Na A Dinghku Ngwi Pyaw Lu

1, 2. Yehowa gaw dinghku ni hpe hpa byin shangun mayu ai kun?

YEHOWA KARAI KASANG gaw dinghku hpe n nan de ya ai madu re. Yehowa gaw numsha hpe hpan nna, “dai masha wa kaw woi wa” ai nga nna Chyum Laika hta tsun da ai. “Ya, masha ndai gaw, nye a nra hta na nra, nye a ashan hta na ashan rai nga ai” ngu Adam grai kabu let tsun ai. (Ningpawt 2:22, 23) Yehowa gaw dinghku hpe ngwi pyaw shangun mayu ai.

² Masha law law gaw ngwi pyaw ai dinghku n lu ma ai. Raitim, Chyum Laika matsun ni gaw, ngwi pyaw ai dinghku byin lu hkra nta masha ni hpe karum ya lu ai.—Luka 11:28.

MADU WA NI KAW NNA KARAI KASANG MYIT MADA AI LAM

3, 4. (a) Madu wa gaw madu jan hpe gara hku lanu lahku ra ai kun? (b) Madu jan hte madu wa hpa majaw shada da mara raw ya na matu ahkyak ai kun?

³ Chyum Laika hta kaja ai madu wa gaw, madu jan hpe tsawra myit hte kanawn mazum ra ai ngu tsun da ai. Chyeju hte Ehpesu 5:25-29 hpe hti u. Madu wa gaw madu jan hpe prat tup tsawra let lanu lahku ra ai. Shi gaw madu jan hpe makawp maga, lanu lahku nna, shi hpe hkra machyi hkra galaw na n re.

⁴ Raitim, madu jan shut ai lam nga yang madu wa hpa galaw ra a ta? “La ni e, madu jan ni hpe tsaw ra nga nna, shanhte hpe kajet kaje hkum rai nga myit” nga nna tsun da ai. (Kolose 3:19) Madu wa ni, nanhte mung shut chye ai hpe dum ra ai. Karai Kasang kaw nna mara raw hkrum mayu yang, madu jan a mara hpe mung raw ya ra ai. (Mahte 6:12, 14, 15) Madu jan hte madu wa yan gaw, sharawng awng let shada da mara raw ya yang dinghku ngwi pyaw lu na re.

5. Madu wa gaw madu jan hpe hpa majaw shagrau ra ai kun?

⁵ Madu wa gaw madu jan hpe shagrau na matu Yehowa myit mada ai. Madu wa gaw madu jan ra rawng ai ni hpe atsawm myit ya ra ai. Dai gaw grai ahkyak ai lam re. Madu wa gaw madu jan hpe lanu lahku ai lam n nga yang, shi a akyu hpyi ga ni hpe Yehowa madat ya na n re. (1 Petru 3:7) Yehowa gaw la ni hpe num ni hta grau manu shadan ai lam n nga ai. Shi hpe tsawra ai ni yawng hpe manu shadan ai.

6. “Hkumshan langai sha rai nga ma ai” ngu ai gaw dinghku num la ni a matu hpa lachyum rai kun?

⁶ Madu jan hte madu wa gaw “lahkawng rai nga ma ai n rai, hkumshan langai sha rai nga ma ai” nga nna Yesu tsun ai. (Mahte 19:6) Shan gaw shada da galoi mung sadi dung ra ai. (Ga Shagawp 5:15-21; Hebre 13:4) Madu jan, madu wa gaw tinang akyu a matu sha n rai, hkum shan lam hta shada da kanawn mazum ra ai. (1 Korinhtu 7:3-5) “Kadai rai ti mung tinang hkum hpe ndawng n yawt ai gaw n nga ai hta n-ga, dai hkum hpe bau maka nna lanu lahku ya wu ai” hpe madu wa dum ra ai. Dai majaw, shi gaw madu jan hpe tsawra nna lanu lahku ging ai. Madu jan gaw kaga lam ni hta na, madu wa a tsawra matsan dum ai hpe ra sharawng ai.—Ehpesu 5:29.

MADU JAN NI KAW NNA KARAI KASANG MYIT MADA AI LAM

7. Dinghku langai hta dinghku madu hpa majaw ra ai kun?

⁷ Dinghku shagu hta nta masha ni myit hkrum let rau nga lu hkra, dinghku hpe atsawm woi awn ya ai dinghku madu nga ra ai. “Lasha nlang hte a baw gaw, Hkristu rai nga ai, numsha a baw gaw lasha rai nga ai, Hkristu a baw chyawm gaw, Karai Kasang rai nga ai” nga nna 1 Korinhtu 11:3 hta tsun da ai.

8. Madu jan gaw madu wa hpe hkungga ai lam gara hku madun na kun?

⁸ Madu wa ni mung shut chye ai. Raitim, madu wa a dawdan ai lam ni hpe madu jan gaw sharawng awng let madi shadaw ya nna karum ya na nga yang, dinghku a matu akyu nga ai. (1 Petru 3:1-6) “Madu jan mung tinang a madu wa hpe hkrit hkungga nga u” nga nna Chyum Laika hta tsun da ai. (Ehpesu 5:33) Madu wa gaw madu jan hte makam masham n bung yang gara hku kun? Makam masham n bung tim, madu wa hpe hkungga ra ai. “Numsha ni e, tinang a madu wa a hkang ai hku hkan nga mu: shanhte hta na langai ngai dai mungga hpe n madat ma ti mung, nanhte hkrit kamyin ai myit hte hkan nga ai chyoi pra ai arawn alai mada mu ma yang gaw, ga nlawm ti mung, madu jan a arawn alai majaw, shanhte hpe lau lu na” nga nna Chyum Laika hta tsun da ai. (1 Petru 3:1, 2) Madu jan a kaja ai lailen gaw, shi a makam masham hpe madu wa chye na na hte hkungga na matu karum ya lu ai.

9. (a) Madu jan gaw madu wa hte myit n hkrum wa yang hpa galaw mai ai kun? (b) Titu 2:4, 5 hta madu jan ni hpe gara hku hpaji jaw da ai kun?

⁹ Madu jan gaw madu wa hte myit n hkrum ai lam ni nga ai shaloi, hpa galaw mai ai kun? Shi mu mada ai ni hpe hkungga let tsun ra ai. Ga shadawn, Sara tsun ai hpe Abraham myit n hkrum ai shaloi, Yehowa gaw shi “tsun matsun madat u” ngu tsun ai. (Ningpawt 21:9-12) Hkristan madu wa dawdan ai gaw Chyum Laika hte nhtan shai ai lam n nga yang, madu jan gaw myit hkrum ya ra ai. (Kasa 5:29; Ehpesu 5:24) Kaja ai madu jan gaw dinghku hpe atsawm gawn lajang ai. (Titu 2:4, 5 hpe hti u.) Madu wa hte ma ni a matu, shi bungli shakut yang, shi hpe nta masha ni gaw grau tsawra nna grau hkungga wa na re.—Ga Shagawp 31:10, 28.

10. Garan nga ai hte hka ai lam hpe Chyum Laika hpa tsun ai kun?

¹⁰ Kalang lang madu jan madu wa ni gaw, garan nga na (sh) hka na matu alawan dawdan ma ai. Raitim, Chyum Laika hta “madu jan gaw madu wa hte n hka u ga,” “madu wa mung, madu jan hpe n kau u ga” nga nna tsun da ai. (1 Korinhtu 7:10, 11) Madu jan hte madu wa a lapran, masa grai sawng wa yang garan nga mai ai raitim, dai gaw grai ahkyak ai dawdan lam re. Dinghku hka ai hte seng nna gaw gara hku kun? Chyum Laika hta madu jan (sh) madu wa gaw, numshaw lashaw ai rai yang she hka mai ai lam tsun da ai.—Mahte 19:9.

KANU KAWA NI KAW NNA KARAI KASANG MYIT MADA AI LAM

11. Ma ni gaw hpa hpe grau ra ai kun?

¹¹ Kanu kawa ni, nanhte a ma ni hpe aten law law jaw lu ai daram jaw u. Hpa majaw nga yang, ma ni gaw nanhte hpe kaga ni hta grau ra ai majaw re. Shanhte hpe aten jaw nna, Yehowa a lam sharin ya ra ai.—Tara Jahprang 6:4-9.

12. Kanu kawa ni nanhte a ma ni hpe hpa majaw makawp maga ra ai kun?

¹² Satan a mungkan gaw lani hte lani grau grau sawng wa ai. Masha nkau mi gaw ma ni hpe shoihpa jaw mayu nna, hkum shan roi rip ai zawn pyi galaw ma ai. Dai lam ni hpe ma ni chye hkra sharin na matu, kanu kawa ni gaw htingnut nga ai. Raitim, dai zawn galaw chye ai ni a lam, ma ni hpe sharin ya ra nna shanhte hpe gara hku koi ra na hpe mung tsun dan ra ai. Kanu kawa ni gaw ma ni hpe makawp maga ra ai.a—1 Petru 5:8.

13. Kanu kawa ni gaw ma ni hpe gara hku sharin ra ai kun?

¹³ Ma ni akyang lailen kaja hkra sharin ya na matu, kanu kawa ni hta lit nga ai. Na a ma ni hpe gara hku sharin ya na kun? Ma ni hpe sharin ya ra ai raitim, sharin shaga ai shaloi laja lana n mai galaw ai. (Yeremia 30:11) Dai majaw, nang pawt nga ai shaloi ma ni hpe n mai sharin shaga ai. Shanhte hpe machyi shangun ai “nhtu hte galun ai zawn” re ai ga ni hpe nang tsun mayu na n re. (Ga Shagawp 12:18) Hpa majaw ga madat ra ai hpe ma ni chye na hkra sharin ya u.—Ehpesu 6:4; Hebre 12:9-11; Jahtum Matsing 29 hpe yu u.

MA NI KAW NNA KARAI KASANG MYIT MADA AI LAM

14, 15. Ma ni nanhte a kanu kawa ni a ga hpe hpa majaw madat ra ai kun?

¹⁴ Yesu gaw shi Kawa Yehowa a ga galoi mung madat ai. Madat na matu grai yak ai aten hta pyi madat wa ai. (Luka 22:42; Yawhan 8:28, 29) Yehowa mung ma ni kanu kawa a ga madat na hpe myit mada ai.—Ehpesu 6:1-3.

¹⁵ Ma ni e, kanu kawa ni a ga madat na yak ai aten ni nga wa tim, nanhte madat mara yang, na a majaw Yehowa hte nu yan wa gaw grai arawng la nga na hpe dum u.b—Ga Shagawp 1:8; 6:20; 23:22-25.

16. (a) Satan gaw n kaja ai hpe galaw na matu ramma ni hpe gara hku hkalem ai kun? (b) Yehowa hpe tsawra ai ni hte manang galaw na matu hpa majaw ahkyak ai kun?

¹⁶ Satan gaw, na a manang ni hte kaga ramma ni hku nna nang shut ai hpe galaw na matu shakut nga ai. Ndai dip n-gun hpe ninghkap na grai yak ai lam Satan chye ai. Ga shadawn, Yaku a kasha Dina gaw, Yehowa hpe n tsawra ai ni hte manang galaw wa ai. Dai majaw, shi hte nta masha ni gaw manghkang ni hkrum wa ai. (Ningpawt 34:1, 2) Yehowa hpe n tsawra ai ni hte manang galaw yang, shanhte gaw Yehowa n ra ai hpe nang galaw na matu hkalem na re. Dai rai yang, nang hte na a nta masha ni sha n-ga Karai Kasang hpe mung myit n pyaw shangun na re. (Ga Shagawp 17:21, 25) Dai majaw, Yehowa hpe tsawra ai ni hte sha, manang galaw na matu grai ahkyak ai.—1 Korinhtu 15:33.

NA A DINGHKU NGWI PYAW LU

17. Nta masha langai hpra gaw hpa galaw na lit nga ai kun?

¹⁷ Nta masha ni yawng gaw, Yehowa a matsun ga ni hpe hkan sa na nga yang, dinghku hta byin wa ai manghkang ni hpe atsawm hparan lu na re. Madu wa rai yang, madu jan hpe tsawra myit hte lanu lahku ra ai. Madu jan rai yang, madu wa hpe shagrit shanem let hkungga ra ai. Ga Shagawp 31:10-31 hta lawm ai dinghku num a kasi hpe hkan sa ra ai. Kanu kawa rai yang, Karai Kasang hpe tsawra wa hkra ma ni hpe sharin ya ra ai. (Ga Shagawp 22:6) Kawa rai yang, “atsawm sha uphkang” let lam madun ra ai. (1 Timohti 3:4, 5; 5:8) Ma ni mung kanu kawa a ga madat ra ai. (Kolose 3:20) Nta masha yawng gaw shut chye ai hpe dum nna, shagrit shanem let shada da mara raw ya ra ai. Chyum Laika hta nta masha langai hpra a matu Yehowa a matsun maroi ga ni lawm ai majaw, dai ni hpe hkan sa na nga yang ngwi pyaw simsa ai dinghku byin wa na re.