Audio Nsen Rim Da Ai Ni Hpe Gara Hku Jailang Mai
1. Laili laika ni sha n-ga akyu law law lu na gara lajang da ya ai lam ni anhte kaw nga ai kun?
1 Masha law law gaw, jw.org hpe jailang nna, teng man ai tara lu hti ai hpe kabu nga ma ai. (Hp.N 12:10) Raitim, audio nsen rim da ai ni hpe nang jailang nga ai kun? Ndai ni gaw, anhte a website hta mara da ai shiga ni hpe masha ni madat lu na matu karum ya ai. Audio nsen rim da ai ni gaw anhte hpe kade daram akyu lu shangun na kun?
2. Tinang hte dinghku a matu audio nsen rim da ai ni hpe gara hku jailang mai na kun?
2 Dinghku Hte Tinang A Matu: Nsen rim da ai Chyum Laika, magazine, (sh) laili laika langai ngai hpe bu hkawm ai aten, nta bungli galaw nga ai aten hta madat ai gaw aten hpe atsawm jailang nga ai hte bung ai. (Ehp. 5:15, 16) Dinghku nawku hta nsen rim da ai laili laika ni hpe madat nna tinang a laika buk kaw na hkan hti mai ai. Laika hti ai atsam rawt jat mayu yang (sh) ga amyu langai hkaja mayu yang, audio nsen rim da ai ni hpe tinang hkrai hkaja ai lamang hta jailang mai ai. Dai hku jailang na nga yang akyu grai lu la na re.
3. Audoi nsen rim da ai ni hpe lawk hta nga ai kadai ni akyu lu la na kun?
3 Hkaw Tsun Bungli A Matu: Anhte hkaw tsun nga ai lawk hta na masha ni gaw bungli law ai majaw, laika n lu hti tim, audio nsen rim da ai ni hpe gaw madat mayu na re. Shing n rai, ‘tinang a buga ga’ hte Mungdan shaiga hpe na mayu ai kaga amyu ga shaga ai ni hte mung anhte hkrum chye na re. (Kasa 2:6-8) Shara nkau hta na htunghking ni hta, madat ai gaw ahkyak ai lam langai re. Ga shadawn, Hmong htung hta nga yang, shanhte a labau ni hpe ramma ni hpe bai tsun dan ra ai htung nga ai. Kaja wa mung shanhte na la ai hpe bai tsun dan ai hta grai byin ma ai. Africa htung law law hta mung, maumwi tsun ai zawn sharin ya ai hpe ra sharawng ma ai.
4. Hkaw tsun lawk hta nga ai masha ni hpe karum ya ai shaloi tinang hkum tinang gara ga san ni san mai na kun?
4 Na a lawk hta, nta madu a amyu ga hte nsen rim da ai lama ma hpe hpaw dan na nga yang akyu nga na kun? Audio nsen rim da ai ni hpe e-mail hte sa ya na nga yang akyu nga na kun? Dip shabra da ai laili laika ni hte arau audio nsen rim da ai ni hpe CD hta download galaw nna, myit lawm ai nta madu hpe jaw mai na kun? Hkaw tsun bungli hta electronic laika buk, brochure, magazine (sh) garan laika ni hpe jaw ngut shagu, hkaw tsun jahpan hta matsing mai ai. Audio nsen rim da ai ni gaw, tinang hkrai hkaja ai lamang hte Mungdan shiga nli hpe gat na matu yaw shada nna lajang da ai re.—1 Kor. 3:6.