RAMMA NI A GA SAN
Kahpu Kanau Shada Hpa Majaw Simsa Hkra Galaw Ra Ai Kun?
“N kaja dik htum manang ni”
Kahpu kanau (sh) kanau kana ni hpe “n kaja dik htum manang ni” ngu nna tsun chye ai. Shanhte mung nang hpe tsawra ai, nang mung shanhte hpe tsawra ai. Raitim, kalang lang dai zawn n myit la wa ai. Asak 18 ning ramma Helena ndai hku tsun ai: “Hpungdim wa gaw ngai hpe myit ru hkra chyu galaw ai. Shi gara hku tsun dat yang, gara hku galaw dat yang ngai pawt na ai hpe atsawm chye ai!”
Kanau kana (sh) kahpu kanau shada byin ai manghkang nkau hpe, simsa ai hku tsun ai, bawngban ai hku nna hparan mai ai. Ga shadawn:
Hpunau 2 gawk langai hta jawm nga ai shaloi myit n hkrum ai aten ni nga na re. Gara hku hparan na? Shada da jahkrum da ra ai. Asum jaw chye ai myit nga ra ai. Luka 6:31 hta lawm ai Chyum Laika npawt tara hpe hkan sa mai ai.
Kanau kana ni gaw ahkang n hpyi ai sha, hpun palawng hpe la hpun ai. Gara hku hparan na? Shada da bawngban nna, hkan sa ra na lam ni masat da u. 2 Timohti 2:24 hta lawm ai Chyum Laika npawt tara hpe hkan sa mai ai.
Masa nkau hta gaw, kahpu kanau (sh) kanau kana ni a lapran byin ai manghkang grai kaba wa nna, grai hkra machyi shangun ai aten ni nga chye ai. Chyum Laika hta lawm ai kasi ningli lahkawng hpe maram yu ga:
Mawshe a kana Miriam hte kahpu Arun gaw, Mawshe hpe manawn ai shaloi, hkra machyi lam nga wa ai. Bu Hkawm 12:1-15 hta lawm ai mabyin hpe hti yu u. Dai hpang, tinang hkum tinang ndai hku san yu u: ‘Kahpu kanau shada manawn ai myit n nga hkra gara hku galaw lu na kun?’
Ka-in gaw kanau Abela hpe grai masin pawt nna sat kau ai. Ningpawt 4:1-12 hta lawm ai mabyin hpe myit yu u. Dai hpang, tinang hkum tinang ndai hku san yu u: ‘Kanau kana ni hte kanawn mazum ai shaloi masin pawt ai myit hpe gara hku hkang lu na kun?’
Simsa Hkra Galaw Ra Ai Lam Lahkawng
Kahpu kanau (sh) kanau kana ni hte simsa na matu yak ai raitim, shada da simsa hkra shakut nna galaw ra ai lam, yawm htum lam 2 nga ai.
Kunghpan sai lam madun ai. Elet ngu ai ramma langai ndai hku tsun ai: “Nye kanau yan hpe ngai grai pyawt ai. Ya chyawm gaw, shan hpe myit galu ai lam, simsa ai lam lu madun sai. Dai majaw ngai kunghpan wa sai ngu lu tsun sai.”
Chyum Laika hta ndai hku tsun ai: “Myit galu ai wa gaw, hpaji kaba rawng nga ai; Myit gadun ai wa chyawm gaw, grai angawk nga ai.”—Ga Shagawp 14:29.
Htawm hpang a matu shaman shakyang ya ai. Kahpu kanau, kanau kana ni a n hkum tsup ai lam ni hpe pyi nang myit n galu ai rai jang, na a ningrum ningtau, bungli manang, bungli madu (sh) kaga langai ngai hte nang gara hku kanawn mazum sana?
Chye da ging ai lam: Htawm hpang de kaga masha ni hte hku hkau chye hkra, na a tsun shaga ai atsam hte bawng jahkrup chye ai atsam gaw karum ya na re. Dai zawn atsam ningja ni nga wa hkra galaw na matu, kaja htum shara gaw tinang a nta hta re.
Chyum Laika hta ndai hku tsun ai: “Nanhte rai lu myit dai daram, masha nlang hte hte myit hkrum nna hkau chyap nga mu.”—Roma 12:18.
Kahpu kanau, kanau kana ni a lapran byin ai manghkang ni a matu karum shingtau lam ra ai kun? “Ramma shada tsun ai lam” ngu ai sumhpa hpe hti u. Dai hte matut manoi nga ai “မောင်နှမတွေနဲ့ အဆင်ပြေအောင် ဘာလုပ်ရမလဲ” ngu ai chyarang hpe mung yu u.