Ĩvuku ya Kelĩ ya Asumbĩ

10 Yu ĩndĩ, Aavu aĩ na ana 70 ku Samalia. Na kwoou Yeu aandĩka valũa na ainengane itwawe Samalia kũla kwĩ anene me mbee ũsumbĩnĩ ma Yesileeli, atumĩa, na asũvĩi ma syana sya Aavu,* na asya atĩĩ: 2 “Yĩla valũa ũũ ũũmũvikĩa, mwĩĩthĩwa mwĩ na ana ma vwana wenyu, o vamwe na makasya ma kaũ, mbalasi, ndũa mbiĩĩe, na mĩio ya kaũ. 3 Kwoou, nyuvai ũla mũseo vyũ na mwaĩlu* vyũ katĩ wa ana ma mwĩai wenyu na mũimwĩkalya kĩvĩlanĩ kya ũsumbĩ kya ĩthe wake. Ĩtina wa ũu, ũkitĩai nyũmba ya mwĩai wenyu.”

4 Ĩndĩ malikwa nĩ wia mwingĩ na masya: “Sisya! Ethĩwa asumbĩ elĩ maineetonya kũũngama mbee wake, ithyĩ tũtonya ata kũũngama mbee wake?” 5 Na kwoou mũsyaĩĩsya wa nyũmba ya mũsumbĩ,* ngavana wa ndũa, atumĩa, na ala asũvĩi matũmana vala ve Yeu, maimwĩa: “Ithyĩ twĩ athũkũmi maku, na nĩtũkwĩka kyonthe kĩla ũũtũtavya. Vai mũndũ twĩtwʼĩkĩthya mũsumbĩ. We ĩka kĩla ũkwona kĩ kĩseo methonĩ maku.”

6 Na ĩndĩ amaandĩkĩa valũa wa kelĩ, ayasya: “Ethĩwa mwĩ ngalĩ ĩ yakwa na nĩmwĩyũmbanĩtye kũmbĩwʼa, ndeteei mĩtwe ya ana ma vwana wenyu na mũyũka vala nĩĩ Yesileeli ũnĩ saa ta ii.”

Yu ĩndĩ, ala ana 70 ma mũsumbĩ maĩ vamwe na aũme manengetwe ndaĩa ma ndũa ĩsu ala mamaeaa. 7 Na yĩla makwatie valũa isu oou, nĩmoosie ana ma mũsumbĩ na mamoaa, aũme 70, na meekĩa mĩtwe yoo ikavũnĩ na mainengane itwaĩwe Yeu ku Yesileeli. 8 Na ũla watũmĩtwe alika vala ve Yeu na amwĩa: “Nĩmaete mĩtwe ya ana ma mũsumbĩ.” Na kwoou asya: “Ũmbai mĩtwe ĩsu mbumbu ilĩ mũvĩanĩ wa ndũa na nĩyĩkale vau nginya kwakya.” 9 Na yĩla waumaalile kwakya, aũngama mbee wa andũ onthe na amea: “Inywʼĩ mũi na ĩvĩtyo.* Nĩ wʼo, nyie nĩnĩnavangĩthisye mũvango wa kũmina mwĩai wakwa na namũaa, ĩndĩ ũla ũaie aa onthe nũũ? 10 Manyai ĩndĩ kana vai ndeto o na ĩmwe ya Yeova ĩla Yeova waneenie ĩũlũ wa nyũmba ya Aavu ĩkalea kwĩanĩa,* na Yeova nĩwĩkĩte kĩla waneenie kwĩsĩla mũthũkũmi wake Eliya.” 11 Eka ũu, Yeu nĩwooaie andũ onthe ala matialĩte ma nyũmba ya Aavu ku Yesileeli, o vamwe na aũme make onthe me ndaĩa, anyanyae, na athembi make, na vai ũmwe woo waamũtia e thayũ.

12 Na kwoou ookĩla na akwata nzĩa athi Samalia. Na nzĩanĩ vaĩ nyũmba ĩla aĩthi matũmĩaa kwova malondu.* 13 Vau nĩ vo Yeu wakomanĩie na ana-a-ĩthe ma Mũsumbĩ Aasia wa Yuta, na amakũlya, “Ninywʼĩ aaũ?” Namo mamwĩa: “Ithyĩ twĩ ana-a-ĩthe ma Aasia, na tũtheeete tũkasisye ethĩwa ana ma mũsumbĩ na ana ma inyia wa mũsumbĩ nĩ aima.” 14 Na vau kwa vau asya: “Makwatei me thayũ!” Na mamakwata me thayũ na mamoaĩa kĩthimanĩ kya ĩla nyũmba aĩthi matũmĩaa kwova malondu, onthe me aũme 42. Vai ũmwe woo waamũtia e thayũ.

15 Na aumĩte vau akomana na Yeonatavu mwana wa Lekavu, ũla wookĩte kũkomana nake. Na yĩla wamũkethisye,* amwĩa: “Yo ngoo yaku nĩlũmanĩtye nakwa,* o tondũ ngoo yakwa ĩlũmanĩtye na ngoo yaku?”

Na Yeonatavu amũsũngĩa amwĩa: “Ĩĩ.”

Nake Yeu amwĩa: “Ethĩwa ũu nĩwʼo vailye, nenge kwʼoko kwaku.”

Na kwoou amũnenga kw’oko kwake, na Yeu amũkĩlya amũlikya ĩkasyanĩ vala waĩ. 16 Na ĩndĩ asya: “Ũka tũthi, na nũkwona ũndũ ndatonya kũmĩĩsya kwona andũ maisindana na* Yeova.” Na kwoou maendanyʼa nake e ĩkasyanĩ ya Yeu ya kaũ. 17 Na ĩndĩ avika Samalia, na akũna andũ onthe ala matialĩte ma nyũmba ya Aavu ku Samalia nginya amamina, kwosana na ndeto ĩla Yeova watavĩtye Eliya.

18 O na ĩngĩ, Yeu nĩwoombanisye andũ onthe na amea atĩĩ: “Aavu athaithaa Mbaali o vanini, ĩndĩ Yeu emũthaitha o na mbeange. 19 Kwoou mbũmbanĩsyei athani onthe ma Mbaali, athaithi make onthe, na athembi make onthe. Mũikatie mũndũ o na ũmwe, nĩkwĩthĩwa nĩenda kũthembea Mbaali nthembo nene. Ũla ũteũka, nũkũawa.” Ĩndĩ Yeu eekie ũu na ũseleke nĩ kana amine athaithi ma Mbaali.

20 Na Yeu aendeea kwasya: “Tangaasai* ũmbano wa mwanya kwondũ wa Mbaali.” Na kwoou matangaasa ũndũ ũsu. 21 Ĩtina wa ũu, Yeu nĩwatũmanie kĩla vandũ Isilaeli, na athaithi onthe ma Mbaali mooka. Vai o na ũmwe woo ũtaaũka. Nĩmalikile nyũmbanĩ* ya Mbaali, na nyũmba ya Mbaali yausũa ki kuma ngalĩko ĩmwe nginya ĩla ĩngĩ. 22 Na kwoou eea ũla waũngamĩe vala vaiawa ngũa atĩĩ: “Umaalĩlya athaithi onthe ma Mbaali ngũa.” Na kwoou amaumaalĩlya ngũa. 23 Nĩvo ĩndĩ Yeu na Yeonatavu mwana wa Lekavu malikile nyũmbanĩ ya Mbaali. Na Yeu eea athaithi ma Mbaali atĩĩ: “Sisyai nesa mũĩkĩĩthye kana vaa vai athaithi ma Yeova, no athaithi ma Mbaali me oka.” 24 Mũthya, nĩmalikile mathembe nthembo sya kũvĩvwʼa na nthembo ingĩ. Na Yeu aũngamya nza aũme 80 katĩ wa aũme make, na asya: “Mũndũũme o na wĩva ũla ngũnengane mokonĩ menyu avonoka, ũla wamũlekya ekwʼa vandũ vake.”*

25 Na Yeu amina kũthemba nthembo ya kũvĩvw’a oou, eea asungi* na makavuteni atĩĩ: “Likai mũmoae! Mũikaeke o na ũmwe woo avonoke!” Na kwoou asungi asu na makavuteni mamoaa na ũvyũ na mamekya nza na maendeea kũlika mamoaĩte nginya vala vandũ vatheu va nthĩnĩ* nyũmbanĩ ya Mbaali. 26 Na ĩndĩ maumaalya ituĩ sya ũthaithi sya nyũmba ya Mbaali na maivĩvya syonthe. 27 Na maananga kĩtuĩ kya ũthaithi kya Mbaali, na maomboa nyũmba ya Mbaali na mamĩtwʼĩkĩthya kyoo, na ũu nĩwʼo ĩilye nginya ũmũnthĩ.

28 Na ũu nĩwʼo Yeu waminie Mbaali nthĩ ya Isilaeli. 29 Ĩndĩ Yeu ndaaĩvathana na naĩ ila Yelovoamu mwana wa Nevati watumie Aisilaeli meka, ila syakonanĩtye na tũla tũsaũ twa thaavu twaĩ Mbetheli na Ndani. 30 Na kwoou Yeova eea Yeu atĩĩ: “Nũndũ nĩwĩkĩte nesa na nĩwĩkĩte kĩla kyaĩlĩte methonĩ makwa, nĩkwĩthĩwa nĩwĩanĩĩtye kĩla natwʼĩte ngoonĩ yakwa kwĩkana na nyũmba ya Aavu, nzyawa inya sya ana maku ikekalĩla kĩvĩla kya ũsumbĩ kya Isilaeli.” 31 Ĩndĩ Yeu ndaaĩsũvĩa akinyĩle Mĩaonĩ ya Yeova Ngai wa Isilaeli na ngoo yake yonthe. Ndaaĩvathana na naĩ ila Yelovoamu watumie Aisilaeli meka.

32 Na mĩthenyanĩ ĩsu Yeova ambĩĩa kũola nthĩ ya Isilaeli kĩsio ĩtina wa kĩsio. Na Aasaeli aendeea kũmavithũkĩa kĩla vandũ kĩsionĩ kya Isilaeli, 33 kuma Yolotani kwelekela wumĩlonĩ wa sua, nthĩ yonthe ya Ngileati, ĩla yaĩ ya Angati, Aleũveni, na Amanase, kuma Aloeli, ĩla yĩ vakuvĩ na Mwanda wa* Alinoni, nginya Ngileati na Mbasani.

34 Na ngewa ĩla ĩngĩ ya Yeu, maũndũ onthe ala weekie na vinya wake wʼonthe, yo ti mbandĩke ĩvukunĩ ya ngewa ya mavinda ma asumbĩ ma Isilaeli? 35 Na ĩndĩ Yeu akwʼa na mamũthika vamwe na aa-ũmae make ku Samalia; na mwana wake Yeoaasu atwʼĩka mũsumbĩ vandũ vake. 36 Ĩvinda* yonthe yĩla Yeu wasumbĩkie Isilaeli e Samalia yaĩ myaka 28.