Ĩvuku ya Kelĩ ya Asumbĩ

15 Mwakanĩ wa 27 wa Mũsumbĩ Yelovoamu* wa Isilaeli, Asalia* mwana wa Mũsumbĩ Amasia wa Yuta nĩwatwʼĩkie mũsumbĩ. 2 Aĩ na myaka 16 yĩla watwʼĩkie mũsumbĩ, na asumbĩkie myaka 52 e Yelusalemu. Inyia wake eetawa Yekolia na aĩ wa Yelusalemu. 3 Nĩwaendeeie kwĩka kĩla kyaĩlĩte methonĩ ma Yeova, o ta ĩthe wake Amasia. 4 Ĩndĩ kũndũ kũtũlu kũyaavetwa, na andũ no maendeeie kũthemba nthembo na kũtuma itoa ĩũlũ wa kũndũ kũu kũtũlu. 5 Yeova nĩwakũnie mũsumbĩ na mangũ, na ekalile e na mangũ nginya yĩla wakwie; ekalaa nyũmbanĩ ĩngĩ, nake Yothamu mwana wa mũsumbĩ nĩwe waũngamĩe nyũmba ya mũsumbĩ, aisilanyʼa andũ ma nthĩ ĩsu. 6 Na ngewa ĩla ĩngĩ ya Asalia, maũndũ onthe ala weekie, yo ti mbandĩke ĩvukunĩ ya ngewa ya mavinda ma asumbĩ ma Yuta? 7 Na ĩndĩ Asalia akwʼa na mamũthika vamwe na aa-ũmae make Ndũanĩ ya Ndaviti; na mwana wake Yothamu atwʼĩka mũsumbĩ vandũ vake.

8 Mwakanĩ wa 38 wa Mũsumbĩ Asalia wa Yuta, Nzekalia mwana wa Yelovoamu nĩwasumbĩkie Isilaeli e Samalia, na asumbĩkie myei thanthatũ. 9 Eekie kĩla kĩthũku methonĩ ma Yeova, o ta aa-ũmae make. Ndaatia naĩ ila Yelovoamu mwana wa Nevati watumie Aisilaeli meka. 10 Na ĩndĩ Salumu mwana wa Yavesi avangĩthya mũvango wa kũmũmina na amũaĩa Ivileamu. Ĩtina wa kũmũaa, nĩwatwʼĩkie mũsumbĩ vandũ vake. 11 Na ngewa ĩla ĩngĩ ya Nzekalia nĩmbandĩke ĩvukunĩ ya ngewa ya mavinda ma asumbĩ ma Isilaeli. 12 Ũndũ ũsu weanĩisye ndeto ya Yeova ĩla watavisye Yeu aimwĩa atĩĩ: “Nzyawa inya sya ana maku ikekalĩla kĩvĩla kya ũsumbĩ kya Isilaeli.” Na ũu nowʼo kweethĩiwe.

13 Salumu mwana wa Yavesi atwʼĩkie mũsumbĩ mwakanĩ wa 39 wa Mũsumbĩ Usia wa Yuta, na asumbĩkie mwei mũima e Samalia. 14 Na ĩndĩ Menaemu mwana wa Kati auma Tilisa na ambata Samalia na ooaĩa Salumu mwana wa Yavesi kũu Samalia. Ĩtina wa kũmũaa, nĩwatwʼĩkie mũsumbĩ vandũ vake. 15 Na ngewa ĩla ĩngĩ ya Salumu na mũvango ũla wavangĩthisye wa kũmina mũsumbĩ, nĩmbandĩke ĩvukunĩ ya ngewa ya mavinda ma asumbĩ ma Isilaeli. 16 Ĩvinda yĩu nĩwʼo Menaemu waumie Tilisa na aananga Tivisa na onthe ala maĩ nthĩnĩ wayo na kĩsio kyayo, nĩkwĩthĩwa mayaamũvingũĩa mũvĩa wa ndũa yoo. Nĩwamyanangie na atembũa mavu ma aka ala aito.

17 Mwakanĩ wa 39 wa Mũsumbĩ Asalia wa Yuta, Menaemu mwana wa Kati nĩwasumbĩkie Isilaeli, na asumbĩkie myaka ĩkũmi e Samalia. 18 Nĩwaendeeie kwĩka kĩla kĩthũku methonĩ ma Yeova. Ndaatia naĩ syonthe ila Yelovoamu mwana wa Nevati watumie Aisilaeli meka, mĩthenyanĩ yake yonthe. 19 Mũsumbĩ Vulu wa Asuli nĩwalikile nthĩ ĩsu, na Menaemu amũnenga Vulu talendi 1,000* sya vetha nĩ kana amũtetheesye kũlũlũmĩĩlya ũsumbĩ wake. 20 Na kwoou Menaemu oombanyʼa vetha ũsu katĩ wa Aisilaeli; eetisye vetha ũsu kuma kwa aũme ala athwii na ma ndaĩa. Anengie mũsumbĩ wa Asuli sekeli 50* sya vetha kuma kwa kĩla mũndũũme. Na ĩndĩ mũsumbĩ wa Asuli asyokethya na ndaaĩkala nthĩ ĩsu. 21 Na ngewa ĩla ĩngĩ ya Menaemu, maũndũ onthe ala weekie, yo ti mbandĩke ĩvukunĩ ya ngewa ya mavinda ma asumbĩ ma Isilaeli? 22 Na ĩndĩ Menaemu akwʼa na athikwa vamwe na aa-ũmae make; na mwana wake Vekaia atwʼĩka mũsumbĩ vandũ vake.

23 Mwakanĩ wa 50 wa Mũsumbĩ Asalia wa Yuta, Vekaia mwana wa Menaemu nĩwatwʼĩkie mũsumbĩ wa Isilaeli e Samalia, na asumbĩkie myaka ĩlĩ. 24 Nĩwaendeeie kwĩka kĩla kĩthũku methonĩ ma Yeova. Ndaatia naĩ ila Yelovoamu mwana wa Nevati watumie Aisilaeli meka. 25 Na ĩndĩ kavuteni wake Veka mwana wa Lemalia avangĩthya mũvango wa kũmũmina, na amũaĩa Samalia mwakonĩ mũtũlu wa nyũmba ya mũsumbĩ ũla waakĩtwe ta ngome, e vamwe na Alikovu na Alie. Aĩ na aũme 50 ma Ngileati; na ĩtina wa kũmoaa, atwʼĩka mũsumbĩ vandũ vake. 26 Na ngewa ĩla ĩngĩ ya Vekaia, maũndũ onthe ala weekie, nĩmbandĩke ĩvukunĩ ya ngewa ya mavinda ma asumbĩ ma Isilaeli.

27 Mwakanĩ wa 52 wa Mũsumbĩ Asalia wa Yuta, Veka mwana wa Lemalia nĩwasumbĩkie Isilaeli e Samalia, na asumbĩkie myaka 20. 28 Nĩwaendeeie kwĩka kĩla kĩthũku methonĩ ma Yeova, na ndaatia naĩ ila Yelovoamu mwana wa Nevati watumie Aisilaeli meka. 29 Mĩthenyanĩ ya Mũsumbĩ Veka wa Isilaeli, Mũsumbĩ Tikilathi-vileseli wa Asuli nĩwavithũkĩie na akwata Iyoni, Aveli-mbethi-maaka, Yanoa, Ketesi, Asoli, Ngileati, na Kalilii, nthĩ yonthe ya Navitali, na nĩwoosie andũ ma isio isu ta mũtavo na amatwaa Asuli. 30 Na ĩndĩ Osiea mwana wa Ela avangĩthya mũvango wa kũmina Veka mwana wa Lemalia, na amũkũna na amũaa; ĩtina wa ũu, nĩwatwʼĩkie mũsumbĩ vandũ vake mwakanĩ wa 20 wa Yothamu mwana wa Usia. 31 Na ngewa ĩla ĩngĩ ya Veka, maũndũ onthe ala weekie, nĩmbandĩke ĩvukunĩ ya ngewa ya mavinda ma asumbĩ ma Isilaeli.

32 Mwakanĩ wa kelĩ wa Veka mwana wa Lemalia mũsumbĩ wa Isilaeli, Yothamu mwana wa Mũsumbĩ Usia wa Yuta nĩwatwʼĩkie mũsumbĩ. 33 Aĩ na myaka 25 yĩla watwʼĩkie mũsumbĩ, na asumbĩkie myaka 16 e Yelusalemu. Inyia wake eetawa Yelusa na aĩ mwĩĩtu wa Nzatoki. 34 Aendeeie kwĩka kĩla kyaĩlĩte methonĩ ma Yeova, o ta Usia ĩthe wake. 35 Ĩndĩ kũndũ kũtũlu kũyaavetwa, na andũ no maendeeie kũthemba nthembo na kũtuma itoa ĩũlũ wa kũndũ kũu kũtũlu. Nĩwe waakie mũvĩa wa ngalĩko ya ĩũlũ wa nyũmba ya Yeova. 36 Na ngewa ĩla ĩngĩ ya Yothamu, maũndũ ala weekie, yo ti mbandĩke ĩvukunĩ ya ngewa ya mavinda ma asumbĩ ma Yuta? 37 Mĩthenyanĩ ĩsu Yeova nĩwambĩĩie kũtũma Lesini mũsumbĩ wa Silia na Veka mwana wa Lemalia mavithũkĩe Yuta. 38 Na ĩndĩ Yothamu akwʼa na athikwa vamwe na aa-ũmae make Ndũanĩ ya Ndaviti ũmae wake. Na mwana wake Aasu atwʼĩka mũsumbĩ vandũ vake.