Karai A Mungdan Gaw Yesu A Matu Hpa Majaw Grai Ahkyak Ai Kun?

Shawng na sumhpa hta tsun wa ai hte maren, Yesu gaw “Karai Kasang a mungdan lam hkaw dan” na matu sha myit maju jung wa ai. (Luka 8:1) Karai a Mungdan lam hte seng nna masha law law hpe sharin ya na matu shakut shaja wa ai. Yesu gaw Israela mung grupyin deng law law lam hkawm nna hkaw tsun let sharin achyin ya wa ai. Yesu magam gun wa ai lam hpe ka da ai Kabu Gara Shiga Laika 4 hta Mungdan lam hpe 100 lang jan lakap da ai. Law malawng hpe gaw Yesu tsun wa ai ga ni kaw mu lu ai. Dai labau ni gaw Karai a Mungdan lam hte seng nna Yesu tsun wa ai ga ni kaw na kachyi mi sha rai shi ai.​—Yawhan 21:25.

Yesu mungkan ga ntsa naw nga ai aten, Karai a Mungdan gaw shi a matu hpa majaw dai daram ahkyak ai kun? Langai gaw, Mungdan a Hkawhkam hku nna shi hpe Karai Kasang lata da ai hpe chye ai majaw re. (Esaia 9:5; Luka 22:28-​30) Raitim, Yesu gaw ahkaw ahkang lu na matu, hpung shingkang dan leng na matu myit maju n jung wa ai. (Mahte 11:29; Marku 10:17, 18) Shi a tingkyeng akyu a matu Karai a Mungdan lam hpe hkaw tsun wa ai n re. Tsawra ai sumsing Kawa hte madat mara ai shi a hpang hkan ai ni a matu, Mungdan galaw ya na lam ni a majaw Mungdan hpe Yesu myit lawm wa ai, myit lawm nga ai re.a

Karai Kasang A Mungdan Gaw Yesu A Kawa A Matu Galaw Ya Na Lam

Sumsing lamu hta nga ai Kawa hpe Yesu grai tsawra ai. (Ga Shagawp 8:​30; Yawhan 14:31) Tsawra myit, matsan dum myit, tara rap ra ai lam zawn re ai Kawa a kaja ai atsam ningja ni hpe mung manu shadan ai. (Tara Jahprang 32:4; Esaia 49:15; 1 Yawhan 4:8) Dai majaw, Karai gaw shinggyim masha ni hpe lanu lahku ai lam n nga ai, masha ni hpe jamjau shangun mayu ai zawn re ai Kawa hte seng na masu ai ga ni hpe Yesu tsep kawp na mayu na n re. Dai majaw mung, “mungdan a kabu gara shi ga” hpe myit rawt let hkaw tsun wa ai re. Aten du yang Mungdan gaw Karai a hpung shingkang hpe dan leng shangun na re ai hpe Yesu chye da ai. (Mahte 4:​23; 6:​9, 10) Gara hku na kun?

Karai Kasang gaw shinggyim masha ni akyu lu la na matu Mungdan hku nna galai shai ai lam galaw ya sana re. Madat mara ai shinggyim masha ni a “myi prwi pru mapru katsut kau ya na” re. Tsun mayu ai gaw, yawn hkyen myi prwi hkrat shangun ai lam mahkra hpe Yehowa Karai Kasang yeng seng kau ya na re. Dai shaloi, “si hkrung si htan n nga lu na sai; sharung shayawt ai, hkrap ngu hkrap ngoi ai, hki si ba si ai” lam nga sana n re. (Shingran 21:​3, 4) Karai Kasang gaw shinggyim masha ni a jamjau ai lam yawng hpe Mungdan hku nna yeng seng kau ya sana re.b

Karai a Mungdan lam hpe Yesu hkaw tsun mayu ai myit rawt ai gaw mauhpa n re. Kawa gaw kade daram dagu atsam kaba ai, kade daram matsan dum chye ai ngu ai hpe ndai mungdan gaw madun mat wa na hpe Yesu chye da ai. (Yaku 5:​11) Dai hta n-ga, dai Mungdan chyu sha madat mara ai shinggyim masha ni hpe akyu chyeju lu la shangun na hpe mung chye da ai.

Madat Mara Ai Shinggyim Masha Ni A Matu Mungdan Galaw Ya Na Lam

Yesu mungkan de garai n sa shi yang lamu hta Kawa hte rau nga wa ai. Kawa gaw Kasha hte rau shagan ni hte hpring nga ai sumsing lamu, tsawm htap ai mungkan ga hte mungkan hta nga ai hkrung mahkrung yawng hpe hpan wa ai. (Kolose 1:​15, 16) Hpan da mada yawng kaw na shinggyim masha ni hpe Yesu grai tsawra ai.​—Ga Shagawp 8:​31.

Shinggyim masha ni hpe Yesu gade daram tsawra ai ngu ai hpe mungkan ga ntsa magam gun ai shaloi mu lu ai. Yakhkak jamjau ai lam hkrum nga ai ni hpe “kabu gara shi ga hkaw tsun na matu” mungkan de du wa ai re ngu nnan kaw na Yesu asan sha tsun wa ai. Masha ni hpe hkaw tsun na matu daram sha n re ai sha tatut mung karum ya wa ai. (Luka 4:​18) Shinggyim masha ni hpe tsawra ai ngu ai hpe Yesu galaw wa ai lam ni hta asan sha mu lu ai. Ga shadawn, masha hpawng gaw Yesu hkaw tsun ai hpe madat na matu du wa ai shaloi, shanhte hpe Yesu “matsan dum” nna “machyi makaw hkrum ai ni hpe” tsi tsi ya ai. (Mahte 14:14) Manggang kap ai masha langai gaw, Yesu tsi tsi ya mayu yang tsi tsi ya lu ai atsam nga ai hpe kam ai lam madun ai shaloi, Yesu gaw “Ngai hkraw nga nngai, san pra wa nu” ngu tsawra myit hte tsun na tsi tsi dat ya ai. (Luka 5:​12, 13) Kanau Lazaru si mat ai majaw yawn hkyen nga ai jinghku Mari hpe Yesu mu ai shaloi mung, “yawn” ai majaw “myi prwi pru” wa ai. (Yawhan 11:32-​36) Dai hpang, si mat wa ai 4 ya na sai Lazaru hpe asak bai hkrung hkra galaw dat ya ai. Dai gaw grai nan mauhpa lam re.​—Yawhan 11:38-​44.

Mungkan hta galaw ya wa ai lam ni gaw chyahkring sha akyu lu la na hpe Yesu chye da ai. Yesu tsi tsi dat ya ai machyi ai masha ni bai machyi wa na, asak bai hkrung hkra galaw dat ya ai ni bai si ra na hpe chye ai. Raitim, Karai a Mungdan gaw dai manghkang yawng hpe tsep kawp yeng seng kau ya na hpe Yesu chye da ai. Dai majaw, Yesu gaw mauhpa lam ni hpe sha galaw wa ai n re ai sha, “mungdan a kabu gara shi ga” hpe mung myit rawt let hkaw tsun wa ai re. (Mahte 9:​35) Yesu galaw wa ai mauhpa lam ni gaw kade n na yang Karai a Mungdan galaw ya na lam ni a shingnip shingna re. Karai a Mungdan uphkang ai lam npu hta hkum tsup wa na Chyum Laika ga sadi ni hpe matut nna dinglik yu u.

• 

  Hkamja lam manghkang nga sana n re.

  “Dai shaloi e myi hten ai ni, myi mu lu nna, na n na ai ni, na lu na ma ra ai. Lagaw hten ai wa gaw shan nga zawn gumtawng lu nna, maa ai wa a shinglet gaw mahkawn mangoi na ra ai.” Dai sha n-ga, “dai hta shanu ai wa gaw, Ngai machyi nga nngai, nga nna n tsun na ra ai.”​—Esaia 33:​24; 35:​5, 6.

• 

  Si hkrung si htan nga sana n re.

  “Ding hpring ai ni gaw dai mungdan [mungkan ga] hpe madu lu nna, Dai hta e nan nawng e nga nga lu na ma ra ai.”​—Shakawn 37:29.

  “Shi gaw si hkrung si htan hpe mayu kau nu ai; Madu Yehowa gaw myi man shagu a myi prwi katsut kau na ra ai.”​—Esaia 25:8.

• Si mat ai ni asak bai hkrung wa na.

  “Lup ni hta rawng nga ai ni nlang hte gaw shi a nsen na nna, pru lu na ahkying du na ra ai.”​—Yawhan 5:​28, 29.

  “Bai hkrung rawt wa na.”​—Kasa 24:15.

• 

  Dum nta n nga ai, bungli n lu ai manghkang ni nga sana n re.

  “Shanhte gaw tinang galaw ai nta hta shanu nga nna, tinang hkai ai tsabyi sun na asi, sha na ma ra ai. Shanhte nta galaw nna, masha kaga rawng na, n rai; shanhte tsabyi sun hkai nna, . . . tinang lata amu a akyu, na na wa hkam la na ma ra ai.”​—Esaia 65:21, 22.

• 

  Majan ni nga sana n re.

  “Ga ting hta na hpyen majan shi jasim kau wu ai.”​—Shakawn 46:9.

  “Amyu mi gaw amyu mi hpe nhtu n shaw ai hte, htawm hpang e hpyen majan sharin sa na, n rai.”​—Esaia 2:4.

• 

  Lusha hku hku ai lam nga sana n re.

  “Aga gaw shi a nsi naisi dik hkra shapraw ya sai, Karai Kasang, anhte a Karai Kasang, anhte hpe shaman ya mi ai.”​—Shakawn 67:6.

  “Mungdan na bum ni a pungding du hkra, nai mam paw wa nna, Lebanon zawn, de a nsi naisi a hkung nga lu ga.”​—Shakawn 72:16.

• Matsan ai lam nga sana n re.

  “Matsan mayan ni hpe tut tut malap kau na mu ai n rai.”​—Shakawn 9:​18.

  “Shaga nga ai matsan ai wa hte, Nrum ntau n lu ai nni nkri hkrum ai wa hpe, shi mawai la na ra ai. Hti n mai ni hte, matsan mayan ni hpe shi matsan dum nna, Matsan mayan ni a myit masin hpe hkye hkrang la na nu ai.”​—Shakawn 72:12, 13.

Karai a Mungdan galaw ya na lam ni hte seng na hkaja ngut ai shaloi, ndai Mungdan gaw Yesu a matu hpa majaw ahkyak ai ngu ai hpe nang chye wa sai ngu na shadu ai. Karai a Mungdan gaw dai ni aten hta hkrum nga ai yawn hkyen hpa manghkang yawng hpe yeng seng kau ya na hpe Yesu chye da ai. Dai majaw, shi mungkan ga hta nga nga ai shaloi Karai a Mungdan lam hte seng nna madat mayu ai ni hpe myit rawt let tsun dan wa ai re.

Karai a Mungdan hku na hpring tsup ya na Chyum Laika ga sadi ni hpe nang ra sharawng ai kun? Ra sharawng ai nga yang, dai mungdan lam hte seng na kahtap na gara hku chye lu na kun? Mungdan galaw ya na akyu chyeju ni hpe hkamsha lu hkra nang hpa galaw ra na kun? Hpang na sumhpa hta dai ga san ni a mahtai hpe mu lu na re.