DAW 47
Hkalup Hkam Na Matu Nang Jin Sai Kun?
Nang gaw Chyum Laika hkaja nna, Yehowa a lam hpe grai law hkra sharin la wa sai. Nang chye wa ai lam ni hpe hkan sa lu na matu, galai shai ai lam nkau mi galaw yang galaw wa na re. Raitim, Yehowa kaw apnawng nna hkalup hkam na matu htingnut shangun ai lam nkau mi nga yang nga na re. Hkalup hkam na matu yak shangun chye ai lam nkau mi hte dai hpe gara hku tawt lai lu ai lam hpe ndai daw hta bawngban lu na re.
1. Hkalup garai n hkam shi yang machye machyang kade daram nga ra ai kun?
Hkalup hkam na matu nang hta “teng man ai” machye machyang nga ra ai. (1 Timohti 2:4) Hkalup garai n hkam shi yang Chyum Laika hte seng ai ga san yawng a mahtai hpe chye da ra ai ngu ai lachyum gaw n re. Hkalup hkam da ai grai na sai Hkristan ni pyi matut nna hkaja ra ai. (Kolose 1:9, 10) Raitim, Chyum Laika sharin ya ai madung lam ni hpe gaw chye ra ai. Nang chye ging ai daram chye ai kun? ngu ai hpe chye na matu, nawku hpung myitsu salang ni gaw karum ya na re.
2. Hkalup garai n hkam shi yang galaw ra na lam nkau mi gaw hpa ni rai kun?
Nang gaw hkalup garai n hkam shi yang, “myit malai lu nna kayin wa” ra ai. (Kasa 3:19, 20 hpe hti u.) Nang galaw wa ai mara ni a matu grai myit malai lu nna, mara raw ya na matu Yehowa kaw hpyi shawn ra ai lachyum re. N kaja ai lailen ni hpe tsep kawp nyet kau nna, Karai Kasang ra sharawng ai hte maren asak hkrung na matu dawdan da ra ai. Dai sha n-ga, zuphpawng ni lung ra nna, nawku hpung hte arau hkaw tsun ra ai.
3. Hkrit nna htingnut ai baw hpa majaw n byin ging ai kun?
Nkau mi gaw Yehowa hpe ga sadi jaw da ai hte maren n lu galaw na hpe tsang chye ai. Kalang lang gaw, mara ni galaw hkrup chye ai. Chyum Laika hta lawm ai sadi dung ai num, la ni pyi, mara ni galaw hkrup wa ai. Yehowa gaw shi hpe nawku ai ni kaw na hkum tsup na hpe n myit mada ai. (Shakawn 103:13, 14 hpe hti u.) Nang kaja htum galaw ai hpe shi ra sharawng ai. Shi nang hpe karum ya na re. Gara lam mung shi a “tsaw ra ai hta na, anhte hpe n jahka kau lu” ai ngu Yehowa ga sadi jaw da ai.—Roma 8:38, 39 hpe hti u.
Kahtap Hkaja
Yehowa a lam grau chye hkra galaw ai, shi a karum shingtau lam hpe hkap la ai hku nna, hkalup hkam na matu yak shangun ai lam ni hpe gara hku tawt lai lu ai hpe hkaja yu ga.
4. Yehowa hpe grau chye hkra galaw u
Hkalup garai n hkam shi yang, Yehowa a lam kade daram chye da ra ai kun? Shi a myit hpe shapyaw ya lu ai du hkra, shi hpe tsawra lu ai du hkra gaw chye da ra ai. Mungkan ting na Chyum ga sharin ni gara hku galaw wa ai hpe chye na matu VIDEO hpe hpaw. Dai hpang ndai ga san hpe bawngban u.
Ndai video hta hkalup hkam na matu shajin ai shaloi, langai hpra hpe hpa gaw karum ya wa ai kun?
Roma 12:2 hpe hti nna, ndai ga san ni hpe bawngban u:
Chyum Laika sharin ya ai lam ni hte seng nna nang hta ntsen ai myit ni nga ai kun? Yehowa Sakse ni gaw tengman lam hpe sharin ya ai kun? n sharin ya ai kun? ngu ai hte seng nna ntsen ai myit ni nga ai kun?
Nga yang, nang hpa galaw mai ai kun?
5. Hkalup hkam na matu yak shangun ai lam ni hpe tawt lai lu
Yehowa kaw apnawng nna hkalup hkam na matu dawdan ai shaloi, anhte yawng hta yakhkak ai lam ni nga ai. Ga shadawn langai hpe chye na matu, VIDEO hpe hpaw. Dai hpang ndai ga san ni hpe bawngban u.
Ndai video hta, Yehowa hpe nawku na matu Naran-gere gaw gara mayak mahkak ni hpe tawt lai ra ai kun?
Yehowa hpe tsawra ai myit gaw dai mayak mahkak ni hpe tawt lai lu hkra gara hku karum ya wa ai kun?
Ga Shagawp 29:25 hte 2 Timohti 1:7 hpe hti nna, ndai ga san hpe bawngban u:
Pat shingdang ai lam ni hpe tawt lai lu hkra hpa gaw anhte hpe karum ya lu ai kun?
6. Yehowa a karum shingtau lam hpe kamhpa u
Yehowa gaw shi a myit shapyaw ya lu hkra nang hpe karum ya na re. VIDEO hpe hpaw, dai hpang ndai ga san ni hpe bawngban u.
Ndai video hta, Chyum ga sharin gaw, hpa lam a majaw hkalup hkam na matu htingnut nga ai kun?
Yehowa hpe kamhpa ai myit grau nga wa hkra karum ya lu ai gara lam hpe shi chye wa ai kun?
Esaia 41:10, 13 hpe hti nna, ndai ga san hpe bawngban u:
Apnawng ai aten hta, jaw wa ai ga sadi hte maren galaw lu na ngu nang hpa majaw kam ai kun?
7. Yehowa a tsawra myit hpe grau nna chyeju dum u
Yehowa nang hpe kade daram tsawra ai hpe grau myit yang, shi hpe grau chyeju dum wa na re. Shi hpe mung htani htana nawku mayu wa na re. Shakawn 40:5 hpe hti nna, ndai ga san hpe bawngban u:
Yehowa jaw ai shaman chyeju ni kaw na gara hpe grau chyeju dum ai kun?
Myihtoi Yeremia gaw Yehowa hte shi a mungga hpe tsawra ai. Yehowa a amying hkam la lu ai ahkaw ahkang a matu mung, grai chyeju dum ai. Shi ndai hku tsun ai: “Karai Kasang Yehowa e, . . . ngai gaw na amying mying ai wa rai nga ai majaw, na a mungga gaw nye a kabu gara shara hte, nye myit sharawng awng ai lam, tai wa sai.” (Yeremia 15:16) Ndai ga san ni hpe htai yu u:
Yehowa Sakse langai byin ai gaw hpa majaw laksan ahkaw ahkang rai kun?
Yehowa Sakse langai hku nna nang hkalup hkam mayu ai kun?
Dai zawn n galaw lu hkra pat shingdang ai lam lama ma nga ai kun?
Hkalup hkam lu hkra nang galaw ra na hpa naw nga ai ngu shadu ai kun?
Nkau Mi Tsun Ai: “Apnawng ga sadi hte maren asak hkrung lu na ngu ngai n shadu ai.”
Dai zawn nang hkamsha ai kun?
Kadun Dawk
Yehowa a karum shingtau lam hte hkalup hkam na matu yak shangun chye ai gara lam hpe raitim tawt lai lu ai.
Bai Maram
Hkalup hkam na matu Chyum Laika machye machyang kade daram ra ai kun?
Hkalup garai n hkam shi yang gara galai shai ai lam ni hpe galaw ra ai kun?
Hkrit nna htingnut ai baw hpa majaw n byin ging ai kun?
Sawk Sagawn
Hkalup hkam na matu dawdan ai gaw hpa a majaw rai ging ai hpe hti yu u.
“Hkalup Hkam Na Matu Jin Sai Kun” (Sin Langchyi, March 2020)
Nang hpe htingnut shangun nga ai lam lama ma hpe tawt lai lu hkra, hpa gaw karum ya lu ai hpe hti yu u.
“Ngai Baptisma Hkam Na Hpa Hkum Shara Nga A Ta?” (Sin Langchyi, March 2019)
Hkalup hkam na matu grai nan yak shangun wa ai lam ni hpe, la langai gara hku tawt lai wa ai hpe yu yu u.
Ata ngu ai la gaw, nnan hta hkalup hkam na matu htingnut wa ai. Ndai ahkyak ai lam hpe galaw lu hkra, shi hpe hpa gaw karum ya wa ai hpe yu yu u.