Yehowa Hpe Ga Sadi Jaw

Egutu mung kaw nna pru wa ai shata lahkawng daram na ai hpang, Israela ni gaw Sina Bum de du wa nna dai shara kaw dap jung nga ma ai. Mawshe gaw Yehowa shaga ai majaw bum ntsa de lung wa ai. Yehowa shi hpe ndai hku tsun ai: ‘Israela ni hpe ngai hkye la wa sai. Shanhte ngai hpe madat mara nna, nye a tara ni hpe hkan sa na nga yang, shanhte gaw nye a laksan amyu byin wa na re.’ Mawshe gaw bum lagaw de yu wa ai hpang, Yehowa tsun ai hte maren Israela ni hpe tsun dan ai. Shanhte gara hku bai htang ai kun? ‘Yehowa anhte hpe galaw shagun ai lam mahkra hpe hkan galaw na’ nga nna shanhte tsun ma ai.

Mawshe gaw bum ntsa de kalang bai lung ai. Yehowa gaw: ‘Masum ya na yang, ngai nang hpe ga shaga na. Israela ni hpe Sina Bum ntsa de lung na matu hkum shakut, nga nna sadi jaw u’ ngu tsun ai. Mawshe gaw bum ntsa kaw nna yu wa ai hpang, Yehowa tsun ai hpe madat na matu jin jin rai nga u, nga nna Israela ni hpe tsun ai.

Masum ya na ai hpang, Israela ni gaw myihprap gala ai hte sin mak ai sumwi ni bum ntsa ka-up taw ai hpe mu ai. Nachying ngoi ai mu ngoi nsen ni hte pahtau nsen ni hpe mung na ai. Yehowa gaw wan galup ai hte bum de yu wa ai. Israela ni gaw grai hkrit gari nga ma ai. Bum ting grai ashun wa nna wan hkut ni ka-up mat ai. Pahtau nsen mung grau grau ngoi wa ai. Shaloi Karai Kasang gaw: ‘Ngai gaw Yehowa rai nga nngai. Ngai hta kaga Karai shaje hpe hkum naw hkum ku’ nga nna tsun ai.

Mawshe gaw bum ntsa de bai lung ai. Yehowa gaw Israela ni a matu shi hpe gara hku nawku dawjau ra ai, gara hku asak hkrung hkawm sa ra ai hte seng ai tara ni Mawshe hpe jaw ai. Mawshe gaw dai tara ni hpe ka matsing nna Israela ni hpe hti dan ai. Shanhte gaw: ‘Yehowa tsun ai mahkra hpe hkan galaw na’ nga nna ga sadi jaw ai. Shanhte gaw Karai Kasang hpe ga sadi jaw wa ai. Raitim, shanhte ga sadi dung wa ai kun?