Daw Kăba 14

Yehowa Sakse Ni Găra Hku Ninghtan Shinggyin Ai Lam

Ya prat na Yehowa Sakse ni gaw, găra aten hta dè hpang wa ma ni? (1)

Yehowa Sakse ni a zup hpawng ni hpe, găra hku gălaw ma ni? (2)

Jai lang jărik ni hpe, găra hku hkam ma ni? (3)

Hpung lăngai hkrai hta ē, kădai ni woi awn ma ni? (4)

Grau kăba ai găra zup hpawng ni hpe shăning shăgu gălaw ma ni? (5)

Shanhtē a ginjaw dăju hte ginjaw lăkung ni hta hpa baw măgam bungli ni hpe gălaw shăjang ma ni? (6)

1. Ya prat na Yehowa a sakse ni gaw 1870 ning jan hta, dè hpang ma ai. Shawng nnan ē shanhtē hpe “Chyum laika Jawngma ni” ngu shămying ma ai. Raitim, 1931 ning hta, Yehowa Sakse ni ngu ai Chyum laika ­amying hpe, shanhtē hkam la ma ai. (Esaia 43:10) Ndai hpung gaw kăji ai npawt kaw nna, Sakse ni wan law law de, jat law htam wa măsai. Shanhtē gaw mungdan 230 jan hta, hkaw tsun ai măgam bungli hta amu gun nga ­măsai.

2. Yehowa Sakse ni a hpung law mălawng ni hta, bat shăgu zup hpawng măsum lang gălaw ma ai. Dai ni hta na zup hpawng lă­ngai ngai hpe lung lu na mătu, nang hpe saw shăga ga ai. (Hebre 10:​24, 25) Shărin achyin lam ni a npawt mădung gaw, Chyum laika rē. Zup hpawng ni hpe akyu hpyi ai hte hpaw pat ma ai. Zup hpawng law mălawng hta “Măhkawn măngoi” ni hpe, myit măsin ra shărawng awng let, măhkawn ma ai. (Ehpesu 5:​18, 19) Mănu jăhpu n jaw ai sha lung lu ai; alu mung n hta ai.​—⁠Mahte 10:⁠8.

3. Hpung ni law mălawng gaw, zup hpawng ni hpe Mungdan Rapdaw hta ē, gă­law ma ai. Dai rapdaw ni gaw tsaw ra shăwang myit hte amu gun ai Sakse ni htap htuk ai hku gap da ai ni rē ai. Mungdan Rapdaw hta, sumla ni, wudang ntsa jen da ai Hkristu a sumla ni hte dai ni hte bung ai arai ni hpe, nang mu lu na ndai n rai. Jai lang ai jărik ni hpe tsaw ra shăwang myit hte bang ai alu gumhpraw ni hte jaw ma ai. Alu bang lawm măyu ai ni a mătu, alu sădek tawn da ai.​—⁠2 Korinhtu 9:⁠7.

4. Hpung shăgu hta ē, ningbaw ningla ni, shing n rai, hpung up ni nga ma ai. Shanhtē gaw hpung kăta ē shărin achyin ya ai hta woi awn ma ai. (1 Timohti 3:​1-7; 5:17) Shanhtē hpe hpung tau ni kărum shingtau nga ma ai. (1 Timohti 3:​8-10, 12, 13) Ndai lasha ni gaw, hpung kaw na ngam ai ni yawng htē hta, grau shătsaw shăgrau ai ni n rē ai. (2 Korinhtu 1:24) Shanhtē hpe laksan arawng aya ­amying shingteng ni mung n jaw tawn ai. (Mahte 23:​8-10) Kăga ni hte laklai shai ai bu hpun pălawng ni hpe, shanhtē n bu n hpun ma ai. Shanhtē gunhpai ai bungli ni a mătu mung, shăbrai n lu ma ai. Ningbaw ningla ni gaw, hpung a wenyi lam hta ra kădawn nga ai lam ni hpe, myit măsin mahkra hte yu lăjang ya ma ai. Jam jau hkrum ai aten hta ē, shanhtē myit shălan shăbran ya nna, lam mădun ya ma ai.​—⁠Yaku 5:​14-​16; 1 Petru 5:​2, 3.

5. Yehowa Sakse ni gaw grau kăba ai ginwang zup hpawng ni, shing n rai, mungdaw zup hpawng kăba ni hpe mung, shă­ning shăgu gălaw ma ai. Ndai aten lădaw hta ē, law la ai buga hpung ni gaw, laksan Chyum laika mătsun shărin na, lămang ­jăhpan a mătu, zup hpawng de du sa ma ai. Ginwang zup hpawng, shing n rai, mungdaw zup hpawng kăba lămang jăhpan shăgu ni hta ē, săpe nnan ni hpe hka lup jaw ai lam gaw, tut nawng gălaw nga ai lămang jăhpan lăngai rē.​—⁠Mahte 3:​13-17; 28:​19, 20.

6. Yehowa Sakse ni a mungkan ting na ginjaw dăju gaw, New York măre kaw rē ai. Dai shăra ē, mungkan ting na hpung shăgu ni hpe, woi awn ningbaw na măhkrum mădup măchyē măchyang kung ai ningbaw ningla ni lawm ai up hkang hpung nga nga ai. Mungkan ting hta ē, ginjaw la­kung 100 jan mung nga ai. Ndai shăra ni hta ē, mădu a shăwang myit hte amu gun ai ni gaw, Chyum laika hte laili laika ni hpe htang dip nna shăpraw na mătu, kărum shingtau nga ma ai. Hkaw tsun ai amu bungli hpe, hpă­ran lăjang ning­htan shinggyin na mătu mung, lam mătsun jaw ya ma ai. Nang hte ni htum ai ginjaw lă­kung a rung lăngai de sa hkawm chyai na mătu lăjang yang n mai na kun?