Myi Nmu Ai Ni Hpe Yehowa A Lam Chye Wa Hkra Karum Ya U

1. Myi nmu ai ni hpe matsan dum ai lam Yesu gara hku madun wa ai kun?

¹ Yesu si na nhtoi ni wa ai shaloi, Yerihko mare kaw na pru wa ai aten hta, myi nmu ai masha lahkawng gaw, “Madu e, an hpe matsan dum la mi law” ngu nna jahtau ai. Yesu gaw, shawng hta hkrum na yakhkak lam ni nga tim, shan hpe shaga la nna shamai ya ai. (Mah. 20:29-34) Myi nmu ai ni hpe Yesu matsan dum myit madun ai kaw na, hpa kasi mai la na kun?

2. Shawa hpawng hta myi nmu ai masha langai hpe hkrum ai shaloi gara hku sakse hkam mai a ta?

² Karum Ya U: Myi nmu ai masha langai hpe, shawa hpawng hta mu yang, tinang shawng shachyen nna shi hpe karum ya na ngu tsun u. Shanhte hpe masha ni gaw chyahkring hkring dang sha ai majaw, tinang hpe ntsen ai myit nga chye ai. Raitim tinang maga hku na, hku hku hkau hkau shaga yang, ntsen ai myit mat mat na re. Myi nmu ai masha langai hte langai masa nbung ai hpe chye da ra ai. Dai rai nna masa hta hkan nna, gara hku karum ra na hpe atsawm myit u. Karum ya ngut ai hpang anhte gaw Chyum Laika hpaji jaw bung­li hta shang lawm nga ai hpe tsun dan mai ai. Sha­kawn Kungdawn 146:8 (sh) Esaia 35:5, 6 ni zawn Chyum daw langai hti dan u. Shi gaw, myi nmu laika hti ai nga yang, Chyum Laika hpe grau chye hkra uhpung shapraw da ai myi nmu laika ni grai law nga ai, lu mayu ai kun? ngu san u. jw.org hta nsen rim da ai file ni lu hkra karum ya mai ai. La ma na shi a computer hta nsen pru nna hti ya ai ladat nga yang, jw.org hta na laili laika ni hpe shi ra sharawng na re. Dai hta nga ai RTF (Rich Text Format) ladat hte mara da ai laika ni hpe mung copy galaw mai ai.

3. Anhte a lawk hta myi nmu ai ni hpe gara hku tam mai na kun?

³ Myi Nmu Ai Ni Hpe Tam U: Nta langai hpang langai hkaw tsun sa ai shaloi, myi nmu ai ni hpe mu na matu yak ai. Hpa majaw nga yang shanhte ni gaw, nta kaw masha tsasam ni hte shaga na matu hkrit nna re. Shanhte hpe sakse hkam mayu yang shakut shaja nna, “tam la” ra ai. (Mah. 10:11) Nang hta myi nmu ai jawng manang, bungli manang nga ai kun? Nga yang nang shawng shaga la u. Tinang buga hta myi nmu jawng nga yang, jawng laika dum a matu uhpung kaw na shapraw da ai myi nmu laika ni jaw mayu ai ngu tsun u. Myi nmu ai masha nga ai dinghku na nta masha langai ngai hpe nang chye ai kun? Na a ginra hta myi nmu ai ni hpe karum ya ai hpung ni nga ai kun? Myi nmu ai ni hpe makawp maga ya nga ai shara ni nga ai kun? Anhte ni gaw myi nmu ai ni hpe grai karum ya mayu ai lam nta masha ni, karum ya ai hpung ni hpe tsun dan u. Myi nmu laika ni, nsen rim da ai file ni jaw mai na kun? ngu san u. Karai Kasang gaw, myi nmu ai ni hpe myi bai mu hkra galaw ya sana ngu ai Chyum Laika ga sadi ni hpe tsun dan u. Chyum Laika hpe myi nmu laika hte hti lu ai majaw akyu hkam sha wa ai la langai a mahkrum madup re ai, Ndai Nnga Yang, Nye Prat Mung Sum Sai, ngu ai video hpe madun mai ai. Shanhte kaw sa ai lam atsawm ntsun dan yang, myi nmu ai masha hte matut mahkai na matu nloi ai.

4. Jenet a mabyin kaw na hpa sharin la lu ai kun?

⁴ Myi nmu ai nauna Janet gaw, myi nmu ai ni nga ai shara de sa nna, num kasha langai hte ga shaga ai. Shi ndai hku tsun ai “Yesu gaw myi nmu ai masha lahkawng hpe shamai ya wa ai. Dai gaw htawm hpang prat hta mung myi nmu ai ni a matu hpa galaw ya na ngu ai hpe chye shangun ai.” Shingran 21:3, 4 hpe mung bawngban nna, dai ga sadi hpe Karai a Mungdan gaw gara hku galaw ya na hpe sang lang wa ai. Shaloi numsha gaw ndai hku tsun ai “Myi nmu ai wa ndai hku tsun ai hpe kalang mung n na ga ai. Ngai hpe sa hkrum ai ni law malawng gaw, masha ni myi nmu ai gaw shanhte hte shanhte a jiwoi jiwa ni nkaja ai langai ngai ga­law ai majaw re ngu tsun ai.” Janet gaw numsha hpe Chyum Laika Teng Sha Sharin laika buk hpe e-mail hte sa ya nna, bat mi hta lahkawng lang Chyum Laika hkaja nga ai.

5. Yesu zawn myi nmu ai ni hpe anhte nlu shamai ya tim, shanhte hpe myit lawm ai lam madun yang hpa akyu ni lu na kun?

⁵ Yesu galaw ai zawn, myi nmu ai ni hpe an­hte shamai ya lu na gaw nre. Raitim Karai Mungga a teng man ai lam hpe myi nmu ai ni hte ndai mungkan a Hpara majaw wenyi lam hta nsin rai nga ai ni yawng hpe chyena wa hkra anhte karum ya mai ai. (2 Kor. 4:4) Yeri­hko mare hta myi nmu ai masha lahkawng hpe Yesu karum ya ai gaw, “matsan dum” ai majaw re. (Mah. 20:34) Anhte mung, myi nmu ai ni hpe myit lawm ai lam madun yang, myi bai mu hkra Yehowa galaw ya na lam hpe shanhte chye wa ai shaloi ngwi pyaw na re.