Alu Gumhpraw Ni Hpe Yehowa Sakse Ni Gara Hku Jai Lang Ai Kun?
Uhpung a nawku htung hte shinggyim masha shada myit tau ya ai magam bungli ni hta, alu gumhpraw ni hpe jai lang ai. Hkristu a sape tai wa hkra masha ni hpe karum ya ai hku nna, dai magam bungli ni hpe anhte galaw ai re.—Mahte 28:19, 20.
Marai langai ngai lusu na matu, alu gumhpraw ni hpe akyu n jashawn ai. Myitsu salang ni, magam tau ni hpe shata shabrai n jaw ai. Nta langai hpang langai hkaw tsun ai Yehowa Sakse ni mung shabrai n lu ai. Uphkang hpung shang ni hte hpawn, ginjaw garan rung hte mungkan ginjaw hta magam gun ai ni mung, shata shabrai n la ai sha magam gun nga ma ai.
Anhte Galaw Ai Lam Ni
Dip Shapraw Ai Lam: Shaning shagu wan hku law ai Chyum Laika ni, Hkristan laili laika ni hpe anhte ga gale, dip shapraw, sa ya ai lam ni galaw nna, shabrai n la ai sha shabra ya ai. jw.org website hte JW Library app hta nga ai dijite (digital) laili laika ni hpe mung, shabrai n la ai sha, ndau shana ai lam ni n bang ai sha shabra ya ai.
Gawgap Ai hte Gram Lajang Ai Lam: Mungkan ting hta nga ai nawku hpung ni arau zuphpawng na matu, Karai Kasang hpe shakawn na matu htap htuk ai nawku shara ni hpe, anhte gawgap ai, gram lajang ai. Ginjaw garan rung ni, ga gale rung ni hpe gawgap ai, gram lajang ai. Dai zawn bungli ni law malawng hpe, shawang lit gun ni hte galaw ai majaw, htum jarik hkyam sa ai.
Hparan Lajang Ai Lam: Mungkan ginjaw, ginjaw garan rung ni, ga gale rung ni, hpung kawan ni a magam bungli ni hpe, mungkan grup bungli a matu alu jaw da ai gumhpraw ni hte madi shadaw ai re.
Hkaw Tsun Ai Lam: Sakse hkam ni gaw kabu gara shiga hkaw tsun ai lam, “Karai Kasang a mungga” sharin ya ai a matu, gumhpraw hpyi ai lam n galaw ai. (2 Korinhtu 2:17) Raitim, tsaban langai na Hkristan ni galaw ai zawn sha, hkaw tsun bungli hta tinang a aten law malawng hpe sak jaw nga ai shaman da hkrum ai magam gun ni gaw, htap htuk ai nga shara hte shani shagu a ra kadawn lam ni hpe chyawm gaw lu la ma ai.—Hpilipi 4:16, 17; 1 Timohti 5:17-18
Sharin Achyin Ai Lam: Anhte a ninghtawn zuphpawng, zuphpawng kaba ni a matu htum ai jarik ni hpe, alu gumhpraw ni hte lang ai re. Dai hta n-ga, Chyum Laika hpe madung tawn ai video ni shapoi ai lamang ni hpe galaw ai. Lit ni hpe tang du hkra gun hpai lu na matu myitsu salang ni, aten hpring magam gun ni hpe shaman shakyang ya ai sharin jawng ni hpe galaw ai.
Hkye Mawai Ai Lam: Shingra tara tsin-yam, masha ni galaw ai majaw tsin-yam hkrum nga ai ni hpe malu masha, lu hka hte nga shara ni madi shadaw ya ai. Dai zawn, masha shada myit tau ai lam madun ai bungli ni hpe, “makam masham a dinghku na ni” sha n-ga, Yehowa Sakse n re ai ni mung akyu hkamsha lu nga ai.—Galati 6:10.