe gara hku akyu jaw ya lu ai kun?
Yehowa gaw shi a amyu masha ni hpe madi shadaw ya na ngu ai ga sadi hpe kam ai lam, nang gara hku madun mai ai kun?
Sawk Sagawn
Gumhpraw hpe nhkru ai hku Chyum Laika hta tsun da ai kun? n tsun da ai kun? ngu ai hpe hti yu u.
“Gumhpraw Gaw Nhkru Ai Lam Amyu Myu A Npawt Rai Kun?” (Web sumhpa)
Gara zawn jaw ya ai lam ni gaw Karai Kasang hpe myit shapyaw ya lu ai kun? ngu ai hpe hti yu u.
“Gam Jaw Gam Ya Ai Hte Seng Nna Chyum Laika Hta Gara Hku Tsun Da Ai Kun?” (Web sumhpa)
Hpaida da ai gaw shoihpa n nga ai kun?
“Chyum Laika Mu Mada Ai Lam—Hpaida Da Ai” (Dum Hprang!, March 2015)
Hpaida da ai, lagu ai wa hpe, shi a prat galai shai hkra hpa gaw karum ya wa ai ngu ai hpe hti yu u.
“Gumra Shingjawng Poi Hpe Grai Ra Sharawng” (Sin Langchyi, November 1, 2011)