‘Kadai Mung Nanhte Hpe N Hkalem Lu U Ga Sadi Nga Mu’

1. Kolose 2:4, 8 hku nga yang Satan gaw anhte a myit masin hpe hkalem hkalau na matu gara hku shakut nga ai kun?

YEHOWA hpe anhte nawku ai kaw nna kayin mat hkra Satan galaw mayu ai. Dai majaw, anhte a myit mang ai lam hpe galai shai na matu shakut nga ai. Shi a ga madat na matu anhte a myit masin hpe hkalem nga ai. Shi hpang hkan na matu, anhte a ra marin ai myit hpe akyu jashawn nna, hkalem hkalau nga ai (sh) lau la nga ai.​—⁠Kolose 2:4, 8 hpe hti u. 

2-3. (a) Kolose 2:8 hta tsun da ai lam hpe anhte hpa majaw myit maju jung ging ai kun? (b) Ndai sumhpa hta hpa lam hkaja mat na kun?

² Satan a hkalem hkrum yang gaja wa shoihpa nga ai kun? Nga ai. Kolose 2:8 hta tsun da ai lam ni gaw, n kam n sham ai ni hpe sadi jaw na matu Pawlu ka da ai n re. Chyoi pra ai wenyi hte namman chya hkam ai Hkristan ni hpe sadi jaw na matu ka da ai re. (Kol 1:1-3, 5) Dai aten na Hkristan ni hta hkalem hkrum chye ai shoihpa nga wa ai. Dai ni aten hta grau nna pyi shoihpa nga ai. (1 Ko 10:12) Hpa majaw kun? Satan gaw mungkan ga de jahkrat kau hkrum nna, Karai a sadi dung ai mayam ni hpe hkalem na matu shakut nga ai majaw re. (Shr 12:9, 12, 17) Dai sha n-ga, nhkru ai masha ni hte hkalem sha ai masha ni gaw, “n hkru ai lam hta je je kaba wa” ai aten hta anhte asak hkrung nga ai majaw mung re.​—⁠2 Tm 3:1, 13.

³ Ndai sumhpa hta, Satan gaw anhte a myit mang ai lam hpe shingkang ka-up na matu ‘kaman lila rai nga ai hkalem hkalau ga’ hpe gara hku akyu jashawn nga ai hpe hkaja mat na re. Shi a “hkalem hkalau” ai ladat 3 hpe anhte chye lu na re. (Ehp 6:11) Hpang na sumhpa hta, anhte a myit mang ai lam hpe n kaja ai hku shingkang ka-up da ai shi a ladat ni hpe gara hku ninghkap lu na lam hkaja lu na re. Shawng nnan, Ga Sadi Tawn Da Ai Mungdan de Israela ni du ai shaloi, Satan hkalem wa ai lam ni kaw nna, anhte hpa sharin la lu ai hpe bawngban yu ga.

Gawngngu Sumla Nawku Na Matu Hkalem

4-6. Tara Jahprang 11:10-15 hku nga yang Ga Sadi Tawn Da Ai Mungdan de Israela ni du ai shaloi, hkai lu hkai sha ai gara ladat ni hpe sharin la ra na kun?

⁴ Satan gaw, Israela ni hpe gawngngu sumla nawku na matu hkalem wa ai. Gara hku galaw wa ai kun? Shanhte malu masha ra kadawn nga ai hpe chye ai majaw, dai lam hpe akyu jashawn nna hkalem wa ai. Ga Sadi Tawn Da Ai Mungdan de Israela ni du ai shaloi, hkai lu hkai sha ai ladat nnan ni hpe sharin la ra ai. Egutu mung hta gaw, hkai lu hkai sha na matu Nai Hkanu kaw na hka hpe akyu jashawn ma ai. Raitim, Ga Sadi Tawn Da Ai Mungdan hta gaw, hkanu kaba n nga ai. Marang hte numri hpe sha akyu jashawn nna, hkai lu hkai sha ma ai. (Tara Jahprang 11:10-15 hpe hti u; Esa 18:4, 5) Dai majaw, ladat nnan hpe shanhte sharin la ra ai. Hkai lu hkai sha ai ladat hpe chye ai law malawng mung, nam maling kaw si mat sai majaw, Israela ni a matu n loi sai.

⁵ Shanhte a masa galai shai ra na re ngu nna Yehowa tsun wa ai. Hkai lu hkai sha ai hte n seng ai sha, shanhte hpe ndai hku sadi jaw wa ai: “Nanhte myit n shut nna, Hpara shaje ni kaw n jaw n jau n naw n ku myit ga sadi nga mu.” (Trj 11:15, 17) Hkai lu hkai sha ai hte seng ai ladat ni hpe tsun nga ai laman, hpara shaje ni hpe n nawku na matu Yehowa hpa majaw sadi jaw wa ai kun?

⁶ Israela ni gaw, hpara shaje nawku ai htingbu ni kaw na hkai lu hkai sha ai ladat nkau hpe sharin la na matu hkalem hkrum na hpe Yehowa chye ai. Shanhte a htingbu ni gaw, hkai lu hkai sha ai hta mahkrum madup grau law nna, shanhte kaw na akyu rawng ai ladat ni hpe Karai a masha ni sharin la lu mai ai. Raitim, shoihpa nga ai. Hkanani masha ni gaw Bala hpe kam ai majaw, akyu lu la ai ngu myit ma ai. Bala gaw lamu hpe madu nna, marang htu ya lu ai ngu kam ma ai. Yehowa gaw Israela ni hpe, dai zawn shut shai ai makam masham hte hkalem n hkrum shangun mayu ai. Raitim, aten ni na mat wa ai hte maren, Israela ni gaw Bala hpe nawku mat ai. (Bhk 25:3, 5; Trg 2:13; 1 Hk 18:18) Israela ni gaw Satan a hkang ai npu de du mat ai.

Israela Ni Hpe Hkalem Na Matu Satan Lang Ai Ladat Masum

7. Ga Sadi Tawn Da Ai Mungdan de du ai shaloi Israela ni a makam masham gara hku chyam dinglik hkrum wa ai kun?

⁷ Satan lang ai shawng nnan na ladat gaw, mungdan hta hka lu na matu marang htu shangun mayu ai htap htuk ai ra marin ai myit hpe lang wa ai. Ga Sadi Tawn Da Ai Mungdan hta shaning shagu April shata htum ai aten kaw na September shata du hkra marang nau n htu ai. Israela ni matut asak hkrung na matu, nai mam ni law law pru na matu, October shata hta nnan htu hpang ai marang hpe sha, shanhte shamyet shanat ma ai. Raitim, shut shai ai hpara hpe nawku ai htingbu ni a htung lai ni hpe hkan sa ra ai ngu kam mat hkra, Israela ni hpe Satan hkalem wa ai. Shanhte a htingbu ni gaw, Bala nawku htung hta shang lawm yang she, marang htu ya na re ngu kam ma ai. Yehowa hpe kamsham ai myit mat mat ai ni gaw, jan gri ai hpe koi lu na matu, dai lam langai sha nga ai ngu kam wa ma ai. Dai majaw, shut shai ai hpara Bala hpe shanhte nawku wa ma ai.

8. Satan lang ai lahkawng ngu na ladat gaw hpa rai kun? Sanglang dan u. 

⁸ Israela ni hpe hkalem na matu Satan lang wa ai lahkawng ngu na ladat gaw, hkum shan ra marin ai myit re. Gawngngu sumla nawku ai ni gaw, matsat shabat re ai akyang lailen ni galaw nna shanhte a hpara ni hpe nawku ma ai. Dai zawn akyang htenza ai nawku dawjau ai lam hta, hpara shawa num, hpara shawa la ni lawm ai. Num shada, la shada nga sha ai lam hte kaga akyang htenza ai lam ni hpe galaw na ahkang jaw da nna, dai hpe hkap la ma ai. (Trj 23:17, 18; 1 Hk 14:24) Shut shai ai hpara nawku ai ni gaw, dai htung lai ni galaw yang, nai mam law htam wa hkra shanhte a hpara gaw galaw ya lu ai ngu nna kam ma ai. Israela law law mung, akyang htenza ai dai htung lai hte hkalem hkrum nna, shut shai ai hpara hpe nawku na matu lata mat ma ai. Gaja nga yang, Satan a hkalem hkalau ai hkrum mat ai re.

9. Hosea 2:16, 17 hku nga yang hku nga yang Yehowa hpe mu mada ai Israela ni a ningmu galai shai mat hkra Satan gara hku hkalem wa ai kun?

⁹ Satan lang ai masum ngu na ladat gaw, Yehowa hpe mu mada ai Israela ni a ningmu mak mat hkra galaw ai lam re. “Bala amying majaw” Yehowa a amying malap mat hkra, myihtoi masu ni gaw Karai a masha ni hpe galaw na ngu myihtoi Yeremia aten hta Yehowa tsun wa ai. (Yer 23:27) Karai a masha ni gaw, Yehowa a amying hpe n lang mat ai sha, “Madu Ai” (sh) “Madu” ngu lachyum nga ai Bali ngu malai shaga mat ai. Dai majaw, Yehowa hte Bala a lapran shai ai lam hpe Israela ni mu na matu yak mat ai. Bala hpe nawku ai gaw Yehowa hpe nawku ai sha re ngu hkam la kau ma ai.​—⁠Hosea 2:16, 17, 18, 19 hpe hti u. 

Dai Ni Aten Satan Lang Ai Ladat Ni

10. Dai ni aten hta gara ladat ni hte Satan hkalem nga ai kun?

¹⁰ Dai ni aten hta mung, Satan gaw dai ladat ni hpe sha lang nga ai. Htap htuk ai ra marin ai myit, hkum shan ra marin ai myit hte Yehowa hpe mu mada ai ningmu mak mat hkra galaw ai lam ni re. Shawng nnan, Yehowa hpe mu mada ai ningmu mak mat hkra gara hku galaw ai hpe hkaja yu ga.

11. Yehowa hpe mu mada ai ningmu mak mat hkra masha ni hpe Satan gara hku galaw nga ai kun?

¹¹ Yehowa hpe mu mada ai ningmu mak mat hkra masha ni hpe Satan galaw nga ai. Yesu a kasa ni si mat ai hpang, makam masham htak mat ai ni gaw masu ga ni hpe sharin hpang wa ai. (Kas 20:29, 30; 2 Ht 2:3) Shanhte gaw, teng man ai Karai Kasang langai sha nga ai lam hpe mak mat hkra galaw hpang wa ai. Ga shadawn, Chyum Laika hpe ga gale ai shaloi, Karai Kasang a amying hpe n lang ai sha, “Madu” (sh) kaga amying hpe malai bang kau ma ai. Karai a amying hpe shaw kau nna, “Madu” ngu malai bang kau ai majaw, Chyum Laika hti ai ni gaw, Chyum Laika hta lawm ai “madu” hte Yehowa gara hku shai ai lam hpe chye na matu yak mat ai. (1 Ko 8:5) Yehowa hte Yesu hpe mung “Madu” ngu nna ka kau ai. Dai majaw, Yehowa hte Yesu gaw n bung ai hpe chye na matu yak mat ai. (Yhn 17:3) Dai zawn myit ung ang shangun ai lam a majaw, Karai a Mungga hta n lawm ai Masum Raitim Langai Karai ngu ai sharin achyin ai lam ni law htam wa ai. Dai lam ni a majaw, masha law law gaw Karai hpe chye na matu n mai byin ai ngu kam mat ma ai. Hkrit hpa masu ga rai nga ai.​—⁠Kas 17:26, 27.

12. Roma 1:28-31 hta tsun da ai hte maren shut shai ai nawku htung ni gaw hpa galaw na matu shadut ya nga ai kun? Hpa ni byin wa shangun ai kun?

¹² Satan gaw hkum shan ra marin ai myit hte hkalem ai. Israela ni a aten hta, Satan gaw shut shai ai nawku htung hpe akyu jashawn nna akyang htenza hkra shadut ya ai. Dai ni aten hta mung maren sha re. Shut shai ai nawku htung ni gaw, akyang htenza ai hpe hkap la nna, n-gun pyi jaw nga ai. Dai majaw, Karai hpe nawku dawjau nga ai ngu tsun ai ni pyi, akyang lailen hte seng ai Karai a tsang madang ni hpe n hkan sa ma ai. Shanhte hta byin wa ai lam ni hte seng nna Roma ni hpe ka ai laika hta kasa Pawlu tsun wa ai. (Roma 1:28-31 hpe hti u.) Num shada, la shada nga sha ai hte hpawn, hpye ai amu galaw ai lam yawng gaw “n hpru n mai re ai amu” re. (Rom 1:24-27, 32; Shr 2:20) Chyum Laika hta asan sha tsun da ai sharin achyin ai lam ni hpe anhte hkan sa na matu grai ahkyak ai.

13. Satan lang ai kaga ladat langai gaw hpa rai kun?

¹³ Satan gaw htap htuk ai ra marin ai myit hpe akyu jashawn ai. Tinang a matu hte kun dinghku hpe madi shadaw na matu atsam ningja ni rawt jat hkra galaw mayu ai myit anhte hta nga ai. (1 Tm 5:8) Dai atsam ningja ni hpe jawng lung nna shakut shaja let hkaja ai hku nna lu la mai ai. Raitim, anhte sadi ra na re. Mungdan law law hta, jawng ma ni gaw jawng kaw na akyu rawng ai hpaji ni hpe sharin la lu ma ai. Raitim, mungkan a hpaji byeng-ya ni hpe mung sharin hkam la ra ai. Ga shadawn, Karai Kasang nga ai hpe ntsen ai myit nga wa hkra shadut ya nna, Chyum Laika hpe n hkungga mat hkra galaw nga ai. Asak gaw sinda masa a majaw byin wa ai ngu nyan hpaji rawng ai masha yawng kam ai nga nna, jawng ma ni sharin hkrum nga ai. (Rom 1:21-23) Dai zawn sharin achyin ya ai lam ni gaw “Karai Kasang hpaji” hpe ninghkap nga ai re.​—⁠1 Ko 1:19-21; 3:18-20.

14. Masha a hpaji byeng-ya gaw hpa hpe shadut ya nga ai kun?

¹⁴ Masha ni a hpaji byeng-ya gaw, Yehowa a tsang madang ni hpe n gawn n sawn di ai sha n-ga, ninghkap shadang nga ai. Karai a chyoi pra ai wenyi asi hpe n re ai sha, “hkum shan a bungli” galaw wa hkra shadut ya ai. (Gal 5:19-23) Gumrawng ai myit nga wa hkra masha ni hpe shadut ya ai majaw, masha ni gaw “tinang hkum hpe tsaw ra ai ni” byin wa ma ai. (2 Tm 3:2-4) Dai myit jasat gaw, Karai Kasang shi a mayam ni hta nga shangun mayu ai shagrit shanem ai myit jasat hte nhtan shai nga ai. (2 Sa 22:28) Dakkasu hpaji hpe sharin la nga ai Hkristan nkau gaw, Karai a myit mang ai lam n re ai sha, masha a myit mang ai lam shingkang ka-up hkrum nga ai. Byin chye ai masa hte seng nna ga shadawn langai hpe yu yu ga.

15-16. Nauna langai a mahkrum madup kaw na hpa sharin la lu ai kun?

¹⁵ Aten hpring magam gun ai 15 ning jan sai nauna langai ndai hku tsun ai: “Hkalup hkam da sai Sakse Hkam langai hku nna, dakkasu lung yang byin wa chye ai shoihpa ni hpe hti lu, na lu ai. Raitim, ngai n madat wa ai. Dai hpaji jaw ga ni gaw ngai hte n seng ai ngu myit wa ai.” Gara manghkang ni hpe shi hkrum wa ai kun? Shi ndai hku tsun ai: “Jawng hpaji hkaja ai lam hta aten hte n-gun atsam grai jaw ra ai majaw, Yehowa kaw akyu hpyi na matu pyi n loi wa ai. Kaga ni hte Chyum Laika hkaja na matu grai pu ba wa ai. Zuphpawng ni a matu atsawm hkyen lajang na matu n loi wa ai. Madang tsaw hpaji hpe sharin la ai gaw, Yehowa hte nye a hku hkau lam hpe hkra machyi shangun ai lam ngai chye na mat ai. Matut n lung na matu ngai dawdan kau ai.”

¹⁶ Dai madang tsaw hpaji gaw nauna a myit mang lam hpe gara hku hkra machyi shangun ai kun? Shi ndai hku tsun ai: “Ngai tsun dan na matu gaw kaya ai. Ngai lata ai hpaji gaw, kaga ni hpe myi man lata chye wa hkra sharin ya ai. Laksan hku nna, hpunau nauna ni hpe shanhte galaw lu ai hta jan nna galaw na matu ngai myit mada wa ai. Shanhte hte ngai n kanawn mat sai. Dai zawn myit jasat hpe galai shai na matu, aten grai na mat ai. Uhpung hku nna sumsing Kawa jaw nga ai sadi jaw ga ni hpe n hkan sa yang, kade daram shoihpa nga ai hpe nye a mahkrum madup kaw nna ngai chye mat ai. Nye hkum ngai chye ai hta na Yehowa grau chye ai. Shi a ga hpe ngai madat wa ging ai.”

17. (a) Hpa galaw na matu dawdan da ra ai kun? (b) Hpang na sumhpa hta hpa lam hkaja mat na kun?

¹⁷ Satan a mungkan kaw na “zai byeng-ya hte lila rai nga ai hkalem hkalau ga” n hkrum na matu dawdan da ga. Satan hkalem ai hpe galoi mung ahkang hkum jaw. (1 Ko 3:18; 2 Ko 2:10, 11) Yehowa hpe mu mada ai ningmu mak mat hkra galaw nga ai Satan hpe ahkang hkum jaw. Yehowa a tsang madang ni hte maren asak hkrung u. Yehowa a hpaji jaw ga ni hpe n gawn n sawn di kau hkrup hkra, Satan hkalem ai hpe ahkang hkum jaw. Ndai mungkan a myit jasat anhte hta nga wa sai hpe chye yang, hpa galaw ging ai kun? Hpang na sumhpa hta, “ngang ngang ru jung nga ai” myit mang ai lam ni hte galaw ai lam ni kaw nna, bai kayin wa lu hkra Karai a Mungga gaw gara hku karum ya lu ai hpe chye lu na re.​—⁠2 Ko 10:4, 5, NW.