Chyum Laika Hti Ai Shaloi Grau Akyu Lu Hkra Galaw U

1. Chyum Laika gaw Yesu a matu ahkyak ai hpe hpa gaw madun dan ai kun?

YESU sharin ya ai hpe madat ai gaw hpa lachyum re ai hpe shingran yu u. Yesu gaw, shi matsing da ai Chyoi Pra ai Chyum Laika hpe chyahkring hkring lakap nna tsun wa ai. Shi hkalup hkam ngut ai hpang, shawng nnan tsun ai ga ni hte shi garai n si shi yang hpang jahtum tsun wa ai ga ni hpe, Chyum Laika kaw na lakap wa ai.b (Trj 8:3; Shk 31:5; Luk 4:4; 23:46) Masum ning chyen laman dai mabyin lahkawng hta, Yesu gaw masha law law a man ayan na Chyum Laika hti dan ai, lakap nna sanglang dan ai.​—Mat 5:17, 18, 21, 22, 27, 28; Luk 4:16-20.

2. Yesu asak kaba wa ai hte maren, Chyum Laika hpe atsawm chye na hkra, hpa gaw karum ya ai kun? (Makawp sumla hpe yu u.)

² Yesu gaw, hkaw tsun magam garai n hpang shi ai shaning law law kaw nna, Karai a Mungga hpe chyahkring hkring hti ai, madat ai. Nta hta Mari yan Yosep shani shagu Chyum Laika hpe lakap nna tsun shaga ai lam ni hpe mung na wa na re.c (Trj 6:6, 7) Shi a nta masha ni hte Laban Nhtoi shagu tara jawng de sa na re. (Luk 4:16) Dai hta Chyum Laika hti dan ai hpe atsawm madat na re. Kalang mi hta, dai Chyoi Pra Ai Ka Da Ai Lam hpe shi nan hti wa ai. Akyu hku nna, Yesu gaw Chyum Laika hpe atsawm chye na ai sha n-ga, sharawng awng let shi a galaw hkawm sa lam hta shingkang ka-up na ahkang jaw wa ai. Ga shadawn, Yesu asak 12 ning hta nawku htingnu hta hpa byin wa ai hpe bai dum ai. Mawshe a Tara hpe atsawm chye da ai sara ni gaw, “[Yesu] htan ai ga a majaw mung, mau nga ma ai.”​—Luk 2:46, 47, 52.

3. Ndai sumhpa hta hpa lam bawngban na kun?

³ Anhte mung Chyum Laika hpe shani shagu hti yang Karai Mungga hpe tsawra wa na, chye na wa na re. Hti ai kaw na akyu grau lu hkra hpa galaw lu na? Jep ai Tara hpe chye ai laika ka ai sara ni, Hparishe ni hte Saduke ni hpe tsun ai Yesu a ga kaw na anhte sharin la mai ai. Dai nawku htung ningbaw ni gaw, ayan na Chyum Laika hti ai raitim, shanhte hti ai kaw na akyu n lu ma ai. Hpa majaw re ai hpe Yesu gaw lam 3 hte dan dawng hkra tsun wa ai. Shanhte hpe tsun ai ga ni gaw, (1) hti ai hpe chye na lu ai atsam rawt jat na matu, (2) wenyi sut gan ni hpe tam mu ai atsam rawt jat na matu, (3) Karai a Mungga shingkang ka-up na ahkang jaw na matu karum ya na re.

Chye Na Hkra Hti U

4. Luka 10:25-29 gaw Karai a Mungga hti ai hte seng nna, anhte hpe hpa sharin ya ai kun?

⁴ Karai a Mungga kaw na hti ai lam a lachyum hpe anhte chye na mayu ai. Raitim, anhte hti ai kaw na hpring tup akyu lu na gaw n re. Ga shadawn, “tara sara langai” hte Yesu ga shaga wa ai lam hpe yu yu ga. (Luka 10:25-29 hpe hti u.) Dai wa gaw hatani htana asak lu na matu hpa galaw ra na kun? ngu Yesu hpe san ai shaloi, Yesu gaw “Tara laika hta kaning nga ka da a ta? nang kaning nga hti n ta?” ngu nna shi hpe Karai a Mungga hte dingtawk tsun ai. Dai wa gaw, Karai Kasang hte htingbu ni hpe tsawra ra ai lam hte seng ai chyum daw ni lakap nna, jaw ai mahtai jaw lu ai. (Jaw 19:18; Trj 6:5) Raitim, “nye htingbu wa gaw kadai wa rai na a ta?” ngu shi bai tsun ai ga hpe sadi yu u. Dai wa gaw shi hti ai hpe atsawm n chye na ai lam madun nga ai. Shi a prat hta chyum daw ni hpe gara hku nna jaw hkra hkan sa ra na hpe n chye wa ai.

5. Akyu hpyi ai hte angwi ngwi hti ai gaw gara hku nna grau chye na hkra karum ya ai kun?

⁵ Kaja ai laika hti ai akyang nga hkra galaw yang, Karai a Mungga hpe grau chye na wa lu ai. Ndai gaw, nang hpe karum ya lu ai lam nkau mi re. N hti shi yang kyu hpyi u. Chyum Laika hpe chye na na matu Yehowa a karum shingtau ra ai. Dai majaw, myit maju jung lu hkra chyoi pra ai wenyi hpyi shawn mai ai. Angwi ngwi hti u. Dai gaw hti ai lam hpe chye na shangun ai. Nsen shapraw nna hti ai (sh) Chyum Laika nsen rim da ai hpe madat nna hkan yu ai mung akyu lu shangun ai. Laika hpe yu nna nsen rim da ai hpe madat ai rai yang, Chyum Laika kaw na hti ai lam hpe chye na hkra, matsing hkra, grau sharin la lu hkra karum ya lu ai. (Ysh 1:8) Hti ngut ai shaloi, Shi a Mungga hpe kumhpa jaw da ai majaw chyeju dum ai lam akyu bai hpyi nna tsun dan u. Hti ai lam hpe tatut hkan sa lu hkra karum ya na matu mung hpyi u. 

6. Laika hti ai shaloi, tinang hkum tinang ga san ni san nna, kadun dawk ka matsing ai gaw hpa majaw karum ya ai kun? (Sumla hpe mung yu u.)

⁶ Chyum Laika hpe grau chye na shangun ai lam lahkawng naw nga ai. Hti ai lam hte seng nna tinang hkum tinang ga san ni san u. Chyum Laika kaw na lam langai ngai hpe hti ai shaloi ndai hku san u: ‘Madung hku na kadai ni lawm ai kun? Kadai tsun nga ai kun? Kadai hpe tsun ai kun? Hpa majaw kun? Gara aten hte gara shara hta byin nga ai kun?’ Dai zawn ga san ni gaw, nang hti ai madung lam hte seng nna myit yu na matu, hkan sa na matu karum ya na re. Ngut nna, hti ai shaloi kadun dawk ka matsing u. Ka matsing ai gaw, hti ai lam hpe grau myit yu na matu, grau chye na na matu karum ya ai. Hti ai lam hpe matsing nga hkra mung karum ya ai. Ga san ni, sawk sagawn lu ai ni hpe ka jahkrat da mai ai, madung lam hpe kadun dawk matsing da mai ai, hti ai lam hpe gara hku hkan sa na hpe ka da mai ai, na a hkamsha lam ni hpe asan sha ka mai ai. Rai yang, Karai a Mungga gaw nang hpe jaw ai shiga zawn mu mada wa hkra karum ya lu ai.

7. Chyum Laika hti ai shaloi hpa atsam ningja ra ai kun? Hpa majaw kun? (Mahte 24:15)

⁷ Karai a Mungga kaw na hti ai lam hpe chye na hkra, ginhka chye ai atsam gaw grai ahkyak ai ngu Yesu tsun ai. (Mahte 24:15 hpe hti u.) Ginhka chye ai atsam ngu ai gaw hpa rai kun? Lam langai hte langai gara hku matut mahkai ai, gara hku shai ai, asan sha n tsun da ai lam ni hpe chye na lu ai atsam re. Myihtoi ga hpring tsup nga ai mabyin ni hpe asan sha chye na na matu, ginhka chye ai atsam ra ai ngu nna mung Yesu tsun ai. Anhte hta mung dai atsam ningja nga ra ai. Rai yang she, Chyum Laika hti ai shaloi akyu hpring tup lu na re.

8. Ginhka chye ai atsam hte gara hku hti mai ai kun?

⁸ Yehowa gaw shi a mayam ni hpe ginhka chye ai atsam jaw ai. Dai majaw, dai atsam hpe shalat lu na matu karum ya rit ngu akyu hpyi u. (Gsh 2:6) Akyu hpyi ga hte maren gara hku galaw lu ai kun? Hti ai lam hpe atsawm chye hkra galaw nna, dai lam gaw kaga lam hte gara hku matut mahkai ai hpe sadi yu u. Karum lam lu na matu, Yehowa Sakse Ni A Matu Hkaja Lam Matsun laika buk zawn re ai Chyum Laika hkaja ai hkingrai ni hpe akyu jashawn u. Dai hkingrai ni gaw chyum daw a lachyum hpe ginhka chye na matu, prat hta tatut hkan sa lu ai lam ni hpe chye wa na matu karum ya na re. (Heb 5:14) Ginhka chye ai atsam hte hti yang, Chyum Laika hpe chye na lu ai atsam rawt jat wa na re.

Wenyi Sut Gan Ni Hpe Tam Mu Hkra Hti U

9. Saduke ni gaw gara ahkyak ai Chyum Laika tengman lam hpe n hkap la ai kun?

⁹ Hebre Chyum Laika a shawng na laika buk 5 hpe Saduke ni atsawm hkau chyap ai raitim, dai hta lawm ai ahkyak ai tengman lam ni hpe gaw n hkap la ai. Ga shadawn, hkrung rawt ai lam hte seng nna Yesu hpe Saduke ni san ai shaloi, Yesu gara hku bai htang ai hpe myit yu ga. Yesu shanhte hpe ndai hku san ai: “Ngai gaw Abraham a Karai Kasang, Isak a Karai Kasang, Yaku a Karai Kasang rai nga nngai, nga ai ga hpe, nanhte Mawshe a laika hta n hti yu myit ni?” (Mrk 12:18, 26) Saduke ni gaw dai chyum daw hpe law law lang hti ga ai raitim, hkrung rawt ai hte seng ai ahkyak ai Chyum Laika tengman lam hpe shanhte n hkap la ai lam, Yesu a ga san gaw madun nga ai.​—Mrk 12:27; Luk 20:38.d

10. Laika hti ai shaloi hpa hpe myit maju jung ra ai kun?

¹⁰ Anhte hpa sharin la lu ai kun? Chyum Laika labau langai (sh) chyum daw langai hti ai shaloi, anhte hpe sharin ya lu ai lam yawng hpe myit maju jung ra ai. Madung sharin achyin lam ni hpe sha n-ga, sung htum ai tengman lam ni hte n dan dawng ai npawt tara ni hpe mung chye hkra galaw ra ai.

11. 2 Timohti 3:16, 17 hpe akyu jashawn nna Chyum Laika kaw na sut gan ni hpe gara hku tam mai ai kun?

¹¹ Chyum Laika hti ai shaloi wenyi sut gan ni gara hku tam mai ai kun? 2 Timohti 3:16, 17 hta tsun da ai hpe myit yu ga. (Hti u.) Dai hta “Chyum laika shagu gaw, . . . akyu rawng nga ai” ngu tsun da ai. Ndai lam ni hku nna re: (1) sharin shaga ya ai, (2) daru sharin chye ai, (3) mye shading lu ai, (4) sharin achyin ya ai. Chyahkring hkring n hti byin ai Chyum Laika a laika buk kaji ni kaw na pyi dai akyu 4 hpe lu mai ai. Labau langai hpe hti yang, Yehowa a lam, Shi a yaw shada lam, Shi a npawt tara ni hte seng nna hpa sharin ya ai lam hpe chye hkra galaw u. Dai gaw gara hku daru sharin chye ai hpe myit yu u. Chyum daw ni gaw, atsawm ginhka chye hkra karum ya na matu, shut shai ai myit jasat (sh) myit masa ni hpe chye nna nyet kau na matu, Yehowa hpe matut sadi dung na matu gara hku karum ya ai hpe sadi yu u. Hkaw tsun bungli hta langai ngai a shut ai ningmu hpe shading sharai ya na matu (sh) mye shading ya na matu chyum daw langai hpe gara hku akyu jashawn lu ai hpe myit yu u. Yehowa a ningmu nga hkra shaman la lu ai sharin achyin ya ai chyum daw ni hpe tam u. Akyu jaw ai dai lam 4 hpe myit hta bang da yang, Chyum Laika hti ai shaloi akyu grau lu hkra karum ya lu ai.

Hti Ai Lam Gaw Nang Hpe Shingkang Ka-up U Ga

12. “Nang kaning nga hti n ta?” ngu Hparishe ni hpe Yesu hpa majaw san ai kun?

¹² Chyum Laika hte seng nna shut ai ningmu nga ai Hparishe ni hpe Yesu ndai hku san wa ai: “Nang kaning nga hti n ta?” (Mat 12:1-7)e Ndai masa hta, Yesu a sape ni gaw Laban Nhtoi hpe n gawn nsawn galaw ai ngu Hparishe ni mara shagun ai. Hparishe ni gaw Laban Nhtoi hte seng ai tara hpe n chye na ai lam, tsawra myit n madun ai lam hpe madun dan na matu, Yesu gaw Hosea laika kaw na chyum daw langai hte Chyum Laika ga shadawn lahkawng hpe tsun dan wa ai. Karai a Mungga kaw na shanhte hti ai lam ni gaw, shanhte hpe hpa majaw shingkang n ka-up ai kun? Masha ni hpe mara shagun na matu gumrawng ai myit hte hti ai majaw re. Dai zawn myit jasat ni gaw, shanhte hti ai lam hpe n chye na hkra byin shangun ai.​—Mat 23:23; Yhn 5:39, 40.

13. Chyum Laika hpe gara myit jasat hte hti ging ai kun? Hpa majaw kun?

¹³ Chyum Laika hpe jaw ai myit jasat hte hti ra ai lam Yesu a ga ni kaw na chye lu ai. Hparishe ni hte n bung ai sha, shagrit shanem ai myit hte sharin la mayu ai myit nga ra ai. Anhte gaw “kraw lawang e hkai da ai mungga hpe, sumnung ai myit hte hkam la” ra ai. (Yak 1:21) Sumnung ai myit nga yang, anhte a myit masin hta Karai a Mungga ru jung na ahkang jaw na re. Mara tam ai myit, gumrawng ai myit hpe koi yang she, tsawra myit, matsan dum myit, myit tau ya chye ai lam hte seng ai Chyum Laika sharin achyin lam ni gaw anhte hpe shingkang ka-up wa na re.

14. Chyum Laika anhte hpe shingkang ka-up na ahkang jaw yang, hpa hpe chye lu na kun? (Sumla ni hpe mung yu u.)

¹⁴ Karai a Mungga anhte hpe shingkang ka-up na ahkang jaw yang, kaga ni hpe kanawn mazum ai lam hta dai lam dan dawng nga na re. Hparishe ni gaw Karai a Mungga shingkang ka-up na hpe n hkam ai majaw, ‘mara n kap ai ni hpe, mara shagun’ ai. (Mat 12:7) Dai hte maren, Karai a Mungga anhte hpe shingkang ka-up ai, n ka-up ai gaw, kaga ni hpe mu mada ai lam hte kanawn mazum ai lam hta dan dawng nga na re. Ga shadawn, kaga ni a kaja ai lam hpe ayan tsun chye ai kun? (sh) Shanhte a shut ai lam hpe alawan tsun chye ai kun? Matsan dum myit hte mara raw ya na matu jin jin rai nga ai kun? (sh) Mara tam nna masin pawt nga ai kun? Dai zawn tinang hkum tinang san jep ai gaw, anhte a galaw ai, hkamsha ai, myit ai lam ni hta anhte hti da ai lam ni shingkang ka-up ai, n ka-up ai hpe madun dan lu ai.​—1 Tm 4:12, 15; Heb 4:12.

Chyum Laika Hti Ai Gaw Ngwi Pyaw Lam Lu Shangun

15. Chyoi Pra ai Chyum Laika hte seng nna Yesu gara hku hkamsha ai kun?

¹⁵ Yesu gaw Chyoi Pra ai Chyum Laika hpe tsawra ai. Shi a hkamsha lam hpe Shakawn Kungdawn 40:8 hta ndai hku tau hkrau tsun da ai: “Nye a Karai Kasang e, na a myit hkan nang na ngai ra nga nngai; Nye a kraw lawang hta na a tara rawng nga ai.” Dai majaw, Yehowa a magam hta awng dang nna, ngwi pyaw ai akyu lu la ai. Anhte mung Karai a Mungga hpe myit masin de du hkra hti ai rai yang, ngwi pyaw nna awng dang ai lam lu na re.​—Shk 1:1-3.

16. Chyum Laika hti ai kaw na akyu grau lu hkra gara ladat ni hpe hkan sa mai ai kun? (“Yesu A Ga Ni Gaw Hti Ai Lam Hpe Chye Na Hkra Karum Ya Lu” ngu ai lawk hpe yu u.)

¹⁶ Yesu a ga ni, kasi ningli ni hte maren, Chyum Laika hti ai atsam rawt jat hkra galaw ga. Akyu hpyi ai, angwi ngwi hti ai, ga san ni san ai, kadun dawk ka matsing ai hku nna chyum daw ni hpe chye na ai atsam rawt jat lu ai. Chyum Laika hpe madung da ai laili laika ni a karum shingtau hte anhte hti ai lam hpe atsawm chye na lu hkra, ginhka lu ai atsam hpe akyu jashawn mai ai. Anhte n hkau chyap ai chyum daw ni rai yang pyi, dai hte seng ai labau ni a wenyi sut gan ni hpe tam ai hku nna Chyum Laika hpe grau akyu jashawn lu ai. Jaw ai myit jasat hte hti na matu shakut ai hku nna, Karai a Mungga anhte hpe shingkang ka-up na ahkang jaw lu ai. Dai lam ni hpe anhte tatut hkan galaw yang, Chyum Laika hti ai kaw na akyu grau lu na, Yehowa hte grau hku hkau wa na re.​—Shk 119:17, 18; Yak 4:8.