Makam Masham Chyam Dinglik Hkrum Ai Lam

Yehowa hpe tsawra na matu hte shi a ga sadi yawng hpe kam na matu, Abraham gaw kasha Isak hpe sharin ya wa ai. Raitim, Isak 25 ning daram hta, Yehowa gaw Abraham hpe grai yak ai lam galaw na matu tsun wa ai. Dai lam gaw hpa rai kun?

Karai Kasang gaw Abraham hpe ndai hku tsun ai: ‘Chyeju hte na a kasha shingtai hpe shaga sa nna Moria ga hta na bum langai hta shi hpe hkungga hku nna nawng u.’ Yehowa shi hpe hpa majaw dai hku galaw shangun ai hpe shi n chye ai. Raitim, Yehowa a ga hpe matut nna madat mara ai.

Hpang jahpawt jau jau, Abraham gaw Isak hte mayam lahkawng hpe shaga nna Moria de sa wa ai. Masum ya na ai hpang, shanhte gaw bum ni hpe tsan tsan kaw nna mu lu ai. Abraham gaw shi hte shi a kasha hkungga nawng na matu sa ai aten hta la nga na matu shi a mayam ni hpe tsun ai. Abraham gaw Isak hpe hpun ni gun shangun nna shi gaw nhtu gun ai. Isak gaw shi kawa hpe ndai hku san ai: ‘Anhte hkungga nawng na matu dusat gara kaw rai ta?’ Abraham ndai hku mahtai jaw ai: ‘Wa kasha, Yehowa lajang ya na re.’

Bum de du ai shaloi, shanhte tawn hkungri galaw ai. Dai hpang, Abraham gaw Isak a lagaw, lata ni hpe gyit nna tawn hkungri ntsa mara ai.

Abraham gaw nhtu hpe la dat ai. Dai shaloi, Yehowa a lamu kasa gaw sumsing lamu kaw nna ndai hku shaga wa ai: ‘Abraham! Lasha hpe hkum hkra! Na a kasha hpe sharawng awng let hkungga nawng mayu ai majaw, nang Karai Kasang hpe kam sham ai lam ya ngai chye sai.’ Dai hpang sagu la langai a nrung gaw, sumwum hta dang taw ai hpe Abraham mu dat ai. Shi gaw Isak hpe alawan sumri raw ya nna, sagu la hpe Isak a malai hkungga nawng kau ai.

Dai shani kaw nna, Yehowa gaw Abraham hpe shi a jinghku nga nna shaga ai. Hpa majaw dai hku shaga ai hpe chye ai kun? Yehowa hpa majaw dai hku galaw shangun ai hpe shi n chye tim, Yehowa galaw shangun mayu ai hpa hpe mung, Abraham galaw wa ai.

Yehowa gaw shi a ga sadi hte seng nna Abraham hpe ndai hku bai kahtap tsun ai: ‘Ngai nang hpe shaman chyeju jaw na, na a kashu kasha ni hpe shalaw jahtam ya na.’ Dai gaw, Abraham a kashu kasha langai kaw nna, masha kaja yawng gaw Yehowa a shaman chyeju lu la na ngu ai lachyum re.